Kunsill Ambjent, 25 ta' Marzu 2024

Riżultati prinċipali

Direttiva qafas dwar l-iskart

Il-ministri għall-ambjent tal-UE kellhom dibattitu ta' orjentazzjoni dwar il-proposta tal-Kummissjoni biex tiġi riveduta d-direttiva qafas dwar l-iskart, b'enfasi fuq is-setturi tat-tessuti u tal-ikel. L-għan ġenerali tad-diskussjoni kien li tingħata aktar gwida għall-ħidma teknika li għaddejja dwar l-emendi proposti.

Kull sena, miljuni ta’ tunnellati ta’ ikel u tessuti jintremew bħala skart fl-UE, b’impatt negattiv enormi fuq l-ambjent tagħna. Dawn huma ċifri allarmanti u l-proposta li ddiskutejna llum għandha l-għan li twaqqaf din ix-xejra għalkollox u li tagħti spinta lill-ekonomija ċirkolari. Kellna diskussjoni produttiva biex niggwidaw aktar il-ħidma importanti li qed issir fuq ir-rieżami mmirat tad-direttiva qafas dwar l-iskart. Jien pożittiv li ser naslu għal ftehim ibbilanċjat fix-xhur li ġejjin.

Alain Maron, Ministru għat-Tranżizzjoni Klimatika, l-Ambjent, l-Enerġija u d-Demokrazija Parteċipattiva tal-Gvern tar-Reġjun ta’ Brussell-Kapitali

Il-proposta għandha l-għan li tnaqqas l-impatti ambjentali u klimatiċi assoċjati mal-ġenerazzjoni u l-ġestjoni tal-iskart tat-tessuti u tal-ikel. B'rabta mat-tessuti, hija tintroduċi skemi obbligatorji u armonizzati ta' responsabbiltà estiża tal-produttur (EPR) madwar l-UE, sabiex il-produtturi jkopru l-ispejjeż tal-ġestjoni tal-iskart tat-tessuti. Ir-regoli proposti għandhom ukoll l-għan li jiżguraw li t-tessuti użati jiġu sseparati biex jintużaw mill-ġdid, u dawk li ma jistgħux jerġgħu jintużaw jiġu riċiklati, bi qbil mal-"ġerarkija tal-iskart".

Il-proposta tistabbilixxi wkoll miri legalment vinkolanti għat-tnaqqis tal-iskart tal-ikel għall-istati membri, li għandhom jintlaħqu sal-2030 biex jikkontribwixxu għall-impenji tal-UE skont l-għanijiet ta' żvilupp sostenibbli (SDGs). Barra minn hekk, id-direttiva emendata tirrikjedi li l-istati membri jirrieżaminaw u jadattaw il-programmi nazzjonali tagħhom għall-prevenzjoni tal-iskart tal-ikel bil-ħsieb li jintlaħqu dawk il-miri.

Fost affarijiet oħra, il-ministri ddiskutew il-livell ta' ambizzjoni tal-objettivi għat-tnaqqis tal-iskart tal-ikel sal-2030 u l-effettività tar-responsabbiltà estiża tal-produtturi tat-tessuti biex jiġi miġġieled l-impatt ambjentali tal-iskart tat-tessuti.

• Dokument ta' sfond tal-presidenza
• Ara s-seduta pubblika
• Proposta għal reviżjoni mmirata tad-Direttiva Qafas dwar l-Iskart (Kummissjoni Ewropea)
• Innaqqsu t-telf u l-ħela ta' ikel (informazzjoni ġenerali)
• L-ekonomija ċirkolari (informazzjoni ġenerali)

Innaqqsu t-tniġġis mill-mikroplastik

Il-ministri kellhom ukoll dibattitu ta' orjentazzjoni dwar il-proposta tal-Kummissjoni dwar il-prevenzjoni tat-telf tal-pellets tal-plastik fl-ambjent. Ir-regolament propost għandu l-għan li jkompli jnaqqas it-tniġġis mill-mikroplastik, b'mod speċifiku billi jindirizza r-rilaxx mhux intenzjonat tal-mikroplastiks mill-immaniġġar tal-pellets tal-plastik.

Il-proposta tistabbilixxi obbligu ġenerali għall-operaturi u għat-trasportaturi tal-UE u mhux tal-UE biex jipprevjenu t-telf tal-pellets tal-plastik u tinkludi l-aħjar prattiki ta’ ġestjoni għall-operaturi, sistema ta’ ċertifikazzjoni obbligatorja u metodoloġija armonizzata biex jiġi stmat it-telf.

Il-ministri laqgħu l-proposta u qablu mal-importanza li jkun hemm leġiżlazzjoni fil-livell tal-UE ffukata fuq it-tnaqqis tat-tniġġis mill-mikroplastik. Huma ffukaw fuq jekk iqisux li d-dispożizzjonijiet huma adegwati u jevalwaw ir-regolament propost fir-rigward tar-responsabbiltà allokata lil atturi pubbliċi u privati differenti. Ivvalutaw ukoll il-ħtieġa li jiġu inklużi miżuri relatati mat-trasport marittimu, li mhuwiex kopert mill-proposta mressqa mill-Kummissjoni.

• Dokument ta' sfond tal-presidenza
• Ara s-seduta pubblika
• Proposta għal regolament dwar il-prevenzjoni tat-telf tal-pellets tal-plastik biex jitnaqqas it-tniġġis mill-mikroplastik (Kummissjoni Ewropea)
• Pjan ta' azzjoni ta' tniġġis żero (Kummissjoni Ewropea)

Mira klimatika għall-2040

Il-ministri għall-ambjent tal-UE kellhom skambju ta' fehmiet dwar il-komunikazzjoni reċenti tal-Kummissjoni dwar il-mira klimatika tal-UE għall-2040. L-għan ta’ din il-komunikazzjoni huwa li tvara dibattitu politiku u tipprovdi l-informazzjoni għat-tħejjija tal-qafas ta’ politika Ewropew għall-klima għal wara l-2030.

Għal dan l-għan, il-komunikazzjoni tistabbilixxi viżjoni biex jintlaħaq l-objettiv tal-Ewropa tan-newtralità klimatika sal-2050, li tinkludi mira intermedjarja għall-2040, kif stabbilit mil-liġi tal-UE dwar il-klima. Il-Kummissjoni rrakkomandat tnaqqis nett tal-gassijiet serra (GHG) tal-UE ta’ 90% sal-2040 meta mqabbla mal-1990.

B’mod partikolari, il-ministri laqgħu l-komunikazzjoni u enfasizzaw il-ħtieġa għal mira ambizzjuża li fl-istess ħin tiżgura tranżizzjoni ġusta u sostenibbiltà kompetittiva. Huma ddiskutew kif l-UE għandha tfittex it-tranżizzjoni lejn in-newtralità klimatika u xi jkunu l-kundizzjonijiet abilitanti importanti għal qafas lil hinn mill-2030. Iddiskutew ukoll liema setturi għandhom l-akbar potenzjal biex jikkontribwixxu għat-tranżizzjoni.

• Dokument ta' sfond tal-presidenza
• Ara s-seduta pubblika
• Komunikazzjoni dwar il-mira klimatika tal-UE għall-2040 (Kummissjoni Ewropea)
• Tibdil fil-klima: x'qed tagħmel l-UE (informazzjoni ġenerali)
• Newtralità klimatika (informazzjoni ġenerali)

Punti A u affarijiet oħra

Fil-bidu tal-laqgħa, il-ministri għall-ambjent tal-UE adottaw formalment ir-reviżjoni tar-regolament dwar il-vjeġġi ta’ skart bħala "punt A" leġiżlattiv.

Waqt l-ikla ta’ nofsinhar, il-Kummissarju Wopke Hoekstra u Prof. Patrick Willems minn KU Leuven ingħaqdu mal-ministri biex jiddiskutu r-reżiljenza tal-ilma. Id-diskussjoni informali kienet dwar l-impatti transkonfinali tat-tibdil fil-klima fuq ir-reżiljenza tal-ilma madwar l-Ewropa u l-ħtieġa li l-UE tipprovdi aktar appoġġ finanzjarju u regolatorju.

Taħt "affarijiet oħra", il-Presidenza infurmat lill-ministri dwar il-progress li għaddej fuq ir-regolament dwar qafas tal-UE għall-monitoraġġ tal-foresti u dwar ir-regolament dwar ir-restawr tan-natura. 

• Proposti leġiżlattivi attwali: qafas ta’ monitoraġġ tal-foresti (nota ta’ informazzjoni)

  Din ir-riżorsa bħalissa hi disponibbli biss bil-lingwa jew il-lingwi li ġejjin:

  EN
• Ir-restawr tan-natura: il-Kunsill u l-Parlament jilħqu ftehim dwar regoli ġodda għar-restawr u l-preservazzjoni tal-ħabitats degradati fl-UE (stqarrija għall-istampa, 9 ta' Novembru 2023)

Il-Kummissjoni ppreżentat l-evalwazzjoni ta' nofs it-terminu tagħha tat-tmien programm ta' azzjoni ambjentali (EAP) u l-komunikazzjoni tagħha dwar il-ġestjoni tar-riskji klimatiċi fl-Ewropa. Infurmat ukoll lill-ministri dwar is-sitwazzjoni attwali tal-pjanijiet nazzjonali għall-enerġija u l-klima.(NECPs).

• Rieżami ta' nofs it-terminu tat-tmien programm ta’ azzjoni ambjentali (Kummissjoni Ewropea)
• Komunikazzjoni tal-Kummissjoni dwar il-ġestjoni tar-riskji klimatiċi
• Is-sitwazzjoni attwali tal-progress tal-istati membri lejn l-objettivi klimatiċi għall-2030 (nota ta’ informazzjoni)

Il-presidenza rrapportat dwar avvenimenti ta’ livell għoli li organizzat u, flimkien mal-Kummissjoni, irrapportat dwar il-laqgħat internazzjonali reċenti ewlenin, inkluż:

• l-14-il laqgħa tal-konferenza tal-partijiet għall-konvenzjoni dwar il-konservazzjoni tal-ispeċijiet migratorji tal-annimali selvaġġi (COP 14) f’Samarkand, l-Użbekistan (12–17 ta’ Frar 2024), u
• is-sitt sessjoni tal-assemblea ambjentali tan-NU (UNEA-6) f’Nairobi, il-Kenja (26 ta’ Frar – 1 ta’ Marzu 2024) 

• Rapport dwar avvenimenti ta’ livell għoli organizzati mill-presidenza (nota ta’ informazzjoni)

  Din ir-riżorsa bħalissa hi disponibbli biss bil-lingwa jew il-lingwi li ġejjin:

  EN
• Eżitu tal-COP 14 (nota ta’ informazzjoni)

  Din ir-riżorsa bħalissa hi disponibbli biss bil-lingwa jew il-lingwi li ġejjin:

  EN
• UNEA-6 (nota ta’ informazzjoni)

  Din ir-riżorsa bħalissa hi disponibbli biss bil-lingwa jew il-lingwi li ġejjin:

  EN

Il-Kummissjoni infurmat ukoll lill-ministri dwar ir-ratifika ta’ diversi ftehimiet ambjentali multilaterali (MEAs).

Il-ministri kienu infurmati miċ-Ċekja u s-Slovakkja dwar id-"Dikjarazzjoni ta’ Djalogu Annwali ta’ Politika ta’ Karlovy Vary" u l-ħtieġa li tissaħħaħ it-tranżizzjoni ġusta fir-reġjuni l-aktar affettwati mid-dekarbonizzazzjoni.

L-Awstrija infurmat lill-ministri dwar l-importanza ta’ tal-bdiewa fuq skala żgħira u n-networks tal-bdiewa għal regolament sostenibbli tal-UE dwar iż-żrieragħ, fil-kuntest tal-ħidma li għaddejja dwar ir-regolament tal-UE dwar il-materjal riproduttiv tal-pjanti.

Id-delegazzjoni Rumena, Slovakka u dik Finlandiża infurmaw lill-ministri dwar il-valutazzjoni mill-ġdid tal-istatus ta’ konservazzjoni tal-ors kannella madwar l-Ewropa.

Il-ministri kienu infurmati ukoll minn Franza, id-Danimarka u l-Iżvezja dwar proposta għal kontroll aktar strett fuq l-esportazzjonijiet ta’ skart tat-tessuti lejn pajjiżi li qed jiżviluppaw, fil-kuntest tas-17-il laqgħa tal-konferenza tal-partijiet għall-Konvenzjoni ta’ Basel (COP17).

Il-Litwanja, appoġġata miċ-Ċekja, l-Estonja u l-Latvja, ippreżentat sejħa għal azzjonijiet biex jitwaqqfu l-importazzjonijiet tal-iskart mir-Russja lejn l-UE.