"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Bil-permess tiegħek, ser nużaw cookies biex nipproduċu data aggregata anonima dwar in-navigazzjoni u l-imġiba tal-viżitaturi fuq is-sit web tagħna. Ser nużaw din id-data biex intejbu l-esperjenza tiegħek tan-navigazzjoni fuq is-sit web tagħna.
Il-ministri għall-ambjent tal-UE ltaqgħu fil-Lussemburgu u laħqu approċċ ġenerali dwar id-direttiva dwar l-asserzjonijiet ekoloġiċi, id-direttiva dwar il-monitoraġġ tal-ħamrija u d-direttiva qafas riveduta dwar l-iskart. Huma adottaw formalment il-liġi dwar ir-restawr tan-natura.
L-UE ħatfet opportunità unika biex treġġa' lura t-telf tal-bijodiversità u biex tiftaħ din it-tieqa li qed tingħalaq malajr, filwaqt li tiżgura futur abitabbli għall-ġenerazzjonijiet li ġejjin.
Illum qbilna wkoll dwar tliet direttivi ewlenin tal-UE għall-ekonomija ċirkolari u s-saħħa tal-ħamrija fl-UE: urejna l-impenn tagħna għal tranżizzjoni ekoloġika, billi qed nipproteġu lill-konsumaturi tagħna mill-greenwashing, qed nimmiraw l-iskart tal-ikel u tat-tessuti u qed nipproteġu l-ħamrija tagħna mid-degradazzjoni.
L-UE qed timxi 'l quddiem b'mod kostanti bl-objettivi ambjentali u klimatiċi tagħha u bil-mira li tinkiseb in-newtralità klimatika fl-UE sal-2050.
Alain Maron, Ministru għat-Tranżizzjoni Klimatika, l-Ambjent, l-Enerġija u d-Demokrazija Parteċipattiva tal-Gvern tar-Reġjun ta' Brussell-Kapitali
Liġi dwar ir-restawr tan-natura
Illum, il-Kunsill adotta formalment ir-regolament dwar ir-restawr tan-natura - l-ewwel wieħed tat-tip tiegħu. Din il-liġi għandha l-għan li tistabbilixxi miżuri ta' rkupru li jkopru mill-inqas 20% taż-żoni tal-art u tal-baħar tal-UE sal-2030, u l-ekosistemi kollha li jeħtieġu restawr sal-2050.
Tistabbilixxi miri u obbligi speċifiċi u legalment vinkolanti għar-restawr tan-natura fl-ekosistemi terrestri, tal-baħar, tal-ilma ħelu, tal-foresti, agrikoli u urbani. Miżuri speċifiċi jinkludu l-protezzjoni tal-pollinaturi u tal-friefet tal-artijiet bil-ħaxix, il-protezzjoni tal-ispazji ħodor urbani u t-tħawwil ta' mill-inqas tliet biljun siġra addizzjonali sal-2030 fil-livell tal-UE.
Il-ministri għall-ambjent tal-UE laħqu approċċ ġenerali dwar proposta biex tiġi riveduta d-direttiva qafas dwar l-iskart, li tiffoka speċifikament fuq is-setturi tat-tessuti u tal-ikel. L-għan ġenerali huwa li jitnaqqsu l-impatt ambjentali u dak klimatiku assoċjati mal-ġenerazzjoni u l-ġestjoni tal-iskart tat-tessuti u tal-ikel. Għandha wkoll l-għan li trawwem iċ-ċirkolarità fis-settur tat-tessuti.
Ir-regoli l-ġodda jintroduċu skemi obbligatorji u armonizzati ta' responsabbiltà estiża tal-produttur (EPR) għall-produtturi tat-tessuti fl-istati membri kollha tal-UE. L-approċċ ġenerali jistabbilixxi wkoll miri legalment vinkolanti għat-tnaqqis tal-iskart tal-ikel għall-istati membri, li għandhom jintlaħqu sal-2030: 10% fl-ipproċessar u l-manifattura, u 30% (per capita) fil-bejgħ bl-imnut, fir-ristoranti, fis-servizzi tal-ikel u fid-djar.
Din ir-riżorsa bħalissa hi disponibbli biss bil-lingwa jew il-lingwi li ġejjin:
Ħela ta' ikel: prevenzjoni, użu mill-ġdid u riċiklaġġ (Infografika)
Asserzjonijiet ambjentali
Il-ministri laħqu approċċ ġenerali dwar id-direttiva proposta dwar l-asserzjonijiet ekoloġiċi.
Id-direttiva għandha l-għan li tipproteġi lill-konsumaturi mill-greenwashing: tistabbilixxi rekwiżiti minimi madwar l-UE fir-rigward tas-sostanzjar, il-komunikazzjoni u l-verifika ta' asserzjonijiet ambjentali espliċiti (bil-miktub jew orali) u tikketti ambjentali.
L-għan huwa li titħaffef it-tranżizzjoni ekoloġika lejn ekonomija ċirkolari u nadifa fl-UE, u b'hekk tikkontribwixxi għall-objettiv ġenerali tan-newtralità klimatika tal-UE sal-2050.
Din ir-riżorsa bħalissa hi disponibbli biss bil-lingwa jew il-lingwi li ġejjin:
Il-ministri għall-ambjent tal-UE laħqu approċċ ġenerali dwar id-direttiva dwar il-monitoraġġ u r-reżiljenza tal-ħamrija. L-għan tad-direttiva huwa li l-UE titqiegħed fit-triq lejn ħamrija f'saħħitha sal-2050.
Biex jintlaħaq dan l-għan ta' aspirazzjoni, l-approċċ ġenerali li ntlaħaq illum jistabbilixxi miżuri biex il-monitoraġġ tas-saħħa tal-ħamrija jsir obbligatorju, jipprovdi prinċipji gwida għall-ġestjoni sostenibbli tal-ħamrija, u jindirizza sitwazzjonijiet fejn il-kontaminazzjoni tal-ħamrija toħloq riskji inaċċettabbli għas-saħħa u għall-ambjent.
Il-ministri approvaw konklużjonijiet fir-rigward tar-rieżami ta' nofs it-terminu tat-tmien programm ta' azzjoni ambjentali, li jwitti t-triq 'il quddiem għal tranżizzjoni ekoloġika, ġusta u inklużiva għal Ewropa sostenibbli.
Dan is-sett ta' konklużjonijiet jissottolinja li l-implimentazzjoni tal-Patt Ekoloġiku Ewropew ser tkun kruċjali biex jintlaħqu l-objettivi prijoritarji tat-tranżizzjoni ekoloġika. Il-konklużjonijiet jindirizzaw, fost affarijiet oħra, ir-reżiljenza għat-tibdil fil-klima u t-tħejjija għar-riskji, il-mitigazzjoni tat-tibdil fil-klima, il-protezzjoni tal-bijodiversità, it-tniġġis żero u l-ekonomija ċirkolari.
L-istati membri enfasizzaw ukoll il-ħtieġa għal aċċettazzjoni soċjali u tranżizzjoni ġusta. Dan is-sett ta' konklużjonijiet ser jiggwida lill-Kummissjoni dwar l-aġġustament tal-miżuri biex jintlaħqu b'mod effettiv l-objettivi tal-2030.
Il-ministri għall-ambjent tal-UE ħadu sehem ukoll f'dibattitu ta' orjentazzjoni dwar il-komunikazzjoni tal-Kummissjoni dwar mira klimatika tal-UE għall-2040.
Il-ministri kellhom skambju ta' fehmiet dwar il-mira klimatika għall-2040, b'kont meħud tal-kontribut tagħha għall-kompetittività tal-Unjoni, filwaqt li tiġi żgurata tranżizzjoni ġusta. Huma qasmu wkoll il-fehmiet tagħhom dwar il-qafas ta' wara l-2030, inkluż il-potenzjal tal-miżuri min-naħa tad-domanda u l-ekonomija ċirkolari.
Waqt l-ikla ta' nofsinhar, il-ministri kellhom skambju ta' fehmiet dwar il-komunikazzjoni tal-Kummissjoni dwar il-ġestjoni tar-riskji klimatiċi.
Il-ministri rrikonoxxew li huwa meħtieġ rispons politiku sistemiku fl-oqsma ta' politika rilevanti kollha. Huma esprimew il-fehmiet tagħhom dwar modi ġodda possibbli ta' kooperazzjoni fil-livelli differenti ta' governanza, inkluż fil-livell tal-UE, biex jiġu indirizzati r-riskji klimatiċi. Huma qasmu wkoll mal-ministri l-oħra kwalunkwe miżura li daħħlu fis-seħħ biex jintegraw il-ġestjoni tar-riskju klimatiku fl-ippjanar baġitarju tagħhom.
Taħt punti mhux għad-diskussjoni, il-Kunsill adotta deċiżjoni biex l-UE tikkonkludi l-Ftehim taħt il-Konvenzjoni tan-Nazzjonijiet Uniti dwar il-Liġi tal-Baħar dwar il-konservazzjoni u l-użu sostenibbli tal-bijodiversità marina fiż-żoni lil hinn mill-ġuriżdizzjoni nazzjonali (il-ftehim BBNJ), magħruf ukoll bħala t-Trattat dwar l-Ibħra Internazzjonali.
Il-ftehim għandu l-għan li jipproteġi l-oċean tad-dinja u l-amministrazzjoni tiegħu f'isem il-ġenerazzjonijiet preżenti u futuri f'żoni lil hinn mill-ġuriżdizzjoni nazzjonali. Dawk iż-żoni jammontaw għal madwar żewġ terzi tal-wiċċ tal-oċean u 95% tal-volum tiegħu.
Il-ministri semgħu mill-presidenza Belġjana dwar il-ħidma leġiżlattiva li għaddejja fir-rigward tar-regolament propost dwar it-tnaqqis tat-tniġġis tal-mikroplastik mit-telf ta' pellets tal-plastik u r-regolament propost dwar vetturi li ma għadhomx jintużaw.
Il-presidenza u l-Kummissjoni infurmaw lill-ministri dwar l-eżitu tar-raba' sessjoni tal-Kumitat Intergovernattiv ta' Negozjar biex jiġi żviluppat strument internazzjonali legalment vinkolanti dwar it-tniġġis tal-plastik, inkluż fl-ambjent tal-baħar (INC-4).
Il-Polonja, iċ-Ċekja u l-Ungerija pprovdew (f'sessjoni mhux pubblika) informazzjoni dwar it-termini u l-kundizzjonijiet tal-irkant tal-2024 tal-Fond għall-Innovazzjoni tal-2024 għall-fjuwils rinnovabbli ta' oriġini mhux bijoloġika (RFNBO) tal-idroġenu (it-tieni ċiklu tal-irkant H2).
Id-delegazzjoni Ungeriża ppreżentat il-programm ambjentali tagħha bħala l-presidenza li jmiss tal-Kunsill tal-Unjoni Ewropea.
Il-Kunsill adotta wkoll, mingħajr diskussjoni, il-punti fuq il-listi ta' punti A.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
