An Chomhairle um Cheartas agus um Ghnóthaí Baile, 27-28/03/2017, 27-28 Márta 2017

Na príomhthorthaí

Ceartas - 28 Márta

An choireacht airgeadais agus maoiniú na sceimhlitheoireachta a chomhrac

Cuireadh na hairí ar an eolas faoin obair a rinneadh ar leibhéal na saineolaithe ar an rialachán maidir le haitheantas frithpháirteach a thabhairt d’orduithe calctha agus coigistíochta chomh maith leis an treoir maidir le sciúradh airgid a chomhrac tríd an dlí coiriúil. Is é an cuspóir foriomlán atá ann cur isteach ar na foinsí ioncaim atá in úsáid ag eagraíochtaí sceimhlitheoireachta, agus feabhas a chur ar sceimhlitheoirí a rianú trí ghluaiseachtaí airgeadais chomh maith.

“Tá sé mar thosaíocht ag AE agus ag Uachtaránacht Mhálta an choireacht airgeadais agus maoiniú na sceimhlitheoireachta a chomhrac. Leis an reachtaíocht seo, leathnófar an raon uirlisí atá ar fáil dúinn chun cuidiú le slándáil níos fearr a chur ar fáil do shaoránaigh na hEorpa”.

Owen Bonnici, an tAire Dlí agus Cirt, Cultúir agus Rialtais Áitiúil

Tá an obair ar an treoir maidir le sciúradh airgid a chomhrac ag teacht chun cinn go tapa agus tá súil ag uachtaránacht Mhálta go dtiocfaidh an Chomhairle ar a seasamh i Meitheamh 2017, sula gcuirfear tús leis an gcaibidlíocht le Parlaimint na hEorpa.

An margadh aonair digiteach

Thug na hairí dá n-aire an dul chun cinn a rinneadh ar an obair theicniúil a bhaineann leis an treoir maidir le hábhar digiteach a sholáthar. Dhírigh uachtaránacht Mhálta a cuid oibre ar chomhréiteach a aimsiú maidir leis na príomhchoincheapa agus na saincheisteanna lárnacha, amhail na rialacha maidir le comhréireacht agus leigheasanna.

Ós rud é go bhfuil dearcadh an-dearfach ag na Ballstáit, tá muinín ag an uachtaránacht go bhféadfar seasamh na Comhairle a ghlacadh faoi mhí an Mheithimh chun tús a chur le caibidlíocht leis an bParlaimint.

Dírítear leis an treoir maidir le hábhar digiteach ar conarthaí chun ábhar digiteach a sholáthar a rialáil agus chumhdófaí léi raon leathar táirgí agus seirbhísí amhail ceannach ceoil agus físeán ar líne nó na seirbhísí lena bhféadfar sonraí a roinnt (e.g. Facebook, YouTube, etc.).

Oifig an Ionchúisitheora Phoiblí Eorpaigh - OIPE

Roimh an gcruinniú a bhí ag an gComhairle, tháinig na hairí Dlí agus Cirt le chéile go neamhfhoirmiúil chun plé a dhéanamh ar chomhar níos fearr maidir le bunú OIPE. Chuir roinnt ballstát in iúl go raibh sé ar intinn acu an fógra a shíniú.

Leis an rialachán maidir le hOifig an Ionchúisitheora Phoiblí Eorpaigh, dírítear ar chabhair a thabhairt chun dul i ngleic le coireanna a dhéantar i gcoinne leasanna airgeadais an Aontais.

Gnóthaí Baile - 27 Márta

An Imirce

Bhreithnigh na hairí na forbairtí a rinneadh i réimse an bheartais imirce Dé Luain, agus díríodh ar dhearbhú Mhálta ón 3 Feabhra 2017 a chur chun feidhme. Thug siad aird faoi leith ar an gcaoi a bhféadfadh rannchuidiú ó na ballstáit cabhrú leis an gcur chun feidhme a dhéanamh níos éifeachtaí fós.

“Tá an clog ag breith orainn. Tá an baol ann go dtarlóidh tuilleadh tragóidí sa Mheánmhuir, agus mar sin ní mór dúinn gníomhú go tapa. Tá gach iarracht á dhéanamh chun na gníomhaíochtaí tosaíochta i nDearbhú Mhálta a chur chun feidhme. Idir an dá linn, tá sé ríthábhachtach go gcomhlíonfaidh na ballstáit a ngealltanais maidir le hathlonnú ón Iodáil agus ón nGréig agus go ndéanfar saineolaithe a imlonnú chuig na gníomhaireachtaí”.

Carmelo Abela, Aire Gnóthaí Baile agus Slándála Náisiúnta Mhálta

Thug na hairí dá n-aire freisin an fhaisnéis ón Uachtaránacht maidir le toradh an chruinnithe a bhí ag Oifigigh Shinsearacha faoin bPlean Comhpháirteach a tionóladh ar an 8-9 Feabhra 2017.

Le linn an lóin, phléigh na hairí gnéithe eile den bheartas imirce, agus dhírigh siad ar imscaradh acmhainní ó na ballstáit agus ar cheist an imlonnaithe chomh maith.

• Teacht ar réitigh i ndáil leis an mbrú imirce (cúlra faisnéise)

Filleadh

Ina theannta sin, phléigh na hairí an beartas um fhilleadh agus athligean isteach, bunaithe ar theachtaireacht ón gCoimisiún maidir le beartas um fhilleadh níos éifeachtaí agus ar mholadh ón gCoimisiún maidir le filleadh a dhéanamh níos éifeachtaí agus treoir 2008/115/CE á cur chun feidhme ("an treoir um fhilleadh"). Dhírigh idirphlé na Comhairle ar dhá ghné - an taobh seachtrach: comhar le tríú tíortha a fheabhsú maidir le hathligean isteach, agus an taobh inmheánach: a chinntiú go mbeidh na nósanna imeachta cearta agus na córais chearta ann chun filleadh a dhéanamh go héifeachtach. Leis an idirphlé, cuireadh ar chumas na n-airí treoir a chur ar fáil chun go ndéanfar obair bhreise theicniúil ar na saincheisteanna sin.

Athchóiriú ar an gcomhchóras Eorpach tearmainn

Thug an Chomhairle dá haire an obair leanúnach atá ar bun maidir leis an gcomhchóras Eorpach tearmainn agus maidir le athlonnú a athlonnú ar bhonn tuarascáil ar dhul chun cinn ón uachtaránacht. Leanfaidh an uachtaránacht de na hiarrachtaí atá á ndéanamh aici chun an obair a thabhairt chun cinn ar an bpacáiste tograí a oiread agus is féidir.

• Tuarascáil ar dhul chun cinn — athchóiriú ar an gcomhchóras Eorpach tearmainn agus ar athlonnú daoine

Calaois doiciméad taistil

Gan aon phlé, ghlac an Chomhairle conclúidí maidir leis an bplean gníomhaíochta chun an fhreagairt Eorpach do chalaois doiciméad taistil a neartú. Dírítear sna conclúidí ar an tábhacht a bhaineann le doiciméid phórúcháin a bheith níos sláine agus an ngá atá le bunachar FADO (Doiciméid Bhréagacha agus Doiciméid Bharántúla ar Líne) a nuachóiriú tríd an mbunús dlí a ghabhann leis a athrú.

Tá slándáil doiciméad taistil ar cheann de na bunghnéithe a bhaineann leis an gcomhrac i gcoinne na sceimhlitheoireachta agus na coireachta eagraithe. Leis an tslándáil sin, cuirtear feabhas freisin ar bhainistiú na himirce agus ar chosaint na dteorainneacha.

• Conclúidí ón gComhairle maidir leis an bplean gníomhaíochta ón gCoimisiún le haghaidh freagairt Eorpach ar chalaois doiciméad a neartú