Kunsill Ġustizzja u Affarijiet Interni, 12-13/10/2017, 12 u 13 ta' Ottubru 2017

Riżultati ewlenin - 13 ta' Ottubru

Kodiċi tal-Fruntieri ta' Schengen

Il-Ministri kellhom l-ewwel skambju ta' fehmiet dwar il-proposta tal-Kummissjoni Ewropea biex jiġi emendat il-Kodiċi tal-Fruntieri ta' Schengen. Din tikkonċerna regoli dwar l-introduzzjoni mill-ġdid b'mod temporanju tal-kontrolli fil-fruntieri interni. Id-diskussjonijiet dwar din il-proposta issa ser ikomplu fuq livell tekniku.

Il-ministri ħadu wkoll nota tar-rakkomandazzjoni tal-Kummissjoni dwar l-implimentazzjoni tar-regoli attwali.

"Ħadd ma jikkontesta l-benefiċċji taż-żona Schengen, u jeħtieġ li nsibu l-aħjar mod kif nipproteġu dawn il-kisbiet filwaqt li fl-istess ħin inkunu nistgħu nwieġbu għat-theddid li qed jevolvi u li qed jiffaċċjaw xi stati membri. Illum kellna dibattitu tajjeb u onest u issa ser inkomplu b'eżami dettaljat tal-proposta."

Anders Anvelt, Ministru Estonjan għall-Intern

Il-ġlieda kontra t-terroriżmu

Il-ministri kellhom skambju ta' fehmiet dwar modi kif tittejjeb il-kooperazzjoni bejn l-atturi fil-qasam tal-infurzar tal-liġi u fil-qasam tal-intelligence fil-ġlieda kontra t-terroriżmu, filwaqt li jiġi rispettat b'mod sħiħ il-fatt li s-sigurtà nazzjonali hija kompetenza esklużiva tal-istati membri.

Migrazzjoni u asil

Il-ministri ddiskutew b'mod informali r-rwol li r-risistemazzjoni jista' jkollha fil-ġestjoni ġenerali tal-migrazzjoni u fil-politiki tal-UE dwar l-asil, b'segwitu għar-rakkomandazzjoni reċenti tal-Kummissjoni.

Il-Kunsill ħa nota wkoll tal-progress li sar fis-seba' fajls leġislattivi li lkoll flimkien jiffurmaw ir-riforma tas-Sistema Ewropea Komuni tal-Asil (SEKA).

• Dwar waħda mill-proposti (Aġenzija tal-UE għall-Asil), kien intlaħaq qbil politiku ġenerali ad referendum mal-Parlament Ewropew f'Ġunju 2017
• Dwar żewġ fajls (ir-regolamenti dwar l-Eurodac u dwar Standards għall-Kwalifika) għadhom għaddejjin in-negozjati mal-Parlament Ewropew
• Dwar żewġ proposti oħra (ir-Regolament dwar ir-Risistemazzjoni u d-Direttiva dwar il-Kondizzjonijiet ta' Akkoljenza) il-presidenza għandha l-għan li tikseb mandat tal-Kunsill u, jekk possibbli, tibda n-negozjati mal-Parlament Ewropew qabel l-aħħar tas-sena
• Dwar fajl ieħor (ir-regolament dwar proċeduri ta' asil), il-ħidma miexja 'l quddiem fil-korpi preparatorji tal-Kunsill
• Dwar il-kwistjoni tas-solidarjetà u r-responsabbiltà (Dublin), tmexxew 'il quddiem l-isforzi biex jinstab approċċ komuni, filwaqt li nbena fuq il-ħidma tal-presidenzi preċedenti.

Riżultati ewlenin - 12 ta' Ottubru

Uffiċċju tal-Prosekutur Pubbliku Ewropew

Ir-regolament li jistabbilixxi l-Uffiċċju tal-Prosekutur Pubbliku Ewropew (UPPE) ġie adottat minn dawk l-istati membri li qed jieħdu sehem fil-kooperazzjoni msaħħa. L-UPPE ser ikun responsabbli għall-investigazzjoni, il-prosekuzzjoni u t-tressiq quddiem il-ġustizzja tal-awturi ta' reati kontra l-interessi finanzjarji tal-Unjoni. Dan ser jgħaqqad l-isforzi marbutin mal-infurzar tal-liġi fuq livell nazzjonali u Ewropew fil-ġlieda kontra l-frodi fil-konfront tal-UE.

Kooperazzjoni ġudizzjarja f'materji kriminali

Il-ministri ddiskutew ir-regolament propost biex tiġi estiża s-Sistema Ewropea ta’ Informazzjoni ta’ Rekords Kriminali (ECRIS) eżistenti billi tiġi stabbilita sistema ċentralizzata. Maġġoranza ta' stati membri qablu li s-sistema għandu jkun fiha informazzjoni dwar ċittadini ta' pajjiżi terzi kkundannati, anki jekk il-persuna jkollha wkoll ċittadinanza tal-UE. Il-ministri ddiskutew ukoll il-kriterji biex jiddaħħlu l-marki tas-swaba' fis-sistema ECRIS. Filwaqt li għadd ta' ministri qiesu l-kriterji ta' sentenza ta' kustodja għal reat imwettaq b'mod intenzjonali bħala kompromess ibbilanċjat, hi meħtieġa ħidma ulterjuri.

Il-ministri kellhom ukoll dibattitu ta' orjentazzjoni dwar ir-regolament propost dwar ir-rikonoxximent reċiproku ta' ordnijiet ta' ffriżar u ta' konfiska u appoġġaw b'mod ġenerali l-inklużjoni ta' sistemi ta' konfiska preventiva fl-ambitu tar-regolament, dment li l-ordni ta' konfiska tkun marbuta b'mod evidenti mal-attivitajiet kriminali u salvagwardji proċedurali adegwati jkunu japplikaw.

"L-Unjoni Ewropea tiffaċilita l-ħajja taċ-ċittadini tagħha, iżda taħdem ukoll bla heda biex tiżgura li l-kriminali ma jieħdux vantaġġ mill-benefiċċji li tipprovdi. Il-kooperazzjoni fil-ġustizzja kriminali, inkluż permezz tal-kondiviżjoni tal-informazzjoni dwar il-kundanni u r-rikonoxximent reċiproku tal-ordnijiet ta' ffriżar u ta’ konfiska hija essenzjali biex jinkiseb dan. Dawn l-għodod ser jippermettulna niżguraw li l-kriminali ma jistgħux sempliċement jaħarbu mill-imgħoddi tagħhom billi jmorru f'pajjiż differenti jew billi jressqu l-assi tagħhom fuq naħa oħra tal-fruntieri u jkomplu bl-attivitajiet tagħhom."

Urmas Reinsalu, Ministru Estonjan għall-Ġustizzja

Drittijiet fundamentali

Il-Kunsill adotta konklużjonijiet dwar l-applikazzjoni tal-Karta tad-Drittijiet Fundamentali fl-2016. Dawn il-konklużjonijiet jirriflettu uħud mill-kwistjonijiet l-aktar pertinenti, bħall-ġlieda kontra r-razziżmu u l-vjolenza fuq in-nisa.