Kronoloġija tat-trasparenza fil-pagi

Il-Kunsill adotta regoli ġodda biex jiġġieled kontra d-diskriminazzjoni fil-pagi u jgħin biex titnaqqas id-differenza fil-pagi bejn il-ġeneri fl-UE.

Skont id-direttiva dwar it-trasparenza fil-pagi, il-kumpaniji tal-UE ser ikunu meħtieġa jaqsmu informazzjoni dwar kemm iħallsu lin-nisa u l-irġiel għal xogħol ta' valur ugwali, u jieħdu azzjoni jekk id-differenza fil-pagi bejn il-ġeneri tagħhom taqbeż il-5%.

Id-direttiva l-ġdida tinkludi wkoll dispożizzjonijiet dwar kumpens għall-vittmi ta' diskriminazzjoni fil-pagi u penali, li jinkludu multi, għal impjegaturi li jiksru r-regoli.

Id-direttiva dwar it-trasparenza fil-pagi ser tidħol fis-seħħ mal-pubblikazzjoni fil-Ġurnal Uffiċjali tal-UE. Imbagħad, il-pajjiżi tal-UE jkollhom sa tliet snin biex ''jittrasponu'' d-direttiva billi jadattaw il-leġiżlazzjoni nazzjonali tagħhom biex tqis ir-regoli l-ġodda.

Il-presidenza Ċeka u l-Parlament Ewropew laħqu qbil proviżorju dwar regoli għat-trasparenza fil-pagi.

In-negozjati mal-Parlament Ewropew biex jintlaħaq qbil dwar test komuni bdew f'Ġunju 2022. Il-qbil attwali ntlaħaq matul il-ħames ċiklu ta' negozjati.

Il-Kunsill jaqbel dwar approċċ ġenerali rigward abbozz ġdid ta' regoli tal-UE dwar it-trasparenza fil-pagi.

Il-liġi proposta tinkludi sett ta' miżuri vinkolanti dwar it-trasparenza fil-pagi, pereżempju:

• l-impjegaturi jeħtieġ li jindikaw il-livell jew il-firxa ta' paga inizjali li għandha titħallas lill-ħaddiem futur
• l-impjegaturi jridu jagħmlu aċċessibbli għall-impjegati tagħhom liema kriterji - oġġettivi u newtrali għall-ġeneru - jintużaw biex jiġu definiti l-paga u l-progress fil-karriera tagħhom
• il-ħaddiema u r-rappreżentanti tagħhom għandu jkollhom id-dritt li jirċievu informazzjoni dwar il-livell tal-paga individwali tagħhom u l-livelli medji tal-pagi għall-ħaddiema li jagħmlu l-istess xogħol jew xogħol ta' valur ugwali, imqassma skont is-sess

• Kunsill Impjiegi, Politika Soċjali, Saħħa u Affarijiet tal-Konsumatur, 6-7 ta' Diċembru 2021
• Il-Kunsill jaqbel dwar pożizzjoni komuni biex tiġi indirizzata d-differenza bejn il-ġeneri fil-pagi (stqarrija għall-istampa, 6 ta' Diċembru 2021)

Il-Kummissjoni Ewropea, bi tweġiba għas-sejħa tal-Kunsill ta’ Ġunju 2019 biex jiġu żviluppati miżuri konkreti biex tiżdied it-trasparenza fil-pagi, tippreżenta proposta għal direttiva għat-tisħiħ tal-applikazzjoni tal-prinċipju ta’ paga ugwali għal xogħol ugwali jew xogħol ta’ valur ugwali bejn l-irġiel u n-nisa permezz ta’ trasparenza fil-pagi u mekkaniżmi ta’ infurzar.

Id-direttiva għandha l-għan li:

• tistabbilixxi rekwiżiti minimi għat-tisħiħ tal-applikazzjoni tal-prinċipju ta’ paga ugwali għall-irġiel u n-nisa għal xogħol ugwali jew għal xogħol ta’ valur ugwali
• telimina d-diskriminazzjoni abbażi tas-sess permezz tat-tisħiħ tat-trasparenza tas-sistemi tal-pagi
• issaħħaħ l-infurzar tad-drittijiet u l-obbligi marbuta mal-prinċipju ta' paga ugwali

• It-Trasparenza fil-Pagi: il-Kummissjoni tipproponi miżuri biex tiżgura pagi ugwali għal xogħol ugwali (stqarrija għall-istampa tal-Kummissjoni Ewropea, 4 ta' Marzu 2021)
• Il-proposta għal direttiva dwar it-trasparenza fil-pagi biex jissaħħaħ il-prinċipju ta’ paga ugwali

Il-Kunsill jadotta konklużjonijiet dwar politiki u miżuri ewlenin bil-għan li titnaqqas id-differenza bejn il-pagi tal-irġiel u n-nisa. Il-konklużjonijiet jirrikonoxxu li l-ugwaljanza bejn l-irġiel u n-nisa hija prinċipju fundamentali tal-Unjoni Ewropea minqux fit-Trattati.

Il-konklużjonijiet jappellaw lill-istati membri u lill-Kummissjoni biex jeżaminaw u jtejbu l-miżuri disponibbli kollha jew biex jintroduċu oħrajn ġodda bil-ħsieb li:

• jiżguraw l-infurzar effettiv fil-livell nazzjonali tal-prinċipju legali ta' paga ugwali għal xogħol ugwali jew għal xogħol ta' valur ugwali
• jippromwovu l-ugwaljanza fl-edukazzjoni u l-impjieg sabiex tiġi indirizzata s-segregazzjoni tas-suq tax-xogħol
• jiffaċilitaw ir-rikonċiljazzjoni tax-xogħol, il-familja u l-ħajja privata kemm għan-nisa kif ukoll għall-irġiel

• Innaqqsu d-differenza bejn il-pagi tal-irġiel u n-nisa: Konklużjonijiet tal-Kunsill (stqarrija għall-istampa, 13 ta' Ġunju 2019)
• Konklużjonijiet tal-Kunsill dwar it-tnaqqis tad-differenza bejn il-pagi tal-irġiel u n-nisa: politiki u miżuri ewlenin, 13 ta' Ġunju 2019