Kunsill Trasport, Telekomunikazzjoni u Enerġija, 14 ta' Marzu 2014

Il-Kunsill jilħaq qbil dwar il-pożizzjoni tiegħu fuq il-proposti ewlenin għall-ferroviji

Imlaqqgħin fl-14 ta' Marzu, il-ministri għat-trasport adottaw il-pożizzjoni tal-Kunsill dwar il-proposta li tagħti kompiti ġodda lill-Aġenzija Ferrovjarja Ewropea u dwar il-proposta ta' Shift2Rail

Il-ministri tal-UE għat-trasport li ltaqgħu fil-Kunsill adottaw approċċ ġenerali dwar proposta li tiddefinixxi kompiti ġodda għall-Aġenzija Ferrovjarja Ewropea (ERA). Il-bidliet proposti jirriflettu r-rwol akbar tal-ERA fiċ-ċertifikazzjoni tas-sikurezza u l-awtorizzazzjoni tal-vetturi. Fost affarijiet oħra, l-ambitu estiż tal-ERA għandu jgħin biex inaqqas l-ispejjeż amministrattivi u jitħaffu l-proċeduri amministrattivi għal impriżi ferrovjarji fl-UE.

Il-bidliet huma parti mill-pilastru tekniku tar-raba' pakkett ferrovjarju, ippubblikat mill-Kummissjoni f'Jannar 2013. Il-pilastru tekniku għandu l-għan li jneħħi ostakoli amministrattivi u tekniċi li fadal għall-ħolqien ta' suq ferrovjarju Ewropew uniku.

Il-ministri adottaw ukoll il-pożizzjoni tal-Kunsill dwar proposta biex tiġi stabbilita l-Impriża Konġunta Shift2Rail. Din is-sħubija pubblika-privata ser ikollha l-għan li tiżviluppa, teżamina u tapprova teknoloġiji u soluzzjonijiet innovattivi li jgħinu biex jitnaqqsu l-ispejjeż taċ-ċiklu tal-ħajja tas-sistema tat-trasport ferrovjarju, tiżdied il-kapaċità tiegħu, tittejjeb l-affidabbiltà tas-servizzi ferrovjarji u l-impatt ambjentali tal-ivvjaġġar bil-ferroviji.

Il-Parlament Ewropew qed jiġi kkonsultat dwar il-proposta, qabel ma tittieħed deċiżjoni finali mill-Kunsill.

Ir-Raba' Pakkett Ferrovjarju

Ir-raba' pakkett ferrovjarju, ippubblikat mill-Kummissjoni f'Jannar 2013, huwa magħmul minn 6 proposti leġislattivi f'erba' oqsma:

• Approvazzjoni fl-UE kollha - Il-ferroviji u l-materjal fuq ir-roti għandhom jinbnew u jiġu ċċertifikati darba sabiex ikunu jistgħu jaħdmu fl-UE kollha. Għandu jkun hemm ċertifikat ta' sikurezza uniku.
• Struttura li taħdem - Jiġi żgurat li ż-żewġ funzjonijiet tal-immaniġġar tal-linji ferrovjarji u t-tmexxija tal-ferroviji jinżammu separati.
• Aktar aċċess għall-ferroviji - Il-ftuħ ta' ferroviji domestiċi tal-passiġġieri għal atturi ġodda, sabiex tiżdied il-kompetizzjoni u l-effiċjenza
• Forza tax-xogħol b'ħiliet - Jiġi żgurat li l-Istati Membri jkunu jistgħu jipproteġu aħjar lill-persunal meta jiġu trasferiti l-kuntratti tas-servizz pubbliku.

Suġġetti oħra fuq l-aġenda

Il-ministri kellhom dibattitu ta' orjentazzjoni dwar komunikazzjoni tal-Kummissjoni dwar il-mobilità urbana kompetittiva u effiċjenti fir-riżorsi. Id-diskussjonijiet iffokaw fuq l-ippjanar tal-mobilità sostenibbli, u fuq l-aħjar mod li jiġu kkoordinati u jintużaw il-mekkaniżmi ta' finanzjament disponibbli fil-livell tal-UE u dak nazzjonali.

Il-Kunsill ġie infurmat ukoll dwar l-aħħar żviluppi fuq diversi fajls leġislattivi attwali, inkluż il-pakkett tal-ajruport, il-proposta biex jiġi emendat ir-Regolament dwar il-promozzjoni tat-trasport fl-ilmijiet navigabbli interni, u d-direttiva proposta dwar il-karburanti alternattivi (Enerġija Nadifa).

Xi punti ġew ukoll adottati mingħajr ebda diskussjoni:

• Direttiva dwar l-Ordni ta’ Investigazzjoni Ewropea
• Direttiva dwar l-iffriżar u l-konfiska tar-rikavat minn attività kriminali
• Il-liberalizzazzjoni tal-viża għall-Moldova
• Direttiva tal-UE dwar it-tabakk