Riforma tan-netwerk Ewropew tal-impjiegi EURES
EURES fil-qosor
Mniedi fl-1993, EURES huwa netwerk għall-kooperazzjoni bejn il-Kummissjoni u s-servizzi pubbliċi tal-impjiegi fl-Ewropa. Huwa jservi għall-iskambju ta' opportunitajiet ta' xogħol u applikazzjonijiet għal xogħol u ta' informazzjoni dwar il-kondizzjonijiet tal-għajxien u tax-xogħol.
EURES jikkonsisti minn sit web u netwerk ta' madwar 900 konsulent dwar l-impjiegi fil-pajjiżi parteċipanti kollha: 28 stat tal-UE, l-Iżlanda, il-Liechtenstein, in-Norveġja u l-Iżvizzera.
Dan jikkontribwixxi madwar 150 000 kollokament kull sena.
L-għan tar-riforma huwa li jiġu pprovduti servizzi aħjar ta' tiftix tax-xogħol u reklutaġġ fl-Ewropa kollha. Għandha l-għan li tagħti spinta tant meħtieġa lill-mobilità tax-xogħol fi ħdan l-UE.
Il-proposta għal riforma ġiet ippreżentata mill-Kummissjoni fis-17 ta' Jannar 2014.
Wara qbil mal-Parlament Ewropew, il-Kumitat tar-Rappreżentanti Permanenti approva r-regoli l-ġodda fit-2 ta’ Diċembru 2015.
Ir-regoli l-ġodda ser jimmodernizzaw il-portal tal-EURES, li ser isir għodda ta’ mobilità aġġornata aċċessibbli għal kulħadd, li tagħmel użu mill-aħħar teknoloġiji tal-IT. Dawn ser iwasslu għal żieda fl-għadd ta' postijiet tax-xogħol battala u ta' CVs ta' dawk li qed ifittxu xogħol permezz tal-EURES.
Ser jintroduċu wkoll tqabbil awtomatizzat bejn il-ħiliet ta' min qed ifittex xogħol u l-opportunitajiet tax-xogħol.
Għaliex għandna bżonnha?
Qabel mhux kull pajjiż tal-UE kien qed jagħmel il-postijiet tax-xogħol battala li jkunu ppubblikati fil-livell nazzjonali kollha disponibbli lill-portal tal-internet tal-EURES u ma kien hemm l-ebda skambju awtomatizzat tas-CVs ta' dawk li qed ifittxu xogħol fil-livell Ewropew.
Dan kien ifisser li dawk li kienu qed ifittxu xogħol u l-impjegaturi kellhom aċċess għal għadd limitat ta' postijiet tax-xogħol battala u CVs.
Spiss, la l-ħaddiema u lanqas l-impjegaturi ma kienu konxji tal-EURES u s-servizzi li joffri. Is-servizzi tal-impjiegi fl-istati membri, li spiss huma l-ewwel punt ta' kuntatt, ma kinux meħtieġa jinfurmaw lill-klijenti dwar x'jista' jagħmel il-EURES għalihom u kif jista' jagħmlu.
Barra minn hekk, l-istati membri ma kinux jiskambjaw biżżejjed informazzjoni dwar nuqqasijiet u eċċessi ta' ħaddiema, u dan xekkel il-kooperazzjoni mmirata fin-netwerk tal-EURES. Għaldaqstant, dan ma kkontribwiex wisq biex jiġu indirizzati l-iżbilanċi fis-suq tax-xogħol fl-Ewropa, li minħabba fihom xi pajjiżi sofrew minn qgħad għoli filwaqt li oħrajn iffaċċaw nuqqas ta' ħaddiema.
Ir-regoli l-ġodda ser jindirizzaw dawn in-nuqqasijiet billi jagħmlu mill-EURES għodda tassew Ewropea ta' kollokament, tqabbil u reklutaġġ. In-netwerk modernizzat tal-EURES ser jagħmel l-informazzjoni dwar impjiegi fl-Ewropa kollha aktar faċilment aċċessibbli u ser joffri sostenn aħjar kemm lil dawk li qed ifittxu xogħol kif ukoll lill-impjegaturi.
Regoli ġodda
Benefiċċji għal dawk li qed ifittxu xogħol u l-impjegaturi
Il-firxa ta' servizzi offruti lil dawk li qed ifittxu xogħol u lill-impjegaturi ser tiġi estiża biex tinkludi:
- aktar pariripersonalizzati dwar il-karriera u r-reklutaġġ
- għajnuna fit-tiftix tax-xogħol u l-assunzjoni tal-persunal
- informazzjoni dwar is-sigurtà soċjali, ħlasijiet ta' taxxa u regoli rilevanti oħrajn
- informazzjoni dwar assistenza wara r-reklutaġġ bħal korsijiet fil-lingwa
Dan ser jikkumplementa s-servizzi li diġà qed jiġu offruti, li jkopru informazzjoni dwar offerti tax-xogħol jew pariri dwar it-tfassil ta' CVs, applikazzjonijiet u avviżi ta' postijiet tax-xogħol battala.
Skont ir-regoli l-ġodda, persuna li qed tfittex impjieg barra minn pajjiżha ser tibbenefika mill-istess livell ta' sostenn bħal persuna li qed tfittex impjieg f'pajjiżha. Kwalunkwe persuna li tikkuntattja servizz tal-impjiegi fi stat membru ser tirċievi informazzjoni bażika dwar in-netwerk tal-EURES u s-servizzi ta' konsulenza u pariri li joffri.
Rekwiżiti ġodda għall-pajjiżi tal-UE
L-istati membri ser ikunu meħtieġa jagħmlu disponibbli għall-portal tal-EURES:
- l-offerti kollha ta' xogħol disponibbli mas-servizzi pubbliċi tal-impjiegi u dawk offruti minn organizzazzjonijiet oħrajn involuti, inklużi apprendistati u traineeships
- is-CVs ta' dawk li qed ifittxu xogħol li huma disponibbli fis-servizzi pubbliċi tal-impjiegi u organizzazzjonijiet oħrajn involuti dment li l-individwi kkonċernati jaqblu li d-data personali tagħhom tiġi trasferita
Sabiex jiġu żgurati l-kwalità u l-protezzjoni tal-minorenni, l-istati membri jistgħu jeskludu t-traineeships jew l-apprendistati li jkunu ffokati prinċipalment fuq l-edukazzjoni.
Sħubija tal-pjattaforma
Il-firxa ta’ membri u sħab tal-EURES ser titwessa’.
L-organizzazzjonijiet privati tal-impjiegi jistgħu jingħaqdu man-netwerk u l-postijiet ta' xogħol battala tagħhom jiġu ppubblikati fuq il-portal web flimkien ma’ dawk pubbliċi. L-organizzazzjonijiet bi skop ta’ qligħ għandhom jipprovdu s-servizzi kollha, eż. il-postijiet ta' xogħol battala, CVs fuq il-portal, kif ukoll servizzi ta’ appoġġ lill-persuni li qed ifittxu xogħol u lill-impjegaturi, dment li ma jkunux jistgħu jiġġustifikaw lill-awtoritajiet nazzjonali li huma ma jistgħux jipprovdu dawn it-tliet servizzi.
L-organizzazzjonijiet mingħajr skop ta’ qligħ jistgħu jagħżlu bejn it-tliet għażliet.
Is-servizzi pubbliċi tal-impjiegi wkoll ser joffru s-servizzi kollha u barra minn hekk ser jiżguraw li l-utenti kollha li mhumiex mħarrġa fl-IT ikun jista’ jkollhom ukoll aċċess offline għal informazzjoni.
Involuti wkoll fin-netwerk hemm: it-trade unions, l-organizzazzjonijiet tal-impjegaturi u atturi rilevanti oħra fis-suq tal-impjiegi. Ir-rappreżentanti tas-sħab soċjali huma involuti fil-livell tal-UE, iżda wkoll fil-livell nazzjonali u transfruntier.