Kunsill Affarijiet Barranin, 17 ta' Ottubru 2022

Riżultati prinċipali

Il-Kunsill ħa għadd ta' deċiżjonijiet importanti, li jirfdu d-determinazzjoni tal-UE fl-appoġġ tal-Ukrajna kontra l-aggressjoni tar-Russja, l-avvanz tal-paċi u l-istabbiltà fil-Kawkasu tan-Nofsinhar u l-pożizzjoni favur id-drittijiet tal-bniedem fl-Iran.

L-aggressjoni Russa kontra l-Ukrajna

Il-Kunsill Affarijiet Barranin kellu skambju ta' fehmiet dwar l-aggressjoni Russa kontra l-Ukrajna.

Qabel id-diskussjoni tal-Kunsill, il-Ministru għall-Affarijiet Barranin tal-Ukrajna, Dmytro Kuleba, indirizza fil-qosor lill-ministri tal-UE permezz ta' vidjokonferenza, u infurmahom dwar l-aħħar żviluppi fuq il-post u l-prijoritajiet attwali tal-Ukrajna.

Putin qed jitlef politikament u moralment. Minkejja dan, huwa qed ikompli bl-eskalazzjoni, inkluż [permezz ta'] attakki indiskriminati fuq miri ċivili madwar l-Ukrajna, kif rajna dalgħodu. Ħadna nota wkoll tal-vot fl-Assemblea Ġenerali tan-Nazzjonijiet Uniti (AĠNU) il-ġimgħa li għaddiet. Dan il-vot ikkonferma l-iżolament internazzjonali tar-Russja. Iżda ma nistgħux inqisuh bħala fatt u jeħtieġ li nibqgħu fit-triq tal-istrateġija tripla tagħna: appoġġ lill-Ukrajna, pressjoni fuq ir-Russja u indirizzar tal-effetti tal-gwerra, minħabba li din il-gwerra qed taffettwa lid-dinja kollha. Josep Borrell, Rappreżentant Għoli għall-Affarijiet Barranin u l-Politika ta' Sigurtà

Il-ministri ġew aġġornati dwar l-eskalazzjoni militari u l-attakki li għaddejjin fi Kiev, u ħadu deċiżjonijiet importanti. Huma qablu li jistabbilixxu Missjoni ta' Assistenza Militari tal-UE biex tappoġġa l-Forzi Armati Ukreni. Il-missjoni ser tħarreġ madwar 15,000 truppa fit-territorju tal-UE. Huma qablu wkoll li jallokaw €500 miljun oħra taħt il-Faċilità Ewropea għall-Paċi biex jiffinanzjaw konsenji għall-forzi tad-difiża Ukreni, biex b'hekk l-assistenza militari tal-UE għall-Ukrajna titla' għal total ta' €3.1 biljun.

Il-Kunsill ġie infurmat ukoll dwar is-sejbiet ġodda ta' atroċitajiet tal-massa u rapporti dwar ħtif sistematiku ta' tfal mill-Ukrajna mill-forzi Russi, u enfasizza li l-ġlieda kontra l-impunità trid tissaħħaħ.

• Ukrajna: l-UE tistabbilixxi missjoni ta' assistenza militari biex tappoġġa aktar il-Forzi Armati Ukreni
• Ukrajna: il-Kunsill jaqbel dwar aktar appoġġ taħt il-Faċilità Ewropea għall-Paċi

Ir-relazzjonijiet bejn l-UE u ċ-Ċina

Il-Kunsill ikkonferma mill-ġdid il-validità tal-approċċ multidimensjonali tal-UE dwar iċ-Ċina - sieħeb li miegħu l-UE trid tinvolvi ruħha , kompetitur iebes, u avversarju sistemiku.

Hemm appoġġ sħiħ fost l-istati membri tal-UE biex ikomplu jinvolvu ruħhom fi kwistjonijiet ta' interess għall-UE - pereżempju t-tibdil fil-klima - biex jiġi evitat li d-dipendenzi jinbidlu f'vulnerabbiltajiet.

Il-ministri enfasizzaw li l-UE teħtieġ li ssaħħaħ ir-reżiljenza interna tagħha, u taħdem mas-sħab internazzjonali.

Ġrajjiet kurrenti

Il-ministri tal-UE kellhom skambju ta' fehmiet dwar l-Iran u adottaw miżuri restrittivi kontra 11-il individwu u 4 entitajiet, immirati lejn dawk assoċjati mal-mewt ta' Mahsa Amini u mar-repressjoni vjolenti tal-protesti paċifiċi.

Ninsabu xxukkjati bil-qtil s'issa inspjegabbli ta' Mahsa Amini, u bir-repressjoni brutali tal-forzi tas-sigurtà kontra dimostranti li għadhom jitilfu ħajjithom jew qed jinżammu f'idejn il-forzi tas-sigurtà. Il-ministri kollha esprimew it-tħassib serju tagħhom dwar dawn il-fatti. [...] Nixtieq nieħu din l-opportunità biex nappella lill-gvern Iranjan biex itemm minnufih din il-vjolenza, biex jeħles lil dawk detenuti, u biex jippermetti servizzi normali tal-internet u fluss ta' informazzjoni. Josep Borrell, Rappreżentant Għoli għall-Affarijiet Barranin u l-Politika ta' Sigurtà

Il-ministri kkunsidraw ukoll l-użu rrappurtat mir-Russja fil-gwerra fl-Ukrajna ta' drones allegatament fornuti mill-Iran.

• Iran: l-UE tissanzjona l-awturi ta' ksur serju tad-drittijiet tal-bniedem

Il-ministri ddiskutew l-elezzjonijiet li saru fil-Bożnija-Ħerzegovina fit-2 ta' Ottubru. B'mod ġenerali, l-elezzjonijiet kienu kompetittivi u organizzati tajjeb, skont ir-rapporti tal-OSKE/ODIHR, iżda kienu kkaratterizzati minn nuqqas ta' fiduċja fl-istituzzjonijiet pubbliċi u retorika etnikament diviżiva. Ir-riżultati finali għad iridu jiġu ċċertifikati minħabba diversi allegazzjonijiet ta' frodi elettorali.

Biex il-pajjiż jibqa' fi triqtu lejn l-UE, il-ġimgħa li għaddiet il-Kummissjoni rrakkomandat li jingħata status ta' kandidat lill-Bożnija-Ħerzegovina bil-fehim li għandhom jittieħdu għadd ta' passi mill-gvern u l-awtoritajiet leġiżlattivi fil-livelli kollha, b'enfasi fuq it-twettiq tar-riformi, bħala kwistjoni ta' prijorità assoluta.

Il-Kunsill iddiskuta wkoll il-Libanu, filwaqt li kkonferma li għadu estremament imħasseb dwar is-sitwazzjoni soċjoekonomika fil-pajjiż u l-inabbiltà tal-forzi politiċi tiegħu li jipproċedu bir-riformi tant meħtieġa. Il-ministri appellaw lill-awtoritajiet Libaniżi biex jeleġġu President ġdid qabel l-aħħar tax-xahar, u laqgħu l-ftehim bejn il-Libanu u Iżrael dwar id-delineazzjoni tal-fruntiera marittima tagħhom.

Fir-rigward tal-Etjopja, il-ministri enfasizzaw li s-sitwazzjoni fuq il-post qatt ma kienet daqshekk ħażina, kemm fil-livell militari kif ukoll f'dak umanitarju, u li soluzzjoni politika biss għall-konflitt hija sostenibbli.

• Etjopja: Dikjarazzjoni tar-Rappreżentant Għoli f'isem l-UE dwar il-ġlied intens fit-tramuntana tal-pajjiż

Deċiżjonijiet oħra tal-Kunsill

Il-Kunsill iddeċieda li jiskjera massimu ta' 40 espert tal-UE għall-monitoraġġ tan-naħa Armena tal-fruntiera internazzjonali mal-Ażerbajġan bl-objettiv tal-monitoraġġ, l-analiżi u r-rappurtar dwar is-sitwazzjoni fir-reġjun.

• Armenja-Ażerbajġan: L-UE tistabbilixxi kapaċità ta' monitoraġġ tul il-fruntieri internazzjonali

Il-Kunsill adotta deċiżjoni li ġġedded il-miżuri restrittivi eżistenti kontra ISIL/Da'esh u Al-Qaeda u persuni, gruppi, impriżi u entitajiet assoċjati magħhom b'sena sal-31 ta' Ottubru 2023.

• ISIL/Da'esh u Al-Qaeda: Miżuri restrittivi tal-UE mġedda b'sena oħra

Il-Kunsill approva konklużjonijiet dwar ir-Rieżami dwar il-Kummerċ u tas-Sostenibbiltà.

• Konklużjonijiet tal-Kunsill rigward ir-Rieżami dwar il-Kummerċ u s-Sostenibbiltà