"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Bil-permess tiegħek, ser nużaw cookies biex nipproduċu data aggregata anonima dwar in-navigazzjoni u l-imġiba tal-viżitaturi fuq is-sit web tagħna. Ser nużaw din id-data biex intejbu l-esperjenza tiegħek tan-navigazzjoni fuq is-sit web tagħna.
Il-gwerra ta' aggressjoni tar-Russja kontra l-Ukrajna
Il-Kunsill iddiskuta l-gwerra ta' aggressjoni tar-Russja kontra l-Ukrajna, wara skambju ta' fehmiet informali mal-Ministru għall-Affarijiet Barranin tal-Ukrajna Andrii Sybiha permezz ta' vidjokonferenza.
Id-diskussjoni ministerjali li segwiet iffokat fuq l-impatt tal-kriżi tal-Lvant Nofsani fuq l-Ukrajna u l-gwerra ta' aggressjoni tar-Russja, b'mod partikolari r-riperkussjonijiet militari u dawk mil-lat ta' enerġija tagħha.
Il-ministri kienu ċari li l-Ukrajna tibqa' l-ogħla prijorità ta' sigurtà tal-Ewropa, u l-attenzjoni għall-Ukrajna mhux ser titħalla tiddgħajjef. L-istess droni li qed jolqtu lil Kiev qed jolqtu lill-istati tal-Golf, allura peress li l-Ukrajna għandha l-aħjar difiża kontra d-droni, iddiskutejna wkoll fil-qosor kif nistgħu ngħaqqdu dawn l-affarijiet flimkien.
Kaja Kallas, Rappreżentant Għoli għall-Affarijiet Barranin u l-Politika ta' Sigurtà u President tal-Kunsill Affarijiet Barranin
Il-Kunsill iddiskuta wkoll l-appoġġ għall-Ukrajna, inkluż permezz tas-Self ta' Appoġġ għall-Ukrajna ta' €90 biljun għas-snin 2026-2027, u modi biex tkompli tiżdied il-pressjoni fuq ir-Russja.
L-Ewropa ser iżżomm is-sanzjonijiet u ser tkompli titbiegħed mill-fjuwils fossili Russi. Jekk irridu li din il-gwerra tintemm, jeħtieġ li Moska jkollha inqas flus għall-gwerra, mhux aktar. Iż-żieda fil-pressjoni fuq il-flotta mistura tar-Russja hija waħda mill-aħjar għodod li għandna.
Kaja Kallas, Rappreżentant Għoli għall-Affarijiet Barranin u l-Politika ta' Sigurtà u President tal-Kunsill Affarijiet Barranin
Il-Kunsill elenka disa' individwi responsabbli għall-massakru ta' Bucha ta' Frar u Marzu 2022.
Adotta wkoll miżuri restrittivi addizzjonali kontra erba' individwi responsabbli għall-Manipulazzjoni tal-Informazzjoni u l-Interferenza minn Barranin (FIMI) kontra l-UE u l-istati membri u s-sħab tagħha, u approva konklużjonijiet dwar l-avvanz tal-kapaċità tal-UE fil-ġlieda kontra t-theddid ibridu.
Il-ministri għall-affarijiet barranin tal-UE ddiskutew is-sitwazzjoni fil-Lvant Nofsani fid-dawl tal-aħħar żviluppi fir-rigward tal-gwerra fl-Iran u l-effetti tagħha fir-reġjun kollu.
Iran
Il-ministri esprimew tħassib serju dwar l-eskalazzjoni kontinwa u r-riskju ta' kunflitt reġjonali usa'. Enfasizzaw li l-uniku mod sostenibbli biex noħorġu mill-kriżi huwa l-waqfien tal-ostilitajiet, il-waqfien mill-ġlied u r-ritorn għad-diplomazija.
Il-ministri ddiskutew ukoll l-implikazzjonijiet usa' tal-konflitt, inkluż ir-riskji għall-istabbiltà reġjonali, ir-rotot kummerċjali dinjija, is-swieq finanzjarji u l-prezzijiet tal-enerġija. Ġie espress tħassib partikolari dwar is-sigurtà tar-rotot marittimi u l-ħtieġa li tiġi ppreservata l-libertà tan-navigazzjoni, inkluż fil-Baħar l-Aħmar u fl-Istrett ta' Hormuz.
L-issoktar tat-trasportazzjoni ta' fertilizzanti, ikel u enerġija mill-Istrett ta' Hormuz huwa prijorità urġenti. [...] L-UE diġà għandha operazzjonijiet navali fis-seħħ. Għandna ASPIDES li taqdi rwol ewlieni fis-salvagwardja tal-libertà tan-navigazzjoni. Fid-diskussjonijiet tagħna kien hemm xewqa ċara li din l-operazzjoni tissaħħaħ.
Kaja Kallas, Rappreżentant Għoli għall-Affarijiet Barranin u l-Politika ta' Sigurtà u President tal-Kunsill Affarijiet Barranin
Il-protezzjoni taċ-ċittadini tal-UE fir-reġjun ġiet enfasizzata bħala prijorità ewlenija. Il-ministri nnotaw il-koordinazzjoni li għaddejja bejn l-istati membri u l-użu ta' strumenti tal-UE biex jiġu ffaċilitati r-ripatrijazzjonijiet u l-assistenza konsulari.
Din mhijiex il-gwerra tal-Ewropa, iżda l-interessi tal-Ewropa huma direttament fil-periklu. Hekk kif din il-gwerra qed tespandi, il-prijorità tal-UE tibqa' l-protezzjoni taċ-ċittadini tagħna.
Kaja Kallas, Rappreżentant Għoli għall-Affarijiet Barranin u l-Politika ta' Sigurtà u President tal-Kunsill Affarijiet Barranin
Il-ministri enfasizzaw l-importanza li tiġi appoġġata s-soċjetà ċivili Iranjana u li jitkompla l-involviment tas-sħab reġjonali, inkluż il-pajjiżi tar-reġjun tal-Golf, biex jiġu appoġġati l-isforzi ta' tnaqqis tat-tensjoni u s-sigurtà reġjonali.
Il-Kunsill iddeċieda li jimponi miżuri restrittivi fuq 16-il persuna u tliet entitajiet addizzjonali responsabbli għal ksur serju tad-drittijiet tal-bniedem fl-Iran.
Il-ministri indirizzaw is-sitwazzjoni fil-Libanu, filwaqt li esprimew tħassib dwar ir-riskju li l-pajjiż jiġi inkluż aktar fil-konflitt u l-konsegwenzi umanitarji tal-ostilitajiet li għaddejjin u l-ispostament fuq skala kbira.
Il-ministri enfasizzaw il-ħtieġa li titnaqqas it-tensjoni u appellaw għad-diżarm tal-Hezbollah, filwaqt li ħeġġew lil Iżrael iżomm lura u jevita azzjonijiet li jistgħu jiddestabbilizzaw aktar lill-pajjiż. Huma enfasizzaw ukoll l-importanza li jitkompla l-appoġġ għall-istabbiltà tal-Libanu u l-istituzzjonijiet tal-istat.
L-UE ser tipprovdi €100 miljun f'għajnuna umanitarja lil-Libanu. Inkomplu nappoġġaw ukoll lill-Forzi Armati Libaniżi fid-diżarm tal-Hezbollah.
Kaja Kallas, Rappreżentant Għoli għall-Affarijiet Barranin u l-Politika ta' Sigurtà u President tal-Kunsill Affarijiet Barranin
Gaża u x-Xatt tal-Punent
Il-ministri enfasizzaw li l-eskalazzjoni li għaddejja fir-reġjun m'għandhiex tiddevja l-attenzjoni mis-sitwazzjoni f'Gaża u x-Xatt tal-Punent. Esprimew tħassib serju dwar il-kundizzjonijiet umanitarji li qed jiddeterjoraw f'Gaża u l-fluss insuffiċjenti ta' għajnuna umanitarja, filwaqt li enfasizzaw il-ħtieġa li jiġi żgurat aċċess umanitarju sħiħ, sikur u mingħajr xkiel f'konformità mad-dritt umanitarju internazzjonali. Tennew ukoll il-ħtieġa li jsir progress fl-implimentazzjoni tal-Pjan Komprensiv biex jintemm il-Kunflitt ta' Gaża, f'konformità mar-Riżoluzzjoni 2803 tal-Kunsill tas-Sigurtà tan-NU.
Il-ministri esprimew ukoll tħassib dwar il-vjolenza li qed tiżdied fix-Xatt tal-Punent, inkluż attakki minn abitanti vjolenti tal-insedjamenti, u ssottolinjaw il-ħtieġa li jiġu protetti ċ-ċivili, tiġi żgurata r-responsabbiltà u tiġi evitata eskalazzjoni ulterjuri. Tennew l-importanza li tiġi ppreservata l-vijabbiltà tas-soluzzjoni ta' żewġ stati u li jiġu appoġġati l-isforzi ta' riforma mill-Awtorità Palestinjana.
L-UE ser tkompli tinsisti għal aċċess umanitarju mtejjeb, tnaqqis tat-tensjoni u wkoll appoġġ għar-riformi tal-awtoritajiet Palestinjani.
Kaja Kallas, Rappreżentant Għoli għall-Affarijiet Barranin u l-Politika ta' Sigurtà u President tal-Kunsill Affarijiet Barranin
Il-ministri qasmu l-fehmiet tagħhom dwar ir-relazzjonijiet tal-UE mal-Viċinat tan-Nofsinhar, u evalwaw l-implimentazzjoni tal-Patt għall-Mediterran imniedi f'Ottubru 2025.
Il-ministri enfasizzaw l-importanza li tissaħħaħ is-sħubija tal-UE mal-pajjiżi fil-Viċinat tan-Nofsinhar biex jiġu promossi l-istabbiltà, l-iżvilupp ekonomiku u l-prosperità fil-Mediterran kollu. Enfasizzaw il-ħtieġa li jsir progress fl-implimentazzjoni tal-Patt u li jinkisbu riżultati tanġibbli permezz ta' inizjattivi u proġetti konkreti.
Qabel il-Kunsill Affarijiet Barranin, sar skambju informali waqt il-kolazzjon dwar l-istrateġija Ewropea ta' sigurtà.
Huwa ċar li l-ambjent tas-sigurtà qed jinbidel malajr, u ma nistgħux nirreaġixxu b'summits ta' emerġenza biss. Neħtieġu politika fit-tul.
Kaja Kallas, Rappreżentant Għoli, Rappreżentant Għoli għall-Affarijiet Barranin u l-Politika ta' Sigurtà u President tal-Kunsill Affarijiet Barranin
Waqt l-ikla ta' nofsinhar, il-Ministru għall-Affarijiet Esterni tal-Indja, Subrahmanyam Jaishankar, ingħaqad mal-ministri għal diskussjoni informali dwar ir-relazzjonijiet bilaterali u l-iżvilupp internazzjonali.
Punti oħrajn
Matul il-laqgħa, il-Ġermanja u Franza qajmu s-sitwazzjoni fil-Georgia, fid-dawl tal-adozzjoni reċenti tal-pakkett leġiżlattiv dwar il-finanzjament barrani u l-attività politika.
L-Estonja, il-Latvja u l-Litwanja infurmaw lill-ministri dwar l-allegazzjonijiet tar-Russja kontra l-istati Baltiċi ta' nuqqas ta' konformità mal-Konvenzjoni internazzjonali dwar l-eliminazzjoni tal-forom kollha ta' diskriminazzjoni razzjali (CERD).
L-Italja u Malta infurmaw lill-ministri dwar it-theddida marittima u ambjentali li qed teskala fil-Mediterran li tinvolvi t-trasportatur Russu tal-LNG Arctic Metagaz.
Deċiżjonijiet oħra
Il-Kunsill adotta deċiżjoni li tappoġġa lill-pajjiżi Afrikani fit-tisħiħ tal-kapaċitajiet tagħhom għall-azzjoni kontra l-mini, u b'hekk tikkontribwixxi għall-għan ta' Afrika ħielsa mill-mini.
Il-Kunsill adotta miżuri restrittivi kontra tliet entitajiet u żewġ individwi responsabbli għal attakki ċibernetiċi mwettqa kontra l-istati membri tal-UE u s-sħab tal-UE.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
