Summit bejn l-UE u l-Ġappun b'vidjokonferenza, 27 ta' Mejju 2021

Riżultati ewlenin

Is-27 summit bejn l-UE u l-Ġappun sar permezz ta' vidjokonferenza fis-27 ta' Mejju 2021.

L-UE kienet rappreżentata mill-President tal-Kunsill Ewropew, Charles Michel, u l-President tal-Kummissjoni Ewropea, Ursula von der Leyen.

Il-Ġappun kien rappreżentat mill-Prim Ministru Yoshihide Suga.

Il-mexxejja adottaw stqarrija konġunta.

• Stqarrija konġunta – Summit UE-Ġappun, 27 ta' Mejju 2021
• Kummenti mill-President Charles Michel wara s-summit bejn l-UE u l-Ġappun permezz ta' vidjokonferenza

L-UE u l-Ġappun huma magħqudin fil-kooperazzjoni tagħhom ibbażata fuq valuri u prinċipji komuni, inkluż il-libertà, ir-rispett għad-drittijiet tal-bniedem, id-demokrazija, l-istat tad-dritt, il-kummerċ ħieles u ġust, il-multilateraliżmu effettiv u l-ordni internazzjonali bbażat fuq ir-regoli. Din is-sena jiġi kkommemorat l-20 anniversarju tas-sħubija strateġika bejn l-UE u l-Ġappun.

Id-diskussjonijiet tal-mexxejja fis-summit ikkonċentraw fuq tliet pilastri ewlenin: kwistjonijiet globali, ir-relazzjonijiet bilaterali u politika barranija u ta' sigurtà.

Kwistjonijiet globali

Tibdil fil-klima u ambjent

Il-mexxejja nedew l-Alleanza Ekoloġika UE-Ġappun, li ser tagħti spinta lill-isforzi kkoordinati fuq iż-żewġ naħat biex iħaffu l-azzjoni klimatika u ambjentali. Permezz ta' din l-alleanza, l-UE u l-Ġappun ser japprofondixxu l-kooperazzjoni tagħhom dwar:

• it-tranżizzjoni enerġetika
• il-ħarsien ambjentali
• il-kooperazzjoni regolatorja u kummerċjali
• ir-riċerka u l-iżvilupp
• il-finanzi sostenibbli
• l-iffaċilitar tat-tranżizzjoni f'pajjiżi terzi

Barra minn hekk, l-UE u l-Ġappun ser jaħdmu flimkien u ma' oħrajn biex jiksbu l-aktar riżultati ambizzjużi fil-COP26 dwar il-klima f'Novembru, u qafas globali tal-bijodiversità ambizzjuż għal wara l-2020 fil-COP15 dwar il-bijodiversità f'Ottubru.

COVID-19

Il-mexxejja affermaw mill-ġdid id-determinazzjoni tagħhom li jegħlbu l-pandemija. Huma rrikonoxxew l-immunizzazzjoni bħala ġid pubbliku globali u esprimew l-appoġġ tagħhom għal aċċess universali, ekwu u affordabbli għal tilqim, dijanjożi u trattamenti tal-COVID li huma sikuri, effettivi u ta' kwalità garantita.

Filwaqt li enfasizzaw il-kontributi sostanzjali ta' xulxin għall-COVAX, huma laqgħu r-rwol ewlieni tal-UE bħala fornitur tat-tilqim madwar id-dinja, inkluż lill-Ġappun. Il-mexxejja impenjaw ruħhom li jaħdmu lejn l-espansjoni tal-produzzjoni tat-tilqim u li jżommu l-ktajjen tal-provvista miftuħa u appellaw biex ma jiġux implimentati restrizzjonijiet bla bżonn fuq l-esportazzjoni u l-ivvjaġġar.

Mal-Ġappun, aħna impenjati bis-sħiħ lejn il-COVAX. Il-Prim Ministru Suga ser jospita s-summit b'appell għal wegħdiet ta' donazzjonijiet għall-COVAX il-ġimgħa d-dieħla. Nittamaw li dawn l-isforzi ser jgħinu biex jiġu żgurati biżżejjed riżorsi biex jitlaqqmu 30 % tal-popolazzjoni tad-dinja sal-aħħar ta' din is-sena. Charles Michel, President tal-Kunsill Ewropew

Biex jiġi żgurat li d-dinja tkun imħejjija aħjar biex tirrispondi għal emerġenzi tas-saħħa globali, l-UE u l-Ġappun ser jikkoordinaw l-isforzi tagħhom biex jappoġġaw, isaħħu u jirriformaw l-Organizzazzjoni Dinjija tas-Saħħa (WHO) u ser jinvolvu ruħhom fid-diskussjonijiet dwar trattat internazzjonali dwar il-pandemiji fi ħdan il-qafas tad-WHO.

Multilateraliżmu

L-UE u l-Ġappun huma determinati li jiddefendu l-ordni internazzjonali bbażat fuq ir-regoli bin-NU fil-qalba tiegħu u li jsaħħu l-istituzzjonijiet multilaterali. Huma ser ikomplu juru tmexxija fit-tweġiba għall-isfidi globali u fit-tħaffif tal-implimentazzjoni tal-Aġenda 2030 għall-Iżvilupp Sostenibbli, il-Ftehim ta' Pariġi u l-Aġenda ta' Azzjoni ta' Addis Ababa. Il-mexxejja impenjaw ruħhom ukoll li jsaħħu l-kooperazzjoni trilaterali mal-Istati Uniti.

L-UE u l-Ġappun jappoġġaw it-tisħiħ u r-riforma tal-Organizzazzjoni Dinjija tal-Kummerċ bħala pilastru ċentrali tas-sistema ekonomika globali. Huma ser jaħdmu flimkien biex jiżguraw Konferenza Ministerjali tad-WTO ta' suċċess f'Ġinevra (30 ta' Novembru sat-3 ta' Diċembru 2021).

Trasformazzjoni diġitali

L-UE u l-Ġappun ser jikkollaboraw biex jippromwovu standards globali u approċċi komprensivi – inkluż regolatorji – għall-politika u t-teknoloġiji diġitali.

L-UE trid tagħmel l-għaxar snin li ġejjin id-"deċennju diġitali" tagħna. Ser naħdmu mal-Ġappun fuq teknoloġiji emerġenti, materjali kritiċi, 5G u 6G, l-intelliġenza artifiċjali, id-data, u l-pjattaformi. Din ser tagħti spinta lill-kompetittività kemm tal-UE kif ukoll tal-Ġappun u tistabbilixxi standards f'fora multilaterali. Charles Michel, President tal-Kunsill Ewropew

Il-mexxejja enfasizzaw l-impenn konġunt tagħhom għal standards għoljin ta' protezzjoni għad-data personali. Huma impenjaw ruħhom li jkomplu l-kooperazzjoni dwar l-inizjattiva "Fluss Liberu tad-Data b'Fiduċja" bil-ħsieb li jiffaċilitaw flussi transkonfinali sikuri u siguri tad-data billi jtejbu s-sigurtà u l-privatezza.

Relazzjonijiet UE-Ġappun

Il-mexxejja laqgħu r-riżultati pożittivi tal-ftehim ta' sħubija ekonomika (FSE) bejn l-UE u l-Ġappun fis-sentejn mid-dħul fis-seħħ tiegħu. Huma kkonfermaw li l-implimentazzjoni sħiħa tal-FSE ser tibqa' prijorità komuni.

• Ftehim ta' sħubija ekonomika bejn l-UE u l-Ġappun (Kummissjoni Ewropea)
• Infografika - kummerċ bejn l-UE u l-Ġappun: fatti u ċifri

Il-mexxejja enfasizzaw li hija l-prijorità komuni tagħhom li jippromwovu konnettività sostenibbli, komprensiva u bbażata fuq ir-regoli permezz tas-sħubija tal-UE għal konnettività sostenibbli u infrastruttura ta' kwalità. Il-Ġappun huwa l-ewwel pajjiż li miegħu l-UE kkonkludiet sħubija ta' konnettività.

Il-mexxejja impenjaw ruħhom ukoll li jespandu l-kooperazzjoni bejn l-oqsma industrijali, tax-xjenza, tar-riċerka u l-innovazzjoni u spazjali taż-żewġ naħat. Dan jinkludi l-possibbiltà li l-Ġappun ikun assoċjat mal-programm ta' riċerka Orizzont Ewropa.

Politika barranija u ta' sigurtà

Reġjun Indo-Paċifiku

Il-mexxejja qablu li jsaħħu l-kooperazzjoni għal reġjun Indo-Paċifiku ħieles u miftuħ, li jkun inklużiv, ibbażat fuq l-istat tad-dritt u l-valuri demokratiċi, u mingħajr restrizzjonijiet permezz ta'koerċizzjoni. Huma ser jippruvaw isaħħu l-kooperazzjoni mal-ASEAN fir-reġjun u ser jaħdmu wkoll mal-pajjiżi tal-Asja t'Isfel u l-Gżejjer tal-Paċifiku.

Il-mexxejja esprimew it-tħassib serju tagħhom dwar is-sitwazzjoni fl-Ibħra tal-Lvant u tan-Nofsinhar taċ-Ċina u jopponu bil-qawwa kwalunkwe tentattiv unilaterali biex jinbidel l-istatus quo u jiżdiedu t-tensjonijiet.

L-UE ddeċidiet li ssaħħaħ l-attenzjoni strateġika tagħha fuq l-Indo-Paċifiku. Għandna interess qawwi li nintensifikaw il-kooperazzjoni tagħna mal-Ġappun fis-sigurtà marittima, il-kooperazzjoni teknoloġika, iċ-ċibersigurtà, id-diżinformazzjoni – u li nippromwovu l-valuri u l-prinċipji fundamentali fir-reġjun. Charles Michel, President tal-Kunsill Ewropew

Kwistjonijiet oħra ta' politika barranija u ta' sigurtà

L-UE u l-Ġappun ser itejbu l-konsultazzjonijiet dwar is-sigurtà, b'mod partikolari dwar in-nonproliferazzjoni u d-diżarm u dwar il-ġlieda kontra t-theddid ibridu u jespandu l-kooperazzjoni prattika f'oqsma bħaċ-ċibersigurtà, is-sigurtà marittima u l-immaniġġar ta' kriżijiet.

Il-mexxejja rrikonoxxew l-importanza ta' informazzjoni trasparenti, affidabbli u bbażata fuq il-fatti u qablu li jkomplu bid-djalogi dwar il-ġlieda kontra d-diżinformazzjoni. Huma tennew ukoll l-impenn tagħhom li jippromwovu ċiberspazju miftuħ, ħieles, stabbli u sigur.

L-UE u l-Ġappun ser jibqgħu determinati fl-appoġġ tagħhom għall-isforzi ta' nonproliferazzjoni nukleari, inkluż biex jinkiseb iż-żarmar komplet, verifikabbli u irreversibbli mill-Korea ta' Fuq tal-armi nukleari u armi oħra ta' qerda massiva tagħha u l-programmi ta' missili ballistiċi ta' kull firxa tagħha. Il-mexxejja tennew l-appoġġ konġunt tagħhom għall-preservazzjoni tal-Iran-Pjan ta' Azzjoni Komprensiv Konġunt (PAKK), u l-iżgurar tal-implimentazzjoni sħiħa tiegħu.

L-UE u l-Ġappun ser jikkonsultaw u jikkoordinaw mill-qrib dwar kwistjonijiet reġjonali oħra bħall-Afganistan, il-Belarussja, il-Myanmar, l-Ukrajna, il-Proċess ta' Paċi fil-Lvant Nofsani, is-Sirja, is-Saħel, il-Libja, Hong Kong, Xinjiang, u l-Lvant tal-Mediterran. Huma ser ikomplu wkoll l-iskambji dwar ir-relazzjonijiet rispettivi tagħhom maċ-Ċina u r-Russja.

Kuntest

L-aħħar summit bejn l-UE u l-Ġappun sar fi Brussell fil-25 ta' April 2019. Minħabba l-pandemija tal-COVID-19, minflok is-summit tal-2020 saret laqgħa tal-mexxejja b'vidjokonferenza fis-26 ta' Mejju 2020.

• Laqgħa b'vidjokonferenza bejn il-mexxejja tal-UE u tal-Ġappun, 26 ta' Mejju 2020
• Summit bejn l-UE u l-Ġappun, Brussell, 25 ta' April 2019

Ir-relazzjonijiet bejn l-UE u l-Ġappun huma bbażati fuq ftehim ta' sħubija strateġika u ftehim ta' sħubija ekonomika. It-tnejn li huma ġew iffirmati fis-summit bejn l-UE u l-Ġappun fl-2018 u ilhom jiġu applikati sa minn Frar 2019.

• Sħubija strateġika bejn l-UE u l-Ġappun (SEAE)
• Ftehim ta' sħubija ekonomika bejn l-UE u l-Ġappun (Kummissjoni Ewropea)
• Summit bejn l-UE u l-Ġappun, 17 ta' Lulju 2018
• Infografika - kummerċ bejn l-UE u l-Ġappun: fatti u ċifri

F'Settembru 2019, iż-żewġ naħat iffirmaw ukoll is-Sħubija bejn l-UE u l-Ġappun għal Konnettività Sostenibbli u Infrastruttura ta' Kwalità. Din hija l-ewwel sħubija ta' konnettività li qatt kellha l-UE ma' pajjiż terz (it-tieni waħda ġiet konkluża fit-8 ta' Mejju 2021, mal-Indja).