Pacáiste i gcoinne seachaint cánach
Céard é féin?
Is tacar tionscnamh reachtach agus neamhreachtach de chuid an Aontais é an ‘pacáiste i gcoinne seachaint cánach’, atá dírithe ar rialacha i gcoinne seachaint cánach corparáidí a neartú agus ar a chinntiú go mbeidh an cánachas corparáideach san Aontas níos córa, níos simplí agus níos éifeachtaí ná mar a bhí.
Cuirtear leis na tionscnaimh sin le moltaí 2015 ón Eagraíocht um Chomhar agus Forbairt Eacnamaíochta (OECD) chun aghaidh a thabhairt ar chreimeadh an bhoinn cánach agus ar aistriú brabúis (BEPS).
Seo a leanas aidhmeanna an phacáiste:
- cosc a chur ar phleanáil ionsaitheach chánach
- trédhearcacht a mhéadú
- timpeallacht níos córa ná mar atá ann a chruthú do ghnólachtaí san Aontas Eorpach
Cad atá sa phacáiste?
Tá na gnéithe seo a leanas sa phacáiste:
Teachtaireacht maidir le pacáiste i gcoinne seachaint cánach
Mínítear, sa teachtaireacht, an réasúnaíocht pholaitiúil agus eacnamaíoch laistigh de na bearta a mholtar sa phacáiste.
Treoir i gcoinne seachaint cánach
Bunaítear leis an treoir roinnt beart atá ceangailteach ó thaobh dlí de i gcoinne pleanáil ionsaitheach chánach. Go háirithe, féachtar le haghaidh a thabhairt ar chásanna ina mbaineann grúpaí corparáideacha leas as na héagothromaíochtaí atá idir na córais náisiúnta chánach lena ndliteanas cánach a laghdú. Chun na críche sin déantar foráil léi d’fhorálacha dlíthiúla i gcoinne pleanáil ionsaitheach chánach a bhaineann le:
- teorannú úis
- rialacha maidir le cánachas scoir
- rialacha maidir le cuideachtaí coigríche rialaithe
- riail ghinearálta maidir le frith-mhí-úsáid
- rialacha maidir le neamhréireanna hibrideacha
Áiritheofar léi freisin go ndéanfar bearta frith-BEPS de chuid OECD a thrasuí ar bhealach comhordaithe, agus go ndéanfaidh na 7 mBallstát de chuid an Aontais nach comhaltaí de OECD iad amhlaidh freisin.
Ghlac an Chomhairle an treoir i gcoinne seachaint cánach ar an 12 Iúil 2016. Ghlac sí an leasú freisin, lena dtugtar isteach rialacha chun aghaidh a thabhairt ar neamhréireanna hibrideacha le córais chánach lasmuigh den Aontas ar an 29 Bealtaine.
Beidh go dtí an 31 Nollaig 2018 ag na Ballstáit leis an treoir a thrasuí ina ndlíthe agus ina rialacháin náisiúnta féin, cé is moite de na rialacha maidir le cánachas scoir, agus beidh go dtí an 31 Nollaig 2019 acu sa chás sin. Ní mór an treoir leasaithe i gcoinne seachaint cánach lena dtugtar isteach na rialacha lena gcuirtear neamhréireanna hibrideacha le tríú tíortha ó éifeacht a chur chun feidhme faoin 1 Eanáir 2020.
Maidir le Ballstáit a bhfuil rialacha spriocdhírithe acu atá chomh héifeachtach céanna leis na rialacha maidir le teorannú úis de chuid na treorach i gcoinne seachaint cánach, féadfaidh siad iad a chur i bhfeidhm go dtí go dtiocfaidh OECD ar chomhaontú maidir le híoschaighdeán nó go dtí an 1 Eanáir 2024 ar a dhéanaí.
- Council directive laying down rules against tax avoidance practices that directly affect the functioning of the internal market
- Proposal for a draft anti tax avoidance directive
Moladh ar chur chun feidhme beart i gcoinne mí-úsáid conarthaí cánach
Tugtar comhairle sa mholadh do Bhallstáit faoin mbealach a bhféadfaidís a gconarthaí cánach a athneartú i gcoinne mí-úsáid ó phleanálaithe ionsaitheacha cánach, ar bhealach a bheidh i gcomhréir le dlí an Aontais.
Athbhreithniú ar an treoir maidir le comhar riaracháin
Bhí sé mar aidhm leis an leasú ar an treoir atá ann cheana féin cleachtas a thabhairt isteach maidir le tuairisciú de réir tíre idir údaráis chánach i ndáil leis an bpríomhfhaisnéis chánach a bhaineann le cuideachtaí ilnáisiúnta. Leis an leasú, beidh na Ballstáit in ann scéimeanna seachanta cánach a bhrath agus a chosc ar bhealach níos éifeachtúla ná mar a rinneadh roimhe sin.
Ghlac an Chomhairle an dréacht-treoir ar an 25 Bealtaine 2016 tar éis an téacs a chomhaontú i mí an Mhárta 2016.
Teachtaireacht maidir le straitéis sheachtracha le haghaidh cánachas éifeachtach
Moltar sa teachtaireacht go ndéanfaidh Ballstáit an Aontais a ngníomhaíocht in aghaidh rioscaí seachtracha seachanta cánach a chomhordú ar bhealach níos dlúithe ná mar a rinneadh roimhe sin agus go gcuirfidh siad dea-rialachas cánach idirnáisiúnta chun cinn.
Cén fáth a bhfuil gá againn leis?
Cailleann Ballstáit an Aontais cuid mhór ioncaim mar gheall ar chleachtais roinnt corparáidí ilnáisiúnta maidir le pleanáil ionsaitheach chánach. Ciallaíonn sin, i measc nithe eile, go gcaithfidh cáiníocóirí eile glacadh le méadú ar an ualach cánach. Tá an cás fíoríogair nuair a áirítear go bhfuil an tAontas ag teacht as géarchéim eacnamaíoch, agus mar sin, is léir gur gá cosc a chur ar na cleachtais sin agus a áirithiú go ndéanfar an t-ualach cánach a roinnt go cothrom.
Chomh maith leis sin, beidh réiteach aonfhoirmeach uile-Aontais ar an bhfadhb seo níos éifeachtaí ná gníomhaíocht aonair a dhéanfaidh na Ballstáit iad féin. Tá sin fíor go príomha siocair go bhféadfaí níos mó bearnaí a chruthú do phleanálaithe ionsaitheacha cánach mar gheall ar éagsúlachtaí sna rialacha trasna na mBallstát nó go bhféadfaí éifeachtacht rialacha tíortha eile a lagú dá mbarr sin.
Ar deireadh, d’fhéadfaí cur leis an éiginnteacht le réitigh difriúla, agus d’fhéadfaí an t-ualach riaracháin atá ar ghnólachtaí a mhéadú freisin. Is tionscnamh uile-Aontais é an pacáiste i gcoinne seachaint cánach mar sin, atá dírithe ar aghaidh a thabhairt ar ghnéithe éagsúla de chleachtais maidir le seachaint cánach chorparáideach san Aontas.
Sa Chomhairle
Thosaigh an Chomhairle ag obair ar na tograí i mí Eanáir 2016, nuair a d’fhoilsigh an Coimisiún Eorpach iad.
Déanann an Chomhairle, ina haonar, cinntí faoi dhlíthe cánachais an Aontais, caitheann sí vóta d'aontoil, agus eisíonn Parlaimint na hEorpa a tuairim.
-
2017
29 BealtaineGlacann an Chomhairle an treoir leasaithe i gcoinne seachaint cánach
Ghlac an Chomhairle an leagan deireanach den treoir leasaithe i gcoinne seachaint cánach, lena dtugtar isteach na rialacha chun dul i ngleic le neamhréireanna hibrideacha le córais chánach i dtíortha lasmuigh den Aontas.
.Ní mór do na Ballstáit an treoir a chur chun feidhme ina ndlí náisiúnta faoin 1 Eanáir 2020.
-
2017
21 FeabhraGlacann an Chomhairle a cur chuige ginearálta faoin treoir leasaithe i gcoinne seachaint cánach
Tháinig an Chomhairle ar chomhaontú faoi théacs maidir le togra le haghaidh treoir leasaithe i gcoinne seachaint cánach. Tugtar isteach, leis an leasú, rialacha atá ina gcabhair chun aghaidh a thabhairt ar neamhréireanna hibrideacha idir an tAontas Eorpach agus tríú tíortha.
Is éard is ‘socruithe maidir le neamhréireanna hibrideacha’ ann, socruithe a úsáideann cuideachtaí ilnáisiúnta nó eintitis eile go minic. Fágann siad gur féidir sochar a bhaint as difríochtaí idir dhá thír nó níos mó ó thaobh cóireáil cánach ionstraimí airgeadais, eagraíochtaí nó aistrithe. Ar an dóigh sin, éiríonn le corparáidí a gcuid dliteanas cánach a laghdú trí chéile.
Tá sé mar aidhm ag na rialacha nua a comhaontaíodh, cosc a chur ar shocruithe den sórt sin agus ar chreimeadh an bhoinn chánach i dtíortha an Aontais.Socraíodh an dáta cur chun feidhme don treoir leasaithe don 1 Eanáir 2020. Tá go dtí an 31 Nollaig 2019 ag na Ballstáit chun an treoir a thrasuí ina ndlíthe náisiúnta agus ina rialacháin.
Is faoin gComhairle atá sé an téacs comhaontaithe den treoir leasaithe a ghlacadh go foirmiúil a luaithe a bheidh a tuairim eisithe ag Parlaimint na hEorpa faoi sin.
- Togra le haghaidh treoir ón gComhairle lena leasaítear an treoir i gcoinne seachaint cánach maidir le neamhréireanna hibrideacha le tríú tíortha - Cur chuige ginearálta, Feabhra 2017
- Togra le haghaidh treoir ón gComhairle lena leasaítear an treoir i gcoinne seachaint cánach maidir le neamhréireanna hibrideacha le tríú tíortha - comhréiteach ón Uachtaránacht, Feabhra 2017
-
2016
6 NollaigTugann an Chomhairle dá haire an dul chun cinn a rinneadh maidir leis an leasú ar neamhréireanna hibrideacha le tríú tíortha
Tháinig an Chomhairle ar chomhaontú ginearálta maidir leis an dréacht-treoir leasaithe i gcoinne seachaint cánach, atá dírithe ar ‘neamhréireanna hibrideacha’ le córais cánach tríú tíortha a chosc.
Tháinig na hairí ar chomhaontú maidir le téacs le haghaidh fhormhór na bhforálacha, agus gan ach dhá shaincheist fágtha le réiteach: rialacha a chuirfeadh ar chumas na mBallstát díolúintí teoranta a chur i bhfeidhm agus dáta an chur chun feidhme.
-
2016
26 Deireadh FómhairTogra le haghaidh treoir leasaithe maidir le cur i gcoinne seachaint cánach
D’eisigh an Coimisiún Eorpach togra chun an treoir i gcoinne seachaint cánach a leasú, a ghlac an Chomhairle i mí Iúil 2016. Baineann an leasú le neamhréireanna hibrideacha le tíortha lasmuigh den Aontas Eorpach.
-
2016
12 IúilGlacann an Chomhairle an treoir i gcoinne seachaint cánach
Rinne an Chomhairle Gnóthaí Eacnamaíocha agus Airgeadais treoir i gcoinne seachaint cánach a ghlacadh go foirmiúil.
Tiocfaidh an treoir i bhfeidhm ar an 20ú lá tar éis a foilsithe in Iris Oifigiúil an Aontais Eorpaigh.
-
2016
21 MeitheamhTagann an Chomhairle ar chomhaontú maidir leis an treoir i gcoinne seachaint cánach
Tháinig an Chomhairle ar chomhaontú maidir leis an dréacht-treoir i gcoinne seachaint cánach, tar éis nós imeachta an tosta, a d’éag ar an 20 Meitheamh 2016 gan agóid ó aon cheann de na Ballstáit.
Thug Parlaimint na hEorpa a tuairim uaithi an 8 Meitheamh 2016, agus glacfaidh an Chomhairle an treoir go foirmiúil tar éis bailchríoch a bheith curtha ar an téacs i ngach teanga oifigiúil de chuid an Aontais. -
2016
25 BealtaineCruinniú den Chomhairle Gnóthaí Eacnamaíocha agus Airgeadais
Treoir i gcoinne seachaint cánach
Bhí díospóireacht chuiditheach ag an gComhairle i ndáil le dréacht-treoir, lena bhféachtar le haghaidh a thabhairt ar chleachtais seachanta cánach atá á n-úsáid go coitianta ag cuideachtaí móra.
Laghdaigh na hAirí líon na bpríomh-shaincheisteanna oscailte atá fós le réiteach, agus chuir siad an comhaontú maidir leis an téacs siar go dtí an chéad chruinniú eile a bheidh ag Ecofin, a reáchtálfar ar an 17 Meitheamh 2016.
An straitéis sheachtrach cánach agus bearta i gcoinne mí-úsáid na gconarthaí cánach
Ghlac an Chomhairle conclúidí maidir leis an teachtaireacht ón gCoimisiún faoi straitéis sheachtrach cánach agus maidir leis an moladh ón gCoimisiún i leith bearta i gcoinne mí-úsáid na gconarthaí cánach.
Treoir maidir le comhar riaracháin i réimse an chánachais
Ghlac an Chomhairle go foirmiúil treoir maidir le faisnéis chánach faoi chuideachtaí ilnáisiúnta a mhalartú, ó tharla gur thángthas ar chomhaontú maidir leis an téacs i mí an Mhárta 2016.
Nuair a bheidh an treoir foilsithe san Iris Oifigiúil, beidh 12 mhí ag na Ballstáit leis an treoir sin a thrasuí ina dlí náisiúnta.
-
2016
8 MártaCruinniú den Chomhairle Gnóthaí Eacnamaíocha agus Airgeadais
Comhaontaíonn an Chomhairle a seasamh maidir le faisnéis a bhaineann le cúrsaí cánach a mhalartú
Chomhaontaigh an Chomhairle a seasamh i ndáil le dréacht-treoir maidir le faisnéis chánach faoi ghníomhaíochtaí cuideachtaí ilnáisiúnta a mhalartú.
Leis an treoir seo, beidh ceangal ar chuideachtaí ilnáisiúnta faisnéis a bhaineann le cúrsaí cánach a thuairisciú, ar faisnéis mhionsonraithe tír-ar-thír í. Áirítear an méid a leanas ar an bhfaisnéis atá le tuairisciú:
- ioncam
- brabúis
- cánacha a íocadh
- caipiteal
- tuillimh
- sócmhainní soláimhsithe
- líon na bhfostaithe
Faoin treoir, beidh oibleagáid ar chuideachtaí ilnáisiúnta a dtuarascáil tír-ar-thír a sheoladh chuig údaráis chánach an Bhallstáit ina bhfuil sí lonnaithe chun críocha cánach, an bhliain fhioscach 2016 san áireamh. Cumhdófar cuideachtaí ilnáisiúnta leis na rialacha nua arb ionann a n-ioncam comhdhlúite iomlán grúpa agus EUR 750 milliún ar a laghad.
Faoin treoir, malartóidh na húdaráis náisiúnta chánach faisnéis a thuairiscíonn na cuideachtaí ilnáisiúnta go huathoibríoch.
-
2016
12 FeabhraCruinniú den Chomhairle Gnóthaí Eacnamaíocha agus Airgeadais
Pléann an Chomhairle an pacáiste agus leagann sí amlíne uaillmhianach amach
Bhí an chéad phlé ag an gComhairle maidir leis an bpacáiste i gcoinne seachaint cánach.
Tá de chuspóir ag Uachtaránacht na Comhairle teacht ar chomhaontú polaitiúil maidir leis na nithe a leanas faoi shamhradh na bliana 2016:
- dréacht-treoir maidir le hathbhreithniú ar an gcomhar riaracháin
- dréacht-treoir i gcoinne seachaint cánach
Tá sé d'aidhm teacht ar chomhaontú maidir leis an gcéad-treoir i mí Mhárta agus dul chun cinn a dhéanamh chomh gasta agus is féidir i ndáil leis na gnéithe eile.
Táimid dóchasach, leis an amchlár uaillmhianach seo, go mbeidh an tAontas Eorpach chun tosaigh ó thaobh chur chun feidhme na gconclúidí ó ECFE anuraidh i dtaca le creimeadh an bhoinn chánach agus aistriú brabúis
arsa Jeroen Dijsselbloem, Aire Airgeadais na hÍsiltíre agus Uachtarán na Comhairle.
-
2016
28 EanáirCuireann an Coimisiún Eorpach an pacáiste i gcoinne seachaint cánach i láthair
Foilsíonn an Coimisiún pacáiste i gcoinne seachaint cánach le ‘cánachas corparáideach san Aontas a dhéanamh níos córa, níos simplí agus níos éifeachtaí.’