"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Ġustizzja u Affarijiet Interni, 9 u 10 ta' Diċembru 2021
Riżultati ewlenin
Affarijiet interni, 9 ta' Diċembru
It-theddid ibridu u l-isfidi tal-migrazzjoni
Il-ministri ddiskutew il-kwistjonijiet tal-attakki ibridi u tal-faċilitazzjoni ta' immigrazzjoni illegali. Huma ffukaw b'mod partikolari fuq l-effettività tal-għodod attwali fir-rispons għal dawn il-fenomeni u fuq l-għodod meħtieġa biex inkunu ppreparati aħjar għall-futur.
Sa minn ftit xhur ilu, qed naraw dimensjoni oħra tal-isfida tal-migrazzjoni, bl-attakk ibridu mir-reġim tal-Belarussja. Fl-istess ħin, hemm għadd ta' sfidi differenti, iżda mhux inqas urġenti, tal-migrazzjoni fuq il-fruntiera esterna tagħna. Illum kellna diskussjoni miftuħa dwar azzjonijiet ulterjuri possibbli biex intejbu l-protezzjoni tal-fruntieri esterni tagħna u nipprevjenu t-telf ta' ħajjiet.
Aleš Hojs, Ministru għall-Intern tas-Slovenja
Il-ministri qiesu x'azzjonijiet addizzjonali l-UE għadha tista' tieħu fil-qasam tal-affarijiet interni sabiex twieġeb għall-użu tal-migrazzjoni bħala theddida ibrida u biex tiskoraġġixxi tentattivi simili fil-futur. Huma ddiskutew liema miżuri għandhom jittieħdu bħala kwistjoni ta' prijorità biex jiġu evitati b'mod effettiv movimenti sekondarji fl-UE u biex jitkisser il-mudell kummerċjali tat-traffikanti. B'kont meħud tal-isforzi li saru fit-tisħiħ tad-dimensjoni esterna tal-migrazzjoni matul l-aħħar xhur, il-ministri ddiskutew ukoll liema elementi oħra għandhom jingħataw prijorità fil-livell tal-UE.
Waqt l-ikla ta' nofsinhar, il-ministri ddiskutew soluzzjonijiet sostenibbli fir-rigward tal-patt dwar il-migrazzjoni u l-ażil.
Next Generation EU: infiltrazzjoni mill-kriminalità organizzata
Il-ministri kellhom dibattitu dwar il-fondi tal-UE għall-irkupru u dwar l-aħjar mod kif tista' tiġi pprevenuta l-infiltrazzjoni mill-kriminalità organizzata fl-istrutturi u fil-proċessi legali.
Ma nistgħux insibu ruħna f'sitwazzjoni fejn il-flus tal-kontribwenti jispiċċaw jappoġġaw l-attivitajiet tal-kriminalità organizzata jew fejn l-istrutturi u l-proċessi legali tagħna jiġu abbużati biex jinħolqu koperturi leġittimi għall-attivitajiet kriminali. Illum il-ministri enfasizzaw l-importanza li jkollna stampa tajba tat-theddida li qed niffaċċaw u l-ħtieġa li naġixxu b'mod konġunt biex nikkumbattuha.
Aleš Hojs, Ministru għall-Intern tas-Slovenja
Il-ministri ssottolinjaw l-importanza tal-użu ta' firxa ta' għodod u approċċ koordinat tal-UE għall-prevenzjoni u l-ġlieda kontra l-infiltrazzjoni mill-kriminalità organizzata fi strutturi legali. Huma enfasizzaw ukoll il-ħtieġa li l-istati membri jiskambjaw informazzjoni dwar il-vulnerabbiltajiet tal-istrutturi legali billi jevalwaw diversi indikaturi. Hija meħtieġa wkoll stampa aħjar tal-intelligence mill-istati membri u l-aġenziji rilevanti tal-ĠAI.
Il-ministri ħadu nota wkoll tal-preżentazzjoni tal-Kummissjoni dwar il-proposti l-ġodda dwar Prum, il-kooperazzjoni fl-infurzar tal-liġi u l-iskambju ta' informazzjoni. Il-ħidma fuq dawn il-proposti ser tkompli fil-livell tekniku fi ħdan il-Kunsill.
Reżiljenza ta' entitajiet kritiċi
Il-ministri ħadu nota tal-ftehim dwar approċċ ġenerali milħuq mill-ambaxxaturi lbieraħ, li mistenni jiġi adottat formalment mill-Kunsill fl-20 ta' Diċembru.
It-titjib tar-reżiljenza tal-infrastrutturi kritiċi tagħna huwa vitali għas-sigurtà u l-prosperità tas-soċjetajiet tagħna. Il-bidliet fix-xenarju tas-sigurtà tagħna, bħall-pandemija attwali tal-COVID-19, it-theddid ibridu jew l-avvenimenti estremi tat-temp juruna li jeħtieġ li nagħmlu aktar biex inkunu ppreparati b'mod kollettiv għall-isfidi futuri. Il-ftehim li ntlaħaq ilbieraħ mill-ambaxxaturi, li nistenna li jiġi adottat formalment mill-Kunsill dalwaqt, huwa pass importanti f'din id-direzzjoni.
Aleš Hojs, Ministru għall-Intern tas-Slovenja
L-abbozz ta' direttiva dwar ir-reżiljenza ta' entitajiet kritiċi għandu l-għan li jiżgura li dawn l-entitajiet ikunu lesti jipprevjenu, jirreżistu u jirkupraw minn diżastri naturali, terroriżmu jew emerġenzi tas-saħħa bħall-COVID-19. L-abbozz ta' mandat tal-Kunsill ikopri entitajiet f'disa' setturi: l-enerġija, it-trasport, is-settur bankarju, l-infrastrutturi tas-swieq finanzjarji, is-saħħa, l-ilma tax-xorb, l-ilma mormi, l-infrastruttura diġitali, u l-ispazju.
Skont ir-regoli l-ġodda proposti, l-entitajiet kritiċi għandhom jirrappurtaw l-inċidenti ta' tfixkil lill-awtoritajiet nazzjonali, u l-istati membri tal-UE għandhom jidentifikaw l-entitajiet kritiċi, iwettqu valutazzjonijiet tar-riskju nazzjonali u jkollhom strateġija biex jiżguraw ir-reżiljenza ta' tali entitajiet.
Ladarba l-approċċ ġenerali tal-Kunsill jiġi adottat formalment, jistgħu jibdew in-negozjati mal-Parlament Ewropew.
L-UE qed taħdem fuq regoli ġodda biex tagħmel l-infrastrutturi kritiċi aktar reżiljenti, reżistenti u jifilħu għall-iskossi.
Applikazzjoni tal-acquis ta' Schengen fil-Kroazja
Illum il-Kunsill ikkonkluda li l-Kroazja ssodisfat il-kondizzjonijiet meħtieġa għall-applikazzjoni tal-partijiet kollha tal-acquis ta' Schengen. Din il-verifika li ġew issodisfati l-kondizzjonijiet meħtieġa għall-applikazzjoni tal-partijiet kollha tal-acquis ta' Schengen hija prekondizzjoni biex il-Kunsill ikun jista' jieħu deċiżjoni sussegwenti li tippermetti li jitneħħew il-kontrolli fuq il-fruntieri interni.
Mekkaniżmu ta' evalwazzjoni u monitoraġġ ta' Schengen
Il-ministri vvalutaw il-progress marbut mar-regolament propost tal-Kunsill dwar mekkaniżmu ta' evalwazzjoni u monitoraġġ ta' Schengen. Id-diskussjonijiet issa jkomplu fil-livell tekniku fi ħdan il-Kunsill.
Il-proposta għandha l-għan li tagħmel iż-żona Schengen aktar adattabbli għall-isfidi attwali u futuri billi żżid il-fokus strateġiku ta' dan il-mekkaniżmu, tqassar u tissimplifika l-proċeduri ta' evalwazzjoni u monitoraġġ, issaħħaħ il-verifika tar-rispett għad-drittijiet fundamentali fl-implimentazzjoni tal-acquis ta' Schengen u tottimizza l-parteċipazzjoni tal-atturi kollha statali u tal-UE.
Implimentazzjoni tal-interoperabbiltà
Il-ministri kellhom skambju ta' fehmiet dwar l-implimentazzjoni tal-interoperabbiltà. Abbażi tal-valutazzjoni mill-eu-LISA u mill-Kummissjoni Ewropea, huma qablu dwar skeda ta' żmien riveduta ta' nofs Ġunju 2022 għas-Sistema ta' Informazzjoni ta' Schengen aġġornata, l-aħħar ta' Settembru 2022 għas-Sistema ta' Dħul/Ħruġ u Mejju 2023 għall-ETIAS u l-ECRIS-TCN.
L-għan jibqa' li l-arkitettura tal-interoperabbiltà tkun f'postha sa tmiem l-2023.
Sistemi tal-IT tal-UE għas-sigurtà u l-migrazzjoni (Infografika)
Kooperazzjoni kontra t-terroriżmu
Il-ministri ngħataw informazzjoni dwar il-kooperazzjoni bejn l-awtoritajiet kompetenti li jittrattaw il-ġlieda kontra t-terroriżmu, fil-preżenza tal-grupp kontra t-terroriżmu (CTG).
It-tagħlimiet meħuda mill-attakki terroristiċi fl-Ewropa wrew biċ-ċar li hija meħtieġa kooperazzjoni bejn l-atturi tal-infurzar tal-liġi u tal-intelligence. F'Novembru 2016, il-ministri qablu li jesploraw opportunitajiet għall-kooperazzjoni bejn is-CTG u l-Europol f'oqsma ta' interess komuni, filwaqt li jirrispettaw bis-sħiħ il-kompetenza unika tal-istati membri għas-sigurtà nazzjonali.
Il-presidenza għarrfet lill-ministri dwar l-aħħar żviluppi fil-ħidma rigward il-proposti leġiżlattivi attwali.
Irrappurtat ukoll dwar l-eżitu tal-laqgħa ministerjali Ġustizzja u Affarijiet Interni bejn l-UE u l-Balkani tal-Punent u dwar it-tħejjijiet u l-aġenda għal-laqgħa ministerjali li jmiss tal-Ġustizzja u l-Affarijiet Interni bejn l-UE u l-Istati Uniti.
Il-Presidenza rrappurtat dwar l-eżitu tal-konferenza ministerjali virtwali dwar il-prevenzjoni u l-investigazzjoni tal-abbuż sesswali tat-tfal, li saret fil-11 u t-12 ta' Novembru.
Il-presidenza Franċiża li jmiss tal-Kunsill ippreżentat il-programm ta' ħidma u l-prijoritajiet tagħha għas-sitt xhur li ġejjin.
Din ir-riżorsa bħalissa hi disponibbli biss bil-lingwa jew il-lingwi li ġejjin:
It tagħlimiet meħuda mill-COVID-19 għall-funzjonament tal-qrati
Il-ministri kellhom skambju ta' fehmiet dwar it-tagħlimiet meħuda mill-pandemija tal-COVID-19 għall-funzjonament tal-qrati u għar-rimedju ġudizzjarju u l-iskrutinju tal-miżuri ta' emerġenza. Huma rriflettew dwar modi possibbli biex jiġu indirizzati l-isfidi eżistenti u futuri li jirriżultaw mis-sitwazzjonijiet ta' emerġenza attwali u potenzjali futuri. L-istati membri qasmu l-aħjar prattiki tagħhom biex itaffu l-impatt tal-pandemija tal-COVID-19 fuq is-sistemi ġudizzjarji. B'mod partikolari, huma enfasizzaw l-importanza li titkompla l-ħidma fuq id-diġitalizzazzjoni biex jiġi żgurat l-aċċess għall-ġustizzja għal kull ċittadin, b'salvagwardji adegwati u f'konformità sħiħa mad-drittijiet fundamentali.
Minkejja d-diffikultajiet iġġenerati mill-pandemija, is-sistemi nazzjonali u l-qrati kostituzzjonali tagħna ġeneralment urew reżiljenza. Madankollu, irridu niżguraw li meta tiġi l-kriżi li jmiss, tkun xi tkun in-natura tagħha, aħna nkunu saħansitra mħejjija aħjar għaliha. Wieħed mill-elementi enfasizzati llum kien l-importanza tad-diġitalizzazzjoni tas-sistemi ġudizzjarji tagħna, u ser inkomplu naħdmu f'dan il-qasam fix-xhur li ġejjin, għall-benefiċċju taċ-ċittadini tagħna.
Marjan Dikaučič, Ministru għall-Ġustizzja tas-Slovenja
Il-ġlieda kontra d-diskors ta' mibegħda u r-reati ta' mibegħda
Waqt l-ikla ta' nofsinhar, il-ministri ddiskutew kif jistgħu jiġu miġġielda aħjar id-diskors ta' mibegħda u r-reati ta' mibegħda sabiex l-Ewropa ssir aktar inklużiva u protettiva. Huma ffukaw fuq l-akbar sfidi u diskrepanzi li jiffaċċjaw l-istati membri fir-rispons tagħhom, fuq il-fatturi ta' faċilitazzjoni possibbli b'appoġġ għall-isforzi tagħhom, fuq l-aħjar prattiki rigward il-kooperazzjoni mas-soċjetà ċivili u l-kumpaniji tal-IT kif ukoll fuq l-aħjar prattiki rigward l-appoġġ u l-protezzjoni għal gruppi speċifiċi ta' vittmi.
Id-diskors ta' mibegħda u r-reati ta' mibegħda ma għandhom l-ebda post fis-soċjetajiet miftuħa u demokratiċi tagħna. Li niżguraw li l-pjattaformi tal-media soċjali jneħħu d-diskors ta' mibegħda u li ninfurzaw ir-rispons tagħna tal-liġi kriminali huma żewġ oqsma importanti li jeħtieġ li nkomplu naħdmu fuqhom. Jeħtieġ ukoll li niżguraw li nappoġġaw b'mod adegwat lill-vittmi u nindirizzaw il-kawżi sottostanti permezz ta' riċerka aħjar u sforz konġunt mas-soċjetà ċivili u korpi pubbliċi oħra.
Marjan Dikaučič, Ministru għall-Ġustizzja tas-Slovenja
Regolament dwar l-evidenza elettronika
Il-ministri wiżnu l-progress fin-negozjati li għaddejjin bejn il-Kunsill u l-Parlament Ewropew fir-rigward tar-regolament dwar l-evidenza elettronika.
Kien hemm skambji matul il-Presidenza Slovena fil-livell tekniku u ffukaw fuq ir-reġim ta' notifika. Id-differenza ewlenija bejn il-leġiżlaturi fir-rigward tal-obbligi ta' notifika tikkonċerna r-rwol rispettiv tal-istati involuti fil-proċeduri tal-ordni ta' preservazzjoni jew ta' produzzjoni.
Il-Presidenza nnutat li l-Kunsill offra li jagħmel konċessjonijiet sostanzjali lill-Parlament bil-ħsieb li jintlaħaq ftehim. S'issa dawn il-konċessjonijiet ma tqisux bħala biżżejjed mill-Parlament.
L-adeżjoni tal-UE mal-Konvenzjoni Ewropea dwar id-Drittijiet tal-Bniedem
Il-ministri ngħataw aġġornament dwar is-sitwazzjoni attwali tal-adeżjoni tal-UE mal-Konvenzjoni Ewropea dwar id-Drittijiet tal-Bniedem (KEDB). Il-Presidenza rrappurtat dwar il-progress li sar fin-negozjati fil-Kunsill tal-Ewropa u t-tħejjijiet fi ħdan il-korpi kompetenti tal-Kunsill.
In-negozjati tal-adeżjoni jitmexxew minn grupp ad-hoc tal-Kunsill tal-Ewropa. Matul is-semestru attwali, saru l-10, il-11 u t-12-il laqgħa tal-grupp ad hoc. Il-fokus ta' dawn id-diskussjonijiet kien il-mekkaniżmi speċifiċi tal-UE tal-proċedura quddiem il-Qorti Ewropea tad-Drittijiet tal-Bniedem, kif ukoll l-applikazzjonijiet bejn il-partiti, il-prinċipju ta' fiduċja reċiproka bejn l-istati membri tal-UE u kwistjonijiet mill-qasam tal-PESK. B'mod parallel ma' din il-ħidma, l-esperti ffukaw ukoll fuq it-tħejjija tar-regoli interni tal-UE li ser ikunu meħtieġa għall-ftehim ta' adeżjoni futur.
Il-Kummissjoni u l-presidenza infurmaw lill-ministri dwar l-aħħar żviluppi rigward l-istabbiliment tal-Uffiċċju tal-Prosekutur Pubbliku Ewropew (UPPE). Il-Kap Prosekutur Ewropew attendiet ukoll id-diskussjoni dwar dan il-punt.
L-UPPE diġà fetaħ aktar minn 400 investigazzjoni għad-danni stmati għal biljuni ta' euro u diġà qed jieħu miżuri investigattivi ewlenin. Wettaq operazzjonijiet ta' tiftix u konfiska u diversi suspettati diġà ġew arrestati fi proċedimenti mmexxija mill-UPPE. Il-ħidma tal-UPPE diġà wasslet għall-ewwel kundanna.
Il-presidenza għarrfet lill-ministri dwar l-aħħar żviluppi fil-ħidma dwar il-proposti leġiżlattivi attwali.
Il-Kummissjoni ppreżentat il-proposti reċenti tagħha biex tiddiġitalizza s-sistemi tal-ġustizzja tal-UE u l-ewwel rapport tagħha dwar l-applikazzjoni tal-Karta tad-Drittijiet Fundamentali tal-UE b'approċċ tematiku, b'enfasi fuq id-drittijiet fundamentali fl-era diġitali. Il-Kummissjoni rreferiet ukoll għal proposti futuri fil-qasam tal-ġustizzja, inkluż il-ġustizzja ċivili u kriminali, għal din is-sena u s-sena d-dieħla.
Il-presidenza rrappurtat dwar l-eżitu tal-laqgħa ministerjali Ġustizzja u Affarijiet Interni bejn l-UE u l-Balkani tal-Punent u t-tħejjijiet u l-aġenda għal-laqgħa ministerjali li jmiss tal-Ġustizzja u l-Affarijiet Interni bejn l-UE u l-Istati Uniti.
Il-Presidenza Franċiża li jmiss tal-Kunsill ippreżentat il-programm ta' ħidma u l-prijoritajiet tagħha għas-sitt xhur li ġejjin.
Il-Kunsill adotta wkoll mingħajr diskussjoni l-punti li jidhru fil-listi ta' punti A leġiżlattivi u mhux leġiżlattivi.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Sa minn ftit xhur ilu, qed naraw dimensjoni oħra tal-isfida tal-migrazzjoni, bl-attakk ibridu mir-reġim tal-Belarussja. Fl-istess ħin, hemm għadd ta' sfidi differenti, iżda mhux inqas urġenti, tal-migrazzjoni fuq il-fruntiera esterna tagħna. Illum kellna diskussjoni miftuħa dwar azzjonijiet ulterjuri possibbli biex intejbu l-protezzjoni tal-fruntieri esterni tagħna u nipprevjenu t-telf ta' ħajjiet.
Minkejja d-diffikultajiet iġġenerati mill-pandemija, is-sistemi nazzjonali u l-qrati kostituzzjonali tagħna ġeneralment urew reżiljenza. Madankollu, irridu niżguraw li meta tiġi l-kriżi li jmiss, tkun xi tkun in-natura tagħha, aħna nkunu saħansitra mħejjija aħjar għaliha. Wieħed mill-elementi enfasizzati llum kien l-importanza tad-diġitalizzazzjoni tas-sistemi ġudizzjarji tagħna, u ser inkomplu naħdmu f'dan il-qasam fix-xhur li ġejjin, għall-benefiċċju taċ-ċittadini tagħna.