Mekkaniżmu tar-reverse charge tal-VAT: il-prevenzjoni tal-frodi tal-VAT
Il-Kunsill qed jaħdem fuq proposta għal direttiva tal-Kunsill li għandha l-għan li tippermetti l-applikazzjoni ta' mekkaniżmu ġeneralizzat tar-reverse charge tal-VAT għal tranżazzjonijiet domestiċi bejn in-negozji li jinvolvu servizzi jew oġġetti b'fattura li taqbeż €10 000. L-applikazzjoni tal-mekkaniżmu tkun tista' ssir skont ċerti kundizzjonijiet.
Il-mekkaniżmu tar-reverse charge jgħaddi r-responsabbiltà għar-rappurtar ta' tranżazzjoni tal-VAT mingħand il-bejjiegħ għal għand ix-xerrej ta’ oġġett jew servizz.
L-applikazzjoni ta' mekkaniżmu bħal dan tkun tinvolvi deroga mill-prinċipji ġenerali ewlenin tas-sistema tal-VAT attwali tal-UE u għalhekk tirrikjedi li tiġi emendata d-direttiva 2006/112/KE dwar is-sistema komuni ta' taxxa fuq il-valur miżjud. Skont il-proposta, id-deroga tingħata għal perjodu ta' żmien limitat u tkun volontarja għall-istati membri li jissodisfaw il-kundizzjonijiet stabbiliti fid-direttiva proposta.
L-għan huwa li xi stati membri li huma affettwati b'mod partikolari mill-frodi tal-VAT u li ma għandhomx miżuri suffiċjenti biex jiġġielduha jiġu megħjuna, li jista' jkun il-każ fl-iskemi tal-frodi tal-VAT bħall-iskemi "karusell" jew dik b'"negozjant nieqes".
Id-direttiva proposta tkun toffri soluzzjoni għal żmien limitat, skont liema l-provvisti jiġu ntaxxati fil-pajjiż ta' destinazzjoni.
- Proposta għal direttiva tal-Kunsill dwar l-applikazzjoni temporanja ta' mekkaniżmu tar-reverse charge ġeneralizzat
- Direttiva tal-Kunsill 2006/112/KE dwar is-sistema komuni ta' taxxa fuq il-valur miżjud
Għalfejn saret il-proposta?
Il-proposta saret wara talba mill-istati membri tal-UE li huma affettwati b'mod partikolari minn telf fid-dħul minħabba l-frodi tal-VAT, speċjalment minħabba l-frodi karusell.
Skont il-Kummissjoni Ewropea, id-diskrepanza tal-VAT (id-differenza bejn id-dħul mistenni mill-VAT u l-proprja VAT li tinġabar mill-awtoritajiet tat-taxxa) fl-UE laħqet kważi €160 biljun, li €50 biljun minnhom huma attribwibbli għall-frodi transkonfinali (fl-2013).
Il-possibbiltà li jiġi applikat il-mekkaniżmu tar-reverse charge teżisti fis-sistema attwali ukoll; madankollu, l-applikazzjoni tiegħu mhix ġeneralizzata u hija limitata għal ċerta lista ta' setturi. L-applikazzjoni tiegħu hija wkoll limitata fiż-żmien. Dan ġie introdott permezz tad-Direttiva 2013/43/UE.
X'inhi l-frodi "karusell" jew b'"negozjant nieqes"?
Fl-UE, il-frodi karusell tipikament tinvolvi tranżazzjonijiet transkonfinali bejn in-negozji.
Skont is-sistema tal-VAT attwali tal-UE, il-provvisti transkonfinali min-negozju għal negozju (B2B) fl-UE huma eżentati mill-VAT, filwaqt li l-bejjiegħ tal-oġġetti jew tas-servizzi fis-suq ta' destinazzjoni għandu l-obbligu li jħallas il-VAT lill-baġit tal-gvern (il-bejjiegħ jiġbor il-VAT).
Essenzjalment, il-moviment transkonfinali tal-oġġetti fl-UE huwa maqsum f'żewġ tranżazzjonijiet:
- il-provvista tal-oġġetti fl-UE hija eżentata mill-VAT
- l-akkwist ta' oġġetti fl-UE huwa soġġett għall-VAT fil-pajjiż ta' destinazzjoni, fejn min jiġbor il-VAT huwa l-bejjiegħ
Kif taħdem l-iskema ta' frodi b'negozjant nieqes jew karusell?
L-iskema tinvolvi diversi kumpaniji li jbiegħu oġġetti jew servizzi lil xulxin f'suq domestiku, importati bla VAT minn fornitur (l-hekk imsejħa kumpanija intermedjarja) f'pajjiż ieħor tal-UE.
Waħda mill-kumpaniji fil-katina, normalment dik li tkun impurtat l-oġġetti, ma tħallasx il-VAT lill-baġit tal-istat minkejja li titlob lix-xerrej sussegwenti jħallas il-VAT, u b'hekk tkun qed twettaq frodi. Din il-kumpanija normalment tisparixxi malajr ħafna mingħajr ma tħalli ebda traċċa wara t-transazzjoni (għalhekk hemm "negozjant nieqes"). Dan jagħmel il-ġbir tat-taxxa impossibbli fl-istat fejn jiġu kkunsmati l-oġġetti jew is-servizzi. Ix-xerrejja l-oħra fil-katina, sadanittant, iġibu lura l-VAT mill-baġit tal-istat wara li jerġgħu jbiegħu l-oġġetti. Fil-verità, l-oġġetti jew is-servizzi jista' jkun li anqas biss jiċċaqalqu, jew li jkunu jeżistu biss fuq karta.
Il-"karusell" jerġa' jibda jdur mill-ġdid meta x-xerrej finali fil-katina fis-suq domestiku jerġa' jbiegħ l-oġġetti lill-ewwel fornitur, jiġifieri lill-kumpanija li tkun ġabet l-oġġetti fil-pajjiż, biex b'hekk il-proċess kollu jkun jista' jerġa' jibda. Din l-aħħar transazzjoni, li tkun waħda transkonfinali, għal darba oħra tkun eżentata mill-VAT.
L-iskema tista' tiffunzjona wkoll fis-suq domestiku biss.
Il-mekkaniżmu tar-reverse charge huwa miżura biex ir-responsabbiltà tal-ħlas finali tal-VAT lill-baġit tal-gvern timxi mill-bejjiegħ għal għand il-konsumatur. B'dan il-mod, huwa għandu l-għan li jnaqqas ir-riskju tal-frodi tal-VAT.
Elementi ewlenin tal-proposta
Proċedura leġislattiva
L-adozzjoni tal-abbozz ta' direttiva titlob proċedura leġislattiva speċjali: vot unanimu mill-Kunsill, wara konsultazzjoni mal-Parlament Ewropew. Il-Kunsill mhuwiex legalment obbligat li jikkunsidra l-opinjoni tal-Parlament, iżda skont il-ġurisprudenza tal-Qorti tal-Ġustizzja, m'għandux jieħu deċiżjoni mingħajr ma jkun irċeviha.
Kundizzjonijiet biex jiġi applikat il-mekkaniżmu
Skont il-proposta, il-kundizzjonijiet li għandu jissodisfa stat membru biex ikun jista' japplika l-mekkaniżmu ġeneralizzat tar-reverse charge għandhom ikunu dawn li ġejjin:
- id-diskrepanza tal-VAT tal-istat membru għandha tkun ħames punti perċentwali aktar mid-diskrepanza tal-VAT medja Ewropea
- il-livell tal-frodi karusell fl-istat membru għandu jammonta għal aktar minn 25 % tad-diskrepanza tal-VAT tiegħu
- l-istat membru għandu jagħti prova li l-miżuri konvenzjonali mhumiex biżżejjed biex jiġġieled dan it-tip ta' frodi
Il-proposta tistipula wkoll li l-Kummissjoni Ewropea jkollha tliet xhur biex tawtorizza jew tiċħad talba ta' stat membru biex japplika l-mekkaniżmu, skont jekk ikunux ġew issodisfati r-rekwiżiti.
Stati membri ġirien
Skont il-proposta, stat membru li jkollu fruntiera komuni mal-istat li jkun qed japplika l-mekkaniżmu ġeneralizzat tar-reverse charge għandu jkun awtorizzat ukoll li japplika dan il-mekkaniżmu, b'ċerti kundizzjonijiet.
Tħassir tal-mekkaniżmu
L-abbozz ta' direttiva jipproponi li jekk ikun hemm impatt negattiv konsiderevoli fuq il-kummerċ fis-suq intern tal-UE wara l-introduzzjoni tal-mekkaniżmu, huwa jkollu jitħassar, mingħajr effett retroattiv, wara perjodu ta' sitt xhur.
Limitu ta' żmien
Il-proposta tissuġġerixxi li l-mekkaniżmu għandu jkun fis-seħħ sat-30 ta' Settembru 2022. Wara jiġi vvalutat mill-Kummissjoni.
-
1 ta' Jannar
Fil-Kunsill
-
2018
2 ta' OttubruIl-Kunsill jilħaq qbil dwar il-mekkaniżmu tar-reverse charge
Fit-2 ta' Ottubru, il-Kunsill laħaq qbil dwar il-proposta li ser tippermetti derogi temporanji mir-regoli normali tal-VAT sabiex il-frodi tal-VAT tkun prevenuta aħjar. Id-direttiva ser tippermetti lill-istati membri li huma l-aktar milquta mill-frodi tal-VAT biex temporanjament japplikaw inverżjoni ġeneralizzata tar-responsabbiltà tal-VAT.
L-Istati membri ser ikunu jistgħu jużaw il-mekkaniżmu tar-reverse charge ġeneralizzat (GRCM):
- għal provvisti domestiċi ta' oġġetti u servizzi 'l fuq minn limitu ta' €17 500 għal kull tranżazzjoni biss
- sat-30 ta' Ġunju 2022 biss
- u taħt kundizzjonijiet tekniċi stretti ħafna
B'mod partikolari, fi stat membru li jixtieq japplika din il-miżura, 25 % tad-differenza fil-VAT trid tkun minħabba frodi karusell. Fost rekwiżiti oħra, dan l-istat membru ser ikollu jistabbilixxi obbligi xierqa u effikaċi ta' rappurtar elettroniku dwar il-persuni taxxabbli kollha, speċjalment dawk li għalihom ikun japplika l-mekkaniżmu.
"Din id-direttiva ser tipprovdi soluzzjoni għal stati membri li jħabbtu wiċċhom ma' frodi karusell endemika. Hija miżura eċċezzjonali, limitata fiż-żmien, li tista' tkun mezz effiċjenti kontra l-frodi tal-VAT." Hartwig Löger, il-ministru għall-finanzi tal-Awstrija, li għandha l-presidenza tal-Kunsill fit-tieni nofs tal-2018Dan il-mekkaniżmu tar-reverse charge ġeneralizzat jista' jintuża biss minn stat membru ladarba jissodisfa l-kriterji tal-eliġibbiltà u t-talba tiegħu tkun awtorizzata mill-Kunsill. L-applikazzjoni ta' din il-miżura hi soġġetta wkoll għal salvagwardji stretti tal-UE.
Il-mekkaniżmu tar-reverse charge diġà jista' jkun applikat fuq bażi temporanja, iżda mhux b'mod ġeneralizzat. Skont ir-regoli attwali, huwa limitat għal lista ta' setturi deċiża minn qabel. Jista' jintuża biss minn stat membru li jkun għamel talba speċifika u jekk ikun awtorizzat mill-Kunsill.
Id-direttiva ser toffri soluzzjonifuq terminu qasir għall-istati l-aktar milquta biex jillimitaw il-frodi, sakemm jintemmu n-negozjati li għaddejjin dwar sistema tal-VAT ġdida u definittiva fejn il-provvisti jkunu intaxxati fil-pajjiż ta' destinazzjoni. Reċentement, il-Kummissjoni ressqet proposti mmirati lejn is-sostituzzjoni tal-arranġamenti "tranżizzjonali" attwali tal-VAT b'sistema definittiva.
Id-direttiva mistennija tiġi adottata mingħajr aktar diskussjoni ladarba l-Parlament Ewropew ikun ta l-opinjoni tiegħu.
-
2018
13 ta' LuljuIl-Kunsill jiddiskuti l-proposta dwar mekkaniżmu tar-reverse charge tal-VAT
Fil-laqgħa tiegħu fit-13 ta' Lulju 2018, il-Kunsill Affarijiet Ekonomiċi u Finanzjarji ddiskuta l-proposta dwar mekkaniżmu tar-reverse charge tal-VAT. Madankollu, il-ministri ma setgħux jaslu għal ftehim u ddeċidew li jerġgħu jiddiskutuha fil-laqgħa tagħhom f'Ottubru.
-
2018
25 ta' MejjuIl-Kunsill iddiskuta l-proposta dwar il-mekkaniżmu tar-reverse charge tal-VAT
Fil-25 ta' Mejju 2018, il-Kunsill Affarijiet Ekonomiċi u Finanzjarji ddiskuta l-proposta dwar mekkaniżmu tar-reverse charge tal-VAT. Madankollu, il-ministri ma setgħux jaslu għal ftehim.
-
2017
16 ta' ĠunjuIl-Kunsill jiddiskuti proposta ta' kompromess dwar mekkaniżmu tar-reverse charge ġeneralizzat tal-VAT
Fil-laqgħa tiegħu tas-16 ta' Ġunju, il-Kunsill Affarijiet Ekonomiċi u Finanzjarji ddiskuta l-proposta ta' kompromess imħejjija mill-presidenza tal-Kunsill bil-ħsieb li jintlaħaq ftehim dwar l-abbozz ta' direttiva. Minkejja li sar progress konsiderevoli fit-taħditiet, id-diskussjoni ntemmet mingħajr ftehim, li jeħtieġ l-unanimità fil-Kunsill.
Dan huwa mistenni fit-tieni nofs tal-2017.
-
2017
21 ta' MarzuIl-Kunsill jiddiskuti l-proposta dwar mekkaniżmu tar-reverse charge tal-VAT
Fil-laqgħa tal-Kunsill Affarijiet Ekonomiċi u Finanzjarji, il-ministri għall-finanzi tal-UE ddiskutew il-proposta għal direttiva tal-Kunsill li tirrigwarda l-mekkaniżmu tar-reverse charge ġeneralizzat tal-VAT.
L-għan tad-diskussjoni kien li tinkiseb gwida dwar il-kamp ta' applikazzjoni tad-direttiva proposta, il-kriterji għall-applikazzjoni tal-mekkaniżmu tar-reverse charge, ir-revoka tiegħu u ż-żmien kemm idum japplika.
Il-fehmiet espressi ser iservu bħala bażi għall-ħidma ulterjuri fil-Kunsill. -
2017
27 ta' JannarIl-Kunsill jisma' l-preżentazzjoni tal-proposta
Il-Kummissjoni Ewropea ppreżentat lill-Kunsill proposta dwar l-applikazzjoni ta' mekkaniżmu tar-reverse charge ġeneralizzat tal-VAT. Il-ministri kellhom skambju ta' fehmiet.
Il-Grupp ta' Ħidma tal-Kunsill dwar Kwistjonijiet ta' Taxxa - Tassazzjoni Indiretta beda jaħdem fuq il-proposta. -
2016
21 ta' DiċembruIl-Kummissjoni toħroġ il-proposta rigward l-applikazzjoni ġenerali tal-mekkaniżmu tar-reverse charge tal-VAT
Il-Kummissjoni Ewropea ħarġet il-proposta għal applikazzjoni temporanja tal-mekkaniżmu tar-reverse charge ġeneralizzat tal-VAT, wara talba mill-istati membri.
-
2016
17 ta' ĠunjuIl-ministri għall-finanzi jiddiskutu l-possibbiltà tal-introduzzjoni ta' mekkaniżmu tar-reverse charge ġeneralizzat
Il-Kunsill Affarijiet Ekonomiċi u Finanzjarji ddiskuta l-possibbiltà li ċerti stati membri jitħallew japplikaw mekkaniżmu tar-reverse charge ġeneralizzat bħala mezz ta' prevenzjoni ta' frodi tal-VAT.
Il-Kummissjoni ppreżentat analiżi tal-applikazzjoni possibbli ta' mekkaniżmu bħal dan fl-Awstrija u fir-Repubblika Ċeka.