An tAontas Custaim a nuachóiriú

Athchóiriú custaim an Aontais

Tá athchóiriú á dhéanamh ag an Aontas ar a chóras custaim ós rud é go bhfuil brú suntasach á chur air mar gheall ar shreafaí trádála méadaithe, córais náisiúnta ilroinnte, méadú tapa na ríomhthráchtála agus réaltachtaí geopholaitiúla atá ag athrú.

I mí na Bealtaine 2023, mhol an Coimisiún Eorpach athchóiriú bunúsach ar chreat custaim an Aontais. An 26 Márta 2026, tháinig an Chomhairle agus an Pharlaimint ar chomhaontú maidir le hionstraimí nuálacha nua chun trádáil dhomhanda a éascú, feabhas a chur ar bhailiú dleachtanna custaim agus cosc a chur ar earraí neamhchomhlíontacha, contúirteacha nó neamhshábháilte teacht isteach san Aontas.

Leis an athchóiriú a comhaontaíodh, tugtar isteach an méid seo a leanas:

• údarás custaim nua de chuid an Aontais
• mol sonraí custaim an Aontais Eorpaigh
• simplithe feabhsaithe do na trádálaithe is iontaofa
• táille láimhseála nua ar fud an Aontais

• Custaim an Aontais: an Chomhairle agus an Pharlaimint tagtha ar chomhaontú maidir le hathchóiriú suntasach (preaseisiúint, an 26 Márta 2026)

Údarás Custaim an Aontais Eorpaigh

Foráiltear leis an gcomhaontú idir na comhreachtóirí go mbunófar gníomhaireacht dhíláraithe de chuid an Aontais – údarás custaim an Aontais Eorpaigh (EUCA) – chun údaráis chustaim náisiúnta a chomhordú agus chun tacú leo ar fud an Aontais.

Táthar ag dréim go ndéanfaidh údarás custaim nua an Aontais an méid seo a leanas:

• bainistiú riosca ar leibhéal an Aontais a chinntiú
• réimsí rialaithe tosaíochta agus critéir riosca a shainaithint
• bainistiú géarchéime a chomhordú ar leibhéal an Aontais

Chuirfeadh Údarás Custaim an Aontais Eorpaigh a chuid cúraimí i gcrích trí úsáid a bhaint as sonraí allmhairiúcháin agus onnmhairiúcháin a nuashonraítear go leanúnach ó mhol sonraí custaim an Aontais.

An tráth céanna, leanfadh na húdaráis chustaim náisiúnta dá n-anailísí riosca náisiúnta féin a dhéanamh, a bheadh saincheaptha do riachtanais náisiúnta.

Beidh Údarás Custaim an Aontais Eorpaigh suite in Lille, agus táthar ag dréim go mbeidh thart ar 250 ball foirne aige.

Bunófar an t-údarás an lá a thiocfaidh an rialachán uileghabhálach i bhfeidhm.

• Lille chun údarás custaim nua an Aontais a óstáil (preaseisiúint, an 25 Márta 2026)

Mol sonraí an Aontais maidir le custaim

Leis na rialacha a comhaontaíodh, bunaítear mol sonraí custaim aonair de chuid an Aontais, áit ar féidir trádálaithe eolas custaim agus táirge a chur isteach trí ardán aonair ar líne.

Le mol sonraí custaim an Aontais Eorpaigh:

• bhaileofaí sonraí custaim agus dhéanfaí anailís orthu chun sreabhadh rianúil earraí isteach san Aontas agus amach as a chinntiú
• chuirfí sonraí comhroinnte fíor-ama ar fáil do na húdaráis, rud a chinnteoidh bainistiú riosca níos tapúla, níos comhsheasmhaí agus níos éifeachtaí
• laghdófaí na hualaí riaracháin ar ghnólachtaí agus d’fheabhsófaí cruinneas na bpróiseas custaim

Faoi théarmaí an chomhaontaithe, tiocfaidh an mol sonraí chun bheith oibríochtúil le haghaidh earraí ríomhthráchtála an 1 Iúil 2028. Le cur i bhfeidhm céimneach, tiocfaidh gluaiseachtaí uile na n-earraí faoina raon feidhme faoin 1 Márta 2034.

Buntáistí do ghnólachtaí agus d’údaráis

Gnólachtaí

• sonraí allmhairiúcháin agus onnmhairiúcháin a chur isteach uair amháin (seachas suas le 27 gcóras náisiúnta a bheith ann)
• na sonraí céanna a athúsáid le haghaidh coinsíneachtaí iomadúla
• ualach riaracháin agus costais laghdaithe

Údaráis náisiúnta

• forbhreathnú iomlán a fháil ar shreafaí trádála agus ar shlabhraí soláthair
• rochtain a fháil ar shonraí comhroinnte fíor-ama ar fud an Aontais
• freagairtí riosca níos tapúla, níos comhsheasmhaí agus níos éifeachtaí a chinntiú

Simplithe do na trádálaithe is iontaofa

Tá sé beartaithe leis an reachtaíocht nuashonraithe sraith nua simplithe a thabhairt isteach do na trádálaithe is iontaofa.

Sna rialacha nua, tá catagóir nua ann de na gnólachtaí is trédhearcaí: 'trádálaithe iontaoibhe agus seiceála' Faoin scéim sin, bhainfeadh gnólachtaí a sholáthraíonn faisnéis chuimsitheach maidir le gluaiseacht agus comhlíonadh earraí, agus a chomhlíonann critéir dhiana, tairbhe as oibleagáidí custaim cuíchóirithe.

Bheadh rochtain ag na trádálaithe is iontaofa sin ar roinnt simplithe a bhaineann lena gcuid oibleagáidí, lena n-áirítear a bheith in ann a gcuid earraí a scaoileadh chun cúrsaíochta san Aontas gan aon idirghabháil ghníomhach chustaim ar chor ar bith i gcásanna áirithe.

Leanfadh cuideachtaí eile de thairbhe a bhaint as na simplithe atá ar fáil cheana faoi scéim an oibreora eacnamaíoch údaraithe (OEÚ).

Insreabhadh beartán beag a bhainistiú

Gach lá, bíonn rabharta pacáistí beaga ar luach íseal san Aontas. De réir an Choimisiúin Eorpaigh, allmhairíodh 4.6 billiún beartán ríomhthráchtála, dar luach faoi bhun €150, isteach san Aontas in 2024, agus tháinig 91% de na lastais sin ón tSín.

I ngeall ar fhás tapa na ríomhthráchtála, cuireadh brú ar údaráis chustaim, méadaíodh an costas a bhaineann le faireachán a dhéanamh ar bheartáin atá ag teacht isteach, méadaíodh rioscaí calaoise, agus cruthaíodh iomaíocht éagórach do ghnólachtaí an Aontais.

Tháinig 27 mBallstát an Aontais ar chomhaontú maidir le meascán de bhearta gearrthéarmacha agus fadtéarmacha chun aghaidh a thabhairt ar na fadhbanna sin.

Áirítear ar na réitigh fhadtéarmacha deireadh a chur leis an tairseach díolúine ó dhleacht chustaim agus táille láimhseála nua a thabhairt isteach le haghaidh beartáin ar luach íseal.

Ós rud é nach dtiocfaidh díchur na tairsí díolúine ó dhleacht chustaim i bhfeidhm go dtí 2028, tá beart gearrthéarmach glactha ag an Aontas freisin lena dtugtar isteach dleacht chustaim sheasta €3 ar ítimí i mbeartáin bheaga a bhfuil luach níos lú ná €150 acu agus a thagann isteach san Aontas.

Féach freisin