"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Il-ministri għall-ambjent u l-klima tal-UE approvaw il-konklużjonijiet tal-Kunsill dwar it-tħejjijiet għall-Konferenza tan-NU dwar it-Tibdil fil-Klima (COP30) tal-2025, li ser issir f'Belém, il-Brażil, mill-10 sal-21 ta' Novembru 2025. Il-konklużjonijiet ser iservu bħala l-pożizzjoni ġenerali ta' negozjar tal-UE waqt il-COP30.
Il-COP ta' din is-sena tfakkar l-għaxar anniversarju tal-Ftehim ta' Pariġi. Qabel il-COP30, il-partijiet huma mistennija jaqsmu l-impenji klimatiċi l-ġodda tagħhom, li ser juru jekk il-limitu tat-temperatura tal-Ftehim ta' Pariġi ta' 1.5°C għadux jista' jintlaħaq. Fil-konklużjonijiet tiegħu, il-Kunsill jissottolinja l-appoġġ qawwi tiegħu għall-kooperazzjoni multilaterali dwar il-klima u jiddeskrivi l-prijoritajiet tal-UE qabel il-COP30, filwaqt li jenfasizza l-urġenza tal-azzjoni klimatika globali.
Illum, l-UE għandha mandat Ewropew b'saħħtu għall-COP30. Irridu nħallu lil Belém bi triq ċara ‘l quddiem biex il-mira ta' 1.5 °C tkun tista' tintlaħaq. It-tibdil fil-klima wasal, u rridu naġixxu u nadattaw mill-aktar fis possibbli. Il-pass li jmiss huwa l-NDC tal-UE u l-Liġi dwar il-Klima, u ninsabu lesti li nkomplu wara d-diskussjoni strateġika bejn il-kapijiet ta' stat u ta' gvern Ewropej.
Lars Aagaard, Ministru għall-enerġija, il-klima u l-utilitajiet tad-Danimarka
L-UE tafferma mill-ġdid l-impenn tagħha li żżomm iż-żieda fit-temperatura globali taħt 1.5°C u tappella għal eżitu ddedikat fil-COP30, biex jiġi indirizzat il-livell kollettiv ta' ambizzjoni u implimentazzjoni. Il-konklużjonijiet jappellaw ukoll għal sforzi ta' adattament imsaħħa u jissottolinjaw l-importanza li jiġi mobilizzat il-finanzjament għall-klima f'konformità mal-għan kollettiv ġdid kwantifikat (NCQG) adottat fil-COP29 f'Baku minn firxa wiesgħa ta' kontributuri. Dan jenfasizza l-ħtieġa li l-kapaċità tal-enerġija rinnovabbli tiġi ttriplata globalment u li r-rata annwali medja globali tat-titjib fl-effiċjenza enerġetika tiġi rduppjata sal-2030, flimkien mal-aċċellerazzjoni ta' teknoloġiji b'emissjonijiet żero u baxxi, u l-eliminazzjoni gradwali tal-produzzjoni u l-konsum tal-enerġija mill-fjuwils fossili fil-livell globali.
Il-ministri adottaw wkoll konklużjonijiet dwar l-istrateġija Ewropea għar-reżiljenza tal-ilma, li nħarġet mill-Kummissjoni Ewropea f'Ġunju 2025.
L-istrateġija għandha l-għan li tirrestawra u tħares iċ-ċiklu tal-ilma filwaqt li toħloq ekonomija sostenibbli, reżiljenti, kompetittiva u ċirkolari li tuża l-ilma b'mod intelliġenti, u tiżgura aċċess għal ilma sikur u affordabbli. L-istrateġija tistabbilixxi perkors biex l-Ewropa ssir reżiljenti fil-qasam tal-ilma, inkluż l-indirizzar tal-iskarsezza tal-ilma permezz ta' żieda fl-effiċjenza tal-ilma.
Ir-riżorsi tal-ilma u tal-oċeani tal-Ewropa jinsabu taħt pressjoni dejjem akbar mit-tniġġis, mill-iskart u mit-tibdil fil-klima. Bħala l-kontinent li qed jisħon l-aktar malajr, l-Ewropa qed tiffaċċa aktar nixfiet, għargħar u skarsezza tal-ilma minn qatt qabel. Dawn l-isfidi ma jafux fruntieri — jirrikjedu azzjoni Ewropea b'saħħitha u magħquda. Bil-progress li għamilna llum fl-Istrateġija għar-Reżiljenza tal-Ilma u l-Patt dwar l-Oċeani, qed inżidu l-isforzi konġunti biex inħarsu l-ilma ħelu u l-oċeani tagħna permezz ta' approċċ aktar koordinat u olistiku li jissalvagwarda l-klima, il-bijodiversità u l-ġenerazzjonijiet futuri.
Magnus Heunicke, Ministru għall-ambjent u l-ugwaljanza bejn il-ġeneri tad-Danimarka
Fil-konklużjonijiet tiegħu, il-Kunsill laqa' l-istrateġija, filwaqt li enfasizza l-ħtieġa urġenti li jiġi restawrat u mħares iċ-ċiklu tal-ilma, tissaħħaħ l-infrastruttura tal-ilma u jiġi żgurat aċċess ekwu għall-ilma. Il-ministri enfasizzaw l-importanza tar-reżiljenza tal-ilma fis-setturi kollha, l-innovazzjoni, il-kooperazzjoni transkonfinali u l-koordinazzjoni. Huma jenfasizzaw l-urġenza li jiġu indirizzati s-sustanzi niġġiesa fis-sors biex jiġi ssalvagwardat l-ilma Ewropew.
Il-konklużjonijiet jenfasizzaw ukoll ir-rwol strateġiku tas-sigurtà tal-ilma għall-kompetittività, it-tħejjija għall-kriżijiet u l-kooperazzjoni globali tal-UE. Il-Kunsill enfasizza l-importanza li jiġi żgurat finanzjament adegwat u aċċessibbli għall-implimentazzjoni tal-aġenda dwar ir-reżiljenza tal-ilma.
Il-ministri għall-ambjent kellhom skambju ta' fehmiet dwar il-patt Ewropew għall-oċeani, inizjattiva mnedija mill-Kummissjoni Ewropea biex tissaħħaħ il-politika tal-UE dwar l-oċeani f'sitt oqsma ta' prijorità, mir-restawr tas-saħħa tal-baħar u t-tisħiħ tal-ekonomija blu għall-appoġġ tal-komunitajiet kostali u t-tisħiħ tas-sigurtà marittima.
Il-ministri ssottolinjaw il-ħtieġa ta' azzjoni aktar b'saħħitha u aktar koerenti għall-ħarsien u r-restawr tal-bijodiversità tal-baħar. Huma laqgħu l-approċċ olistiku tal-patt li jorbot is-saħħa tal-oċeani, l-ekonomija blu u l-komunitajiet kostali, u enfasizzaw l-importanza li l-leġiżlazzjoni u l-oqfsa ta' governanza eżistenti tal-UE jiġu allinjati.
Ir-reviżjoni li jmiss tad-Direttiva Kwadru dwar l-Istrateġija Marina (MSFD) intlaqgħet b'appoġġ ġenerali u ġiet identifikata bħala opportunità ewlenija biex jitħaffef il-progress lejn il-kisba ta' status ambjentali tajjeb fl-ilmijiet tal-baħar tal-UE. Il-ministri nnutaw il-ħtieġa ta' implimentazzjoni aktar koerenti tad-direttiva u sostnew li għandu jkun hemm ċikli ta' rappurtar simplifikati biex jitnaqqsu l-piżijiet amministrattivi, kif ukoll allinjament aħjar ma' politiki oħra tal-UE u integrazzjoni tal-kunsiderazzjonijiet dwar it-tibdil fil-klima. Il-ministri enfasizzaw ukoll il-ħtieġa ta' finanzjament iddedikat, li t-tniġġis jiġi indirizzat aħjar fis-sors u ta' ġestjoni aħjar taż-żoni marini.
Il-presidenza Daniża u l-Kummissjoni Ewropea infurmaw lill-ministri dwar tliet laqgħat internazzjonali reċenti:
it-tkomplija tat-tielet sessjoni tal-grupp ta' ħidma miftuħ ad hoc dwar panel ta' politika xjentifika (SPP OEWG 3.2) u laqgħa intergovernattiva sussegwenti (SPP IM) dwar il-ġestjoni tajba tas-sustanzi kimiċi u l-iskart
Din ir-riżorsa bħalissa hi disponibbli biss bil-lingwa jew il-lingwi li ġejjin:
it-tieni parti tal-ħames sessjoni tal-kumitat intergovernattiv ta' negozjar (INC-5.2) biex jiġi żviluppat strument internazzjonali legalment vinkolanti dwar it-tniġġis mill-plastik
Din ir-riżorsa bħalissa hi disponibbli biss bil-lingwa jew il-lingwi li ġejjin:
il-pakkett ta' proposti li jmiss għas-sistema l-ġdida għall-iskambju ta' kwoti tal-emissjonijiet għat-trasport bit-triq u l-fjuwils tal-bini (ETS2)
Ċipru informa lill-ministri dwar l-inizjattivi u l-għodod differenti li żviluppa biex isaħħaħ l-ekonomija ċirkolari fil-pajjiż u jiffaċilita l-implimentazzjoni tagħha.
Din ir-riżorsa bħalissa hi disponibbli biss bil-lingwa jew il-lingwi li ġejjin:
Il-Litwanja u stati membri oħra infurmaw lill-ministri dwar dokument informali rigward il-flotta mistura u t-theddid urġenti tagħha għall-ambjent tal-baħar.
Il-ministri semgħu liċ-Ċekja, appoġġata minn stati membri oħra, dwar l-aġenda ambjentali fil-Qafas Finanzjarju Pluriennali (QFP) 2028–2034.
Din ir-riżorsa bħalissa hi disponibbli biss bil-lingwa jew il-lingwi li ġejjin:
Franza u Spanja infurmaw ukoll lill-ministri dwar l-istandards tal-emissjonijiet tas-CO2 għall-vetturi ħfief, filwaqt li enfasizzaw b'mod partikolari li t-twettiq tal-mira fir-rigward tal-vetturi b'emissjonijiet żero sal-2035 hija essenzjali biex tinkiseb in-newtralità klimatika sal-2050.
Il-ministri kellhom ikla ta' nofsinhar informali dwar it-tħejjijiet għal negozjati ambjentali internazzjonali fis-seba' sessjoni li jmiss tal-Assemblea tan-NU għall-Ambjent (UNEA-7) f'Diċembru 2025 f'Nairobi, il-Kenja, u l-proċess tal-kumitat intergovernattiv ta' negozjar (INC) dwar it-tniġġis mill-plastik.
Dokumenti tal-laqgħat
Dokumenti ta' tħejjija
Din ir-riżorsa bħalissa hi disponibbli biss bil-lingwa jew il-lingwi li ġejjin:
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
