Eżami tal-kompetittività

Fil-kuntest ta’ dibattitu dwar l-istrateġija fit-tul tal-UE dwar it-tkabbir sostenibbli, il-ministri tal-UE skambjaw fehmiet dwar id-dimensjoni esterna tal-kompetittività tal-Unjoni Ewropea
.

Id-delegazzjonijiet laqgħu l-approċċ integrat għal tkabbir sostenibbli, kif stabbilit f’rapport mill-presidenza Finlandiża tal-Kunsill.

• Kunsill Kompetittività, 26-27/09/2019

Il-ministri skambjaw fehmiet dwar l-impatt tal-kompetizzjoni tas-suq fuq il-kompetittività tas-suq uniku.

Filwaqt li qablu b’mod ġenerali li l-kompetizzjoni għadha strument essenzjali għas-suq intern tal-UE, għadd ta’ delegazzjonijiet leħħnu l-ħtieġa li tiġi kkunsidrata mill-ġdid id-definizzjoni ta’ “suq rilevanti” - b’mod partikolari fir-rigward ta’ pjattaformi online li jagħmlu negozju fuq skala globali.

• Kunsill Kompetittività, 27-28/05/2019

Id-diskussjonijiet fil-Kunsill iffukaw fuq l-impatt tal-katini ta' valur settorjali Ewropej fuq il-kompetittività u t-tkabbir.

Il-ministri enfasizzaw ir-rwol dejjem akbar tas-servizzi tas-suq fil-katini ta' valur globali.

• Kunsill Kompetittività, 18-19/02/2019

Il-Kunsill iddiskuta l-futur tal-governanza tas-suq uniku.

Matul id-dibattitu, il-Kummissjoni Ewropea ppreżentat il-komunikazzjoni tagħha adottata reċentement dwar dan is-suġġett.

• Kunsill Kompetittività, 29/11/2018
• Is-suq uniku: l-aħjar assi tal-Ewropa f'dinja li qed tinbidel (Kummissjoni Ewropea)

Il-Kunsill ivvaluta l-importanza tal-konverġenza reġjonali għaż-żieda ġenerali fil-produttività, it-tkabbir u l-kompetittività.

Il-ministri ddiskutew aspetti bħat-tqassim tal-ispejjeż u l-benefiċċji tat-tkabbir ekonomiku u l-integrazzjoni fir-reġjuni kollha tal-UE.

F'dan il-kuntest, huma enfasizzaw ukoll il-ħtieġa ta' aktar konċentrazzjoni fuq l-innovazzjoni u d-diġitalizzazzjoni permezz tal-investiment fl-infrastruttura u t-titjib tal-ħiliet taċ-ċittadini.

• Kunsill Kompetittività, 27-28/09/2018

Il-ministri kkonċentraw fuq l-impatt konkret tas-suq intern fuq il-bażi industrijali tal-UE, f'termini ta' kompetittività u produttività.

Huma saħqu dwar ir-rilevanza tal-katini ta' valur għal produttività aħjar fit-tul u biex tingħata spinta lill-kompetittività.

Il-ministri appellaw ukoll lill-Kummissjoni Ewropea biex tkompli tidentifika inizjattivi u investimenti għall-katini ta' valur tal-ġejjieni.

• Kunsill Kompetittività, 28-29/05/2018

Il-Kunsill eżamina l-ispejjeż li jirriżultaw minn restrizzjonijiet bla bżonn fis-swieq tas-servizzi.

Dawn ir-restrizzjonijiet inaqqsu l-produttività tas-setturi tal-manifattura li jużaw dawk is-servizzi.

It-tneħħija ta' dawn ir-restrizzjonijiet żejda tista' tipproduċi gwadanji sostanzjali għall-ekonomija reali, b'mod partikolari fis-settur tal-bejgħ bl-imnut.

• Kunsill Kompetittività, 12/03/2018

Il-ministri ħadu nota tal-preżentazzjoni tal-Kummissjoni Ewropea rigward il-komunikazzjoni tagħha dwar "Ninvestu f'industrija intelliġenti, innovattiva u sostenibbli: Strateġija mġedda għall-Politika Industrijali tal-UE".

Dan seħħ wara talba minn għadd kbir ta' stati membri li talbu objettivi fit-tul għall-politika industrijali li tirrifletti strateġija ambizzjuża.

Il-Kummissjoni ressqet ukoll analiżi tas-sitwazzjoni u l-perspettivi attwali tas-settur industrijali Ewropew kif imqabbla ma' ekonomiji b'saħħithom oħrajn fid-dinja. L-analiżi kienet tinkludi parametri dwar tendenzi bħal l-impjiegi fil-manifattura, l-innovazzjoni u l-livell ta' ħiliet diġitali.

• Eżitu tal-laqgħa tal-Kunsill, 30 ta' Novembru 2017
• Komunikazzjoni dwar strateġija ta' politika industrijali mġedda (Kummissjoni Ewropea)

Il-Kummissjoni ppreżentat analiżi tas-suq uniku minn perspettiva ta' katina tal-valur. Hija indikat li s-servizzi qed isiru aktar rilevanti u li l-importanza tal-effetti kollaterali minn piżijiet regolatorji fis-servizzi ma tistax tiġi sottovalutata.

Bosta ministri enfasizzaw ir-rabtiet bejn is-servizzi u l-manifattura. Uħud ikkummentaw li hemm bżonn li tiżdied il-parteċipazzjoni tal-SMEs Ewropej fil-katini tal-valur globali.

Fl-aħħar nett, ħafna laqgħu l-intenzjoni tal-Kummissjoni li tissorvelja s-suq uniku mill-perspettiva tal-evoluzzjoni u t-trasformazzjoni tal-katini ta' valur.

• Kunsill Kompetittività, 29-30/05/2017

Il-ministri kellhom skambju ta' fehmiet dwar l-investimenti intanġibbli fin-negozji tal-UE. Dawn jinkludu pereżempju:

• il-ħiliet
• il-kompetenza esperta fil-qasam maniġerjali
• ir-reputazzjoni tal-kumpanija
• is-software tal-kompjuter
• id-disinni
• il-proprjetà intellettwali

Il-ministri rrikonoxxew il-kontribut tal-investimenti intanġibbli għall-ekonomija tal-UE u qiesu l-inċentivi possibbli u d-direzzjoni ta' politika li jistgħu jittieħdu biex jikber dan is-settur. Huma kienu tal-fehma li l-ostakli għall-investiment għandhom jitneħħew u li għandu jiġi implimentat għadd ta' azzjonijiet ta' politika b'appoġġ għall-investiment fl-assi intanġibbli. Dan għandu jinkludi:

• protezzjoni adegwata tal-proprjetà intellettwali
• aċċess faċli għall-finanzi għad-ditti, speċjalment għall-SMEs, biex jinvestu fl-assi intanġibbli
• miżuri favur il-kapital ta' riskju
• inċentivi fiskali
• aktar sforzi għall-promozzjoni tal-investimenti fil-kapital uman
• prijoritizzazzjoni tal-edukazzjoni u l-ħiliet
• appoġġ għall-investimenti fir-riċerka u l-iżvilupp

• Kunsill Kompetittività, 20/02/2017

Il-ministri ddiskutew l-impatt tad-diġitalizzazzjoni fuq il-produttività - waqt li ffokaw fuq s-settur tas-servizzi.

Offrew gwida fuq kif tista' tiżdied il-produttività fl-UE u jingħeleb id-distakk fil-konfront ta' reġjuni aktar avvanzati fid-dinja.

B'mod partikolari, semmew:

• il-ħtieġa li l-investimenti jiġu mmirati lejn oqsma promettenti bħall-ICT, ir-riċerka u l-innovazzjoni
• id-diġitalizzazzjoni rapida tas-settur tas-servizzi
• il-promozzjoni tal-infrastrutturi diġitali u l-interkonnessjoni tan-netwerks
• it-tisħiħ tas-suq uniku
• leġislazzjoni li tiffavorixxi aktar l-innovazzjoni
• il-promozzjoni ta' taħriġ u ħiliet f'teknoloġiji ġodda
• inizjattivi b'appoġġ għall-SMEs u n-negozji ġodda.

Il-Kunsill ħa nota wkoll tal-progress li sar fit-tħejjijiet għall-istabbiliment ta' tabella ta' valutazzjoni tal-kompetittività. Din l-għodda ser tippermetti li l-Kummissjoni u l-pajjiżi tal-UE jissorveljaw aħjar l-iżviluppi fil-qasam tal-kompetittività u jtejbu l-kwalità tal-proċess tat-teħid ta' deċiżjonijiet. It-tabella ta' valutazzjoni ser tinkludi indikaturi tal-kompetittività ġenerali kif ukoll tal-oqsma tematiċi li huma l-aktar rilevanti għall-eżami tal-kompetittività.

• Kunsill Kompetittività, 26-27/05/2016

Taħt l-“eżami tal-kompetittività”, il-ministri kellhom skambju ta' fehmiet dwar kif l-aħjar jingħata appoġġ lill-SMEs u n-negozji ġodda biex joħolqu l-impjiegi u jiżviluppaw.

Id-dibattitu sar abbażi ta' preżentazzjoni mill-Kummissjoni li wriet data komparattiva dwar in-negozji ġodda u aspetti marbutin mal-iżvilupp tan-negozji ġodda.

Xi delegazzjonijiet faħħru l-fatt li, wara snin ta' tnaqqis, l-SMEs Ewropej qed jespandu u reġgħu bdew jimpjegaw, kif jidher fir-rapport annwali tal-Kummissjoni tal-2014/2015 għall-SMEs Ewropej.

Il-parti l-kbira tad-delegazzjonijiet indikaw għadd ta' oqsma ewlenin fejn il-politika tal-UE tista' tgħin lill-impriżi jiżviluppaw, fosthom:

• il-faċilitazzjoni tal-aċċess għall-finanzi
• it-trawwim ta' attivitajiet transkonfinali billi jiġu żviluppat aktar is-suq intern
• l-applikazzjoni ta' prinċipji ta' regolamentazzjoni aħjar sabiex jitfassal ambjent regolatorju validu għall-futur.

Madankollu, il-ministri għarfu li kien hemm grad qawwi ta' eteroġeneità fil-ħolqien ta' impjieg mill-SMEs fost l-istati membri u setturi ta' attività ekonomika.

Ir-rapport tan-netwerk tar-rappreżentanti tal-SMEs tas-sena li għaddiet ikkonferma wkoll li l-SMEs li jidhru li qed jixprunaw l-irkupru fil-ħolqien ta' impjieg mill-SMEs kienu primarjament dawk li jipprovdu servizz. Skont ir-rapport, li ġie ppreżentat lill-Kunsill fit-30 ta' Novembru, f'termini ġenerali l-SMEs ħerġin mill-kriżi ekonomika bil-mod iżda b'mod stabbli.

Fl-2014, il-valur miżjud tagħhom żdied b'3.3 % (meta mqabbel ma' 1.6 % fl-2013). Barra minn dan, l-għadd ta' SMEs żdied għal total ta' 22.3 miljun, li huwa 3.6 % aktar milli fl-2008.

Għall-ewwel darba f'sitt snin, l-impjiegi fl-SMEs żdiedu (b'1.2 %).

It-tendenza pożittiva fil-prestazzjoni tal-SMEs tirrifletti t-titjib fil-kondizzjonijiet makroekonomiċi u ta' negozju. Madankollu, il-ħruġ mill-kriżi jsir b'rati differenti.

Il-maġġoranza vasta tal-istati membri raw lill-SMEs tagħhom jespandu n-negozju tagħhom fl-2014. Iżda f'dawk il-pajjiżi l-aktar milquta mill-kriżi, il-qawmien tal-SMEs għadu ma bediex.

• Rapport annwali tal-2014/2015 għall-SMEs Ewropej (Kummissjoni Ewropea)
• Kunsill Kompetittività tad-29/02/2016

Fil-laqgħa tal-Kunsill Ewropew, il-mexxejja tal-UE adottaw dikjarazzjoni dwar il-kompetittività, li tenfasizza l-importanza tal-kompetittività fil-ħolqien tat-tkabbir u l-impjiegi, u l-ħtieġa li l-potenzjal tas-suq intern jiġi sfruttat b'mod sħiħ. Id-dikjarazzjoni tħeġġeġ lill-istituzzjonijiet tal-UE u lill-pajjiżi tal-UE biex jistinkaw favur regolamentazzjoni aħjar u biex jirrevokaw liġijiet Ewropej mhux neċessarji sabiex tingħata spinta lill-kompetittività.

Id-dikjarazzjoni tisħaq fuq il-ħtieġa tal-Ewropa li żżid il-kompetittività internazzjonali tagħha fis-servizzi u l-prodotti u f'oqsma ewlenin bħall-enerġija u s-suq uniku diġitali.

Tappella wkoll għal sistema kummerċjali multilaterali abbażi ta' regoli u tisħaq fuq il-ħtieġa li jiġu konklużi ftehimiet kummerċjali bilaterali ambizzjużi ma' pajjiżi u gruppi ta' pajjiżi li mhumiex fl-UE.

Fid-dikjarazzjoni, il-mexxejja tal-EU talbu lill-Kunsill Kompetittività biex "jevalwa b'mod regolari l-progress li jsir fid-diversi elementi”li għandhom impatt fuq il-kompetittività tal-UE. Dan isaħħaħ ir-rwol tal-proċess tal-eżami tal-kompetittività.

• Konklużjonijiet tal-Kunsill Ewropew, 18-19 ta' Frar 2016
• Kunsill Ewropew, 18-19 ta' Frar 2016

Il-Kunsill eżamina r-relazzjoni bejn l-integrazzjoni tas-suq intern u l-kompetittività tal-UE fis-swieq dinjija, b'attenzjoni speċjali għall-ishma mis-suq tal-UE fis-swieq dinjija tal-esportazzjoni u l-vantaġġi kompetittivi relatati magħhom għall-UE.

Waqt id-dibattitu, għadd ta' delegazzjonijiet kienu favur l-użu sħiħ u f'waqtu mill-firxa ta' strumenti tal-politika kummerċjali tal-UE biex jiġu żgurati kondizzjonijiet dinjija ekwivalenti ta' kompetizzjoni. F'dan ir-rigward issemmiet is-sitwazzjoni diffiċli f'xi setturi industrijali, bħall-industrija tal-azzar.

Il-Kummissjoni ħabbret li fil-futur qarib ser tiġi organizzata konferenza ta' livell għoli tal-partijiet ikkonċernati dwar l-industriji li jużaw ħafna enerġija, inkluż is-settur tal-azzar, sabiex tanalizza s-sitwazzjoni attwali u tikkunsidra soluzzjonijiet xierqa.

Id-dibattitu sar abbażi ta' rapport imħejji mill-presidenza Lussemburgiża. Ir-rapport jagħti ħarsa ġenerali lejn il-ħidma mwettqa taħt il-presidenza Lussemburgiża u jippreżenta rakkomandazzjonijiet dwar kif l-integrazzjoni tal-kompetittività tista' tittejjeb aktar fil-futur.

• Eżami tal-kompetittività: rapport mill-Presidenza Lussemburgiża
• Kunsill Kompetittività, 30/11-01/12/2015

Il-ministri għall-kompetittività kellhom l-ewwel diskussjonijiet tagħhom skont il-proċess tal-eżami tal-kompetittività li għadu kif tnieda. Id-diskussjonijiet ikkonċentraw fuq:

• l-aħħar tendenzi u ċifri ekonomiċi abbażi ta' preżentazzjoni mill-Kummissjoni li ffokat fuq kwistjonijiet mikroekonomiċi
• l-integrazzjoni tal-kompetittività, abbażi ta' lista tal-inizjattivi ewlenin tal-UE li għandhom impatt potenzjali fuq il-kompetittività

Bosta parteċipanti kienu tal-fehma li kien hemm bżonn li l-kumpaniji tal-UE jingħataw għajnuna biex iżidu l-livell ta' kompetittività tagħhom u jespandu billi l-kondizzjonijiet regolatorji jsiru sempliċi u prevedibbli. Dan jikkontribwixxi wkoll biex jiġi stimulat il-livell tal-investimenti fl-Ewropa.

Kien hemm kunsens ġenerali li r-regoli tal-UE għandhom ikunu aktar effiċjenti u jkollhom valur miżjud reali għall-konsumaturi u l-kumpaniji.

Għadd kbir ta' delegazzjonijiet ġibdu l-attenzjoni għal aspetti tal-politika kummerċjali b'rabta mal-kapaċità fir-rigward tal-kompetittività tal-industriji u n-negozji Ewropej.

Fost l-isfidi ewlenin sabiex il-kompetittività tingħata spinta, issemmew dawn li ġejjin:

• id-diġitalizzazzjoni tas-suq uniku, tal-industrija u l-SMEs
• l-applikazzjoni tal-prinċipji ta' regolamentazzjoni intelliġenti mingħajr ma jiddgħajjef il-livell ta' protezzjoni tal-konsumaturi u l-ħaddiema
• appoġġ għal raggruppamenti għall-innovazzjoni

Il-Presidenza Lussemburgiża fasslet lista indikattiva u mhux eżawrjenti ta' inizjattivi attwali u li ġejjin li x'aktarx ikollhom impatt sinifikanti fuq il-kompetittività, inkluż inizjattivi ttrattati minn konfigurazzjonijiet oħrajn tal-Kunsill. Dan ta lil ministri stampa ġenerali informali tal-fajls ewlenin għall-integrazzjoni tal-kompetittività.

Ir-riżultat tad-dibattiti ppermetta lill-presidenza tressaq rapport li ntbagħat lill-Kunsill Kompetittività tat-30 ta' Novembru.

• Laqgħa tal-Kunsill Kompetittività, 1 ta' Ottubru 2015