Pakketti tal-ivvjaġġar

Regoli tal-UE dwar il-pakketti tal-ivvjaġġar

Ir-regoli tal-UE jiżguraw li l-vjaġġaturi li jibbukkjaw pakkett:

• jirċievu informazzjoni ċara, permezz ta' formola informattiva standardizzata tal-UE, dwar is-servizzi inklużi fil-pakkett, il-prezz totali tiegħu, kwalunkwe rekwiżit ta' viża u d-drittijiet tagħhom
• jistgħu jikkanċellaw il-prenotazzjoni tagħhom għal kwalunkwe raġuni billi jħallsu tariffa raġonevoli u, jekk il-kanċellazzjoni tkun dovuta għal kwistjonijiet inevitabbli u straordinarji, jew jekk il-prezz tal-pakkett ikun żdied b'aktar minn 8%, ma jkun hemm l-ebda ħlas
• għandhom jirċievu assistenza mill-organizzatur, pereżempju fil-każ ta' kwistjonijiet ta' saħħa jew dokumenti tal-ivvjaġġar misruqa/mitlufa
• huma intitolati għal kumpens u possibilment għal ripatrijazzjoni jekk l-organizzatur ifalli

Informazzjoni ċara

Assistenza

Drittijiet ta' kanċellazzjoni

Kumpens f'każ ta' falliment

Fir-rigward tal-arranġamenti tal-ivvjaġġar marbuta, ir-regoli tal-UE jiżguraw li l-vjaġġaturi:

• jirċievu informazzjoni ċara dwar id-drittijiet tagħhom
• ikunu protetti fil-każ ta' falliment tal-kummerċjant

Reviżjoni tar-regoli dwar il-pakketti tal-ivvjaġġar

Fit-30 ta' Marzu 2026, il-Kunsill adotta direttiva li għandha l-għan li ssaħħaħ id-drittijiet tal-vjaġġaturi meta jixtru diversi servizzi, bħal titjiriet, trasferimenti, akkomodazzjoni jew eskursjonijiet, f'pakkett wieħed.

Informazzjoni mtejba għall-vjaġġaturi

Ir-regoli l-ġodda jtejbu l-informazzjoni li l-vjaġġaturi jridu jirċievu qabel, matul u wara l-vjaġġ tagħhom, bħal:

• metodi ta' ħlas disponibbli
• rekwiżiti tal-passaport u tal-viża
• aċċessibbiltà għal persuni b'mobbiltà mnaqqsa
• tariffi ta' terminazzjoni fil-każ ta' kanċellazzjoni

L-organizzaturi irid ikollhom fis-seħħ arranġamenti għat-trattament tal-ilmenti.

Drittijiet ta' kanċellazzjoni msaħħa

F'ċirkostanzi straordinarji u inevitabbli (magħrufa wkoll bħala "force majeure"), il-vjaġġaturi għandhom id-dritt li jikkanċellaw pakkettimingħajr tariffi ta' terminazzjoni. Ġie ċċarat kif ċirkostanzi inevitabbli u straordinarji jistgħu jaffettwaw l-eżekuzzjoni tal-pakkett u għalhekk jitqiesu li jikkostitwixxu "force majeure", kif ukoll ir-rilevanza, il-prova u l-valur legali tal-hekk imsejħa avviżi tal-ivvjaġġar.

Barra minn hekk, l-organizzaturi jridu jirrimborżaw lill-vjaġġaturi fi żmien 14-il jum meta jikkanċellaw pakkett. L-organizzaturi jistgħu joffru vawċers minflok rimborż, iżda l-vjaġġaturi jżommu d-dritt li jitolbu rimborż minflok. Il-vawċers iridu:

• ikollhom valur mill-inqas ugwali għal dak tar-rimborż
• ikunu validi għal massimu ta' 12-il xahar
• ikunu trasferibbli darba biss
• ikunu koperti minn protezzjoni mill-insolvenza

Il-vjaġġaturi jridu jkunu jistgħu jużaw il-vawċers ukoll biex jixtru servizz tal-ivvjaġġar wieħed jew aktar offruti mill-kummerċjant.

Jekk il-kanċellazzjoni tkun ikkawżata mill-insolvenza tal-organizzatur tal-ivvjaġġar, il-vjaġġaturi għandhom jiġu rimborżati fi żmien sitt xhur, b'estensjoni possibbli għal disa' xhur f'sitwazzjonijiet debitament ġustifikati.

Definizzjoni mtejba ta' "pakkett tal-ivvjaġġar"

Ir-regoli aġġornati jħallu barra arranġamenti tal-ivvjaġġar marbuta u jagħtu definizzjoni aktar ċara ta' pakkett tal-ivvjaġġar, fost oħrajn billi jintroduċu rekwiżiti ta' informazzjoni f'ċerti sitwazzjonijiet li ma jwasslux għall-ħolqien ta' pakkett.

• Protezzjoni tal-konsumatur: il-Kunsill jagħti l-approvazzjoni finali lis-salvagwardji addizzjonali għall-utenti tal-pakketti tal-ivvjaġġar (stqarrija għall-istampa, 30 ta' Marzu 2026)

Ara wkoll