Lenti fuq il-ħaddiema tal-pjattaformi diġitali fl-UE

It-titjib tal-kundizzjonijiet tax-xogħol fl-ekonomija diġitali

Ix-xogħol fuq pjattaformi diġitali huwa mod relattivament ġdid ta' ħidma fejn pjattaforma online, bħal sit web jew app, tqabbel talba għal servizz minn klijent mal-provvista ta' xogħol imħallas minn individwu.

Id-direttiva l-ġdida, għandha l-għan li tgħin biex jittejbu l-kundizzjonijiet tax-xogħol tal-persuni li jaħdmu permezz ta' pjattaformi diġitali, filwaqt li tippreserva l-opportunitajiet u l-benefiċċji li ġġib magħha l-ekonomija tal-pjattaformi.

Fit-13 ta' Diċembru 2023, il-Kunsill u l-Parlament Ewropew laħqu ftehim proviżorju dwar id-direttiva proposta. Il-Kunsill adotta r-regoli l-ġodda fl-14 ta' Ottubru 2024.

Id-direttiva l-ġdida tindirizza każijiet ta' klassifikazzjoni ħażina tal-ħaddiema tal-pjattaformi u tiffaċilita t-triq għal ħaddiema bħal dawn biex jiġu kklassifikati mill-ġdid bħala impjegati. Dan jiggarantixxi aċċess aktar faċli għad-drittijiet tagħhom bħala impjegati skont id-dritt tal-UE. Barra minn hekk, ir-regoli l-ġodda ser jipproteġu aħjar id-data personali tal-ħaddiema tal-pjattaformi u jżidu t-trasparenza dwar kif is-sistemi tal-algoritmi jintużaw biex jittieħdu deċiżjonijiet fuq il-post tax-xogħol.

Kemm hemm minnhom u x'inhu l-profil tagħhom?

Hemm 28.3 miljun ħaddiem tal-pjattaformi diġitali fl-UE, li jikkostitwixxu forza tax-xogħol sostanzjali simili għall-għadd ta' persuni impjegati fil-manifattura (29 miljun ħaddiem). Din iċ-ċifra mistennija tiżdied malajr.

It-tkabbir mistenni tal-ħaddiema tal-pjattaformi diġitali (2022–2025)

Il-ħaddiema tal-pjattaformi x'aktarx ikunu rġiel u żgħażagħ, il-biċċa l-kbira huma kwalifikati żżejjed għax-xogħol li jagħmlu (il-maġġoranza għandhom kwalifika postsekondarja) u x-xogħol fuq il-pjattaformi ġeneralment ikuni s-sors sekondarju ta' introjtu tagħhom, minbarra x-xogħol regolari tagħhom.

Livell ta' ħiliet meħtieġ biex jingħataw is-servizzi

X'tip ta' xogħol jagħmlu u għal min?

Fl-Ewropa, is-sewqan tat-taxis huwa l-aktar xogħol popolari mwettaq mill-ħaddiema tal-pjattaformi.

Il-qligħ tal-persuni li jaħdmu permezz tal-pjattaformi skont it-tip ta' servizz li jingħata:

Tipi ta' klijenti

Il-biċċa l-kbira tas-servizzi huma pprovduti lil klijenti individwali, u aktar minn 80% tal-klijenti jaqgħu f'din il-kategorija.

Dawn huma impjegati jew ħaddiema freelance?

Fl-UE, madwar 5 miljun ħaddiem tal-pjattaformi huma kklassifikati b'mod skorrett.

L-istatus korrett fl-impjieg għall-ħaddiema tal-pjattaformi huwa kruċjali biex jiġi żgurat li dawn igawdu d-drittijiet tax-xogħol li huma intitolati għalihom. Il-ħaddiema li jiġu kklassifikati b'mod skorrett bħala ħaddiema għal rashom mhumiex intitolati għall-istess drittijiet u protezzjonijiet bħal persuni impjegati.

Madwar 55% mill-ħaddiema tal-pjattaformi jaqilgħu inqas mill-paga minima netta fis-siegħa fil-pajjiż fejn jaħdmu, fejn teżisti paga minima.

Waqt li 41% tal-ħin li jiddedikaw għal xogħol tal-pjattaformi huwa mingħajr ħlas (eż xogħol ta' riċerka, il-ħin li fih jistennew biex jiġu assenjati xogħol, jevalwaw ir-riklami, eċċ.).