"Bainimid úsáid as fianáin lena chinntiú go bhfeabhsaítear d’eispéireas brabhsála. Tá gá le fianáin riachtanacha chun tacú le gnéithe bunriachtanacha de shuíomh gréasáin na Comhairle. Cuidíonn na fianáin roghnacha linn tuarascálacha staidrimh anaithnide, comhiomlánaithe a tháirgeadh chun freastal níos fearr ar do chuid riachtanas.
Le cead uaitse, úsáidfimid fianáin le sonraí comhlánaithe anaithnide a tháirgeadh maidir le brabhsáil agus iompraíocht na gcuairteoirí ar ár suíomh gréasáin. Úsáidfimid na sonraí sin chun feabhas a chur ar an eispéireas agat ar ár suíomh.
An Chomhairle Fostaíochta, Beartais Shóisialta, Sláinte agus Gnóthaí Tomhaltóirí
An Chomhairle Fostaíochta, Beartais Shóisialta, Sláinte agus Gnóthaí Tomhaltóirí, 14-15 Meitheamh 2021
Na príomhthorthaí
Fostaíocht agus gnóthaí sóisialta (Dé Luain, an 14 Meitheamh)
Ráthaíocht Eorpach do Leanaí
Ghlac an Chomhairle moladh lena mbunaítear Ráthaíocht Eorpach do Leanaí. Is é is aidhm don mholadh eisiamh sóisialta leanaí a chosc agus a chomhrac trí rochtain a ráthú do leanaí atá i ngátar ar shraith príomhsheirbhísí, agus ar an gcaoi sin cuidiú freisin le cearta an linbh a chosaint trí bhochtaineacht leanaí a chomhrac agus comhdheiseanna a chothú.
Go háirithe moltar do na Ballstáit rochtain éifeachtach, saor in aisce a ráthú ar oideachas agus cúram na luath-óige, ar oideachas agus ghníomhaíochtaí scoilbhunaithe, ar bhéile sláintiúil amháin ar a laghad gach lá scoile agus ar chúram sláinte chomh maith le rochtain éifeachtach ar chothú sláintiúil agus ar thithíocht leordhóthanach.
Ba cheart do na Ballstáit freisin comhordaitheoir náisiúnta um an Ráthaíocht do Leanaí a ainmniú agus laistigh de 9 mí ón dáta a ghlacfar an moladh, plean gníomhaíochta a chur faoi bhráid an Choimisiúin ina gcumhdófar an tréimhse go dtí 2030 chun an moladh sin a chur chun feidhme.
Is bua é seo, ní hamháin d’Uachtaránacht na Portaingéile ach go háirithe don 18 milliún leanbh san Aontas Eorpach atá i mbaol bochtaineachta nó eisiaimh shóisialta. Is bua é lena ndéanfar oideachas, cúram leanaí, cúram sláinte ar ardchaighdeán agus tithíocht chuibhiúil do gach leanbh san Eoraip a ráthú.
Ana Mendes Godinho – Aire Saothair, Dlúthpháirtíochta agus Slándála Sóisialta na Portaingéile
Níl an acmhainn seo ar fáil faoi láthair ach amháin sa teanga (sna teangacha) seo a leanas:
Ráthaíocht Eorpach do Leanaí: an chaoi a gcosnaíonn an tAontas leanaí (Grafaic faisnéise)
Teilea-obair
Ó bhris an ráig COVID-19 amach, tá méadú ollmhór tagtha ar líon na ndaoine i mbun teilea-oibre. I suirbhé a rinne Eurofound, i mí Iúil 2020, bhí 34% d’fhreagróirí ag obair ón mbaile go huile agus go hiomlán, i gcomparáid le 5.4% díobh siúd a bhí fostaithe in AE-27 a d’oibrigh ón mbaile in 2019. Ghlac an Chomhairle conclúidí maidir leis gceist sin ina léirítear gur gá féachaint, mar gheall ar an méadú sin, ar na féidearthachtaí, ar na teorainneacha agus ar na rioscaí a bhaineann leis an teilea-obair. Sna conclúidí, iarrtar ar na Ballstáit, i measc nithe eile, féachaint an bhféadfaí an méid seo a leanas a dhéanamh:
pleananna gníomhaíochta náisiúnta nó straitéisí náisiúnta a bhunú lena dtugtar aghaidh ar na deiseanna agus ar na rioscaí a bhaineann leis an teilea-obair, agus aird á tabhairt ar ghné na hinscne, nó ina gcuimsítear an topaic sin i straitéisí atá ann cheana nó a bheidh ann amach anseo
leasú a dhéanamh ar a mbeartais lena rialaítear an teilea-obair nó treoir a eisiúint, mar shampla maidir le heagrú agus faireachán ar an am oibre, rioscaí a bhaineann le comhionannas idir mná agus fir, agus liúntais chun na costais a bhaineann le teilea-obair a chlúdach i gcás inarb infheidhme
tionscnaimh a bhunú nó a athneartú chun an chigireacht saothair agus an tsláinte agus an tsábháilteacht ceirde a neartú i bhfianaise na rioscaí a bhaineann leis an teilea-obair.
D’iarr an Chomhairle ar an gCoimisiún freisin anailís a dhéanamh ar chomhthéacs agus ar impleachtaí na teilea-oibre san Aontas agus ar a mhéid a chinntítear dálaí maithe oibre do theilea-oibrithe leis an dlí sóisialta agus saothair atá san Aontas faoi láthair.
Is mar ghnáthchuid den saol oibre anois an teilea-obair do na milliúin Eorpach agus leanfar leis mar shamhail hibrideach tar éis na paindéime. Tá solúbthacht agus neamhspleáchas níos fearr le baint amach ag oibrithe, chomh maith le ham a shábháil mar gheall ar laghdú ar an am a chaitear ag taisteal isteach agus amach ag an obair. Ach ná déanaimis dearmad ar na dúshláin a thagann leis, mar shampla an deighilt idir obair agus an saol príobháideach a dhoiléiriú, nó leithlisiú oibrithe. Rinneamar conclúidí a fhormheas ina n-iarrtar ar na Ballstáit na deiseanna a thapú agus aghaidh a thabhairt ar na rioscaí a bhaineann leis an teilea-obair ina gcuid straitéisí agus beartas náisiúnta do thodhchaí na hoibre.
Ana Mendes Godinho – Aire Saothair, Dlúthpháirtíochta agus Slándála Sóisialta na Portaingéile
D’fhormheas an Chomhairle conclúidí lena n-iarrtar ar na Ballstáit (agus, i gcás inarb iomchuí, ar an gCoimisiún) céimeanna a dhéanamh chun éifeacht ghéaraithe ghéarchéim COVID-19 ar roinnt de na míbhuntáistí fadtéarmacha a bhíonn ag mná a mhaolú agus chun a áirithiú go mbeidh comhionannas inscne ina spreagadh don téarnamh.
Ar na céimeanna sin tá:
comhionannas inscne agus deiseanna a chur chun cinn i gceapadh agus i gcur chun feidhme na mbeart téarnaimh, mar shampla trí thacaíocht a thabhairt d’oibrithe in earnálacha eacnamaíocha a buaileadh go dona amhail earnálacha an mhiondíola, an fháilteachais agus na turasóireachta, agus aghaidh á tabhairt ar riachtanais ar leith na mban maidir le gnóthachtáil oideachais, uaireanta oibre, neamhghníomhaíocht, dífhostaíocht agus scileanna
aghaidh a thabhairt ar shaol na hoibre, saol an teaghlaigh agus an saol príobháideach a thabhairt chun réitigh do mhná agus d’fhir araon trína áirithiú go mbeidh na deiseanna céanna ag gach oibrí, teilea-oibrithe san áireamh, chun dul chun cinn gairme a dhéanamh, lena n-áirítear rochtain chomhionann ar phoist bhainistíochta agus chinnteoireachta
rochtain chothrom ar gach réimse oideachais agus ar gach conair ghairme a chur chun cinn, lena n-áirítear aghaidh a thabhairt ar an mbearna dhigiteach idir na hinscní, feabhas a chur ar scileanna digiteacha agus rannpháirtíocht i réimsí staidéir ETIM (eolaíocht, teicneolaíocht, innealtóireacht agus matamaitic), go háirithe TFC
tuilleadh sonraí, faisnéise agus taighde maidir le tionchar COVID-19 ar an gcomhionannas inscne a fhorbairt agus a scaipeadh, agus iad imdhealaithe de réir inscne
Mar thoradh ar an neamhionannas inscne struchtúrach atá ann cheana i margadh an tsaothair agus sa tsochaí ina hiomláine (an bhearna phá idir na hinscní agus an bhearna sa chúram), bhí, agus tá fós, tionchar díréireach ag paindéim COVID-19 agus bearta srianta gaolmhara ar mhná. Is mná iad idir 76% agus 95% d’oibrithe cúraim sláinte agus, dá bhrí sin, is mó an riosca atá acu COVID-19 a tholgadh. Idir an dá linn, bíonn ar mhná sciar díréireach den obair gan phá a ghlacadh (cúraimí tí agus cúraim), obair atá dulta i méid le linn ghéarchéime COVID-19.
Mar a tharla i ngéarchéimeanna roimhe seo, ní raibh an tionchar a bhí ag paindéim COVID-19 comhionann ó thaobh inscne de, agus bhí tionchar níos mó aici ag mná. Feicimid na mná atá thíos leis sin sa túslíne mar oibrithe cúraim sláinte, cúramóirí nó oibrithe cúraim leanaí, mar mhúinteoirí nó mar ghlantóirí tí, agus is minic a bhíonn orthu aghaidh a thabhairt ar na dúshláin bhreise a bhaineann le cúram a thabhairt dá dteaghlaigh, tabhairt faoi obair bhreise gan phá agus aghaidh a thabhairt ar dheacrachtaí ina gcothromaíocht oibre is saoil. Níl léargas soiléir againn, áfach, ar an gcaoi a gcuireann na héifeachtaí sin srian ar rannpháirtíocht na mban i margadh an tsaothair agus ar an gcaoi a leathnaíonn siad na bearnaí atá ann faoi láthair i soláthar pá agus cúraim, agus ní féidir linn ach athrú a dhéanamh ar an méid is féidir linn a fheiceáil go soiléir. Anois agus sinn ag obair i dtreo téarnamh ón ngéarchéim agus ag ullmhú ár sochaithe don todhchaí, ní mór dúinn a áirithiú go mbeidh ár mbearta bunaithe ar shonraí nithiúla, ionas go mbeimid in ann léargas soiléir a fháil ar a bhfuil le hathrú chun gur féidir linn cinntí eolasacha a dhéanamh agus neamhionannais a cheartú.
Mariana Vieira da Silva – Aire Stáit agus Uachtaránachta na Portaingéile
Tá thart ar 87 milliún duine san Aontas Eorpach faoi mhíchumas de shaghas éigin agus measann níos mó ná a leath díobh (52 %) go ndéantar idirdhealú orthu ina saol laethúil. I mí an Mhárta 2021, ghlac an Coimisiún Eorpach an straitéis um chearta daoine faoi mhíchumas (2021-2030).
D’fhormheas an Chomhairle conclúidí lena dtacaítear leis an straitéis. Sna conclúidí sin, iarrtar ar na Ballstáit leanúint de straitéisí agus beartais náisiúnta a fhorbairt agus a nuashonrú chun Coinbhinsiún na Náisiún Aontaithe ar Chearta Daoine faoi Mhíchumas (UNCRPD) a chur chun feidhme ar an leibhéal náisiúnta, réigiúnach agus áitiúil, trasuí agus cur chun feidhme éifeachtach agus comhleanúnach dhlí an Aontais maidir le hinrochtaineacht táirgí, seirbhísí, na meán, iompair agus foirgnemh a áirithiú, forbairt seirbhísí sóisialta duine-lárnaithe agus maireachtáil neamhspleách a chur chun cinn, rannpháirtíocht sa saol polaitiúil agus sa saol poiblí a chur chun cinn, an straitéis a chur san áireamh agus spriocanna náisiúnta deonacha á leagan síos chun na príomhspriocanna atá beartaithe i bplean gníomhaíochta Cholún Eorpach na gCeart Sóisialta a bhaint amach agus an úsáid is fearr a bhaint as cláir chistiúcháin agus airgeadais iomchuí de chuid an Aontais
Tá Uachtaránacht na Portaingéile tiomanta go láidir do chearta daoine faoi mhíchumas. Is deis iontach iad na conclúidí seo chun focail a chur i ngníomh agus chun a áirithiú nach bhfágfar aon duine ar lár. Mar atá ráite againn, is é seo an t-am le beart a dhéanamh, mar sin tá sé ríthábhachtach go mbeimis uile tiomanta don Straitéis Eorpach um Cearta Daoine faoi Mhíchumas 2021-2030, i gcomhréir le UNCRPD.
Ana Mendes Godinho - Aire Saothair, Dlúthpháirtíochta agus Slándála Sóisialta na Portaingéile
Chuir an uachtaránacht na hairí ar an eolas faoin dul chun cinn atá déanta ar an treoir maidir le híosphá leordhóthanach. Bhí an deis ag na hairí freisin tuairimí a mhalartú maidir leis na feabhsuithe a bhfuil siad ag súil go mbainfear amach leis an treoir agus comhartha a thabhairt ar ghnéithe criticiúla an togra, dar leo, agus ar an gcaoi sin, leag siad síos bealach féideartha chun cinn le haghaidh tuilleadh caibidlíochta d’fhonn teacht ar chomhaontú.
Ócáid ríthábhachtach don Eoraip shóisialta ba ea Cruinniú Mullaigh Sóisialta Porto an 7 agus an 8 Bealtaine 2021. An 7 Bealtaine, shínigh Parlaimint na hEorpa, an Coimisiún, Uachtaránacht na Portaingéile ar Chomhairle an Aontais Eorpaigh, comhpháirtithe sóisialta an Aontais Eorpaigh agus an tArdán Sóisialta Gealltanas Sóisialta Porto agus, an 8 Bealtaine, tháinig ceannairí an Aontais ar chomhaontú maidir le Dearbhú Porto, áit ar threisigh siad a ngealltanais maidir le cur chun feidhme Cholún Eorpach na gCeart Sóisialta agus ba dhíol sásaimh dóibh príomhspriocanna 2030 maidir le fostaíocht, scileanna agus laghdú na bochtaineachta i bplean gníomhaíochta an Cholúin. Mar obair leantach, phléigh na hairí socrú spriocanna agus faireachán ar an dul chun cinn a rinneadh maidir le prionsabail an Cholúin a chur chun feidhme ar an leibhéal náisiúnta tríd an Seimeastar Eorpach.
Dúshláin don idirphlé sóisialta agus don chómhargáil
Bhí díospóireacht bheartais ag na hairí freisin maidir le rannpháirtíocht na gcomhpháirtithe sóisialta sa téarnamh trí na Pleananna Athléimneachta agus Téarnaimh agus maidir leis an gcur chuige is fearr i leith idirphlé sóisialta agus cómhargáil i gcomhthéacs dlús a chur leis an aistriú digiteach, agus aird ar leith á tabhairt ar an ngá atá le hionadaíocht oibrithe i gcineálacha neamhghnácha oibre agus a gceart comhlachais a chinntiú.
I ndíospóireacht an lae inniu, chuireamar ár n-eispéiris éagsúla i láthair; thug sé sin deis dúinn go léir ár smaointe a roinnt faoi na dúshláin a mbeidh orainn aghaidh a thabhairt orthu sa ghearrthéarma, sa mheántéarma agus san fhadtéarma maidir leis na saincheisteanna tábhachtacha tráthúla sin.
Ana Mendes Godinho – Aire Saothair, Dlúthpháirtíochta agus Slándála Sóisialta na Portaingéile
Eoraip Shóisialta níos láidre a chur chun cinn (Grafaic faisnéise)
Trédhearcacht pá agus cóir chomhionann
Chuir an uachtaránacht na hairí ar an eolas faoi staid na himeartha i ndáil le roinnt comhad reachtach leanúnach: togra le haghaidh treoir maidir le cur i bhfeidhm an phrionsabail go bhfuil pá comhionann as obair chomhionann nó obair ar comhionann a luach ag dul d'oibrithe fireanna agus d'oibrithe baineanna a threisiú, agus treoir ón gComhairle chun an chosaint ar idirdhealú ar bhonn reiligiún nó creidimh, míchumais, aoise nó ar ghnéaschlaonadh duine a leathnú go réimsí lasmuigh den fhostaíocht. Maidir leis an dá thogra sin, chuir Uachtaránacht na Portaingéile tuarascáil i láthair ina ndéantar achoimriú ar staid na himeartha maidir leis an bplé i measc na mBallstát, agus ar an mbealach chun cinn a d’fhéadfadh a bheith ann chun teacht ar chomhaontú.
An Seimeastar Eorpach, cúram fadtéarmach agus pinsin
D’fhormhuinigh an Chomhairle an measúnú ar chur chun feidhme mholtaí tírshonracha 2020 agus 2019, agus an tuairim ón gCoiste Fostaíochta agus ón gCoiste um Chosaint Shóisialta le haghaidh Scórchlár Sóisialta athbhreithnithe, lena socraítear táscairí ceannlíne nua. Baineann an dá mhír leis an Seimeastar Eorpach, arb é creat an Aontais é chun beartais eacnamaíocha a chomhordú ar fud an Aontais Eorpaigh. D’fhormhuinigh na hairí freisin na conclúidí maidir le tuarascáil cúraim fhadtéarmaigh 2021 agus tuarascáil 2021 maidir le leordhóthanacht pinsean – ón gCoiste um Chosaint Shóisialta agus ón gCoimisiún Eorpach.
Níl an acmhainn seo ar fáil faoi láthair ach amháin sa teanga (sna teangacha) seo a leanas:
Rochtain ar tháirgí íocshláinte agus ar fheistí leighis
D'fhormheas na hairí conclúidí maidir le rochtain ar tháirgí íocshláinte agus ar fheistí leighis d’Aontas níos láidre, níos athléimní. Cé gur baineadh amach torthaí suntasacha in go leor réimsí galar, is gá níos mó a dhéanamh chun rochtain thráthúil ar chógais agus ar fheistí leighis nuálacha a chinntiú, go háirithe i ndáil le hábhair imní sláinte poiblí amhail forbairt ábhar nua frithmhiocróbach. Iarrtar sna conclúidí, i measc nithe eile, ar an gCoimisiún, fardal iomlán a cheapadh maidir le hacmhainneachtaí monaraíochta domhanda reatha agus féideartha an Aontais i dtaobh cógais leighis chriticiúla, feistí leighis agus táirgí íocshláinte eile.
Tharraing an phaindéim seo aird arís ar an dúshlán triarach a bhaineann le hinrochtaineacht, infhaighteacht agus inacmhainneacht cógas. Is cúis áthais dom gur tháinig na hairí le chéile inniu lena iarraidh go comhpháirteach go ngníomhófaí i leith na riachtanas struchtúrach, agus lena chinntiú go rachaidh rochtain thráthúil ar chógais leighis nuálacha chun tairbhe do na hothair agus do na córais sláinte araon.
Marta Temido, Aire Sláinte na Portaingéile
Ról treisithe don Ghníomhaireacht Leigheasra Eorpach
Tháinig an Chomhairle ar chomhaontú maidir le dréachtrialacha chun ról na Gníomhaireachta Leigheasra Eorpaí a threisiú in ullmhacht agus i mbainistiú géarchéimeanna i ndáil le táirgí íocshláinte agus feistí leighis.
Leis an gcur chuige ginearálta sin, tugtar sainordú caibidlíochta d’Uachtaránacht na Comhairle teacht ar chomhsheasamh le Parlaimint na hEorpa.
An Lárionad Eorpach um Ghalair a Chosc agus a Rialú agus bagairtí trasteorann ar shláinte
Chuir an uachtaránacht na hairí ar an eolas faoi staid na himeartha maidir le dhá chomhad reachtacha leanúnacha: an togra chun leasú a dhéanamh ar an rialachán lena mbunaítear Lárionad Eorpach um Ghalair a Chosc agus a Rialú agus an togra maidir le bagairtí tromchúiseacha trasteorann ar shláinte.
Is é atá i gceist leis an gcéad cheann sainordú níos láidre a thabhairt don Lárionad Eorpach um Ghalair a Chosc agus a Rialú chun gur fearr a bheidh sé in ann tacú leis na Ballstáit agus leis an gCoimisiún chun – i measc nithe eile – faireachán fíor-ama a dhéanamh ar an staid eipidéimeolaíoch, agus chun tascfhórsaí sláinte an Aontais a shlógadh chun cuidiú le freagairtí áitiúla. Le rialachán atá beartaithe maidir le bagairtí tromchúiseacha trasteorann ar shláinte, forordaítear plean géarchéime sláinte agus ullmhachta paindéime a cheapadh don Aontas, agus moltaí a dhéanamh chun pleananna náisiúnta a cheapadh (a ndéanfar measúnú agus tástáil struis orthu).
Is iad údaráis rialtais na tíre óstaí a láimhseálfaidh creidiúnú na meán le haghaidh cruinnithe mullaigh idirnáisiúnta a reáchtáiltear lasmuigh den Aontas Eorpach.
Is bua é seo, ní hamháin d’Uachtaránacht na Portaingéile ach go háirithe don 18 milliún leanbh san Aontas Eorpach atá i mbaol bochtaineachta nó eisiaimh shóisialta. Is bua é lena ndéanfar oideachas, cúram leanaí, cúram sláinte ar ardchaighdeán agus tithíocht chuibhiúil do gach leanbh san Eoraip a ráthú.
Mar a tharla i ngéarchéimeanna roimhe seo, ní raibh an tionchar a bhí ag paindéim COVID-19 comhionann ó thaobh inscne de, agus bhí tionchar níos mó aici ag mná. Feicimid na mná atá thíos leis sin sa túslíne mar oibrithe cúraim sláinte, cúramóirí nó oibrithe cúraim leanaí, mar mhúinteoirí nó mar ghlantóirí tí, agus is minic a bhíonn orthu aghaidh a thabhairt ar na dúshláin bhreise a bhaineann le cúram a thabhairt dá dteaghlaigh, tabhairt faoi obair bhreise gan phá agus aghaidh a thabhairt ar dheacrachtaí ina gcothromaíocht oibre is saoil. Níl léargas soiléir againn, áfach, ar an gcaoi a gcuireann na héifeachtaí sin srian ar rannpháirtíocht na mban i margadh an tsaothair agus ar an gcaoi a leathnaíonn siad na bearnaí atá ann faoi láthair i soláthar pá agus cúraim, agus ní féidir linn ach athrú a dhéanamh ar an méid is féidir linn a fheiceáil go soiléir. Anois agus sinn ag obair i dtreo téarnamh ón ngéarchéim agus ag ullmhú ár sochaithe don todhchaí, ní mór dúinn a áirithiú go mbeidh ár mbearta bunaithe ar shonraí nithiúla, ionas go mbeimid in ann léargas soiléir a fháil ar a bhfuil le hathrú chun gur féidir linn cinntí eolasacha a dhéanamh agus neamhionannais a cheartú.
Tharraing an phaindéim seo aird arís ar an dúshlán triarach a bhaineann le hinrochtaineacht, infhaighteacht agus inacmhainneacht cógas. Is cúis áthais dom gur tháinig na hairí le chéile inniu lena iarraidh go comhpháirteach go ngníomhófaí i leith na riachtanas struchtúrach, agus lena chinntiú go rachaidh rochtain thráthúil ar chógais leighis nuálacha chun tairbhe do na hothair agus do na córais sláinte araon.