"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Summit tal-G7, Cornwall, ir-Renju Unit, 11-13/06/2021, 11-13 ta' Ġunju 2021
Riżultati ewlenin
Charles Michel, President tal-Kunsill Ewropew, u Ursula von der Leyen, President tal-Kummissjoni Ewropea, irrappreżentaw lill-UE fis-summit tal-G7 ta' din is-sena ospitat f'Carbis Bay, Cornwall.
Matul il-laqgħa ta' tlett ijiem il-mexxejja tal-G7 iddiskutew firxa wiesgħa ta' suġġetti urġenti, inkluż il-COVID-19, it-tħejjija għall-pandemiji u l-irkupru ekonomiku; l-isfidi ġeopolitiċi u l-affarijiet barranin; il-kummerċ u l-iżvilupp; il-promozzjoni ta' soċjetajiet miftuħa u valuri demokratiċi; u l-ġlieda kontra t-tibdil fil klima u l-ħarsien tal-ambjent.
Is-summit sar taħt il-presidenza tar-Renju Unit tal-G7, bit-tema ġenerali tiegħu tkun "Nibnu mill-Ġdid Aħjar" wara l-pandemija. Ir-Renju Unit stieden mexxejja mill-Awstralja, l-Indja, il-Korea t'Isfel u l-Afrika t'Isfel biex jattendu parti mil-laqgħa bħala pajjiżi mistiedna.
Fi tmiem is-summit, il-mexxejja tal-G7 adottaw komunikat tal-mexxejja.
Ritratt mis-sala: Nibnu mill-ġdid aħjar - irkupru għal kulħadd
Saħħa
Il-mexxejja stabbilew għan kollettiv li tintemm il-pandemija fl-2022. Dan ser jeħtieġ it-tilqim ta' mill-inqas 60 fil-mija tal-popolazzjoni globali. It-tħaffif tal-introduzzjoni ta' tilqim sikur, effettiv, aċċessibbli u affordabbli huwa għalhekk prijorità internazzjonali għall-G7.
Il-G7 impenja ruħu li jipprovdi biljun doża ta' tilqim matul is-sena d-dieħla. Dawn ser jgħaddu primarjament permezz tal-COVAX, il-pilastru tat-tilqim tal-Aċċelleratur tal-Aċċess għall-Għodod kontra l-COVID-19 (ACT-A), lejn dawk l-aktar fil-bżonn. Jekk jingħaddu flimkien mal-ekwivalenti f'tilqim tal-kontribuzzjoni finanzjarja tal-G7 ta' $8.6 biljun, dan ifisser kontribuzzjoni totali tal-G7 ta' aktar minn żewġ biljun doża ta' tilqim.
Filwaqt li enfasizzaw il-ħtieġa ta' aċċess ekwu għat-tilqim kontra l-COVID-19, il-mexxejja tal-G7 impenjaw ruħhom li jappoġġaw il-manifattura tal-għodod kontra l-COVID-19 f'pajjiżi bi dħul baxx u jħaffu l-manifattura tagħhom fil-kontinenti kollha. Il-mexxejja ser jipparteċipaw b'mod kostruttiv fid-diskussjonijiet fid-WTO dwar ir-rwol tal-proprjetà intellettwali, inkluż billi jaħdmu b'mod konsistenti fi ħdan il-ftehim TRIPS.
Il-prijorità kienet li niżguraw li nkunu nistgħu nilħqu mad-domanda għat-tilqim u hawn l-UE assumiet it-tmexxija. Is-sħab issa ngħaqdu magħna biex iħaffu l-produzzjoni u t-twassil tat-tilqim madwar id-dinja.
Charles Michel, il-President tal-Kunsill Ewropew
Fil-qalba tad-diskussjonijiet dwar is-saħħa globali kien hemm kif nistgħu nkunu mħejjija aħjar għal pandemiji futuri u nindirizzaw it-theddidiet globali għas-saħħa li ilhom jeżistu. Il-mexxejja tal-G7 irrikonoxxew ir-rwol u r-responsabbiltajiet partikolari tagħhom fit-tisħiħ tal-arkitettura globali tas-saħħa u s-sigurtà tas-saħħa.
Il-mexxejja tal-G7 laqgħu d-Dikjarazzjoni ta' Ruma adottata fis-Summit Globali dwar is-Saħħa fil-21 ta' Mejju u qed jistennew bil-ħerqa li jaħdmu mal-G20 u organizzazzjonijiet internazzjonali rilevanti fi tfittxija għal azzjoni multilaterali dwar it-tħejjija u r-rispons għall-pandemiji, inkluż l-esplorazzjoni tal-valur potenzjali ta' trattat dwar il-pandemiji.
Il-mexxejja adottaw ukoll id-Dikjarazzjoni dwar is-Saħħa ta' Carbis Bay, li tistipula impenn tal-G7 għal prevenzjoni, detezzjoni, reazzjoni u rkupru aħjar fir-rigward ta' pandemiji futuri permezz ta' azzjoni multilaterali effettiva u sistema globali tas-saħħa msaħħa bl-Organizzazzjoni Dinjija tas-Saħħa (WHO) fil-qalba tagħha.
Il-mexxejja ngħaqdu mal-appell għal riċerka dwar l-oriġini tal-COVID-19.
Aħna nappellaw ukoll għal studju ta' fażi 2 dwar l-Oriġini tal-COVID-19 imsejjaħ mid-WHO li jkun f'waqtu, trasparenti, immexxi minn esperti, u bbażat fuq ix-xjenza, fiċ-Ċina.
Komunikat tal-mexxejja tal-G7
COVID-19: il-kontribuzzjoni tal-UE għas-solidarjetà globali dwar il-vaċċini (Infografika)
Irkupru ekonomiku u impjiegi
Biex jittaffa l-impatt tal-pandemija, il-pajjiżi tal-G7 ipprovdew appoġġ bla preċedent liċ-ċittadini li jammonta għal aktar minn $12-il triljun. Il-G7 ser ikompli jappoġġa l-ekonomiji tiegħu sakemm hemm bżonn, billi jaqleb minn rispons għal kriżi għall-promozzjoni ta' tkabbir b'saħħtu, reżiljenti, sostenibbli, ibbilanċjat u inklużiv għall-futur.
Biex tinħoloq sistema globali tat-taxxa aktar ġusta, jiżdied aktar id-dħul mit-taxxa biex jiġi appoġġat l-investiment u jiġi miġġieled l-evitar tat-taxxa, il-mexxejja approvaw il-ħolqien ta' taxxa minima korporattiva globali ta' mill-inqas 15 fil-mija fuq bażi ta' pajjiżi b'pajjiż, permezz tal-qafas inklużiv tal-G20/OECD. L-għan huwa li jintlaħaq qbil fil-laqgħa ta' Lulju tal-ministri għall-finanzi u l-gvernaturi tal-banek ċentrali tal-G20.
Kummerċ ħieles u ġust
Il-G7 hu magħqud fl-impenn tiegħu favur kummerċ ħieles u ġust bħala prinċipji u għanijiet fundamentali tas-sistema multilaterali bbażata fuq ir-regoli. Il-mexxejja qablu madankollu dwar il-ħtieġa ta' viżjoni komuni għal riforma tas-sistema kummerċjali multilaterali, b'ġabra ta' regoli modernizzata u Organizzazzjoni Dinjija tal-Kummerċ (WTO) riformata fil-qalba tagħha. F'dan il-kuntest huma enfasizzaw l-importanza ta' funzjonament xieraq tal-funzjoni ta' negozjar u s-sistema għas-soluzzjoni tat-tilwim tad-WTO.
Il-mexxejja impenjaw ruħhom li jaħdmu b'mod kollaborattiv biex jindirizzaw ir-riskju ta' rilokazzjoni tal-emissjonijiet tal-karbonju u biex jallinjaw il-prattiki kummerċjali tagħhom mal-impenji tagħhom skont il-Ftehim ta' Pariġi.
Impenjaw ruħhom ukoll li jkomplu jaħdmu flimkien biex jiżguraw li l-ktajjen ta' provvista globali jkunu ħielsa mill-użu ta' xogħol furzat.
Fruntieri futuri
Il-G7 ser jippromwovi kollaborazzjoni aktar b'saħħitha dwar ir-riċerka u l-iżvilupp, u jippromwovi prinċipji tas-sigurtà u l-integrità tar-riċerka u x-xjenza miftuħa. Għal dan il-għan, il-mexxejja approvaw il-Patt tal-G7 dwar il-Kollaborazzjoni fir-Riċerka.
Il-G7 ser ikompli jżid l-isforzi tiegħu biex il-limitu ta' żieda ta' 1.5°C fit-temperatura jkun jista' jintlaħaq. Il-mexxejja affermaw mill-ġdid l-impenn tagħhom għall-Ftehim ta' Pariġi u impenjaw ruħhom b'mod kollettiv li jiksbu emissjonijiet ta' gassijiet serra żero netti mill-aktar fis possibbli u sa mhux aktar tard mill-2050.
It-tranżizzjoni ekoloġika mistennija li tnaqqas l-emissjonijiet, iżżid l-azzjoni ta' adattament madwar id-dinja, twaqqaf u treġġa' lura t-telf tal-bijodiversità, toħloq impjiegi ġodda ta' kwalità għolja, u żżid il-prosperità u l-benesseri. Ser tkun immexxija mit-teknoloġija u appoġġata minn azzjonijiet tanġibbli fis-setturi kollha tal-ekonomiji u s-soċjetajiet tal-G7.
Impenji speċifiċi jinkludu t-tħaffif ulterjuri tat-tranżizzjoni lil hinn minn kapaċità tal-faħam mhux imnaqqsa filwaqt li jiġu appoġġati l-ħaddiema affettwati, u jintemm l-appoġġ dirett ġdid mill-gvern għall-ġenerazzjoni internazzjonali mhux imnaqqsa tal-enerġija termali mill-faħam sa tmiem l-2021.
It-tranżizzjoni lejn ekonomiji mingħajr emissjonijiet netti toħloq sfidi finanzjarji partikolari għall-pajjiżi li qed jiżviluppaw. Il-mexxejja tal-G7 jibqgħu favur l-impenji bilaterali u multilaterali tagħhom biex jappoġġaw l-isforzi ta' dekarbonizzazzjoni ta' dawn is-sħab permezz tal-finanzjament għall-klima.
Huma affermaw mill-ġdid l-għan kollettiv ta' pajjiż żviluppat li b'mod konġunt jimmobilizza $100 biljun fis-sena minn sorsi pubbliċi u privati, sal-2025 fil-kuntest ta' azzjonijiet ta' mitigazzjoni sinifikanti u trasparenza dwar l-implimentazzjoni.
Il-mexxejja ssottolinjaw ukoll l-importanza ta' swieq tal-karbonju ta' integrità għolja u l-aħjar użu ta' lievi ta' politika sabiex nimxu lejn ipprezzar ġust u effiċjenti tal-karbonju.
Il-mexxejja tal-G7 impenjaw ruħhom li jwaqqfu u jreġġgħu lura t-telf tal-bijodiversità sal-2030, u appoġġaw qafas tal-bijodiversità globali ambizzjuż għal wara l-2020 li għandu jiġi adottat mill-partijiet fil-COP15 dwar il-bijodiversità. Huma adottaw il-patt tal-G7 dwar in-natura 2030, li jistipula l-azzjoni dwar il-bijodiversità fost erba' pilastri ewlenin: it-tranżizzjoni, l-investiment, il-konservazzjoni u r-responsabbiltà.
Skont il-patt, il-G7 impenja ruħu li jikkonserva jew jipproteġi mill-inqas 30 fil-mija tal-art globali u mill-inqas 30 fil-mija tal-oċean globali sal-2030. Huma ser jikkontribwixxu billi jikkonservaw jew jipproteġu mill-inqas 30 fil-mija tal-art u ż-żoni kostali u tal-baħar tagħhom sal-2030 skont iċ-ċirkostanzi u l-approċċi nazzjonali.
Ritratt mis-sala: Nibnu mill-ġdid b'mod aktar ekoloġiku - Klima u natura
Ugwaljanza bejn il-ġeneri
Il-mexxejja tal-G7 irrikonoxxew l-impatt devastanti u sproporzjonat tal-COVID-19 fuq in-nisa u l-bniet, li jirriskja li jreġġa' lura l-kisbiet diffiċli li nkisbu speċjalment fir-rigward tal-vjolenza abbażi tal-ġeneru, is-saħħa sesswali u riproduttiva u d-drittijiet relatati, u l-edukazzjoni u x-xogħol.
L-avvanzar tal-ekwità u l-ugwaljanza bejn il-ġeneri huwa pilastru ċentrali tal-pjanijiet u l-politiki tal-G7 biex nibnu mill-ġdid aħjar wara l-pandemija u huwa infurmat minn tliet prijoritajiet ewlenin: l-edukazzjoni tal-bniet, it-tisħiħ tal-pożizzjoni tan-nisa, u t-tmiem tal-vjolenza kontra n-nisa u l-bniet.
Il-mexxejja impenjaw ruħhom għal żewġ miri ewlenin globali ġodda tal-SDG4 għall-edukazzjoni tal-bniet:
40 miljun tifla aktar fl-edukazzjoni sal-2026 f'pajjiżi bi dħul baxx u baxx-medju
20 miljun tifla aktar li jaqraw sal-età ta' 10 snin jew sa tmiem l-iskola primarja sal-2026, f'pajjiżi bi dħul baxx u baxx-medju
Sabiex jiġi żgurat li dawn il-miri jkunu sostnuti minn finanzjament sostenibbli, il-mexxejja tal-G7 ħabbru wegħda kkombinata ta' $2.75 biljun f'finanzjament għall-ħames snin li ġejjin għas-Sħubija Globali għall-Edukazzjoni qabel ir-riforniment tagħha f'Lulju.
Responsabbiltà u azzjoni globali
Id-demokraziji ewlenin tad-dinja huma impenjati li jaħdmu flimkien biex jippromwovu l-valuri komuni tagħhom fis-sistema internazzjonali. Dan l-impenn huwa rifless fl-Istqarrija dwar Soċjetajiet Miftuħa, li ġiet adottata fis-summit mill-mexxejja tal-G7 u dawk tal-Awstralja, l-Indja, ir-Repubblika tal-Korea, u l-Afrika t'Isfel.
F'din l-istqarrija, il-mexxejja affermaw mill-ġdid u ppromwovew il-valuri u l-prinċipji tad-drittijiet tal-bniedem, id-demokrazija, l-inklużjoni soċjali, l-ugwaljanza bejn il-ġeneri, il-libertà tal-espressjoni, l-istat tad-dritt, sistema multilaterali effettiva, u soċjetajiet ċivili diversi, indipendenti u pluralistiċi.
Il-mexxejja rrikonoxxew ir-responsabbiltà partikolari tal-akbar pajjiżi u ekonomiji fil-ħarsien tas-sistema internazzjonali bbażata fuq ir-regoli u d-dritt internazzjonali. Huma impenjaw ruħhom li jaħdmu mas-sħab kollha u bħala membri tal-G20, in-NU u l-komunità internazzjonali ġenerali għal dan il-għan, u ħeġġew lil oħrajn biex jagħmlu l-istess.
Il-mexxejja ddiskutew ukoll l-aktar kwistjonijiet ġeopolitiċi u ta' politika barranija urġenti, inkluż iċ-Ċina, ir-Russja, l-Ukrajna, il-Belarussja, Tigray, is-Saħel, il-Libja, l-Afganistan, ir-Repubblika Demokratika tal-Poplu tal-Korea, il-Myanmar, l-Indo-Paċifiku, l-Iran u l-Iraq.
Fir-rigward taċ-Ċina, u l-kompetizzjoni fl-ekonomija globali, il-G7 ser jkompli jikkonsulta dwar approċċi kollettivi biex jiġu sfidati politiki u prattiki mhux tas-suq li jimminaw l-operazzjoni ġusta u trasparenti tal-ekonomija globali.
Fil-kuntest tar-responsabbiltajiet rispettivi tagħhom fis-sistema multilaterali, il-pajjiżi tal-G7 ser jikkooperaw fejn huwa fl-interess reċiproku tagħhom dwar sfidi globali komuni, b'mod partikolari dwar l-indirizzar tat-tibdil fil-klima u t-telf tal-bijodiversità fil-kuntest tal-COP26 u diskussjonijiet multilaterali oħra.
Fl-istess ħin u billi nagħmlu hekk, aħna ser nippromwovu l-valuri tagħna, inkluż billi nappellaw liċ-Ċina biex tirrispetta d-drittijiet tal-bniedem u l-libertajiet fundamentali, speċjalment fir-rigward ta' Xinjiang u dawk id-drittijiet, il-libertajiet u l-livell għoli ta' awtonomija għal Hong Kong minquxa fid-Dikjarazzjoni Konġunta Sino-Brittanika u l-Liġi Bażika.
Komunikat tal-mexxejja tal-G7
Il-mexxejja tennew l-interess tagħhom f'relazzjonijiet stabbli u prevedibbli mar-Russja. Huma appellaw lir-Russja biex twaqqaf l-imġiba destabbilizzanti u l-attivitajiet malizzjużi tagħha u biex tissodisfa l-obbligi u l-impenji internazzjonali tagħha fir-rigward tad-drittijiet tal-bniedem.
Dwar l-Ukrajna, huma appellaw lir-Russja biex ittaffi t-tensjonijiet, taġixxi f'konformità mal-obbligi internazzjonali tagħha, u tirtira t-truppi u l-materjal militari tagħha fil-fruntiera tal-Lvant tal-Ukrajna u fuq il-peniżola tal-Krimea.
Aħna nibqgħu fermament tal-fehma li r-Russja hija parti għall-konflitt fil-Lvant tal-Ukrajna, mhux medjatriċi.
Komunikat tal-mexxejja tal-G7
Fir-rigward tal-attakki kontinwi fuq id-drittijiet tal-bniedem, il-libertajiet fundamentali u d-dritt internazzjonali mill-awtoritajiet fil-Belarussja, il-pajjiżi tal-G7 ser jaħdmu flimkien biex dawk responsabbli jagħtu kont ta' għemilhom, inkluż permezz tal-impożizzjoni ta' sanzjonijiet, u jkomplu jappoġġaw lis-soċjetà ċivili, il-media indipendenti u d-drittijiet tal-bniedem fil-pajjiż.
Il-mexxejja esprimew it-tħassib serju tagħhom dwar il-kunflitt li għaddej fir-reġjun ta' Tigray fl-Etjopja. Huma appellaw għal waqfien immedjat tal-ostilitajiet, aċċess umanitarju mingħajr xkiel għaż-żoni kollha, l-irtirar immedjat tal-forzi Eritreani, u biex il-partijiet kollha jsegwu proċess politiku kredibbli.
Seba' xhur ta' kunflitt, atroċitajiet, vjolenza bbażata fuq l-etniċità, u ksur tad-drittijiet tal-bniedem u tad-dritt umanitarju internazzjonali qed iwasslu eluf ta' persuni innoċenti għal waħda mill-agħar karestiji kkawżati mill-bniedem. Nappellaw lill-komunità internazzjonali kollha biex taġixxi.
Charles Michel, il-President tal-Kunsill Ewropew
Żvilupp
Il-mexxejja tal-G7 irrikonoxxew li l-COVID-19 għandha impatt estensiv fuq l-ifqar pajjiżi li diġà kienu qed jiffaċċjaw l-effetti ta' kunflitti, it-tibdil fil-klima, xokkijiet soċjoekonomiċi u nuqqas kroniku ta' riżorsi u infrastruttura. Biex jgħin lill-pajjiżi l-aktar fraġli, il-G7 jappoġġa sett ta' miżuri komplementari inkluż is-serħan mid-dejn, il-finanzjament u l-appoġġ għall-iżvilupp permezz tal-Fond Monetarju Internazzjonali (FMI).
Il-mexxejja tal-G7 irrikonoxxew il-ħtiġijiet sinifikanti ta' infrastruttura fil-pajjiżi bi dħul baxx u medju, li ġew aggravati mill-pandemija tal-COVID-19. Huma impenjaw ruħhom għal bidla radikali fl-approċċ tagħhom għall-finanzjament globali tal-infrastruttura, b'enfasi speċifika fuq l-Afrika. L-istituzzjonijiet tal-finanzi għall-iżvilupp u s-sħab multilaterali beħsiebhom jinvestu mill-inqas $80 biljun fis-settur privat fl-Afrika matul il-ħames snin li ġejjin biex jappoġġaw l-irkupru u t-tkabbir ekonomiku sostenibbli.
Għal xi snin diġà, b'xi mexxejja fl-Ewropa konna konvinti li dan l-involviment mal-Afrika jeħtieġ li jkun fil-qalba tar-relazzjonijiet internazzjonali futuri tagħna. Konna kapaċi li ngħaqqdu dejjem aktar il-pożizzjonijiet tal-pajjiżi Ewropej dwar din il-kwistjoni u issa kkonvinċejna lis-sħab tagħna biex ikomplu jimmobilizzaw il-fondi biex niżguraw strateġija vantaġġuża għal kulħadd għall-Afrika u l-Ewropa.
Charles Michel, il-President tal-Kunsill Ewropew
Ir-Renju Unit għandu l-presidenza tal-G7 mill-1 ta' Jannar sal-31 ta' Diċembru 2021. Il-prijorità ewlenija tiegħu għal dan il-perjodu hija li d-demokraziji ewlenin jgħinu lid-dinja fil-ġlieda, u mbagħad fil-bini mill-ġdid aħjar mill-COVID-19 u l-ħolqien ta' futur aktar ekoloġiku u aktar prosperu billi:
imexxu l-irkupru globali mill-coronavirus filwaqt li jsaħħu r-reżiljenza tagħna kontra pandemiji futuri
jippromwovu l-prosperità futura tagħna billi jippromwovu l-kummerċ ħieles u ġust
jindirizzaw it-tibdil fil-klima u l-preservazzjoni tal-bijodiversità tal-pjaneta
jippromwovu l-valuri komuni tagħna
Bi tħejjija għas-summit ta' Cornwall, ir-Renju Unit ospita vidjokonferenza tal-mexxejja tal-G7 fid-19 ta' Frar 2021. Fil-laqgħa, il-President Michel appella għal trattat globali dwar il-pandemiji u għal aċċess ekwu u affordabbli għall-vaċċini għal kulħadd.
Fi tmiem il-vidjokonferenza, il-mexxejja adottaw dikjarazzjoni konġunta.
Is-summit tal-G7 huwa forum li jaqdi rwol importanti fit-tfassil ta' rispons globali għal sfidi globali, u jikkumplimenta l-koordinazzjoni ekonomika globali mwettqa mill-G20.
Jiġbor flimkien mexxejja mill-UE u mill-pajjiżi li ġejjin:
Kanada
Franza
Ġermanja
Italja
Ġappun
Renju Unit
Stati Uniti
L-aħħar Summit tal-G7 sar f'Biarritz, Franza, fl-2019. Ma kien hemm l-ebda summit tal-G7 taħt il-presidenza tal-G7 tal-Istati Uniti fl-2020.
Il-mexxejja ilhom jiltaqgħu fil-konfigurazzjoni tal-G7 mill-2014, wara l-ksur tas-sovranità u l-integrità territorjali tal-Ukrajna mill-Federazzjoni Russa.
L-UE bħala membru tal-G7
Fl-1977, rappreżentanti ta' dik li kienet il-Komunità Ewropea bdew jipparteċipaw fis-summit ta' Londra. Fil-bidu, ir-rwol tal-UE kien limitat għal dawk l-oqsma fejn kellha kompetenzi esklużivi, iżda dan ir-rwol kiber maż-żmien.
L-UE ġiet gradwalment inkluża fid-diskussjonijiet politiċi kollha fuq l-aġenda tas-summit u, mis-summit ta' Ottawa (1981) 'il quddiem, ħadet sehem fis-sessjonijiet ta' ħidma kollha tas-summit.
L-UE għandha r-responsabbiltajiet kollha tas-sħubija. Il-komunikat tas-summit jorbot politikament lill-membri kollha tal-G7.
Ir-rotazzjoni tal-presidenza hija kif ġej: Il-Kanada fl-2018, Franza fl-2019, l-Istati Uniti fl-2020, ir-Renju Unit fl-2021, il-Ġermanja fl-2022, il-Ġappun fl-2023, u l-Italja fl-2024.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Għal xi snin diġà, b'xi mexxejja fl-Ewropa konna konvinti li dan l-involviment mal-Afrika jeħtieġ li jkun fil-qalba tar-relazzjonijiet internazzjonali futuri tagħna. Konna kapaċi li ngħaqqdu dejjem aktar il-pożizzjonijiet tal-pajjiżi Ewropej dwar din il-kwistjoni u issa kkonvinċejna lis-sħab tagħna biex ikomplu jimmobilizzaw il-fondi biex niżguraw strateġija vantaġġuża għal kulħadd għall-Afrika u l-Ewropa.