An Chomhairle Iompair, Teileachumarsáide agus Fuinnimh (Iompar), 3 Meitheamh 2021

Na príomhthorthaí

Aerspás Eorpach Aonair 2+

Tháinig an Chomhairle ar chomhaontú faoina seasamh (‘cur chuige ginearálta’) i ndáil leis na tograí chun athbhreithniú a dhéanamh ar chreat reachtach an Aerspáis Eorpaigh Aonair. Is é is aidhm do thionscnamh an Aerspáis Eorpaigh Aonair tionscal na seirbhísí aerloingseoireachta a athchóiriú chun an bealach a n-eagraítear agus a mbainistítear aerspás na hEorpa a dhéanamh éifeachtúil.

Níl bainistiú an aerthráchta cosúil le haon ghníomhaíocht eacnamaíoch eile. Tá dlúthbhaint aige le sábháilteacht agus slándáil na saoránach, agus ní féidir a rialáil a fhágáil go hiomlán faoin margadh. Ós rud é go bhfuil tionchar ollmhór ag paindéim COVID-19 ar an eitlíocht, tá gá le hathchóiriú ar an earnáil a dhéanfar a anailísiú go cúramach, lena gcinnteofar simpliú agus a laghdóidh na costais mar bhonn lena téarnamh. Ina theannta sin, ní mór drochthionchar na heitlíochta ar an gcomhshaol a laghdú tríd an athchóiriú sin. Cuirtear an méid sin san áireamh ina iomláine sa seasamh ón gComhairle. Ag an am céanna, cinntítear leis go nglacfar bearta ar an leibhéal is éifeachtaí agus go n-urramófar cearta agus freagrachtaí na mBallstát maidir le sábháilteacht agus slándáil a n-aerspáis faoi Choinbhinsiún Chicago.

Pedro Nuno Santos, Aire Bonneagair agus Tithíochta na Portaingéile, agus cathaoirleach an chruinnithe

• Aerspás Eorpach Aonair (SES): A seasamh comhaontaithe ag an gComhairle maidir le hathchóiriú na bainistíochta aerthráchta (preaseisiúint, an 3 Meitheamh 2021)

Feithiclí fruilithe

Tháinig an Chomhairle ar chomhaontú faoi chur chuige ginearálta maidir le rialacha athbhreithnithe i ndáil le feithiclí fruilithe a úsáid chun earraí a iompar de bhóthar. Tá sé mar aidhm leis an togra creat rialála soiléir aonfhoirmeach a bhunú do mhargadh na bhfeithiclí fruilithe a bhaineann le hiompar earraí, agus na srianta ar úsáid feithiclí fruilithe san iompar idirnáisiúnta a mhaolú.

• Rialacha níos soiléire maidir le leoraithe fruilithe a úsáid – a seasamh comhaontaithe ag an gComhairle (preaseisiúint, an 3 Meitheamh 2021)

Deimhnithe tríú tíortha maidir le loingseoireacht intíre

Tháinig an Chomhairle ar chomhaontú freisin faoi chur chuige ginearálta i ndáil le treoir leasaitheach maidir leis na bearta idirthréimhseacha chun deimhnithe tríú tír sa loingseoireacht intíre a aithint. Cinnteofar leis an leasú leanúnachas agus deimhneacht dhlíthiúil do dhaoine aonair agus d’oibreoirí eacnamaíocha in earnáil na n-uiscebhealaí intíre.

• Loingseoireacht intíre: Cur chuige ginearálta formheasta ag an gComhairle chun go bhféadfaidh náisiúnaigh tríú tír obair leantach a dhéanamh (preaseisiúint, an 3 Meitheamh 2021)

An t-iarnród ar thús cadhnaíochta sa tsoghluaisteacht inbhuanaithe agus chliste

Ghlac an Chomhairle conclúidí maidir leis ‘An tIarnród a chur ar thús cadhnaíochta sa tsoghluaisteacht inbhuanaithe agus chliste’.

I bhfianaise an Chomhaontaithe Ghlais don Eoraip, na straitéise um an tsoghluaisteacht inbhuanaithe agus chliste, gan dearmad a dhéanamh ar Bhliain Eorpach na nIarnród, is tráthúil anois go ndéanfadh an Chomhairle meas ar na hiarrachtaí chun iarnróid a chur chun cinn, chomh maith le ráiteas polaitiúil uaillmhianach ar an iarnród. Tá an t-iarnród a chur ar thús cadhnaíochta ar cheann de spriocanna Uachtaránacht na Portaingéile agus is léiriú iomlán é ar chuspóirí beartais an Aontais. Tá sé an-tábhachtach dom, agus an t-iarnród á phlé againn i gcomhthéacs polaitiúil, go dtuigimid cé chomh tábhachtach atá sé do shoghluaisteacht níos glaise, agus an tionchar is féidir a bheith aige ar an gcomhtháthú sochaíoch agus críochach, ar thionsclú agus ar an bhforbairt eacnamaíoch. Pedro Nuno Santos, Aire Bonneagair agus Tithíochta na Portaingéile, agus cathaoirleach an chruinnithe

• An t-iarnród ar thús cadhnaíochta sa tsoghluaisteacht inbhuanaithe agus chliste - conclúidí glactha ag an gComhairle (preaseisiúint, an 3 Meitheamh 2021)

Soghluaisteacht inbhuanaithe chliste

Ghlac an Chomhairle conclúidí chomh maith maidir leis an straitéis um an tsoghluaisteacht inbhuanaithe agus chliste ón gCoimisiún. Mhalartaigh na hairí ansin faoin mbealach chun cinn i ndáil leis an straitéis sin, agus gnéithe nach bhfuil mar chuid de na conclúidí ón gComhairle san áireamh. Cabhróidh an plé, chomh maith leis na conclúidí, leis an gCoimisiún an obair a dhéanfaidh sé amach anseo sa réimse seo a spriocdhíriú.

Táim an-sásta leis an gcomhdhearcadh ar ar tháinig na hAirí Iompair maidir leis an téacs uaillmhianach réamhbhreathnaitheach seo. Leis na conclúidí sin, tá teachtaireacht pholaitiúil shoiléir á cur in iúl againn faoinár dtiomantas do chóras iompair agus soghluaisteachta a bheidh níos inbhuanaithe, níos cuimsithí, níos cliste, níos sábháilte agus níos athléimní. Tá an t-aistriú sin ríthábhachtach agus cuideoidh sé go mór lenár gcuspóir Aontas aeráidneodrach a bhaint amach faoi 2050, i gcomhréir le Comhaontú Pháras. Beidh an t-iompar mar dhlúthchuid d'aghaidh a thabhairt ar na saincheisteanna aeráide s'againne anois. Pedro Nuno Santos, Aire Bonneagair agus Tithíochta na Portaingéile, agus cathaoirleach an chruinnithe

• Straitéis um an tSoghluaisteacht Inbhuanaithe agus Chliste – conclúidí glactha ag an gComhairle (preaseisiúint, an 3 Meitheamh 2021)

Aon ghnó eile

Chuir an Uachtaránacht na hairí ar an eolas faoin staid mar atá i ndáil leis an togra i dtaca le rialacha an Aontais maidir le muirearú bóithre a athbhreithniú (Treoir Eurovignette) chun astaíochtaí gás ceaptha teasa a laghdú, iompar de bhóthar a dhéanamh níos glaise agus chun cur le maoiniú an bhonneagair bóithre. Tá sé mar aidhm ag Uachtaránacht na Portaingéile teacht ar chomhaontú polaitiúil le Parlaimint na hEorpa maidir leis an gcomhad tosaíochta sin roimh dheireadh a téarma.

Phléigh an Chomhairle gnó eile a tharraing toscaireacht na Liotuáine anuas maidir le tuirlingt éigeantach an aerárthaigh shibhialtaigh i Mionsc an 23 Bealtaine. Thacaigh na hairí le gnó eile na Liotuáine agus leis na conclúidí ón gComhairle Eorpach an 24 Bealtaine. Dhearbhaigh siad a thábhachtaí atá sé seasamh gualainn ar ghualainn a chéile chun sábháilteacht agus slándáil shaoránaigh an Aontais a chosaint.

Mar mhír dheireanach tar éis go leor gnóthaí eile, chuir uachtaránacht inteachta na Slóivéinea clár oibre don dara leath de 2021 i láthair.