Kunsill Affarijiet Barranin, 16-17/11/2015, 16 u 17 ta' Novembru 2015

Riżultati ewlenin

Affarijiet Barranin, 16 ta' Novembru

''L-isfidi fis-Sirja, l-isfidi llum fi Franza, fl-Ewropa, huma sfidi komuni: is-sigurtà hemm tfisser is-sigurtà hawn.  Ma jrid ikun hemm l-ebda konfużjoni bejn il-kwistjoni tal-migrazzjoni u r-refuġjati, u t-theddid terroristiku, għax dawk li qed ifittxu l-protezzjoni tal-UE qed jaħarbu mill-istess theddid li qed inħabbtu wiċċna miegħu.'' Federica Mogherini, Rappreżentant Għoli għall-Affarijiet Barranin u l-Politika ta' Sigurtà

Fil-bidu nett tal-laqgħa, ir-Rappreżentant Għoli rreferiet għall-attakki ta’ Pariġi, li seħħew wara attakki terroristiċi f’Bejrut, kontra persuni ċivili Russi fuq l-ajruplan fl-Eġittu, u kuljum fl-Iraq u fis-Sirja.

Il-ministri osservaw minuta silenzju f'12:00 b'tifkira tal-vittmi.

Sirja

Il-ministri kellhom diskussjoni dwar is-Sirja, flimkien mal-Mibgħut Speċjali tan-NU Staffan De Mistura. Huma ddiskutew l-aħħar żviluppi li jkopru l-isforzi diplomatiċi reċenti, inklużi d-diskussjonijiet fi Vjenna fit-30 ta’ Ottubru u l-14 ta’ Novembru.

Ir-Rappreżentant Għoli ssottolinjat li s-sejbien ta' soluzzjoni politika għall-kunflitt Sirjan joffri l-aħjar kondizzjonijiet biex jintrebaħ id-Daesh. Hija rrappurtat li s-sens ta’ urġenza, speċjalment għall-Ewropa, inħass u ġie mifhum b’mod ċar ħafna minn dawk kollha madwar il-mejda fi Vjenna. Hija ssottolinjat ukoll li ġiet stabbilita skeda ta’ żmien ambizzjuża.

L-UE tinsab lesta biex tkompli tikkontribwixxi: 

• fil-livell umanitarju, permezz ta’ proġetti li għaddejjin - l-UE hija l-kontributur ewlieni ta' għajnuna umanitarja b’rispons għall-kriżi Sirjana.
• fil-livell politiku, b'mod partikolari billi taħdem biex iġġib il-grupp tal-oppożizzjoni madwar il-mejda kif ukoll biex tinbeda t-transizzjoni politika fis-Sirja.

Migrazzjoni

Il-Kunsill iddiskuta l-migrazzjoni, is-segwitu għall-konferenza ta’ livell għoli fuq ir-rotta tal-Balkani tal-Punent fit-8 ta’ Ottubru u s-summit tal-Belt Valletta dwar il-migrazzjoni li sar fil-11 u t-12 ta’ Novembru. Il-ministri ddiskutew segwitu għad-deċiżjonijiet li diġà ttieħdu fuq ir-rotta tal-Mediterran ċentrali u fuq ir-rotta tal-Balkani tal-Punent. Huma laqgħu d-diskussjonijiet miftuħa mas-sħab Afrikani fil-Belt Valletta. Rigward ir-rotta tal-Balkani tal-Punent u tal-lvant huma ddiskutew il-kooperazzjoni mat-Turkija, il-Libanu u l-Ġordan, li għandha ħafna dimensjonijiet, lil hinn sew mill-kwistjoni tar-refuġjati u l-immaniġġar ta' flussi tar-refuġjati u tal-fruntieri.

• It-tiftix ta’ soluzzjonijiet għal pressjonijiet migratorji (informazzjoni ġenerali)

Proċess ta' Paċi fil-Lvant Nofsani 

Il-Kunsill iddiskuta s-sitwazzjoni fil-Lvant Nofsani, u ffoka fuq il-proċess ta’ paċi, fid-dawl ta’ vjolenza dejjem tikber b’mod partikolari f’Ġerusalemm tal-Lvant, ix-Xatt tal-Punent u Gaża. L-UE tinsab lesta li tkompli l-impenn tagħha biex tiffaċilita l-qawmien mill-ġdid ta’ proċess politiku kredibbli. Ir-Rappreżentant Għoli ser tkompli taħdem maż-żewġ partijiet, kif ukoll mas-sħab reġjonali u internazzjonali, kemm fil-Kwartett kif ukoll permezz tal-kuntatti bilaterali tagħha.

Affarijiet Barranin - Difiża, 17 ta' Novembru

''Franza ġiet attakkata. L-Ewropa kollha kemm hi ġiet attakkata. Illum Franza fittxet l-għajnuna u l-assistenza tal-Ewropa kollha. U llum l-Ewropa, maqgħuda, wieġbet iva.'' Federica Mogherini, Rappreżentant Għoli tal-UE għall-Affarijiet Barranin u l-Politika ta' Sigurtà

 Il-ministri għad-difiża ddiskutew ir-reazzjoni għall-attakki ta’ Pariġi tat-13 ta’ Novembru 2015.  Il-President Franċiż François Hollande invoka l-artikolu 42§7 tat-Trattat tal-Unjoni Ewropea, u talab l-għajnuna u l-assistenza bilaterali mill-istati membri l-oħra tal-UE. Il-ministri esprimew l-appoġġ unanimu u sħiħ tagħhom għal Franza u li jinsabu lesti biex jipprovdu l-għajnuna u l-assistenza kollha meħtieġa.

Bini ta' kapaċità għas-sigurtà u l-iżvilupp

Il-ministri ddiskutew l-isforzi biex jgħinu lil pajjiżi sħab jipprevjenu u jimmaniġġaw il-kriżijiet. Ingħaqad magħhom is-Segretarju Ġenerali tan-NATO Jens Stoltenberg li ssottolinja li filwaqt li kemm l-UE kif ukoll in-NATO kienu qed jaħdmu ħafna għall-bini ta' kapaċità, jeħtieġ li jsir iktar.  L-istati membri kollha appoġġaw din il-fehma: Li jiżdiedu l-kapaċitajiet fil-pajjiżi sħab huwa l-aħjar mod biex tinħoloq l-istabbiltà u titnaqqas il-ħtieġa għal intervent ta' maniġġar ta’ kriżijiet. 

Ir-Rappreżentant Għoli kkonkludiet id-dibattitu u indikat li l-UE ser tindirizza dawn il-kwistjonijiet fix-xhur li ġejjin billi:

• tibda timplimenta proġetti pilota f’xi pajjiżi sħab, inklużi l-Mali, ir-Repubblika Ċentru-Afrikana u s-Somalja;
• taħdem fuq l-istrumenti finanzjarji differenti possibbli, inkluż fil-Faċilità għall-Paċi fl-Afrika u strument dedikat futur possibbli.

Operazzjonijiet tal-PSDK

 Il-ministri, flimkien mas-Segretarju Ġenerali tan-NATO Jens Stoltenberg, iddiskutew l-operazzjonijiet, b’mod partikolari:

• EUNAVFOR Med Operation Sophia, l-operazzjoni militari tal-UE fin-Nofsinhar Ċentrali tal-Mediterran;
• EUMAM RCA, il-missjoni konsultattiva militari tal-UE fir-Repubblika Ċentru-Afrikana.

Il-ministri ġew infurmati li l-operazzjoni Sophia s’issa rriżultat fit-trasferiment ta’ 42 traffikant tal-bnedmin lill-awtoritajiet Taljani u salvat il-ħajja ta’ madwar 5400 migrant. 

Il-Kunsill adotta konklużjonijiet dwar ir-Repubblika Ċentru-Afrikana.

• Konklużjonijiet tal-Kunsill dwar ir-Repubblika Ċentru-Afrikana, 17 ta' Novembru 2015

• Riżultati tal-laqgħa tal-Kunsill