Proposti tekniċi

Fil-qosor

L-hekk imsejjaħ 'pilastru tekniku' tar-raba' pakkett ferrovjarju jkopri l-aġġornamenti għal tliet partijiet importanti tal-leġislazzjoni eżistenti. L-għan ta' dawn il-bidliet hu li jnaqqsu l-ispejjeż amministrattivi għall-operaturi ferrovjarji u li jagħmluha aktar faċli għal operaturi ġodda biex jidħlu fis-suq ferrovjarju. Waħda mill-bidliet ewlenin tikkonċerna l-Aġenzija Ferrovjarja Ewropea (ERA). Bħalissa, din għandha rwol importanti fil-promozzjoni tal-interoperabbiltà u l-armonizzazzjoni tal-istandards tekniċi għas-suq kollu tal-UE. Madankollu, ir-regoli nazzjonali tekniċi u dwar is-sikurezza jimxu flimkien ma' dawk tal-UE abbozzati mill-ERA, u dan joħloq kumplessità bla bżonn għall-operaturi ferrovjarji. Ir-reviżjonijiet proposti jagħmlu lill-ERA il-korp esklużiv responsabbli għall-ħruġ ta' awtorizzazzjonijiet tal-vetturi u ċ-ċertifikati ta' sikurezza fl-UE kollha.

Flimkien mal-bidliet fir-responsabbiltajiet tal-ERA, ir-raba' pakkett ferrovjarju jinkludi wkoll aġġornamenti għal leġislazzjoni eżistenti dwar l-interoperabbiltà u s-sikurezza ferrovjarja. Dawn il-bidliet għandhom l-għan li jneħħu l-ostakli amministrattivi u tekniċi li għad fadal għall-ħolqien ta' żona ferrovjarja unika Ewropea.

Fid-dettall

1. Proposta dwar l-Aġenzija Ferrovjarja Ewropea - 2013/0014 (COD)

Il-proċeduri ta' awtorizzazzjoni għal vetturi ferrovjarji ġodda attwalment jistgħu jieħdu sa sentejn u jiswew sa €6 miljun. L-operaturi ferrovjarji jridu wkoll iħallsu lill-awtorità nazzjonali tas-sikurezza l-ispejjeż għall-proċess ta' approvazzjoni.

Minħabba hekk, ikun diffiċli għal operaturi ġodda u manifatturi ta' vetturi ġodda li jidħlu fis-suq.

Bħalissa l-ERA hi responsabbli mill-abbozzar ta' speċifikazzjonijiet tekniċi tal-UE għall-interoperabbiltà (TSIs) u biex tipproponi metodi u miri dwar sikurezza għas-sikurezza ferrovjarja. Madankollu, għalkemm hemm standards armonizzati, l-awtorizzazzjonijiet ferrovjarji u ċ-ċertifikati ta' sikurezza għadhom qed jinħarġu mill-istati membri.

Taħt il-bidliet proposti, l-ERA jkollha r-responsabbiltà esklużiva għall-ħruġ ta' awtorizzazzjonijiet għal vetturi ferrovjarji, ċertifikati ta' sikurezza għall-operaturi ferrovjarji u awtorizzazzjonijiet ta' sistemi tal-kmand tal-kontroll u s-sinjalazzjoni maġenb il-binarji. Ikollha wkoll kompiti ġoddaoħrajn, li jinkludu:

• il-monitoraġġ tar-regoli ferrovjarji nazzjonali u l-prestazzjoni tal-awtoritajiet nazzjonali fl-oqsma tal-interoperabbiltà u s-sikurezza ferrovjarja
• l-għoti ta' appoġġ tekniku indipendenti u oġġettiv, l-aktar lill-Kummissjoni Ewropea
• rwol akbar fl-iżgurar tal-iżvilupp konsistenti u l-użu bla dewmien ta' applikazzjonijiet telematiċi
• rwol aktar importanti fl-iżgurar tal-iżvilupp konsistenti tas-Sistema Ewropea tal-Ġestjoni tat-Traffiku Ferrovjarju (ERTMS)

Il-proposta tinkludi wkoll titjib fl-istruttura ta' governanza tal-ERA u metodi operattivi interni.

2. Proposta dwar l-interoperabbiltà tas-sistema ferrovjarja fl-UE - 2013/0015 (COD)

Id-direttiva eżistenti (2008/57) ġiet introdotta biex tiżgura l-istandardizzazzjoni teknika tan-netweks u l-interoperabbiltà ferrovjarja - fattur ewlieni fl-iżvilupp u l-istabbiliment ta' netwerks ferrovjarji Trans-ewropej. Il-bidliet proposti jistabbilixxu approċċ komuni għar-regoli ta' interoperabbiltà, li jżidu l-ekonomiji ta' skala għall-operaturi ferrovjarji. Il-bidliet iħaffu wkoll il-proċeduri amministrattivi u b'hekk inaqqsu l-ispejjeż amministrattivi. Ir-reviżjoni wkoll tallinja d-direttiva tal-2008 ma' elementi oħrajn tar-raba' pakkett ferrovjarju, b'mod partikolari l-proposta għar-reviżjoni tar-rwol tal-ERA.

B'mod partikolari, il-proposta tinkludi dispożizzjoni ġdida fl-istandards tekniċi għall-interoperabbiltà (TSIs) biex jiġu koperti s-subsistemi eżistenti. Permezz ta' dan, l-operaturi ferrovjarji jkunu jistgħu jivverifikaw il-kompatibbiltà bejn il-vetturi u r-rotot fejn dawn il-vetturi jkunu ser jiġu operati. Bidliet oħra jinkludu:

• kjarifika dwar l-użu tal-opinjonijiet tal-ERA filwaqt li tiġi posposta l-emenda tat-TSIs għall-wara li jiġu individwati n-nuqqasijiet
• riduzzjoni tal-każijiet għall-possibbiltà ta' nonapplikazzjoni tat-TSIs
• dispożizzjoni ġdida dwar l-awtorizzazzjoni ta' vetturi għat-tqegħid fis-suq
• kjarifika tar-rwol tal-operaturi ferrovjarji u l-ġesturi tal-infrastruttura fil-verifika tal-kompatibbiltà teknika ta' vettura ma' rotta

3. Proposta biex tiġi emendata d-direttiva dwar is-sikurezza ferrovjarja - 2013/0016 (COD)

Id-direttiva eżistenti (2004/49) tistabbilixxi qafas għas-sikurezza ferrovjarja iżda ma tintroduċix ċertifikat uniku ta' sikurezza. Ir-raba' pakkett ferrovjarju jipproponi li l-UE għandha timxi lejn ċertifikat uniku ta' sikurezza, maħruġ mill-Aġenzija Ferrovjarja Ewropea (ERA). Dan ifisser li d-direttiva tal-2004 trid tiġi aġġornata, biex tirrevedi r-rwol tal-awtoritajiet nazzjonali tas-sikurezza u talloka mill-ġdid ir-responsabbiltajiet bejnhom u l-ERA. Il-bidliet proposti jqisu wkoll bidliet reċenti fis-suq ferrovjarju, u jiżguraw li jintużaw monitoraġġ tas-sikurezza u miżuri għall-kontroll tar-riskji korretti.

B'mod partikolari, id-direttiva riveduta għandha l-għan li:

• tiffaċilita l-ħolqien u l-implimentazzjoni ta' ċertifikat uniku ta' sikurezza tal-UE, filwaqt li tagħti aċċess għall-infrastruttura ferrovjarja biss lill-operaturi ferrovjarji li jkollhom ċertifikat ta' sikurezza
• tieħu kont tal-iżviluppi fis-suq ferrovjarju, bħal żieda fl-esternalizzazzjoni ta' servizzi u tnaqqis ta' kontrolli interni
• tadatta l-kamp ta' applikazzjoni u d-definizzjonijiet tagħha f'konformità mad-direttiva riveduta dwar l-interoperabbiltà
• tiċċara l-kooperazzjoni bejn il-korpi investigattivi nazzjonali u l-awtoritajiet ġudizzjarji matul l-ivestigazzjonijiet wara inċident

Fil-Kunsill

Fl-10 ta' Diċembru 2015, il-Kunsill adotta l-pożizzjoni tiegħu fl-ewwel qari dwar l-abbozz ta' kull waħda mit-tliet direttivi. Il-Parlament Ewropew issa jeħtieġ japprovahom formalment fit-tieni qari.

Il-Kunsill adotta testi separati ta' approċċ ġenerali dwar kull waħda mill-proposti matul il-laqgħat tal-Kunsill Trasport, Telekomunikazzjoni u Enerġija (TTE) f'Ġunju 2013, Ottubru 2013 u Marzu 2014. Dan kien segwit minn qbil politiku dwar l-abbozz ta' kull waħda mit-tliet proposti fil-5 ta’ Ġunju 2014. Wara sensiela ta’ diskussjonijiet tat-trilogu informali, il-Kunsill u l-Parlament Ewropew laħqu qbil proviżorju dwar it-tliet proposti tekniċi fis-17 ta’ Ġunju 2015. Dan il-qbil ġie kkonfermat mill-istati membri f’laqgħa tal-Coreper fit-30 ta’ Ġunju 2015.

1. Proposta dwar l-Aġenzija Ferrovjarja Ewropea

Il-Kunsill adotta approċċ ġenerali fl-14 ta' Marzu 2014, li jistabbilixxi diversi bidliet għall-proposta oriġinali, inkluż:

• il-bdil tar-rwol tal-ERA fl-eżami tar-regoli nazzjonali b'rabta mas-sikurezza u l-interoperabbiltà ferrovjarja
• aktar kjarifika dwar meta l-Kummissjoni tkun tista' toħroġ deċiżjoni dwar regoli nazzjonali

It-test tal-Kunsill jikkunsidra wkoll il-proċess għat-trattament ta' nuqqasijiet fil-kompiti dwar sikurezza u interoperabbiltà tal-awtoritajiet nazzjonali tas-sikurezza, it-tariffi li titlob l-ERA għas-servizzi li tagħti, u l-istabbiliment ta' sistema ta' appelli.

Il-Parlament Ewropew adotta l-pożizzjoni tiegħu fl-ewwel qari fis-26 ta' Frar 2014 għas-sitt biċċiet ta' leġislazzjoni kollha taħt ir-raba' pakkett ferrovjarju.

2. Proposta dwar l-interoperabbiltà tas-sistema ferrovjarja fl-UE

Il-Kunsill adotta approċċ ġenerali fl-10 ta' Ġunju 2013, li jistabbilixxi diversi bidliet għall-proposta oriġinali. Il-Kunsill jipproponi bidliet fir-responsabbiltajiet tal-awtoritajiet nazzjonali tas-sikurezza u l-ERA fir-rigward tal-proċess għall-awtorizzazzjoni tal-vettura. It-test tal-Kunsill jipprevedi sistema doppja ta' awtorizzazzjonijiet b'separazzjoni ċara tal-kompiti u r-responsabbiltajiet bejn l-ERA u l-awtoritajiet nazzjonali tas-sikurezza. L-ERA toħroġ awtorizzazzjonijiet għal vetturi li jintużaw f'operazzjonijiet transkonfinali, ibbażati fuq valutazzjonijiet imwettqa mill-awtoritajiet nazzjonali.

3. Proposta dwar is-sikurezza ferrovjarja

Il-Kunsill adotta approċċ ġenerali fl-10 ta' Marzu 2013, li jistabbilixxi diversi bidliet għall-proposta oriġinali. It-test maqbul tal-Kunsill jipprevedi sistema doppja għaċ-ċertifikazzjoni tas-sikurezza bl-introduzzjoni ta' ċertifikat uniku ta' sikurezza. B'din is-sistema doppja l-ERA tkun punt uniku ta’ servizz għall-kumpanniji ferrovjarji li joperaw f'aktar minn stat membru wieħed. Madankollu, l-awtoritajiet nazzjonali jibqa' jkollhom rwol ewlieni fit-twettiq tal-valutazzjonijiet meħtieġa għall-ħruġ taċ-ċertifikat tas-sikurezza. Jekk il-kumpannija ferrovjarja topera biss fi stat membru wieħed, il-Kunsill jipproponi li l-istat membru jista' jiddeċiedi li jippreżenta t-talba għal ċertifikazzjoni lill-ERA jew lill-awtorità nazzjonali rilevanti tas-sikurezza.