Kunsill Affarijiet Barranin, 21 ta' April 2026

Riżultati ewlenin

Il-gwerra ta' aggressjoni tar-Russja kontra l-Ukrajna

Illum il-Kunsill iddiskuta l-gwerra ta' aggressjoni tar-Russja kontra l-Ukrajna, wara intervent b'vidjokonferenza mill-Ministru għall-Affarijiet Barranin tal-Ukrajna, Andrii Sybiha, li ta stampa ġenerali tas-sitwazzjoni fuq il-post u tal-ħtiġijiet l-aktar urġenti tal-Ukrajna.

Wara, id-diskussjoni ministerjali ffukat fuq aktar appoġġ għall-Ukrajna, anke permezz tas-Self ta' Appoġġ għall-Ukrajna b'valur ta' €90 biljun għas-snin 2026-2027, u fuq modi kif tista' tiżdied aktar il-pressjoni fuq ir-Russja b'mod komprensiv, fost oħrajn permezz tal-20 pakkett ta' sanzjonijiet u aktar miżuri restrittivi.

Fi tmiem il-laqgħa, ir-Rappreżentant Għoli ħabbret li hemm appoġġ ġenerali biex isir progress fir-raba' pilastru tal-garanziji tas-sigurtà Ewropej, b'fokus fuq ir-riforma tas-settur tad-difiża, appoġġ ċibernetiku/ibridu msaħħaħ, u l-isforzi għat-tneħħija tal-mini, kif ukoll appoġġ għall-veterani tal-gwerra.

Barra minn hekk, il-Kunsill adotta miżuri restrittivi fil-konfront ta' żewġ entitajiet oħra responsabbli għall-attivitajiet ibridi persistenti tar-Russja, b'mod partikolari l-propaganda u d-diżinformazzjoni, u ddeċieda wkoll li jestendi sad-29 ta' April 2027 il-miżuri restrittivi tal-UE fil-konfront ta' dawk responsabbli għal azzjonijiet li għandhom l-għan li jiddestabbilizzaw, idgħajfu jew jheddu s-sovranità u l-indipendenza tar-Repubblika tal-Moldova.

• Theddid ibridu Russu: l-UE telenka żewġ entitajiet minħabba attivitajiet ta' manipulazzjoni tal-informazzjoni (stqarrija għall-istampa, 21 ta' April 2026)
• Ir-Repubblika tal-Moldova: il-miżuri restrittivi tal-UE estiżi sa April 2027 (stqarrija għall-istampa, 21 ta' April 2026)
• Il-gwerra tar-Russja kontra l-Ukrajna (informazzjoni ġenerali)
• Appoġġ militari tal-UE għall-Ukrajna (informazzjoni ġenerali)
• Solidarjetà tal-UE mal-Ukrajna (informazzjoni ġenerali)

Is-sitwazzjoni fil-Lvant Nofsani

Il-ministri għall-affarijiet barranin tal-UE ddiskutew is-sitwazzjoni fil-Lvant Nofsani fil-kuntest tal-aħħar żviluppi fir-reġjun.

Libanu

Is-sessjoni bdiet bi skambju informali mal-President tal-Kunsill tal-Ministri tar-Repubblika Libaniża, Nawaf Salam, li ffoka fuq is-sitwazzjoni fuq il-post u l-ftehim dwar il-waqfien tal-ostilitajiet ma' Iżrael.

Il-ministri enfasizzaw il-konsegwenzi umanitarji tal-kunflitt u saħqu fuq l-importanza li jingħata aktar appoġġ lil-Libanu.

Iran

Il-ministri tal-UE mbagħad iffukaw fuq is-sitwazzjoni fl-Iran u fil-Golf. Ir-Rappreżentant Għoli infurmat lill-ministri għall-affarijiet barranin dwar iż-żjara reċenti tagħha fir-reġjun u enfasizzat l-importanza li ssir ħidma mill-qrib mas-sħab reġjonali biex jiġu żgurati s-sigurtà u d-dieskalazzjoni.

Il-ministri saħqu fuq l-importanza li jitkomplew l-isforzi diplomatiċi biex jitnaqqsu t-tensjonijiet u tinstab soluzzjoni dejjiema għall-kunflitt.

Fi tmiem il-laqgħa, ir-Rappreżentant Għoli ħabbret li hemm qbil politiku biex jiġi estiż ir-reġim ta' sanzjonijiet tal-UE biex jiddaħħlu fil-mira wkoll dawk responsabbli għall-ksur tal-libertà ta' navigazzjoni.

• Dikjarazzjoni mir-Rappreżentant Għoli f'isem l-UE dwar il-waqfien mill-ġlied maqbul mill-Istati Uniti u l-Iran (9 ta' April 2026)
• Kronoloġija - l-Iran u l-Lvant Nofsani (informazzjoni ġenerali)
• Sanzjonijiet tal-UE kontra l-Iran (informazzjoni ġenerali)

Iżrael u l-Palestina

Il-Kunsill iddiskuta Iżrael u l-Palestina.

Ir-Rappreżentant Għoli infurmat lill-ministri dwar l-eżitu tal-laqgħat tal-Alleanza Globali għall-implimentazzjoni tas-soluzzjoni ta' żewġ stati u tal-Kumitat ta' Kollegament Ad Hoc, li hija kkopresediet il-jum ta' qabel, u reġgħet affermat l-importanza tal-implimentazzjoni effettiva tal-pjan ta' paċi f'konformità mar-Riżoluzzjoni 2803 tal-Kunsill tas-Sigurtà tan-NU.

Rigward ir-relazzjonijiet ma' Iżrael, ir-Rappreżentant Għoli ħabbret li ma kienx hemm unanimità dwar il-proposta mressqa minn xi stati membri għal sospensjoni sħiħa jew parzjali tal-Ftehim ta' Assoċjazzjoni UE-Iżrael.

Tqajmu wkoll is-sitwazzjoni fix-Xatt tal-Punent u l-involviment tal-UE permezz ta' missjonijiet tal-PSDK.

• Il-pożizzjoni tal-UE dwar is-sitwazzjoni fil-Lvant Nofsani (informazzjoni ġenerali)
• Appoġġ umanitarju tal-UE għall-Palestinjani (informazzjoni ġenerali)

Sirja

Bi tħejjija għall-ewwel djalogu politiku bejn l-UE u s-Sirja ppjanat għall-11 ta' Mejju, il-Kunsill iddiskuta l-aħjar modi kif jista' jingħata appoġġ lit-tranżizzjoni fil-pajjiż.

• Konklużjonijiet tal-Kunsill Ewropew, 20 ta' Marzu 2025
• Is-Sirja: il-Kunsill japprova konklużjonijiet (stqarrija għall-istampa, 23 ta' Ġunju 2025)
• Sirja (informazzjoni ġenerali)

Kawkasu tan-Nofsinhar

Il-ministri kellhom skambju ta' fehmiet dwar ir-relazzjonijiet tal-UE mal-Kawkasu tan-Nofsinhar, b'enfasi fuq l-iżviluppi fil-proċess ta' paċi bejn l-Armenja u l-Ażerbajġan. F'dan il-kuntest, diversi ministri enfasizzaw li l-progress f'dak il-proċess huwa verament opportunità għar-reġjun, u li l-UE qed iżżid l-appoġġ tagħha għalih b'mod sinifikanti.

Il-Kunsill Affarijiet Barranin iddiskuta wkoll ir-relazzjonijiet bejn l-UE u l-Armenja qabel l-ewwel Summit li ser isir fl-4 u l-5 ta' Mejju f'Yerevan, u approva r-riżultati tanġibbli tas-summit. Illum il-Kunsill iddeċieda li jistabbilixxi l-Missjoni ta' Sħubija tal-UE fl-Armenja (EUPM Armenia) skont il-Politika ta' Sigurtà u ta' Difiża Komuni (PSDK), flimkien mal-Missjoni tal-UE fl-Armenja (EUMA) li għaddejja bħalissa, bħala kontribut ieħor għall-isforzi biex tissaħħaħ ir-reżiljenza demokratika tal-Armenja u l-kapaċità tagħha li timmaniġġa l-kriżijiet.

• Armenja: l-UE tistabbilixxi missjoni ċivili ġdida biex tikkontribwixxi għat-tisħiħ tar-reżiljenza tal-pajjiż (stqarrija għall-istampa, 21 ta' April 2026)
• L-ewwel summit bejn l-UE u l-Armenja ser isir fl-4 u l-5 ta' Mejju 2026 (stqarrija għall-istampa, 26 ta' Marzu 2026)
• Armenja (informazzjoni ġenerali)

B'kont meħud tal-eżitu taż-żjara tal-President tal-Kunsill Ewropew f'Baku fil-11 ta' Marzu, il-ministri ddiskutew ir-relazzjonijiet tal-UE mal-Ażerbajġan u l-parametri għal involviment mill-ġdid possibbli tal-UE mal-pajjiż.

• Dikjarazzjoni konġunta għall-istampa mill-President tal-Kunsill Ewropew, António Costa, u l-President tar-Repubblika tal-Ażerbajġan, Ilham Aliyev (11 ta' Marzu 2026)
• Ażerbajġan (informazzjoni ġenerali)

Fl-aħħar nett, il-Kunsill ħa kont tas-sitwazzjoni fil-Georgia u ddiskuta l-pressjoni tal-UE b'reazzjoni għar-rigress demokratiku li għaddej bħalissa. Fi tmiem il-laqgħa, ir-Rappreżentant Għoli enfasizzat li ma kienx hemm sinjali ta' titjib, u li l-ministri kellhom messaġġ espliċitu li l-gvern Georgjan jeħtieġlu jieħu direzzjoni oħra.

• Georgia (informazzjoni ġenerali)

Sudan

Filwaqt li mmarka aktar minn tliet snin minn meta l-kunflitt beda fil-15 ta' April 2023, il-Kunsill ħa kont tal-gwerra fis-Sudan, fejn għadu għaddej il-ġlied bejn il-Forzi Armati Sudaniżi (SAF) u l-Forzi ta' Appoġġ Rapidu (RSF) u l-milizzji affiljati rispettivi tagħhom fost każijiet ta' ksur bla preċedent tad-drittijiet tal-bniedem, sitwazzjoni umanitarja katastrofika, u l-akbar kriżi ta' spostament fid-dinja.

Il-Kunsill iddiskuta s-Sudan wara t-Tielet Konferenza Internazzjonali dwar is-Sudan f'Berlin li saret fil-15 ta' April 2026. L-avveniment kien ospitat b'mod konġunt mill-UE flimkien ma' Franza, il-Ġermanja, ir-Renju Unit, l-Istati Uniti u l-Unjoni Afrikana.

L-UE għamlet dikjarazzjoni dwar il-kwistjoni fejn ikkonfermat l-impenn tagħha għall-għaqda, is-sovranità u l-integrità territorjali tas-Sudan, u ċaħdet bil-qawwa kwalunkwe tentattiv unilaterali biex tiġi stabbilita governanza parallela li tirriżulta f'riskju li l-pajjiż jinqasam.

• Sudan: Dikjarazzjoni mir-Rappreżentant Għoli f'isem l-Unjoni Ewropea li timmarka tliet snin minn meta bdiet il-gwerra (stqarrija għall-istampa, 21 ta' April 2026)
• Komunikat tal-Koospitanti - Konferenza Internazzjonali dwar is-Sudan f'Berlin (15 ta' April 2026 - Uffiċċju Federali għall-Affarijiet Barranin)
• L-UE u l-Istati Membri jwiegħdu aktar minn €812 miljun b'reazzjoni għall-kriżi fis-Sudan - Operazzjonijiet Ewropej ta' Protezzjoni Ċivili u Għajnuna Umanitarja (15 ta' April 2026 – Kummissjoni Ewropea)
• Sudan (informazzjoni ġenerali)

Punti u deċiżjonijiet oħra

Matul il-laqgħa, il-Latvja qajmet il-kwistjoni tal-parteċipazzjoni tar-Russja fil-Biennale ta' Venezja 2026.

Il-Litwanja infurmat lill-Kunsill bid-deċiżjoni reċenti tal-Qorti Suprema tal-Belarussja li tiddeżinja lill-Università Ewropea tal-Istudji Umanistiċi (EHU) bħala "organizzazzjoni estremista".

Fl-aħħar nett, il-ministru Belġjan informa lill-Kunsill dwar il-missjoni tiegħu fil-Balkani tal-Punent.

Illum il-Kunsill approva konklużjonijiet dwar "Id-diplomazija tal-UE fil-qasam tal-enerġija u l-klima – it-tisħiħ tas-sovranità u t-tmexxija 'l quddiem tat-tranżizzjoni globali lejn enerġija nadifa".

• Id-diplomazija tal-UE fil-qasam tal-enerġija u l-klima: il-Kunsill japprova konklużjonijiet (stqarrija għall-istampa, 21 ta' April 2026)