Kunsill Ambjent, 17 ta' Diċembru 2024

Riżultati ewlenin

Telf ta' pellets tal-plastik

Il-ministri tal-ambjent tal-UE laħqu approċċ ġenerali għal regolament dwar il-prevenzjoni tat-telf ta' pellets tal-plastik – il-materja prima industrijali użata biex isiru prodotti tal-plastik – fl-ambjent.

Ir-regoli l-ġodda ser jgħinu biex jittejjeb l-immaniġġjar tal-pellets tal-plastik tul il-katina tal-provvista kollha u t-trasport tagħhom fl-UE. Dan jista' jnaqqas it-telf ta' pellets tal-plastik fl-ambjent sa 74%.

It-telf ta' pellets tal-plastik fl-ambjent huwa t-tielet l-akbar sors tar-rilaxxi kollha mhux intenzjonati tal-mikroplastiċi. Ir-regoli l-ġodda, l-ewwel tat-tip tagħhom fl-UE, ser jgħinu lill-kumpaniji jimminimizzaw it-telf tal-pellets tal-plastik, filwaqt li jikkontribwixxu għall-ġlieda kontra t-tniġġis mill-mikroplastiċi, li ma jaf l-ebda fruntiera jew konfini.

Anikó Raisz, Ministru tal-Istat Ungeriż għall-Affarijiet Ambjentali u l-Ekonomija Ċirkolari

Filwaqt li jibni fuq il-proposta tal-Kummissjoni, l-approċċ ġenerali tal-Kunsill isib bilanċ bejn l-introduzzjoni ta' miżuri ambizzjużi u effettivi biex jimminimizzaw it-telf tal-pellets tal-plastik u l-evitar ta' piż amministrattiv bla bżonn. It-test jiżgura wkoll kundizzjonijiet ekwi bejn it-trasportaturi tal-UE u dawk mhux tal-UE u jintroduċi obbligi għall-bastimenti tal-baħar li jittrasportaw pellets tal-plastik.

L-approċċ ġenerali maqbul illum jifformalizza l-pożizzjoni għan-negozjati tal-Kunsill. In-negozjati mal-Parlament Ewropew dwar il-forma finali tar-regolament huma mistennija li jibdew kmieni fl-2025.

• Tniġġis żero: Il-Kunsill jaqbel dwar il-pożizzjoni tiegħu fuq it-tnaqqis tat-telf ta' pellets tal-plastik, inkluż fit-trasport marittimu (stqarrija għall-istampa, 17 ta' Diċembru 2024)
• Ara s-sessjoni pubblika

Vetturi li m'għadhomx jintużaw

Abbażi ta' nota mħejjija mill-presidenza Ungeriża, il-ministri kellhom dibattitu ta' orjentazzjoni dwar ir-regolament propost dwar ir-rekwiżiti taċ-ċirkolarità għad-disinn tal-vetturi u dwar il-ġestjoni ta' vetturi li m'għadhomx jintużaw. Ir-regolament għandu l-għan li jtejjeb is-sostenibbiltà u ċ-ċirkolarità fis-settur awtomobilistiku, billi jiżgura li d-disinn ta' vetturi ġodda jagħmilha aktar faċli li jiġu riċiklati u użati mill-ġdid il-partijiet u l-komponenti tagħhom.

Id-diskussjonijiet urew li sar progress importanti dwar diversi suġġetti fil-livell tekniku, inkluż il-kamp ta' applikazzjoni tar-regolament, l-obbligi relatati tal-produtturi u l-awtoritajiet, kif ukoll id-dispożizzjonijiet finali dwar ir-rieżami u l-emendi meħtieġa għal-leġiżlazzjoni relatata.

Matul id-dibattitu ta' orjentazzjoni, il-ministri esprimew appoġġ wiesa' għaż-żieda tal-Artikolu 192(1) TFUE (protezzjoni tal-ambjent) bħala bażi legali minbarra l-Artikolu 114 TFUE (funzjonament tas-suq intern), u għall-estensjoni ta' ċerti obbligi għal vetturi heavy-duty u muturi.

Il-ministri kellhom ukoll dibattitu importanti dwar il-mira għal kontenut minimu riċiklat għall-plastik. Għadd ta' stati membri setgħu jappoġġaw ir-rata ta' 25%, kif propost mill-Kummissjoni, filwaqt li oħrajn talbu rata ferm aktar baxxa u wissew li din tista' pereżempju twassal għal distorsjonijiet tas-suq f'każ ta' nuqqas ta' materjal riċiklat. Il-Kunsill ser ikompli d-diskussjonijiet sabiex isib kompromess aċċettabbli dwar din il-kwistjoni.

Il-ministri ddiskutew mira possibbli għal kontenut minimu riċiklat għall-azzar. Għadd sinifikanti ta' Stati Membri indikaw li l-ewwel ikun meħtieġ studju ta' fattibbiltà, li għandu jitwettaq mill-Kummissjoni, biex jiġu evalwati aħjar l-implikazzjonijiet tal-istabbiliment ta' din il-mira.

Fl-aħħar nett, il-ministri kellhom skambju ta' fehmiet dwar il-partijiet u l-komponenti tal-vetturi li għandhom jitneħħew qabel it-tqattigħ.

• Dibattitu ta' orjentazzjoni dwar ir-regolament dwar il-vetturi li m'għadhomx jintużaw – nota tal-presidenza
• Ara s-sessjoni pubblika

Mira klimatika għall-2040

Il-ministri għall-ambjent kellhom skambju ta' fehmiet dwar il-komunikazzjoni tal-Kummissjoni dwar il-mira klimatika tal-UE għall-2040, ippubblikata fis-6 ta' Frar 2024. Il-komunikazzjoni tirrakkomanda mira ta' tnaqqis ta' 90% fl-emissjonijiet netti ta' gassijiet serra sal-2040 meta mqabbla mal-1990.

Il-ministri ffukaw id-diskussjoni tagħhom fuq il-prerekwiżiti għal tranżizzjoni b'suċċess lejn il-mira klimatika tal-UE għall-2040. Rigward l-implimentazzjoni sħiħa tal-qafas maqbul għall-2030, il-ministri qablu dwar il-ħtieġa għal simplifikazzjoni sabiex jitnaqqas il-piż amministrattiv.

Huma enfasizzaw ukoll li oqfsa regolatorji u ta' investiment stabbli u prevedibbli huma kruċjali biex tiġi żgurata l-kompetittività. L-allinjament tal-politiki tad-dekarbonizzazzjoni u industrijali u l-kisba ta' prezzijiet tal-enerġija aktar kompetittivi huma wkoll elementi kruċjali f'dan ir-rigward.

Għal tranżizzjoni ġusta u soċjalment aċċettabbli, il-ministri rrikonoxxew ir-rwol importanti tal-involviment kemm taċ-ċittadini kif ukoll tan-negozji, kif ukoll it-taħriġ mill-ġdid u t-titjib tal-ħiliet tal-ħaddiema.

• Skambju ta' fehmiet dwar il-mira klimatika tal-Ewropa għall-2040 – nota tal-presidenza
• Komunikazzjoni dwar il-mira klimatika tal-UE għall-2040
• Newtralità klimatika (informazzjoni ġenerali)
• Tibdil fil-klima: x'qed tagħmel l-UE (informazzjoni ġenerali)
• Ara s-sessjoni pubblika

Rappurtar dwar laqgħat internazzjonali

Il-presidenza Ungeriża, flimkien mal-Kummissjoni, infurmat lill-ministri dwar il-laqgħat internazzjonali reċenti ewlenin u l-eżiti tagħhom:

• COP29 dwar it-tibdil fil-klima (UNFCCC) (Baku, l-Ażerbajġan, 11-22 ta' Novembru 2024)

  Din ir-riżorsa bħalissa hi disponibbli biss bil-lingwa jew il-lingwi li ġejjin:

  EN
• Konferenza tan-NU dwar it-tibdil fil-klima: l-UE tappella għal sforzi biex ikun jista' jintlaħaq l-għan ta' 1.5°C (stqarrija għall-istampa, 14 ta' Ottubru 2024)
• COP16 dwar id-diversità bijoloġika (CBD) (Cali, il-Kolombja, 21 ta' Ottubru - 1 ta' Novembru 2024)

  Din ir-riżorsa bħalissa hi disponibbli biss bil-lingwa jew il-lingwi li ġejjin:

  EN
• Konvenzjoni tan-NU dwar il-bijodiversità: l-UE tafferma mill-ġdid il-wegħda globali li tipproteġi terz tal-pjaneta sal-2030 (stqarrija għall-istampa, 14 ta' Ottubru 2024)
• COP16 dwar il-ġlieda kontra d-deżertifikazzjoni (UNCCD COP16) (Riyadh, l-Arabja Sawdija, 2-13 ta' Diċembru 2024)

  Din ir-riżorsa bħalissa hi disponibbli biss bil-lingwa jew il-lingwi li ġejjin:

  EN
• Il-ġlieda kontra d-deżertifikazzjoni fl-UE: il-Kunsill iħeġġeġ azzjoni għal futur sostenibbli (stqarrija għall-istampa, 14 ta' Ottubru 2024)
• Il-ħames sessjoni tal-Kumitat Intergovernattiv ta' Negozjar dwar trattat globali dwar il-plastik (INC-5) (Busan, il-Korea t'Isfel, 25 ta' Novembru - 1 ta' Diċembru 2024)

  Din ir-riżorsa bħalissa hi disponibbli biss bil-lingwa jew il-lingwi li ġejjin:

  EN
• Ara s-sessjoni pubblika

Affarijiet oħra

Il-ministri rċevew aġġornament mill-Kummissjoni dwar il-progress tal-missjonijiet tal-UE ta' Orizzont Ewropa bħala għodda għall-azzjoni lokali dwar il-klima.

• Aġġornament dwar il-Progress tal-Missjonijiet tal-UE ta' Orizzont Ewropa bħala għodda għall-azzjoni lokali dwar il-klima ‒ Informazzjoni mill-Kummissjoni

  Din ir-riżorsa bħalissa hi disponibbli biss bil-lingwa jew il-lingwi li ġejjin:

  EN
• Ara s-sessjoni pubblika

Il-ministri semgħu mill-Iżvezja, appoġġata mid-Danimarka, il-Finlandja u l-Lussemburgu, dwar kwistjonijiet ewlenin fir-reviżjoni mmirata tar-regolament REACH.

• Kwistjonijiet ewlenin fir-reviżjoni mmirata tar-Regolament REACH ‒ Informazzjoni mill-Iżvezja, appoġġata mid-Danimarka, il-Finlandja u l-Lussemburgu

  Din ir-riżorsa bħalissa hi disponibbli biss bil-lingwa jew il-lingwi li ġejjin:

  EN
• Ara s-sessjoni pubblika

Iċ-Ċekja, flimkien mad-Danimarka, Franza u s-Slovakkja, qajmu punt dwar is-swieq online u n-nuqqas ta' konformità mal-obbligi tar-responsabbiltà estiża tal-produttur. L-Awstrija indirizzat ukoll il-kwistjoni ta' swieq online kbar ħafna u n-nuqqas ta' konformità tagħhom mar-responsabbiltà estiża tal-produttur.

• Swieq online - nuqqas ta' konformità mal-obbligi tal-EPR u kif għandu jiġi indirizzat ‒ Informazzjoni miċ-Ċekja, id-Danimarka, Franza u s-Slovakkja

  Din ir-riżorsa bħalissa hi disponibbli biss bil-lingwa jew il-lingwi li ġejjin:

  EN
• Pjattaformi online kbar ħafna (VLOPs) ‒ nuqqas ta' konformità mar-responsabbiltà estiża tal-produttur u kif għandu jiġi indirizzat ‒ Informazzjoni mill-Awstrija

  Din ir-riżorsa bħalissa hi disponibbli biss bil-lingwa jew il-lingwi li ġejjin:

  EN
• Ara s-sessjoni pubblika

Franza infurmat lill-ministri dwar il-ħtieġa li jiġi evitat li l-manifatturi tal-karozzi jiddgħajfu permezz ta' penali, filwaqt li jinżammu l-miri u l-ambizzjoni tar-regolament dwar l-istandards tas-CO₂ għall-karozzi u l-vannijiet.

• Il-ħtieġa li jiġi evitat li l-manifatturi tal-karozzi jiddgħajfu permezz ta' penali, filwaqt li jinżammu l-miri u l-ambizzjoni tar-regolament dwar l-istandards tas-CO2 għall-karozzi u l-vannijiet ‒ Informazzjoni minn Franza
• Ara s-sessjoni pubblika

Fl-aħħar nett, il-Presidenza Pollakka ppreżentat il-programm ambjentali tagħha bħala l-presidenza li jmiss.

Dibattitu waqt l-ikla ta' nofsinhar

Waqt l-ikla ta' nofsinhar, il-ministri kellhom diskussjoni informali mal-Kummissarji Jessica Roswall u Wopke Hoekstra dwar il-prijoritajiet tal-Kummissjoni għall-2024-2029 fil-qasam tal-politika dwar l-ambjent u l-klima.

Il-Kunsill adotta wkoll, mingħajr diskussjoni, il-punti li jidhru fil-lista ta' punti A mhux leġiżlattivi.