Summit bejn l-UE u l-Istati Uniti, Brussell, 15/06/2021, 15 ta' Ġunju 2021

Riżultati ewlenin

Is-summit bejn l-UE u l-Istati Uniti fil-15 ta' Ġunju 2021 immarka l-bidu ta' sħubija transatlantika mġedda u ffissa aġenda konġunta għall-kooperazzjoni bejn l-UE u l-Istati Uniti fl-era ta' wara l-pandemija. Il-mexxejja ħadu l-impenn li jkollhom djalogu regolari biex iqisu l-progress.

Ir-riżultati tanġibbli ewlenin tas-summit jinkludu tliet inizjattivi kummerċjali ġodda ewlenin. Il-mexxejja qablu li:

• joħolqu Qafas Kooperattiv għal Inġenji tal-Ajru Ċivili Kbar
• ikollhom diskussjonijiet biex isolvu d-differenzi dwar miżuri rigward l-azzar u l-aluminju sa tmiem is-sena
• iwaqqfu Kunsill tal-Kummerċ u t-Teknoloġija bejn l-UE u l-Istati Uniti

Charles Michel, President tal-Kunsill Ewropew, u Ursula von der Leyen, President tal-Kummissjoni Ewropea, irrappreżentaw lill-UE. Il-President Joe Biden irrappreżenta lill-Istati Uniti. Dan kien l-ewwel summit bejn l-UE u l-Istati Uniti mill-2014 'l hawn u l-ewwel żjara minn President tal-Istati Uniti fl-istituzzjonijiet tal-UE mill-2017 'l hawn.

Fi tmiem is-summit, il-mexxejja adottaw stqarrija konġunta.

• Stqarrija tas-summit bejn l-UE u l-Istati Uniti: "Lejn Sħubija transatlantika mġedda"
• Kummenti mill-President Charles Michel wara s-summit bejn l-UE u l-Istati Uniti fi Brussell, 15 ta' Ġunju 2021

COVID-19, tħejjija fil-qasam tas-saħħa, irkupru globali sostenibbli

Irridu li l-COVID-19 tispiċċa fil-kotba tal-istorja, u hemm biss mod wieħed: il-kooperazzjoni internazzjonali. Irridu nwettqu dan, billi niżguraw li l-popolazzjoni tad-dinja jkollha aċċess għat-tilqim. Il-President Charles Michel

L-UE u l-Istati Uniti ħadu impenn li jkomplu jappoġġaw il-Faċilità COVAX u jħeġġu aktar donaturi jagħmlu żewġ biljun doża ta' tilqim disponibbli madwar id-dinja sa tmiem l-2021. Huma jaspiraw li jipprovdu biżżejjed dożi ta' tilqim biex ilaqqmu żewġ terzi tal-popolazzjoni tad-dinja sa tmiem l-2022.

Il-mexxejja enfasizzaw il-ħolqien ta' Task Force Konġunta bejn l-UE u l-Istati Uniti dwar il-Manifattura u l-Katina tal-Provvista fil-ġlieda kontra l-COVID. L-għan tagħha huwa li tespandi l-kapaċità tal-produzzjoni tat-tilqim u t-terapiji billi:

• tibni faċilitajiet ġodda ta' produzzjoni għat-tilqim u t-terapiji
• iżomm ktajjen ta' provvista miftuħa u siguri
• tevita kull restrizzjoni mhux meħtieġa fuq l-esportazzjoni
• tħeġġeġ il-qsim volontarju tal-għarfien u t-teknoloġija

L-UE u l-Istati Uniti ser isaħħu l-kooperazzjoni fuq ir-riforma tal-Organizzazzjoni Dinjija tas-Saħħa (WHO). Il-mexxejja laqgħu l-idea li jevalwaw il-benefiċċji tal-iżvilupp ta' konvenzjoni, ftehim jew strument internazzjonali ieħor tad-WHO dwar it-tħejjija u r-rispons għall-pandemiji.

Li nieħdu tagħlima mill-COVID ifisser ukoll li nitgħallmu kif inħejju għal pandemiji u kriżijiet tas-saħħa futuri. Iddiskutejna trattat possibbli dwar il-pandemiji. Il-President Charles Michel

Il-mexxejja appellaw ukoll għal progress fuq studju tal-fażi 2 dwar l-oriġini tal-COVID-19 trasparenti, ibbażat fuq l-evidenza, immexxi minn esperti u organizzat mid-WHO li jkun ħieles mill-interferenza.

Il-mexxejja laqgħu d-diskussjonijiet tal-G7 dwar bini mill-ġdid aħjar għad-dinja, l-orjentazzjoni tal-għodod ta' finanzjament għall-iżvilupp lejn sfidi bħall-ħolqien ta' infrastruttura u teknoloġiji reżiljenti, u l-indirizzar tal-impatt tat-tibdil fil-klima.

L-UE u l-Istati Uniti biħsiebhom jimbuttaw b'mod konġunt irkupru globali sostenibbli u inklużiv, skont l-Aġenda 2030 tan-NU għall-Iżvilupp Sostenibbli. Huma ser ikomplu jipprovdu assistenza lill-pajjiżi fil-bżonn, jindirizzaw il-vulnerabbiltajiet tad-dejn u jistimulaw riformi domestiċi u aktar investiment privat.

Il-mexxejja qablu li jistabbilixxu grupp ta' ħidma konġunt ta' esperti bejn l-UE u l-Istati Uniti biex jissokta l-ivvjaġġar sikur u sostenibbli mhux essenzjali bejn l-UE u l-Istati Uniti.

Huma laqgħu l-progress li sar fid-diskussjonijiet dwar stati membri addizzjonali tal-UE li jgawdu minn vjaġġar mingħajr viża lejn l-Istati Uniti, u qablu li jkomplu dan id-djalogu.

Inħarsu l-pjaneta tagħna u nrawmu t-tkabbir ekoloġiku

L-UE u l-Istati Uniti huma ddedikati għall-Ftehim ta' Pariġi u l-implimentazzjoni effettiva u msaħħa tiegħu. Biex jipprovdu pjattaforma effettiva għall-kooperazzjoni f'dan ir-rigward, il-mexxejja ħadu impenn li jistabbilixxu Grupp ta' Livell Għoli dwar l-Azzjoni għall-Klima bejn l-UE u l-Istati Uniti.

Biħsiebna nagħtu eżempju billi nsiru ekonomiji b'emissjonijiet ta' gassijiet serra żero netti mhux aktar tard mill-2050 u nimplimentaw il-miri mtejba rispettivi tagħna għall-2030 / Kontributi Stabbiliti fil-Livell Nazzjonali (NDCs). Aħna lesti li naħdmu mas-sħab internazzjonali tagħna biex niksbu riżultat ambizzjuż fis-26 Konferenza tal-Partijiet dwar it-Tibdil fil-Klima tan-NU (COP26), filwaqt li nagħmlu kull sforz possibbli biex inżommu l-limitu ta' 1.5 grad fuq it-temperatura dinjija. Stqarrija tas-summit bejn l-UE u l-Istati Uniti

Il-mexxejja impenjaw ruħhom li jżidu malajr it-teknoloġiji u l-politika li jkomplu jaċċelleraw it-tranżizzjoni lil hinn mill-kapaċità tal-faħam mhux imnaqqsa u lejn sistema tal-enerġija dekarbonizzata ferm fis-snin 2030, b'mod konsistenti mal-NDCs għall-2030 u l-impenn ta' żero emissjonijiet netti sal-2050 rispettivi tal-UE u tal-Istati Uniti.

Il-mexxejja ddeċidew li jżidu l-kooperazzjoni tagħhom fuq tranżizzjoni għal ekonomija newtrali għall-klima, effiċjenti fl-użu tar-riżorsi u ċirkolari. Huma beħsiebhom jaħdmu għal Alleanza Transatlantika għat-Teknoloġija Ekoloġika li trawwem il-kooperazzjoni fl-iżvilupp u l-użu ta' teknoloġiji ekoloġiċi, kif ukoll li tippromwovi swieq biex dawn it-teknoloġiji jiġu intensifikati.

L-UE u l-Istati Uniti huma determinati ħafna li jwaqqfu u jreġġgħu lura t-telf tal-bijodiversità sal-2030 u jieħdu azzjoni urġenti biex jindirizzaw il-muturi tagħha. Il-mexxejja impenjaw ruħhom għall-għan li jikkonservaw jew jipproteġu mill-inqas 30% tal-art dinjija u 30% tal-oċeani tad-dinja sal-2030. Huma jaqsmu l-għan li jippromwovu flimkien qafas dinji ta' suċċess u ambizzjuż għall-bijodiversità għal wara l-2020 fil-15-il Konferenza tal-Partijiet dwar il-Bijodiversità tan-NU (COP15). Barra minn hekk, il-mexxejja impenjaw ruħhom li jaħdmu flimkien biex iħarsu l-oċeani tad-dinja, fost l-oħrajn billi jiġġieldu kontra l-iskart fil-baħar.

It-tisħiħ tal-kummerċ, l-investiment u l-kooperazzjoni teknoloġika

L-UE u l-Istati Uniti tal-Amerka għandhom l-akbar relazzjoni ekonomika fid-dinja. Huma impenjati li jżidu r-relazzjoni kummerċjali u ta' investiment bilaterali tagħhom u li jħarsu u jirriformaw is-sistema kummerċjali multilaterali bbażata fuq ir-regoli. Il-mexxejja qalu li beħsiebhom jużaw il-kummerċ biex jgħinu fil-ġlieda kontra t-tibdil fil-klima, iħarsu l-ambjent, jippromwovu d-drittijiet tal-ħaddiema, jespandu ktajjen tal-provvista reżiljenti u sostenibbli u joħolqu xogħlijiet diċenti.

Iddeċidejna li ningħaqdu flimkien biex nipproteġu lin-negozji u l-ħaddiema tagħna minn prattiki kummerċjali inġusti, b'mod partikolari dawk li ġejjin minn ekonomiji mhux tas-suq li jdgħajfu s-sistema kummerċjali dinjija. Stqarrija tas-summit bejn l-UE u l-Istati Uniti

Sabiex tiġi pprovduta pjattaforma effettiva għall-kooperazzjoni, il-mexxejja waqqfu Kunsill tal-Kummerċ u t-Teknoloġija (KKT) ta' livell għoli bejn l-UE u l-Istati Uniti. L-objettivi tal-KKT jinkludu:

• it-tkabbir tar-relazzjoni bilaterali fil-kummerċ u l-investiment
• l-evitar ta' ostakli tekniċi ġodda bla bżonn għall-kummerċ
• it-tisħiħ tal-kooperazzjoni dinjija fit-teknoloġija, kwistjonijiet diġitali u l-ktajjen tal-provvista
• kooperazzjoni fl-iżvilupp ta' standards kompatibbli u internazzjonali
• il-faċilitazzjoni tal-politika regolatorja
• il-promozzjoni tal-innovazzjoni u t-tmexxija minn kumpanniji tal-Istati Uniti u Ewropej

Fil-qafas tal-KKT, iż-żewġ sħab jimpenjaw ruħhom li jibnu sħubija bejn l-UE u l-Istati Uniti li tibbilanċja mill-ġdid il-ktajjen tal-provvista dinjija fis-semikondutturi, bil-ħsieb li tissaħħaħ is-sigurtà tal-provvista fl-UE u fl-Istati Uniti u tingħata spinta lill-kapaċità taż-żewġ sħab li jfasslu u jipproduċu l-aktar semikondutturi b'saħħithom u effiċjenti fl-użu tar-riżorsi.

B'mod parallel mal-KKT, l-UE u l-Istati Uniti beħsiebhom jistabbilixxu Djalogu Konġunt bejn l-UE u l-Istati Uniti dwar il-Politika tal-Kompetizzjoni fil-qasam tat-Teknoloġija li jiffoka fuq approċċi għall-politika tal-kompetizzjoni u l-infurzar, u aktar kooperazzjoni fis-settur tat-teknoloġija.

Is-summit offra wkoll il-prospett li jissolva tilwim kummerċjali li ilu jeżisti.

• Il-mexxejja laqgħu l-fatt li ntlaħaq Qbil dwar Qafas Kooperattiv għal Inġenji tal-Ajru Ċivili Kbar, li jirrifletti relazzjoni transatlantika ġdida f'dan il-qasam.
• Il-mexxejja qablu wkoll li jkollhom diskussjonijiet biex isolvu differenzi eżistenti dwar miżuri rigward l-azzar u l-aluminju qabel tmiem is-sena

Barra minn hekk, l-UE u l-Istati Uniti huma determinati li jrawmu sistema internazzjonali tat-taxxa ġusta, sostenibbli u moderna u jikkooperaw biex jiksbu kunsens dinji sa nofs l-2021 dwar il-kwistjoni tat-tassazzjoni ta' kumpaniji multinazzjonali fi ħdan l-OECD.

Il-mexxejja qablu wkoll li jaħdmu b'mod kooperattiv fuq l-isforzi biex tinkiseb riforma sinifikanti tal-Organizzazzjoni Dinjija tal-Kummerċ (WTO). Dan jinvolvi li jimxi 'l quddiem it-tħaddim xieraq tal-funzjoni ta' negozjar u s-sistema ta' soluzzjoni tat-tilwim tad-WTO, li ser jeħtieġu li jiġu indirizzati kwistjonijiet li ilhom jeżistu.

Bini ta' dinja aktar demokratika, paċifika u sigura

Flimkien, l-UE u l-Istati Uniti huma ankra għad-demokrazija, il-paċi u s-sigurtà madwar id-dinja. Huma magħqudin fix-xewqa tagħhom li jevitaw u jsolvu kunflitti b'mod paċifiku, jiddefendu l-istat tad-dritt u d-dritt internazzjonali, u jippromwovu d-drittijiet tal-bniedem għal kulħadd, l-ekwità u l-ugwaljanza bejn il-ġeneri, u l-għoti ta' setgħa lin-nisa u l-bniet. Iż-żewġ sħab beħsiebhom jappoġġaw id-demokrazija madwar id-dinja, fost l-oħrajn billi jiddefendu l-libertà tal-mezzi tax-xandir, javvanzaw internet ħieles u miftuħ, irawmu mġiba responsabbli fiċ-ċiberspazju u jindirizzaw id-diżinformazzjoni.

Il-mexxejja ddeċidew li jagħtu eżempju f'pajjiżhom, u li jissieħbu fis-Summit għad-Demokrazija, filwaqt li impenjaw ruħhom għal azzjonijiet konkreti biex jiddefendu d-drittijiet universali tal-bniedem, jevitaw ir-rigress demokratiku u jiġġieldu l-korruzzjoni.

L-UE u l-Istati Uniti beħsiebhom jikkonsultaw u jikkooperaw mill-qrib fuq il-firxa sħiħa ta' kwistjonijiet rigward iċ-Ċina, li jinkludu elementi ta' kooperazzjoni, kompetizzjoni, u rivalità sistemika. Beħsiebhom ikomplu jikkoordinaw fuq it-tħassib komuni tagħhom, inkluż il-ksur kontinwu tad-drittijiet tal-bniedem f'Xinjiang u t-Tibet, l-erożjoni tal-awtonomija u l-proċessi demokratiċi f'Hong Kong, il-koerċizzjoni ekonomika, il-kampanji ta' diżinformazzjoni u kwistjonijiet ta' sigurtà reġjonali.

Għadna mħassbin serjament dwar is-sitwazzjoni fl-Ibħra tal-Lvant u tan-Nofsinhar taċ-Ċina u nopponu bil-qawwa kwalunkwe tentattiv unilaterali biex jinbidel l-istatus quo u jiżdiedu t-tensjonijiet. Nenfasizzaw l-importanza tal-paċi u l-istabbiltà fl-Istrett tat-Tajwan u nħeġġu r-riżoluzzjoni paċifika tal-kwistjonijiet bejn l-Istrett. Stqarrija tas-summit bejn l-UE u l-Istati Uniti

L-UE u l-Istati Uniti beħsiebhom ukoll jikkoordinaw fl-involviment kostruttiv tagħhom maċ-Ċina għal kwistjonijiet bħat-tibdil fil-klima u n-nonproliferazzjoni, u ċerti kwistjonijiet reġjonali.

L-UE u l-Istati Uniti huma magħquda fl-approċċ ta' prinċipju tagħhom għar-Russja. Huma lesti li jwieġbu b'mod deċiżiv għat-tendenza ripetuta tagħha ta' mġiba negattiva u attivitajiet ta' ħsara. Il-mexxejja qablu li jistabbilixxu djalogu ta' livell għoli bejn l-UE u l-Istati Uniti dwar ir-Russja biex jikkoordina l-politika u l-azzjonijiet tagħna f'dan ir-rigward.

Il-mexxejja indirizzaw ukoll firxa wiesgħa ta' kwistjonijiet ġeopolitiċi, ta' politika barranija u ta' sigurtà urġenti oħra ta' tħassib komuni.

Huma esprimew id-determinazzjoni tagħhom li jkomplu jappoġġaw is-sovranità, l-indipendenza u l-integrità territorjali tas-sħab tal-Lvant tal-UE, u li jappoġġaw it-triq ta' riforma tal-Ukrajna, il-Georgia u r-Repubblika tal-Moldova. Huma determinati li jaħdmu għall-paċi, ir-reżiljenza u l-istabbiltà dejjiema fil-Kawkasu tan-Nofsinhar.

L-UE u l-Istati Uniti jappoġġaw il-poplu tal-Belarussja u t-talbiet tagħhom għad-drittijiet tal-bniedem u d-demokrazija.

Irridu nżommu lir-reġim ta' Lukashenka responsabbli għall-attakki dejjem akbar tiegħu fuq id-drittijiet tal-bniedem u l-libertajiet fundamentali, u talli pperikola s-sikurezza tal-avjazzjoni permezz tad-devjazzjoni furzata bla preċedent u inaċċettabbli ta' ajruplan tal-passiġġieri tal-UE bi pretensjonijiet foloz, u l-arrest sussegwenti ta' ġurnalist bħala parti minn attakk kontinwu fuq l-ilħna tal-oppożizzjoni u l-libertà tal-istampa. Stqarrija tas-summit bejn l-UE u l-Istati Uniti

Barra minn hekk, l-UE u l-Istati Uniti beħsiebhom ikomplu jsaħħu l-impenn konġunt tagħhom fil-Balkani tal-Punent, u determinati li jaħdmu id f'id biex inaqqsu t-tensjoni b'mod sostenibbli fil-Lvant tal-Mediterran, fejn id-differenzi għandhom jissolvew permezz ta' djalogu b'rieda tajba u skont il-liġi internazzjonali tal-baħar. L-UE u l-Istati Uniti għandhom ukoll l-għan li jistabbilixxu relazzjoni kooperattiva u ta' benefiċċju reċiproku ma' Turkija demokratika.

Il-mexxejja laqgħu l-waqfien mill-ġlied fil-kunflitt fil-Lvant Nofsani u esprimew it-tħassib serju tagħhom dwar is-sitwazzjoni politika, tad-drittijiet tal-bniedem, tas-sigurtà u dik umanitarja fl-Etjopja, is-Somalja u l-pajjiżi tas-Saħel, b'mod partikolari dwar il-polarizzazzjoni politika u etnika dejjem akbar fl-Etjopja li thedded is-sovranità u l-integrità territorjali tal-pajjiż. Il-mexxejja ddiskutew ukoll appoġġ speċifiku finanzjarju u għall-iżvilupp għall-pajjiżi Afrikani.

Huma ddiskutew ukoll is-sitwazzjonijiet fl-Indo-Paċifiku, il-Myanmar, l-Afganistan, l-Amerka Latina u l-Karibew, u b'mod partikolari l-Venezwela, u ddeċidew li jaħdmu flimkien biex iżommu l-Artiku bħala reġjun ta' paċi u stabbiltà.

Il-mexxejja enfasizzaw l-appoġġ tagħhom għall-isforzi u n-negozjati diplomatiċi li għaddejjin fi Vjenna bil-għan li jiffaċilitaw ir-ritorn tal-Istati Uniti għall-Pjan ta' Azzjoni Komprensiv Konġunt (PAKK), kif ukoll l-implimentazzjoni sħiħa u effettiva tal-ftehim mill-Iran u l-Istati Uniti.

Fl-aħħar nett, il-mexxejja laqgħu l-istedina tal-UE lill-Istati Uniti biex jissieħbu fil-proġett ta' Mobbiltà Militari tal-PESCO bħala pass importanti lejn sħubija aktar mill-qrib bejn l-UE u l-Istati Uniti fis-sigurtà u d-difiża. Il-mexxejja impenjaw ruħhom li jaħdmu għal Arranġament Amministrattiv għall-Istati Uniti mal-Aġenzija Ewropea għad-Difiża, u qablu li jaħdmu flimkien biex jgħollu l-livell tal-ambizzjoni tan-NATO u tal-UE biex isaħħu aktar din is-sħubija strateġika ewlenija li ssaħħaħ lil xulxin.

Kuntest

Fl-10 u l-11 ta' Diċembru 2020 il-Kunsill Ewropew kellu diskussjoni dwar ir-relazzjonijiet bejn l-UE u l-Istati Uniti. Fil-konklużjonijiet tagħhom, il-mexxejja enfasizzaw l-importanza ta' sħubija tranżatlantika strateġika b'saħħitha bbażata fuq interessi komuni u valuri mħaddna mit-tnejn.

• Nota ta' informazzjoni
• Kunsill Ewropew, 10-11 ta' Diċembru 2020
• Skeda informattiva dwar ir-relazzjonijiet bejn l-UE u l-Istati Uniti

Fil-25 ta' Marzu 2021, il-President tal-Istati Uniti Joe Biden ingħaqad mal-mexxejja tal-UE waqt vidjokonferenza tal-membri tal-Kunsill Ewropew.

Fis-7 ta' Diċembru 2020, wara l-elezzjonijiet tal-Istati Uniti, il-Kunsill kellu diskussjoni fuq il-bażi ta' komunikazzjoni konġunta dwar kif tingħata ħajja ġdida lis-sħubija strateġika mal-Istati Uniti. F'dan il-kuntest il-Kunsill adotta konklużjonijiet dwar ir-relazzjonijiet bejn l-UE u l-Istati Uniti.

• Konklużjonijiet tal-Kunsill dwar ir-relazzjonijiet bejn l-Unjoni Ewropea u l-Istati Uniti, 7 ta' Diċembru 2020
• Komunikazzjoni Konġunta tal-Kummissjoni u tar-Rappreżentant Għoli (Kummissjoni Ewropea)

Fit-22 ta' Frar, il-Kunsill Affarijiet Barranin kellu skambju ta' fehmiet, permezz ta' vidjokonferenza, mas-Segretarju tal-Istat il-ġdid tal-Istati Uniti Antony Blinken dwar l-aġenda sostantiva għall-kooperazzjoni bejn l-UE u l-Istati Uniti dwar kwistjonijiet ewlenin ta' politika globali, barranija u ta' sigurtà.

Fl-10 ta' Mejju, il-Kunsill Affarijiet Barranin iddiskuta l-prijoritajiet għall-ħidma mal-amministrazzjoni tal-Istati Uniti, u qasam il-fehmiet tiegħu mal-Mibgħut Speċjali Presidenzjali tal-Istati Uniti dwar il-Klima John Kerry.

Fl-20 ta' Mejju l-Kunsill Affarijiet Barranin iddiskuta r-relazzjonijiet kummerċjali bejn l-UE u l-Istati Uniti u qasam il-fehmiet tiegħu informalment mar-Rappreżentant tal-Kummerċ tal-Istati Uniti Katherine Tai.

• Kunsill Affarijiet Barranin (Kummerċ), 20 ta' Mejju 2021
• Infografika: Kummerċ bejn l-UE u l-Istati Uniti
• Kummerċ bejn l-UE u l-Istati Uniti (Kummissjoni Ewropea)

L-aħħar summit bejn il-mexxejja tal-UE u tal-Istati Uniti sar fi Brussell fil-25 ta' Mejju 2017. Dan laqqa' flimkien lill-President preċedenti tal-Kunsill Ewropew, Donald Tusk, u l-President preċedenti tal-Kummissjoni Ewropea, Jean-Claude Juncker, u l-45 President tal-Istati Uniti, Donald Trump.