Proċeduri leġiżlattivi speċjali

F'każijiet speċifiċi, bħal eżenzjonijiet tas-suq uniku, il-Kunsill tal-Unjoni Ewropea huwa l-parti ewlenija li tieħu d-deċiżjonijiet. Il-Parlament Ewropew huwa involut jew billi jiġi kkonsultat inkella billi jagħti l-approvazzjoni tiegħu.

X'inhuma l-proċeduri leġiżlattivi speċjali?

Proċeduri leġiżlattivi speċjali japplikaw għal każijiet speċifiċi fejn il-Kunsill jadotta leġiżlazzjoni waħdu. F'dawn il-każijiet, il-Parlament ma jaġixxix bħala koleġiżlatur, iżda jrid jiġi kkonsultat jew jagħti l-approvazzjoni tiegħu.

Dawn il-proċeduri jintużaw għal oqsma speċifiċi bħall-eżenzjonijiet tas-suq uniku, il-liġi tal-kompetizzjoni u miżuri biex tiġi miġġielda d-diskriminazzjoni.

Il-Kummissjoni Ewropea tippreżenta proposta leġiżlattiva. Il-Kunsill tal-Unjoni Ewropea jadotta l-leġiżlazzjoni waħdu. Il-Parlament Ewropew irid jiġi kkonsultat jew jagħti l-approvazzjoni tiegħu.

Approvazzjoni jew konsultazzjoni tal-Parlament

Hemm żewġ tipi ta' proċedura leġiżlattiva speċjali: il-proċedura ta' approvazzjoni u l-proċedura ta' konsultazzjoni.

Fiż-żewġ każijiet, il-proposta leġiżlattiva normalment tiġi mill-Kummissjoni Ewropea, bi ftit eċċezzjonijiet biss. Madankollu, dawn ivarjaw fil-livell ta' involviment tal-Parlament Ewropew.

Proċedura ta' approvazzjoni

Il-Parlament Ewropew jista' japprova jew jirrifjuta proposta leġiżlattiva b'vot ta' maġġoranza assoluta, iżda ma jistax jemendaha.

Il-Kunsill jista' jadotta liġi biss wara li jkun kiseb l-approvazzjoni tal-Parlament. Il-Kunsill ma jistax jinjora d-deċiżjoni tal-Parlament.

Proċedura ta' konsultazzjoni

Il-Parlament Ewropew joħroġ opinjoni dwar proposta leġiżlattiva. Huwa jista' japprova l-proposta, jirrifjutaha jew jipproponi emendi.

Il-Kunsill mhuwiex legalment obbligat li jsegwi l-opinjoni tal-Parlament, iżda jrid jirċeviha qabel ma jadotta l-liġi.

Liema proċedura tintuża u meta

Proċedura ta' approvazzjoni

Il-proċedura ta' approvazzjoni tintuża għal:

liġijiet ġodda tal-UE biex tiġi miġġielda d-diskriminazzjoni
ċerti ftehimiet internazzjonali nnegozjati mill-UE
deċiżjonijiet dwar ksur serju tad-drittijiet fundamentali
azzjoni tal-UE f'oqsma fejn l-UE normalment ma jkollhiex is-setgħa li taġixxi

Proċedura ta' konsultazzjoni

Il-proċedura ta' konsultazzjoni tintuża f'każijiet bħal:

miżuri għall-prevenzjoni tad-distorsjoni tal-kompetizzjoni fis-suq uniku u eżenzjonijiet tas-suq uniku
l-armonizzazzjoni tat-taxxi fuq il-fatturat, dazji tas-sisa, u forom oħra ta' tassazzjoni indiretta
rakkomandazzjonijiet u opinjonijiet adottati mill-Kunsill u mill-Kummissjoni

Bażi legali

Il-proċeduri leġiżlattivi speċjali huma definiti fl-Artikoli 289(2) tat-Trattat dwar il-Funzjonament tal-Unjoni Ewropea.

Trattat dwar il-Funzjonament tal-Unjoni Ewropa

Ara wkoll

Il-binjiet tal-Kunsill tal-UE, tal-Parlament Ewropew u tal-Kummissjoni Ewropea, konnessi b'linja.

Ir-rwol tal-Kunsill fit-teħid tad-deċiżjonijiet tal-UE

Il-passi tal-proċedura leġiżlattiva ordinarja.

Il-proċedura leġiżlattiva ordinarja

Il-bini tal-Kunsill imdawwar b'roti u vleġeġ.

Atti ta' implimentazzjoni u atti delegati