Cosaint tomhaltóirí: glaoch a chur, téacs a sheoladh nó scimeáil ar an ngréasán

Fánaíocht

Agus iad ag taisteal lasmuigh dá dtír dhúchais, cuireann rialacha fánaíochta an Aontais ar chumas mhuintir na hEorpa glaonna a dhéanamh, teachtaireachtaí téacs a sheoladh agus scimeáil ar an ngréasán gan aon fhormhuirir.

Ón 15 Meitheamh 2017 i leith, tá tomhaltóirí in ann taisteal ar fud 27 mBallstát an Aontais, chomh maith leis an Íoslainn, Lichtinstéin agus an Iorua, agus fanann siad nasctha díreach mar a dhéanann siad sa bhaile.

Chuaigh an Mholdóiv agus an Úcráin isteach sa limistéar ‘Fánaíocht ar tháillí baile’ an 1 Eanáir 2026. Chuir an tAontas tús freisin leis an gcaibidlíocht i mí an Mheithimh 2026 chun é a leathnú chuig comhpháirtithe na mBalcán Thiar.

Beartas maidir le húsáid chóir

Níl aon srianta méide ar ghuthghlaonna ná ar theachtaireachtaí téacs agus tú ag taisteal thar lear.

Féadfaidh oibreoirí líonraí soghluaiste, áfach, teorainn a chur le sonraí a úsáidtear le linn fánaíochta i gcás conarthaí le seirbhísí sonraí neamhtheoranta nó le seirbhísí sonraí ar chostas an-íseal. Sa chás sin, ceanglaítear ar an oibreoir fógra a thabhairt faoin teorainn roimh ré, agus foláireamh a thabhairt nuair a shroichtear 80 %.

Cuireadh an beartas sonraí sin maidir le ‘húsáid chóir’ i bhfeidhm chun cur ar chumas oibreoirí seirbhísí fánaíochta a sholáthar gan iallach a bheith orthu praghsanna baile a mhéadú, agus chun buanfhánaíocht a chosc.

Dearadh rialacha fánaíochta le haghaidh turais ócáideacha. Más rud é, thar thréimhse 4 mhí, go sáraíonn tomhaltas seirbhísí fánaíochta i dtír eile AE úsáid intíre, féadfaidh oibreoirí líonraí soghluaiste soiléiriú a iarraidh agus formhuirir a bhfuil uasteorainn leo a chur i bhfeidhm.

D’fhormheas an tAontas an síneadh ar scéim ‘fánaíocht ar tháillí baile’ go dtí 2032.

Ba cheart d’úsáideoirí fón póca faisnéis faoi phraghsáil agus coinníollacha fánaíochta a fháil freisin, chomh maith le faisnéis faoi uimhreacha seirbhíse éigeandála, agus iad ag trasnú teorann chuig tír eile de chuid an Aontais nó LEE.

Níl glaonna ná teachtaireachtaí téacs a fhaightear agus iad thar lear faoi réir aon chostas breise ach oiread.

• Fánaíocht: fón póca a úsáid san Aontas (an Coimisiún Eorpach)

An chumarsáid laistigh den Aontas

Cinntíonn rialacha teileachumarsáide an Aontais go n-íocann muintir na hEorpa táillí teoranta as cumarsáid, glaonna agus téacsanna móibíleacha agus líne thalún laistigh den Aontas ón mbaile go tír eile san Aontas.

Tá muirir uasta socraithe ag an Aontas ar ghlaonna agus ar theachtaireachtaí téacs.

Sular cuireadh na huasteorainneacha sin i bhfeidhm i mí na Bealtaine 2019, bhí meánphraghas caighdeánach glao fosaithe nó soghluaiste laistigh den Aontas thart ar thrí oiread phraghas caighdeánach glao intíre.

Tá feidhm ag na huasteorainneacha freisin maidir le glaonna agus SMSanna chuig an Íoslainn, Lichtinstéin agus an Iorua.

Rochtain ar ábhar ar líne thar lear

Mar gheall ar an méadú atá ag teacht ar úsáid gléasanna iniompartha mar shampla táibléid agus fóin chliste, tá sé níos éasca do thomhaltóirí rochtain a fháil ar sheirbhísí ábhair ar líne beag beann ar an áit ina bhfuil siad.

Le rialacha an Aontais maidir le hinaistritheacht ábhair, cuirtear ar a gcumas do thomhaltóirí rochtain a fháil ar a seirbhísí ábhair ar líne ar íocadh astu ar fud an Aontais agus iad ag taisteal nó ag fanacht go sealadach lasmuigh dá dtír dhúchais, gan aon chostas breise.

San áireamh anseo, tá síntiúis íoctha, mar shampla, síntiús teilifís ar líne (scannáin agus sraitheanna), ríomhleabhair, cluichí, sruthú ceoil agus craoltaí spóirt.

Scannáin

Sruthú ceoil

Sraitheanna

Cluichí

Ríomhleabhair

Craoltaí spóirt

Ceanglaítear ar sholáthraithe rochtain ar a n-ábhar a chur ar fáil faoi na coinníollacha céanna atá sa tír bhaile - i.e. rochtain ar na scannáin chéanna, ar na gnéithe céanna, ar an líon céanna gléasanna agus don líon céanna úsáideoirí.

Chun aon mhí-úsáid a sheachaint, tá cead ag soláthraithe seirbhíse Ballstát cónaithe na síntiúsóirí a sheiceáil, i gcomhréir le rialacha an Aontais maidir le cosaint sonraí.

Is féidir rochtain a fháil ar ábhar a fhaightear trí shíntiúis saor in aisce de réir rialacha an Aontais, ach braitheann sé ar rogha an tsoláthraí seirbhíse. Áirítear leis sin, mar shampla, craoltóirí poiblí.

Féach freisin

• A formheas tugtha ag an gComhairle le síneadh ar an bhfánaíocht gan táillí breise (preaseisiúint, an 4 Aibreán 2022)
• Nascacht níos fearr: athchóiriú teileachumarsáide glactha ag an Aontas (preaseisiúint, an 4 Nollaig 2018)
• Inaistritheacht seirbhísí digiteacha ar fud an Aontais Eorpaigh: rialacha nua glactha ag an gComhairle (preaseisiúint, an 8 Meitheamh 2017)