Dokument: ESP-PO-01001

L-Artikolu 8 tal-Att dwar ir-Reġistru tal-Istat Ċivili: Il-fatti u ċ-ċirkostanzi previsti mir-Regolament għandhom jiġu ċċertifikati għall-finijiet kollha, mingħajr ħlas, fil-Ktieb tal-Familja, hekk kif jiġu rreġistrati.

L-Artikolu 36 tar-Regolament dwar ir-Reġistru tal-Istat Ċivili. Il-Ktieb tal-Familja għandu jinfetaħ biċ-ċertifikazzjoni ta' żwieġ pubbliku u għandu jkun fih paġni sussegwenti għaċ-ċertifikazzjoni tal-informazzjoni dwar l-istatus ċivili dwar ir-reġim tal-proprjetà matrimonjali, it-twelid tat-tfal taż-żewġ konjuġi u ta' tfal adottati konġuntament miż-żewġ partijiet kontraenti, il-mewt tal-konjuġi u l-annullament taż-żwieġ jew id-divorzju jew is-separazzjoni tal-konjuġi. Il-Ktieb tal-Familja għandu jinħareġ ukoll lill-ġenitur jew lill-ġenituri ta' tifel/tifla mwieldin barra ż-żwieġ u lil persuna jew persuni li jadottaw minuri. Żwieġ sussegwenti bejn id-detenturi ta' dak il-Ktieb għandu jiġi rreġistrat. Kwalunkwe fatt li jaffettwa r-responsabbiltà tal-ġenituri, u l-mewt ta' tifel/tifla, jekk dan iseħħ qabel l-età legali, għandu jiġi rrekordjat fil-Ktieb, b'effett ta' ċertifikazzjoni. Ir-rekords ta' ċertifikazzjoni għandhom ikunu estratti mingħajr traskrizzjoni ta' noti u r-rekords tat-twelid m'għandhomx jispeċifikaw il-kategorija ta' affiljazzjoni. Dawn jistgħu jiġu korretti permezz ta' rekord ta' ċertifikazzjoni sussegwenti.

L-Artikolu 37: Il-Ktieb tal-Familja għandu jinħareġ lid-detenturi tiegħu, jew lil persuni awtorizzati mid-detenturi, immedjatament wara li ż-żwieġ jiġi rreġistrat fir-reġistru ordinarju jew, jekk ikunu għadhom mhux fil-pussess tiegħu, meta jiġu rreġistrati twelid barra ż-żwieġ jew adozzjoni. Meta l-ħruġ tal-Ktieb iseħħ bis-saħħa tar-reġistrazzjoni ta' adozzjoni, ir-rekord tat-twelid fil-Ktieb tal-Familja preċedenti maħruġ, jekk dan inħareġ, lill-ġenitur jew lill-ġenituri naturali, għandu jitħassar. Jekk fil-Ktieb preċedenti dak ir-rekord tat-twelid huwa l-uniku entrata, dak il-Ktieb għandu jitħassar.

L-Artikolu 38: Il-ħruġ tal-Ktieb, kull meta jseħħ, għandu fi kwalunkwe każ jiġi rrekordjat fil-marġini tar-reġistrazzjoni taż-żwieġ korrispondenti jew, fin-nuqqas tiegħu, f'kull reġistrazzjoni tat-twelid. Il-konjuġi jew id-detentur jew id-detenturi bl-awtorità tal-ġenituri għandhom ikollhom fi kwalunkwe każ il-ktieb korrispondenti. Fil-każ li dan jintilef jew issirlu ħsara, huma għandhom jiksbu duplikat mir-Reġistru li fih jiddaħħlu ċ-ċertifikazzjonijiet rilevanti. Fid-duplikat għandu jiġi ddikjarat li dan qed jissostitwixxi l-oriġinali u l-ħruġ tiegħu għandu jiġi rreġistrat fir-rekords korrispondenti fir-Reġistru.

L-Artikolu 39: Id-detentur tal-Ktieb għandu jitlob li ċ-ċertifikazzjonijiet pertinenti kollha jiddaħħlu fih immedjatament wara r-reġistrazzjoni. Ir-Reġistratur għandu jagħti attenzjoni partikolari li jikkonforma ma' dan ir-rekwiżit (partikolarment fir-rigward taż-żwieġ tat-tfal u l-imwiet). L-Artikolu 40: ir-Reġistratur għandu jipprovdi lid-detenturi tal-Ktieb, mingħajr ħlas, b'folji addizzjonali tal-formoli meħtieġa, tal-istess qies u magħmulin minn karta ordinarja. Il-folji addizzjonali għandhom jiġu ffirmati mir-Reġistratur u ttimbrati bis-siġill tal-Uffiċċju, u n-numru tagħhom għandu jiġi indikat fl-aħħar tal-aħħar paġna. L-Artikolu 46: (Fil-qrati tal-maġistrati) iċ-ċertifikazzjonijiet għandhom dejjem jinħarġu u jiġu ffirmati mill-maġistrat u mill-iskrivan konġuntament.

Iċ-ċirkulari tat-2 ta' Ġunju 1981 tad-Direttorat Ġenerali għar-reġistri u n-nutara - linji gwida bażiċi: (a) Il-Ktieb għandu jinħareġ lil ġenitur jew lill-ġenituri li jirrikonoxxu tifel/tifla mwieldin barra ż-żwieġ jew li jadottaw tifel/tifla, u lil persuni li jiżżewġu, dment li ma jkollhomx diġà Ktieb tal-Familja għall-ewwel raġuni; (b) Il-Ktieb għandu jkun fih rekords biss għat-tfal taż-żewġ ġenituri, jew għat-tfal li għandhom ġenitur wieħed biss rikonoxxut legalment. Għaldaqstant tfal ta' oriġini differenti għandhom jiġu rrekordjati f'Kotba differenti.

(c) Il-paġna li tirrigwardja ż-żwieġ għandha tirrekordja ż-żwieġ li seħħ bejn id-detenturi tal-Ktieb fi kwalunkwe żmien; (d) Fil-paġni li jikkonċernaw it-twelid tat-tfal, kemm jekk huma t-tfal taż-żewġ konjuġi jew adottati miż-żewġ konjuġi jew minn persuna waħda biss jew imwielda barra ż-żwieġ iżda rikonoxxuti minn wieħed mill-ġenituri jew miż-żewġ ġenituri, l-istatus ta' dawk it-tfal m'għandux jiġi speċifikat b'mod dirett; (e) Fejn applikabbli, is-separazzjoni jew id-divorzju tal-konjuġi jew l-annullament ta' żwieġ preċedenti għandhom ukoll jiġu rreġistrati, fuq il-paġni vojta, meta d-deċiżjonijiet ġudizzjarji rilevanti jiddaħħlu fir-Reġistru adatt.

Ħruġ tad-dokument u tad-detentur(i) tiegħu

Detentur(i) tad-dokument

Ċertifikat taż-żwieġ

It-tfal tad-detentur(i) tad-dokument

Mewt tad-detentur(i) tad-dokument

Telf tar-responsabbiltà tal-ġenituri mid-detentur(i) tad-dokument

Vokabularju bil-lingwi kouffiċjali ta' Spanja