Proċedura komuni tal-ażil

Simplifikazzjoni tal-proċedura tal-ażil

Sabiex jiġu armonizzati l-proċeduri tal-ażil tal-UE, ir-regolament emendat ser jissostitwixxi d-direttiva dwar il-proċedura tal-ażil. Fost affarijiet oħra, ir-regoli riveduti:

• jintroduċu proċeduri obbligatorji fuq il-fruntiera biex issir valutazzjoni malajr fil-fruntieri esterni tal-UE jekk l-applikazzjonijiet ikunux bla bażi jew inammissibbli
• jistabbilixxu standards għad-drittijiet u l-obbligi ta' dawk li jfittxu l-ażil
• jipprevjenu l-abbuż tas-sistema billi jiddeskrivu proċeduri ċari

Proċedura fuq il-fruntiera

Ir-regolament dwar il-proċedura tal-ażil jintroduċi proċeduri obbligatorji fuq il-fruntiera għal ċerti kategoriji ta' applikanti, bl-għan li ssir valutazzjoni malajr fil-fruntieri esterni tal-UE jekk l-applikazzjonijiet ikunux bla bażi jew inammissibbli.

Il-persuni li jkunu soġġetti għall-proċedura tal-ażil fuq il-fruntiera mhumiex awtorizzati jidħlu fit-territorju tal-istat membru.

Aspetti ewlenin tal-proċedura fuq il-fruntiera:

Hija tintroduċi proċedura obbligatorja fuq il-fruntiera għal persuni li joħolqu riskju għas-sigurtà, li jqarrqu bl-awtoritajiet billi jipprovdu informazzjoni falza jew iżommu informazzjoni, jew li jkunu ġejjin minn pajjiżi b'rata baxxa ta' rikonoxximent.

Hija tistabbilixxi kapaċità adegwata f'kull stat membru, f'termini ta' akkoljenza u riżorsi umani, biex jiġu eżaminati, kwalunkwe mument, għadd speċifiku ta' applikazzjonijiet bħala parti mill-proċedura fuq il-fruntiera. Fil-livell tal-UE din il-kapaċità adegwata ġiet stabbilita għal 30 000.

Il-kapaċità adegwata ta' kull stat membru ser tiġi stabbilita abbażi ta' formula li tqis:

• l-għadd ta' qsim irregolari tal-fruntieri
• wasliet ta' tfittxija u salvataġġ
• rifjuti ta' dħul fuq perjodu ta' tliet snin

Aspetti ewlenin oħra tal-proċedura fuq il-fruntiera huma:

L-introduzzjoni ta' sistema ta' prijoritizzazzjoni biex tingħata prijorità lil min għandu jkun soġġett għall-proċedura fuq il-fruntiera, jiġifieri applikanti li għandhom prospetti ogħla li jiġu rritornati, li jippreżentaw riskju għas-sigurtà jew li mhumiex minorenni jew membri tal-familja. Meta l-proċedura fuq il-fruntiera tiġi applikata għal din l-aħħar kategorija, għandha tingħata prijorità lill-eżami tal-applikazzjonijiet tagħhom.

Hija tipprevedi wkoll eċċezzjonijiet għall-proċedura fuq il-fruntiera, pereżempju għal minorenni li ma joħolqux riskju għas-sigurtà jew fejn l-appoġġ meħtieġ ma jistax jiġi pprovdut lil applikanti bi bżonnijiet speċjali ta' akkoljenza jew dawk proċedurali.

U fl-aħħar nett tobbliga lill-istati membri jistabbilixxu mekkaniżmu għall-monitoraġġ tad-drittijiet fundamentali fir-rigward tal-proċedura fuq il-fruntiera.

Drittijiet u obbligi ta' dawk li jfittxu l-ażil

L-APR riformata mhux biss tissimplifika l-arranġamenti proċedurali iżda tistabbilixxi wkoll standards għad-drittijiet u l-obbligi tal-applikanti għall-ażil, bħal:

• il-garanziji proċedurali li jissalvagwardjaw id-drittijiet tal-applikanti, billi, fost affarijiet oħra, jipprovdulhom informazzjoni adegwata u f'waqtha, li tippermettilhom jesprimu ruħhom f'intervista personali u li jkollhom aċċess għall-interpretazzjoni
• id-dritt għal konsulenza legali mingħajr ħlas għall-applikanti kollha matul il-proċedura amministrattiva kif ukoll għal assistenza u rappreżentanza legali mingħajr ħlas matul il-proċedura ta' appell
• aktar attenzjoni għal individwi vulnerabbli bi bżonnijiet proċedurali speċjali, bħal minorenni mhux akkumpanjati

garanziji proċedurali

konsulenza legali mingħajr ħlas

aktar attenzjoni għal individwi vulnerabbli

Kunċetti ta' pajjiż terz bla periklu

Ir-regolament dwar il-proċedura tal-ażil jistipula wkoll regoli armonizzati għall-istabbiliment ta' pajjiżi bla periklu, jiġifieri pajjiżi li ġeneralment ma jiġġenerawx ħtiġijiet ta' protezzjoni, jew fejn dawk li jfittxu l-ażil ma jkunux fil-periklu. Jekk pajjiż terz jiżgurax protezzjoni effettiva jiddependi fuq kriterji bħal:

• id-dritt li persuna titħalla tibqa' fit-territorju tal-pajjiż terz
• l-aċċess għal mezzi ta' sussistenza suffiċjenti biex jinżamm standard ta' għajxien adegwat fir-rigward tas-sitwazzjoni ġenerali tal-pajjiż terz
• l-aċċess għall-kura tas-saħħa u t-trattament essenzjali tal-mard skont il-kundizzjonijiet ġeneralment previsti fil-pajjiż terz
• l-edukazzjoni taħt il-kundizzjonijiet ġeneralment previsti fil-pajjiż terz
• li l-protezzjoni effettiva tibqa' disponibbli sakemm tkun tista' tinstab soluzzjoni dejjiema

Ħidma fuq il-patt dwar il-migrazzjoni u l-ażil

Fl-20 ta' Diċembru 2023, il-Kunsill u l-Parlament Ewropew laħqu ftehim dwar din il-leġiżlazzjoni importanti li tiddeskrivi l-proċeduri li għandhom jiġu segwiti, kif ukoll dwar ħafna fajls oħra fil-patt dwar il-migrazzjoni u l-ażil.

Fit-8 ta' Frar 2024, ir-rappreżentanti tal-istati membri tal-UE approvaw il-ftehim milħuq f'Diċembru kif ukoll tliet liġijiet li diġà kien hemm qbil dwarhom bejn il-Kunsill u l-Parlament fl-2022.

Ġie approvat ukoll regolament dwar ir-ritorn fuq il-fruntiera li jippermetti li l-patt japplika għal dawk il-pajjiżi Ewropej b'regoli differenti ta' Schengen.

Il-Kunsill adotta l-patt tal-UE dwar il-migrazzjoni u l-ażil fl-14 ta' Mejju 2024.

• Politika dwar il-migrazzjoni: il-Kunsill jilħaq qbil dwar liġijiet ewlenin b'rabta mal-ażil u l-migrazzjoni (stqarrija għall-istampa, 8 ta' Ġunju 2023)
• Il-Kunsill u l-Parlament Ewropew jirnexxilhom jagħmlu progress fir-riforma tas-sistema tal-ażil u l-migrazzjoni tal-UE (stqarrija għall-istampa, 20 ta' Diċembru 2023)
• Ir-riforma tal-ażil u l-migrazzjoni: ir-rappreżentanti tal-istati membri tal-UE japprovaw qbil mal-Parlament Ewropew (stqarrija għall-istampa, 8 ta' Frar 2024)
• Il-Kunsill jadotta l-patt tal-UE dwar il-migrazzjoni u l-ażil (stqarrija għall-istampa, 14 ta' Mejju 2024)