"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Ġustizzja u Affarijiet Interni, 7 u 8 ta' Ottubru 2021
Riżultati ewlenin
Ġustizzja
Arrest preventiv (qabel is-smigħ tal-kawża)
Il-ministri kellhom dibattitu dwar l-arrest preventiv, kwistjoni li għandha impatt fuq il-libertajiet individwali u li hija importanti wkoll għall-fiduċja reċiproka u r-rikonoxximent reċiproku.
Id-detenzjoni hija fil-qofol tas-sistema tal-ġustizzja kriminali, iżda d-differenzi fil-kondizzjonijiet ta' detenzjoni jista' jkollhom impatt fuq il-fiduċja reċiproka u għalhekk jistgħu jkunu ta' xkiel għall-kooperazzjoni fi kwistjonijiet kriminali madwar l-UE. Id-diskussjoni produttiva tal-lum irriflettiet l-impenn konġunt tagħna biex inkomplu ntejbu l-kondizzjonijiet ta' detenzjoni u ser isservi ta' gwida għal aktar ħidma mill-Kummissjoni f'dan il-qasam.
Marjan Dikaučič, Ministru għall-Ġustizzja tas-Slovenja
Il-ministri ffukaw b'mod partikolari fuq liema standards minimi għall-kondizzjonijiet materjali tad-detenzjoni u drittijiet proċedurali fl-arrest preventiv għandhom jingħataw prijorità sabiex tissaħħaħ il-fiduċja reċiproka bejn l-istati membri. Huma ddiskutew ukoll liema azzjonijiet oħra fil-livell tal-UE jistgħu jgħinu biex jittejbu l-kondizzjonijiet tad-detenzjoni jew iżidu l-użu ta' miżuri alternattivi għad-detenzjoni.
Il-Kummissjoni u l-presidenza infurmaw lill-ministri dwar l-aħħar żviluppi rigward l-istabbiliment tal-Uffiċċju tal-Prosekutur Pubbliku Ewropew (UPPE). Il-Kap Prosekutur Ewropew attenda wkoll id-diskussjoni dwar dan il-punt.
L-UPPE beda l-operazzjonijiet tiegħu fl-1 ta' Ġunju u diġà qed iwettaq għadd ta' investigazzjonijiet fir-rigward ta' kawżi li jaqgħu taħt il-mandat tiegħu.
Tkompli wkoll il-ħidma f'għadd ta' oqsma inkluż l-adattament tas-sistemi ġudizzjarji nazzjonali għar-regolament dwar l-UPPE, il-ħatra tal-Prosekuturi Delegati Ewropej u r-reklutaġġ tal-persunal. Fil-Kunsill għaddejja ħidma dwar ir-relazzjonijiet tal-UPPE ma' pajjiżi terzi u organizzazzjonijiet internazzjonali.
Kawżi strateġiċi kontra l-parteċipazzjoni pubblika (SLAPP)
Qabel il-laqgħa, il-ministri attendew ikla ta' ħidma fejn iddiskutew il-kwistjoni ta' kawżi strateġiċi kontra l-parteċipazzjoni pubblika (SLAPP) u l-ħtieġa li l-ġurnalisti jiġu protetti minn litigazzjoni abbużiva.
Kif imħabbar fil-pjan ta' azzjoni Ewropew għad-demokrazija ppubblikat f'Diċembru 2020, il-Kummissjoni qed tħejji inizjattiva biex tipproteġi lill-ġurnalisti u lid-difensuri tad-drittijiet kontra dan it-tip ta' litigazzjoni abbużiva. Biex jikkontribwixxu għat-tħejjija ta' din l-inizjattiva, il-ministri ffukaw fuq l-esperjenza nazzjonali u l-prattiki tajba fil-ġlieda kontra SLAPP, kif ukoll fuq id-dimensjoni transkonfinali ta' dan il-fenomenu.
Il-ministri kellhom dibattitu dwar id-dimensjoni diġitali tal-investigazzjoni tal-abbuż sesswali tat-tfal. Huma ffukaw b'mod partikolari fuq kif jista' jiġi garantit l-aċċess għad-data għall-awtoritajiet kompetenti sabiex jiġu miġġielda b'mod effettiv dawn ir-reati. Iddiskutew ukoll ir-rwol ta' miżuri proattivi mill-pjattaformi tal-media soċjali, is-servizzi ta' hosting u l-fornituri tal-komunikazzjoni elettronika fl-indirizzar ta' dan il-fenomenu.
Il-pandemija tal-COVID-19 wasslet biex it-tfal isiru aktar attivi u konnessi online, li rriżulta wkoll f'żieda fl-għadd ta' attivitajiet kriminali relatati mal-abbuż sesswali tat-tfal kemm fuq l-internet kif ukoll fuq id-dark web. Illum il-ministri tennew l-impenn tagħhom li jiżguraw li l-awtoritajiet tal-infurzar tal-liġi tagħna jkollhom l-għodod kollha meħtieġa biex ikomplu jiġġieldu dawn ir-reati faħxija online bħalma jagħmlu offline.
Aleš Hojs, Ministru għall-Intern tas-Slovenja
Dimensjoni esterna tal-migrazzjoni
Il-Kummissjoni u l-presidenza infurmaw lill-ministri dwar il-progress fl-iżvilupp ta' pjanijiet ta' azzjoni għat-tisħiħ ta' sħubiji komprensivi dwar il-migrazzjoni ma' pajjiżi prijoritarji ta' oriġini u ta' tranżitu. Diġà saru diskussjonijiet fil-livell tekniku fi ħdan il-Kunsill dwar pjanijiet ta' azzjoni rigward l-Afganistan, il-Bożnija-Ħerzegovina, it-Tuneżija, in-Niġer, in-Niġerja u l-Iraq.
Il-ministri qasmu wkoll il-fehmiet tagħhom dwar is-sitwazzjoni f'diversi rotot migratorji. L-UE ser tkompli issegwi mill-qrib is-sitwazzjoni fir-rotot kollha.
Bħalissa kważi l-pajjiżi kollha fil-fruntieri esterni tal-UE qed jesperjenzaw pressjoni. Filwaqt li jkomplu n-negozjati dwar il-proposti leġiżlattivi, diġà nistgħu nagħmlu aktar illum biex intejbu l-kooperazzjoni ma' pajjiżi terzi, inkluż rigward ir-ritorn ta' migranti li jaqsmu l-fruntieri illegalment u li mhumiex intitolati għall-protezzjoni internazzjonali.
Aleš Hojs, Ministru għall-Intern tas-Slovenja
Il-ministri għall-affarijiet interni ddiskutew il-kwistjoni tal-iskrinjar u d-detenzjoni tal-migranti fil-fruntiera. Huma qablu li sfidi akbar għas-sigurtà u s-saħħa jeħtieġu azzjoni komuni rapida. Regoli armonizzati dwar il-kontrolli tas-sigurtà u tas-saħħa fil-fruntieri esterni huma essenzjali biex jintlaħaq l-objettiv li tiġi żgurata s-sikurezza fiż-żona Schengen. Madankollu, xi stati membri enfasizzaw ukoll il-ħtieġa li jinżamm ċertu livell ta' flessibbiltà biex ikun hemm adattament għan-natura differenti tal-fruntieri esterni u ċ-ċirkostanzi nazzjonali.
Diversi ministri enfasizzaw ukoll il-ħtieġa li tiġi żgurata l-koerenza mar-riforma ġenerali tal-ażil u li ssir ħidma fuq il-proposti kollha b'mod parallel. Il-Presidenza kkonkludiet li għandhom jinstabu s-soluzzjonijiet meħtieġa fil-qafas tal-proposta għal regolament dwar l-iskrinjar u ser tkompli tmexxi l-ħidma biex jinstabu soluzzjonijiet fil-livell tekniku.
Sitwazzjoni fl-Afganistan
Il-ministri ħadu nota tal-informazzjoni pprovduta mill-Kummissjoni, is-SEAE u l-Koordinatur għall-Ġlieda Kontra t-Terroriżmu dwar is-sitwazzjoni fl-Afganistan fir-rigward tal-protezzjoni internazzjonali, il-migrazzjoni u s-sigurtà. Bħalissa għaddejja ħidma biex jiġu implimentati l-linji differenti deskritti fid-dikjarazzjoni adottata mill-ministri għall-affarijiet interni fil-laqgħa straordinarja tagħhom fil-31 ta' Awwissu.
Dwar l-aspett tal-migrazzjoni u l-ispostament furzat, il-Kummissjoni u s-SEAE ppreżentataw pjan ta' azzjoni aġġornat dwar l-Afganistan u dan ġie rieżaminat mill-Kunsill fil-livell tekniku fis-17 ta' Settembru. Il-Kummissjoni tat informazzjoni wkoll dwar il-Forum ta' Livell Għoli dwar ir-Risistemazzjoni dwar l-Afganistan li sar fis-7 ta' Ottubru 2021. Dwar l-aspett tas-sigurtà, ġie żviluppat pjan ta' azzjoni kontra t-terroriżmu mill-koordinatur tal-UE għall-ġlieda kontra t-terroriżmu f'konsultazzjoni mill-qrib mal-istati membri, l-istituzzjonijiet u l-aġenziji tal-UE.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Id-detenzjoni hija fil-qofol tas-sistema tal-ġustizzja kriminali, iżda d-differenzi fil-kondizzjonijiet ta' detenzjoni jista' jkollhom impatt fuq il-fiduċja reċiproka u għalhekk jistgħu jkunu ta' xkiel għall-kooperazzjoni fi kwistjonijiet kriminali madwar l-UE. Id-diskussjoni produttiva tal-lum irriflettiet l-impenn konġunt tagħna biex inkomplu ntejbu l-kondizzjonijiet ta' detenzjoni u ser isservi ta' gwida għal aktar ħidma mill-Kummissjoni f'dan il-qasam.
Il-pandemija tal-COVID-19 wasslet biex it-tfal isiru aktar attivi u konnessi online, li rriżulta wkoll f'żieda fl-għadd ta' attivitajiet kriminali relatati mal-abbuż sesswali tat-tfal kemm fuq l-internet kif ukoll fuq id-dark web. Illum il-ministri tennew l-impenn tagħhom li jiżguraw li l-awtoritajiet tal-infurzar tal-liġi tagħna jkollhom l-għodod kollha meħtieġa biex ikomplu jiġġieldu dawn ir-reati faħxija online bħalma jagħmlu offline.