Pakkett kontra l‑evitar tat‑taxxa
X'inhu?
Il-'pakkett kontra l-evitar tat-taxxa' huwa sett ta' inizjattivi leġislattivi u mhux leġislattivi tal-UE, bl-għan li jsaħħu r-regoli kontra l-evitar tat-taxxa korporattiva u biex it-tassazzjoni korporattiva fl-UE tkun aktar ġusta, sempliċi u effettiva.
Dan jibbaża fuq ir-rakkomandazzjonijiet tal-2015 mill-OECD (Organizzazzjoni għall-Kooperazzjoni u l-Iżvilupp Ekonomiċi) biex jiġu indirizzati l-erożjoni tal-bażi tat-taxxa u t-trasferiment tal-profitt (BEPS).
Il-miri tal-pakkett:
- jiġi evitat l-ippjanar aggressiv tat-taxxa
- żieda fit-trasparenza
- jinħoloq ambjent aktar ġust għan-negozji fl-UE
X'fih?
Il-pakkett jikkonsisti mill-elementi li ġejjin:
Komunikazzjoni dwar pakkett kontra l‑evitar tat‑taxxa
Il-komunikazzjoni tispjega r-raġunament politiku u ekonomiku wara l-miżuri proposti fil-pakkett.
Direttiva kontra l‑evitar tat‑taxxa
Id-direttiva tistabbilixxi numru ta' miżuri legalment vinkolanti kontra l-ippjanar aggressiv tat-taxxa. B'mod partikolari, timmira li tindirizza sitwazzjonijiet fejn gruppi korporattivi jieħdu vantaġġ mid-differenzi bejn is-sistemi nazzjonali tat-taxxa sabiex inaqqsu l-obbligi ġenerali tagħhom tat-taxxa. Għal dan l-għan hija tipprevedi dispożizzjonijiet legali kontra l-ippjanar aggressiv tat-taxxa relatati ma’:
- limitazzjoni tal-imgħax
- regoli dwar it-tassazzjoni tal-ħruġ
- regoli għall-kumpaniji kkontrollati minn barra l-pajjiż
- regola ġenerali kontra l-abbuż
- regoli dwar diskrepanzi ibridi
Hija ser tiżgura wkoll li l-miżuri tal-OECD kontra l-BEPS jiġu trasposti b'mod koordinat, inkluż minn 7 stati membri tal-UE li mhumiex membri tal-OECD.
Il-Kunsill adotta d-direttiva kontra l-evitar tat-taxxa fit-12 ta’ Lulju 2016. Adotta wkoll l-emenda tagħha, li tintroduċi regoli biex jiġu indirizzati d-diskrepanzi ibridi mas-sistemi fiskali ta’ pajjiżi barra l-UE, fid-29 ta’ Mejju 2017.
L-istati membri ser ikollhom sal-31 ta' Diċembru 2018 biex jittrasponuha fil-liġijiet u r-regolamenti nazzjonali tagħhom, għajr ir-regoli dwar it-tassazzjoni tal-ħruġ, li għalihom ser ikollhom sal-31 ta' Diċembru 2019. Id-direttiva emendata kontra l-evitar tat-taxxa li tintroduċi r-regoli li jinnewtralizzaw id-diskrepanzi ibridi ma’ pajjiżi terzi għandha tiġi implimentata qabel l-1 ta’ Jannar 2020.
L-istati membri li għandhom regoli mmirati li huma effettivi daqs ir-regoli għal-limitazzjoni tal-imgħax tad-direttiva kontra l-evitar tat-taxxa, jistgħu japplikawhom sakemm l-OECD tilħaq qbil dwar standard minimu, jew sa mhux aktar tard mill-1 ta' Jannar 2024.
- Council directive laying down rules against tax avoidance practices that directly affect the functioning of the internal market
- Proposal for a draft anti tax avoidance directive
Rakkomandazzjoni dwar l-implimentazzjoni ta' miżuri kontra l-abbuż mit-trattat dwar it-taxxa
Ir-rakkomandazzjoni tipprovdi pariri lill-istati membri dwar kif isaħħu t-trattati tagħhom dwar it-taxxa kontra l-abbuż minn ippjanar aggressiv tat-taxxa, b'mod li jkun konformi mad-dritt tal-UE.
Reviżjoni tad-direttiva dwar kooperazzjoni amministrattiva
L-għan tal-emenda tad-direttiva eżistenti kien li tintroduċi l-prattika ta' rapport għal kull pajjiż bejn l-awtoritajiet tat-taxxa dwar informazzjoni ewlenija relatata mat-taxxa li tirrigwarda kumpaniji multinazzjonali. L-emenda tippermetti lill-istati membri jindividwaw u jipprevjenu skemi ta' evitar tat-taxxa b'mod aktar effiċjenti.
Il-Kunsill adotta l-abbozz ta’ direttiva fil-25 ta’ Mejju 2016, wara l-qbil tiegħu dwar it-test f’Marzu 2016.
Komunikazzjoni dwar strateġija esterna għal tassazzjoni effettiva
Il-komunikazzjoni tipproponi li l-istati membri tal-UE jikkoordinaw l-azzjoni tagħhom kontra r-riskji esterni ta' evitar tat-taxxa iktar mill-qrib u jippromwovu governanza tajba tat-taxxa internazzjonali.
Għalfejn għandna bżonnu?
L-istati membri tal-UE jsofru minn telf sinifikanti ta' dħul minħabba l-prattiki tal-ippjanar aggressiv tat-taxxa minn xi korporazzjonijiet multinazzjonali. Fost affarijiet oħra, dan ifisser ukoll li kontribwenti oħra jkollhom jieħdu piż akbar tat-taxxa. Is-sitwazzjoni hija partikolarment serja minħabba l-fatt li l-UE ħierġa minn kriżi ekonomika, u għaldaqstant hemm ħtieġa ċara li jiġu evitati dawn il-prattiki u jiġi żgurat li l-piż tat-taxxa jinqasam b'mod ġust.
Barra minn hekk, soluzzjoni uniformi madwar l-UE kollha għal din il-problema tkun iktar effettiva minn azzjoni individwali meħuda mill-istati membri għal rashom. Dan prinċipalment minħabba l-fatt li d-differenzi fir-regoli madwar l-istati membri jistgħu joħolqu lakuni ulterjuri għal ippjanar aggressiv tat-taxxa, jew idgħajfu l-effettività tar-regoli ta' pajjiżi oħra.
Fl-aħħar nett, soluzzjonijiet differenti jistgħu jsaħħu l-inċertezza kif ukoll iżidu l-piż amministrattiv fuq in-negozji. Il-pakkett dwar l-evitar tat-taxxa huwa għaldaqstant inizjattiva madwar l-UE biex tindirizza d-diversi aspetti tal-prattiki magħrufa tal-evitar tat-taxxa korporattiva fl-UE.
Fil‑Kunsill
Il-Kunsill jaħdem fuq il-proposti f'Jannar 2016, wara l-pubblikazzjoni tagħhom mill-Kummissjoni Ewropea.
Il-Kunsill jieħu d-deċiżjonijiet dwar liġijiet ta' tassazzjoni tal-UE waħdu, billi jivvota b'mod unanimu, u l-Parlament Ewropew joħroġ l-opinjoni tiegħu.
-
2017
29 ta' MejjuIl-Kunsill jadotta d-direttiva emendata kontra l-evitar tat-taxxa
Il-Kunsill adotta l-verżjoni finali tad-direttiva emendata kontra l-evitar tat-taxxa, bl-introduzzjoni tar-regoli li jindirizzaw id-diskrepanzi ibridi mas-sistemi tat-taxxa f'pajjiżi barra mill-UE.
L-istati membri għandhom jimplimentaw id-direttiva fil-liġi nazzjonali tagħhom sal-1 ta' Jannar 2020.
-
2017
21 ta' FrarIl-Kunsill jadotta l-approċċ ġenerali tiegħu dwar id-direttiva emendata kontra l-evitar tat-taxxa
Il-Kunsill qabel dwar test għal proposta dwar direttiva emendata kontra l-evitar tat-taxxa. L-emenda tintroduċi regoli li jgħinu biex jiġu indirizzati diskrepanzi ibridi bejn l-UE u pajjiżi terzi.
L-'arranġamenti ta' diskrepanzi ibridi' huma arranġamenti użati ta' sikwit minn kumpaniji jew entitajiet multinazzjonali oħra. Dawn jagħmluha possibbli li jiġu sfruttati d-differenzi bejn żewġ pajjiżi jew aktar fit-trattament fiskali ta’ strumenti, organizzazzjonijiet jew trasferimenti finanzjarji. B’dan il-mod, il-korporazzjonijiet jirnexxielhom inaqqsu l-obbligazzjonijiet tat-taxxa ġenerali tagħhom.
Ir-regoli li għadhom kif ġew maqbula għandhom l-għan li jipprevjenu tali arranġamenti u jipprevjenu l-erożjoni ta’ bażijiet taxxabbli fil-pajjiżi tal-UE.Id-data ta’ implimentazzjoni għad-direttiva emendata ġiet stabbilita għall-1 ta’ Jannar 2020. L-istati membri għandhom jittrasponu d-direttiva f'liġijiet u regolamenti nazzjonali sal-31 ta’ Diċembru 2019.
It-test maqbul tad-direttiva emendata għandu jiġi adottat formalment mill-Kunsill ladarba l-Parlament Ewropew ikun ta l-opinjoni tiegħu dwaru.
- Proposta għal direttiva tal-Kunsill li temenda direttiva kontra l-evitar tat-taxxa fir-rigward ta' diskrepanzi ibridi ma' pajjiżi terzi - approċċ Ġenerali, Frar 2017
- Proposta għal direttiva tal-Kunsill li temenda direttiva kontra l-evitar tat-taxxa fir-rigward ta' diskrepanzi ibridi ma' pajjiżi terzi - kompromess tal-presidenza, Frar 2017
-
2016
6 ta' DiċembruIl-Kunsill jagħmel progress fl-emenda dwar id-diskrepanzi ibridi ma' pajjiżi terzi
Il-Kunsill kiseb kunsens ġenerali dwar l-abbozz ta' direttiva emendata kontra l-evitar tat-taxxa, li għandha l-għan li tevita 'diskrepanzi ibridi' mas-sistemi tat-taxxa ta' pajjiżi terzi.
Il-ministri qablu dwar test għall-biċċa l-kbira tad-dispożizzjonijiet, u tħallew biss żewġ kwistjonijiet biex jiġu solvuti: regoli li jippermettu lill-istati membri japplikaw eżenzjonijiet limitati u d-data ta' implimentazzjoni.
-
2016
26 ta' OttubruProposta għal direttiva emendata kontra l-evitar tat-taxxa
Il-Kummissjoni Ewropea ħarġet proposta sabiex temenda d-direttiva kontra l-evitar tat-taxxa, li ġiet adottata mill-Kunsill f’Lulju 2016. L-emenda tikkonċerna diskrepanzi ibridi ma’ pajjiżi barra mill-UE.
-
2016
12 ta' LuljuIl-Kunsill jadotta d-direttiva kontra l-evitar tat-taxxa
Il-Kunsill Affarijiet Ekonomiċi u Finanzjarji adotta formalment id-direttiva kontra l-evitar tat-taxxa.
Din id-direttiva ser tidħol fis-seħħ fl-għoxrin jum wara dak tal-pubblikazzjoni tagħha fil-Ġurnal Uffiċjali tal-UE.
-
2016
21 ta' ĠunjuIl-Kunsill jilħaq qbil dwar id-direttiva kontra l-evitar tat-taxxa
Il-Kunsill laħaq qbil dwar l-abbozz ta' direttiva kontra l-evitar tat-taxxa, wara proċedura ta' silenzju, li skadiet fl-20 ta' Ġunju 2016 mingħajr ma tqajmet oġġezzjoni minn xi stat membru.
Il-Parlament Ewropew ta l-opinjoni tiegħu fit-8 ta' Ġunju 2016, u l-Kunsill ser jadotta formalment id-direttiva wara li t-test ikun ġie ffinalizzat bil-lingwi uffiċjali kollha tal-UE. -
2016
25 ta' MejjuLaqgħa tal-Kunsill Affarijiet Ekonomiċi u Finanzjarji
Direttiva kontra l‑evitar tat‑taxxa
Il-Kunsill kellu dibattitu kostruttiv dwar abbozz ta' direttiva, bil-mira li tindirizza l-prattiki tal-evitar tat-taxxa użati b'mod komuni minn kumpaniji kbar.
Il-Ministri naqqsu l-għadd ta' kwistjonijiet pendenti ewlenin li għad fadal jiġu riżolti, u pposponew il-ftehim dwar it-test għal-laqgħa li jmiss tal-Ecofin li hija skedata li ssir fis-17 ta' Ġunju 2016.
Strateġija dwar it-tassazzjoni esterna u miżuri kontra l-abbuż tat-taxxa
Il-Kunsill adotta konklużjonijiet dwar il-komunikazzjoni mill-Kummissjoni rigward strateġija dwar it-tassazzjoni esterna u rigward ir-rakkomandazzjoni tal-Kummissjoni dwar miżuri kontra l-abbuż tat-trattat dwar it-taxxa.
Direttiva dwar il-kooperazzjoni amministrattiva fil-qasam tat-tassazzjoni
Il-Kunsill formalment adotta d-direttiva dwar l-iskambju ta' informazzjoni relatata mat-taxxa dwar il-kumpaniji multinazzjonali, wara li ntlaħaq il-qbil tiegħu dwar it-test f'Marzu 2016.
Ladarba d-direttiva tkun ġiet ippubblikata fil-Ġurnal Uffiċjali, l-istati membri jkollhom 12-il xahar biex jittrasponu d-direttiva fil-liġi nazzjonali tagħhom.
-
2016
8 ta' MarzuLaqgħa tal-Kunsill Affarijiet Ekonomiċi u Finanzjarji
Il‑Kunsill jilħaq qbil dwar il‑pożizzjoni tiegħu rigward l‑iskambju ta' informazzjoni relatata mat‑taxxa
Il‑Kunsill laħaq qbil dwar il‑pożizzjoni tiegħu rigward abbozz ta' direttiva dwar l‑iskambju ta' informazzjoni relatata mat‑taxxa dwar l‑attivitajiet ta' kumpaniji multinazzjonali.
Id-direttiva ser titlob lill-kumpaniji multinazzjonali jirrapportaw informazzjoni relatata mat-taxxa, b'deskrizzjoni għal kull pajjiż. L-informazzjoni li għandha tiġi rrapportata tinkludi:
- dħul
- profitti
- taxxa mħallsa
- kapital
- qligħ
- assi tanġibbli
- in-numru ta' impjegati
Skont id‑direttiva, il-kumpaniji multinazzjonali ser ikunu obbligati jippreżentaw ir-rapport tagħhom għal kull pajjiż lill‑awtoritajiet tat‑taxxa tal‑istat membru fejn ikunu residenti fiskali, inkluż għas‑sena fiskali 2016. Ir-regoli l-ġodda ser ikopru kumpaniji multinazzjonali bi dħul totali konsolidat tal‑grupp ta' mill‑anqas €750 miljun.
Skont id-direttiva l-awtoritajiet tat-taxxa nazzjonali ser ikollhom skambju awtomatiku tal-informazzjoni rapportata mill-kumpaniji multinazzjonali.
-
2016
12 ta' FrarLaqgħa tal-Kunsill Affarijiet Ekonomiċi u Finanzjarji
Il-Kunsill jiddiskuti l-pakkett u jistabbilixxi skeda kronoloġika ambizzjuża
Il-Kunsill kellu l-ewwel diskussjoni dwar il-pakkett kontra l‑evitar tat‑taxxa.
Il-Presidenza tal-Kunsill stabbiliet l-objettiv li jintlaħaq qbil politiku sas-sajf tal-2016 dwar:
- abbozz ta' direttiva dwar ir-reviżjoni tal-kooperazzjoni amministrattiva
- abbozz ta' direttiva kontra l‑evitar tat‑taxxa
Il-mira hija li jintlaħaq qbil dwar l-ewwel direttiva f'Marzu u li jsir progress kemm jista' jkun malajr fl-elementi l-oħra.
Qed nittamaw li din l-iskeda ta' żmien ambizzjuża ser tikkonferma li l-UE tinsab fuq quddiem fl-implimentazzjoni tal-konklużjonijiet tas-sena li għaddiet tal-OECD dwar l-erożjoni tal-bażi tat-taxxa u t-trasferiment tal-profitt
Jeroen Dijsselbloem, Ministru għall-Finanzi tan-Netherlands u President tal-Kunsill.
-
2016
28 ta' JannarIl-Kummissjoni Ewropea tippreżenta l-pakkett kontra l‑evitar tat‑taxxa
Il-Kummissjoni tippubblika l-pakkett kontra l‑evitar tat‑taxxa 'għal tassazzjoni korporattiva aktar ġusta, sempliċi u effettiva fl-UE.'