Iompar muirí

Faigh amach faoina bhfuil ar siúl ag an Aontas chun an t-iompar muirí a dhéanamh níos iomaíche, níos glaise agus níos sábháilte.

Iompar muirí níos inbhuanaithe

Is é an muiriompar is cúis le thart ar 13 % d’astaíochtaí gás ceaptha teasa an iompair. Tá roinnt tionscnamh glactha ag an Aontas Eorpach chun astaíochtaí ó earnáil muiriompair na hEorpa a laghdú agus í a choinneáil iomaíoch ag an am céanna.

FuelEU maritime: breoslaí dícharbónaithe

Leis an tionscnamh FuelEU maritime, atá mar chuid den phacáiste ‘Oiriúnach do 55’, cuirfear chun cinn úsáid breoslaí in-athnuaite agus ísealcharbóin sa mhuiriompar.

Is é an sprioc atá ann déine astaíochtaí gás ceaptha teasa an fhuinnimh a úsáidtear ar bord long a laghdú suas le 80 % faoi 2050, trí úsáid breoslaí níos inbhuanaithe a chur chun cinn ag longa a úsáideann calafoirt an Aontais agus sreabhadh rianúil an tráchta mhuirí a chinntiú agus saobhadh sa mhargadh inmheánach a sheachaint ag an am céanna.

Ghlac an Chomhairle na rialacha nua i mí Iúil 2023.

Cuirtear i láthair sa ghrafaic faisnéise spriocanna agus tairbhí rialacháin ReFuelEU aviation agus FuelEU maritime atá beartaithe, arb é is aidhm dóibh glacadh breoslaí níos inbhuanaithe a mhéadú sa dá earnáil iompair.

Oiriúnach do 55: glacadh breoslaí níos glaise a mhéadú sna hearnálacha eitlíochta agus muirí (Grafaic faisnéise)

Cur chuige domhanda i leith astaíochtaí muirí

Oibríonn an tAontas i gcomhthéacs na hEagraíochta Muirí Idirnáisiúnta (IMO) freisin chun astaíochtaí gás ceaptha teasa ó longa a laghdú. Glacadh straitéis athbhreithnithe IMO chun astaíochtaí gás ceaptha teasa a laghdú i mí Iúil 2023, agus é mar aidhm aici astaíochtaí glan-nialasacha a bhaint amach faoi thart ar 2050. Tá bearta á bplé chun an straitéis athbhreithnithe IMO sin a chur chun feidhme.

Freastalaíonn uachtaránacht na Comhairle agus Ballstáit de chuid an Aontais ar chruinnithe IMO agus cuireann siad go gníomhach le bearta comhshaoil agus bearta eile a fhorbairt. Is comhaltaí den eagraíocht iad Ballstáit uile an Aontais.

An Eagraíocht Mhuirí Idirnáisiúnta – IMO

Sábháilteacht iompair mhuirí

Chun tacú le loingseoireacht ghlan, níos sábháilte agus nua-aimseartha san Aontas, tá sraith de chúig phíosa reachtaíochta molta ag an Aontas, ar a dtugtar an pacáiste sábháilteachta muirí le chéile. Áirítear sa tacar bearta maidir leis an méid seo a leanas:

rialú stát an chalafoirt
truailliú ó longa
ceanglais an Bhratstáit a chomhlíonadh
imscrúdú timpistí
lena ndéantar athbhreithniú ar shainordú na Gníomhaireachta Eorpaí um Shábháilteacht Mhuirí (EMSA)

Is é an sprioc atá ann rialacha an Aontais maidir le sábháilteacht mhuirí a nuachóiriú agus truailliú uisce ó longa a laghdú agus iomaíochas earnáil loingseoireachta na hEorpa a chosaint ag an am céanna.

I mí na Samhna 2024, ghlac an Chomhairle ceithre chuid den phacáiste.

Sábháilteacht mhuirí: dlíthe nua glactha ag an gComhairle chun tacú leis an loingseoireacht shábháilte ghlan nua-aimseartha san Aontas (preaseisiúint an 18 Samhain 2024)

I mí na Bealtaine 2025, tháinig an Chomhairle agus an Pharlaimint ar chomhaontú polaitiúil sealadach maidir leis an gcúigiú píosa reachtaíochta, ag díriú ar EMSA.