Kunsill Ġustizzja u Affarijiet Interni, 06-07/06/2019, 6 u 7 ta' Ġunju 2019

Riżultati ewlenin

Ġustizzja (Il-Ħamis 6 ta' Ġunju)

Evidenza elettronika

Il-Kunsill ta mandat lill-Kummissjoni biex tinnegozja ftehim li jiffaċilita l-aċċess għal evidenza elettronika mal-Istati Uniti u mandat ieħor biex tipparteċipa fin-negozjati fil-Kunsill tal-Ewropa dwar it-tieni protokoll addizzjonali għall-Konvenzjoni dwar iċ-Ċiberkriminalità. Iż-żewġ strumenti għandhom l-għan li jiffaċilitaw l-aċċess għall-evidenza elettronika, bħall-posta elettronika jew id-dokumenti li jinsabu fuq il-Cloud, bħala parti minn investigazzjonijiet kriminali. Huma ser jikkomplementaw il-qafas tal-UE dwar l-aċċess għal evidenza elettronika li bħalissa qed jiġi diskuss mill-istituzzjonijiet tal-UE. Dwar dan tal-aħħar, illum il-Kunsill adotta wkoll komplement għall-pożizzjoni tiegħu dwar ir-regolament tal-evidenza elettronika, fir-rigward taċ-ċertifikati.

• Il-Kunsill jagħti mandat lill-Kummissjoni biex tinnegozja ftehimiet internazzjonali dwar evidenza elettronika f'materji kriminali (stqarrija għall-istampa, 06/06/2019)
• Aċċess aħjar għal evidenza elettronika fil-ġlieda kontra l-kriminalità (informazzjoni ġenerali)
• Regolament dwar l-ordnijiet ta' produzzjoni u ta' preservazzjoni Ewropej għall-evidenza elettronika f'materji kriminali (Annessi), 17 ta' Mejju 2019

Iż-żamma ta' data

Il-Kunsill inkariga lill-Kummissjoni biex tkompli taħdem dwar il-kwistjoni taż-żamma ta' data biex tiġi investigata b'mod effiċjenti l-kriminalità serja u biex tipproduċi studju komprensiv dwar soluzzjonijiet possibbli għaż-żamma ta' tali data, inkluż il-kunsiderazzjoni ta' inizjattiva leġislattiva futura.

Il-ministri nnotaw ukoll li filwaqt li ż-żamma ta' data hija għodda essenzjali fil-ġlieda kontra l-kriminalità serja, l-użu tagħha jenħtieġ li jqis il-ħtieġa li jiġu protetti d-drittijiet u l-libertajiet fundamentali.

• Iż-żamma ta' data għall-ġlieda kontra l-kriminalità: Il-Kunsill jadotta konklużjonijiet (stqarrija għall-istampa, 06/06/2019)

Iż-żamma ta' data hija kruċjali sabiex inkunu nistgħu naċċessaw provi vitali bħala parti mill-ġlieda kontra l-kriminalità serja. Illum, inkarigajna lill-Kummissjoni biex tressaq studju sabiex inkunu nistgħu nagħmlu progress rapidu lejn soluzzjoni li ssib il-bilanċ it-tajjeb bejn il-ħtiġijiet tal-awtoritajiet tal-infurzar tal-liġi u dakw ġudizzjarji tagħna u bejn l-impenn tagħna biex nipproteġu d-drittijiet u l-libertajiet fundamentali. Ana Birchall, Viċi Prim Ministru tar-Rumanija, Ministru għall-Ġustizzja ad interim

Diġitalizzazzjoni tal-kooperazzjoni ġudizzjarja

Il-ministri ddiskutew il-kwistjoni tad-diġitalizzazzjoni tal-kooperazzjoni ġudizzjarja transfruntiera f'matarji ċivili u kummerċjali. Id-dibattitu sar fil-qafas tar-reviżjoni tar-regolamenti dwar is-servizz tad-dokumenti u l-kumpilazzjoni ta' xhieda. L-adattament tal-ġudikaturi Ewropew għall-iżviluppi diġitali huwa linja ta' azzjoni importanti li jista' jgħin biex jikkonsolida l-ispazju ta' libertà, sigurtà u ġustizzja, u jiffaċilita l-interazzjoni bla xkiel maċ-ċittadini.

Il-Presidenza kkonkludiet li l-Kunsill ikkonferma l-ħtieġa biex jimmodernizza l-proċessi u nnota l-preferenza espressa għal sistema tat-teknoloġija tal-informazzjoni deċentralizzata u sigura, li tista' tkun ibbażata fuq is-soluzzjoni ta' software pprovdut mill-e-Codex. L-użu tiegħu jista' jkun mandatorju biss b'ċerti kundizzjonijiet, inkluż perijodu ta' transizzjoni itwal, sistema ta' referenza back-end li għandha tiġi pprovduta mill-Kummissjoni u eċċezzjonijiet xierqa fejn meħtieġ. Il-ħidma ser tkompli fil-livell tal-esperti taħt il-presidenza Finlandiża.

Grupp ta' Stati kontra l-Korruzzjoni (GRECO)

Il-Kunsill stieden lill-Kummissjoni biex tippreżenta abbozz ta' deċiżjoni relatat mal-parteċipazzjoni tal-UE fil-Grupp ta' Stati kontra l-Korruzzjoni (GRECO) bi status ta' osservatur.

Il-GRECO ġie stabbilit fl-1999 mill-Kunsill tal-Ewropa. L-objettiv tal-GRECO huwa li jtejjeb il-kapaċità tal-membri tiegħu biex jiġġieldu l-korruzzjoni billi jimmonitorja l-konformità tagħhom mal-istandards kontra l-korruzzjoni permezz ta' proċess dinamiku ta' evalwazzjoni reċiproka u pressjoni mill-pari.

• Sit web tal-GRECO

Affarijiet interni (il-Ġimgħa 7 ta' Ġunju)

Migrazzjoni u asil

Il-ministri kellhom skambju ta' fehmiet dwar il-futur tal-politika dwar il-migrazzjoni u l-asil tal-UE. Abbażi ta' dan l-iskambju, id-diskussjonijiet ser ikomplu fi ħdan il-Kunsill tul ix-xhur li ġejjin. Id-dibattitu kopra kemm l-aspetti interni kif ukoll dawk esterni tal-approċċ komprensiv tal-UE għall-migrazzjoni, inkluż il-kooperazzjoni mas-sħab internazzjonali, it-tnaqqis tal-inċentivi għall-migrazzjoni illegali permezz ta' ritorni effettivi, il-ġlieda kontra n-netwerks tal-faċilitaturi tal-immigrazzjoni u r-riforma tas-sistema Ewropea komuni tal-asil.

Matul l-ikla ta' nofsinhar, il-ministri kellhom skambju ta' fehmiet dwar l-iżviluppi globali futuri fil-qasam tal-migrazzjoni, fil-preżenza tal-Kummissarju Għoli tan-NU għar-Refuġjati u d-Direttur Ġenerali tal-Organizzazzjoni Internazzjonali għall-Migrazzjoni.

Il-Kunsill laħaq approċċ ġenerali parzjali dwar proposta għal riforma tad-direttiva dwar ir-ritorn. Ir-regoli l-ġodda proposti jħaffu l-proċeduri tar-ritorn, jipprevjenu r-riskju ta' ħarba u l-movimenti sekondarji, u jżidu r-rata tar-ritorni.

• Il-politika dwar il-migrazzjoni: il-Kunsill jaqbel dwar pożizzjoni ta' negozjar parzjali għad-direttiva dwar ir-ritorn (stqarrija għall-istampa, 07/06/2019)

Il-laqgħa tagħna llum iffukat fuq l-isfidi li ġejjin fl-oqsma tal-migrazzjoni u s-sigurtà. Saru ħafna kisbiet fi snin reċenti fil-ġlieda kontra t-terroriżmu u l-kriminalità organizzata u fl-iżvilupp ta' approċċ komprensiv għall-migrazzjoni. Iżda għad jista' jsir aktar biex jinkisbu riżultati f'dawn l-oqsma. Id-diskussjonijiet tagħna llum fetħu t-triq għal analiżi aktar dettaljata fix-xhur li ġejjin. Carmen Daniela Dan, Ministru għall-Affarijiet Interni tar-Rumanija

Sigurtà interna

Il-ministri bdew id-diskussjonijiet dwar il-futur tal-politika tal-UE fil-qasam tas-sigurtà interna u, b'mod partikolari, il-kooperazzjoni fl-infurzar tal-liġi. Il-ministri esprimew il-fehmiet tagħhom dwar għadd ta' oqsma għall-azzjoni possibbli, inkluż it-titjib tal-konnessjoni u l-analiżi tad-data, il-ġabra flimkien tar-riżorsi fir-riċerka u l-innovazzjoni u l-bini ta' ċentru tat-teknoloġija, il-ħidma fuq qafas aktar b'saħħtu għall-kooperazzjoni operazzjonali, u l-iżgurar ta' prospett finanzjarju sostenibbli u investiment fl-innovazzjoni għas-sigurtà interna. Id-diskussjoni ser titkompla f'aktar dettall tul ix-xhur li ġejjin.

Taħt affarijiet oħra, il-Koordinatur għall-Ġlieda Kontra t-Terroriżmu aġġorna lill-ministri dwar l-implikazzjonijiet tal-5G fil-qasam tas-sigurtà interna.

Proposti settorjali tal-qafas finanzjarju pluriennali

Illum il-Kunsill laħaq approċċi ġenerali parzjali dwar tliet proposti settorjali dwar l-affarijiet interni fil-kuntest tal-qafas finanzjarju pluriennali (QFP) għall-perijodu 2021–2027: il-fond għall-asil u l-migrazzjoni, l-istrument għall-appoġġ finanzjarju għall-ġestjoni tal-fruntieri u l-viża u l-fond għas-sigurtà interna.

• Finanzjament għall-politiki tal-migrazzjoni, il-fruntieri u s-sigurtà: il-Kunsill jaqbel dwar il-pożizzjoni tiegħu (stqarrija għall-istampa, 07/06/2019)