"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Bil-permess tiegħek, ser nużaw cookies biex nipproduċu data aggregata anonima dwar in-navigazzjoni u l-imġiba tal-viżitaturi fuq is-sit web tagħna. Ser nużaw din id-data biex intejbu l-esperjenza tiegħek tan-navigazzjoni fuq is-sit web tagħna.
Kunsill Edukazzjoni, Żgħażagħ, Kultura u Sport (Edukazzjoni u Żgħażagħ), 11 ta' Mejju 2026
Riżultati ewlenin
Edukazzjoni
Erasmus+ 2028-2034
Il-Kunsill qabel fuq il-pożizzjoni tiegħu dwar ir-regolament dwar Erasmus+ għall-2028-2034, li huwa l-ewwel pass kruċjali lejn negozjati mal-Parlament Ewropew.
Fiduċjużi li, permezz tal-ħidma tagħna dan is-semestru, il-ġenerazzjonijiet futuri tal-Erasmus ser ikomplu jibbenefikaw mill-opportunitajiet kbar li jġib miegħu l-programm. Mill-mobbiltà tal-apprendiment u l-volontarjat sal-opportunitajiet ta' żvilupp tat-talent u tal-eċċellenza u l-kooperazzjoni fost l-istituzzjonijiet u l-organizzazzjonijiet, l-Erasmus+ futur għandu jkompli jinvesti fin-nies, fl-innovazzjoni u fl-apprendiment tul il-ħajja ta' kwalità għolja.
Dr Athena Michaelidou, Ministru għall-Edukazzjoni, l-Isport u ż-Żgħażagħ tar-Repubblika ta' Ċipru
Il-programm Erasmus+ għandu l-għan li jappoġġa apprendiment tul il-ħajja ta' kwalità għolja u jipprovdi opportunitajiet ta' mobbiltà tal-apprendiment għal firxa wiesgħa ta' parteċipanti, inkluż iż-żgħażagħ, l-apprendisti, l-istudenti u l-għalliema. Il-proposta tal-Kummissjoni tgħaqqad il-programm mal-Korp Ewropew ta' Solidarjetà (KES).
Il-Kunsill approva konklużjonijiet dwar l-għalliema fl-era tal-intelliġenza artifiċjali (IA). Il-konklużjonijiet jaffermaw mill-ġdid li l-għalliema huma kruċjali għal integrazzjoni tal-IA fl-edukazzjoni li jkollha lill-bniedem fil-qalba tagħha u mmexxija mill-pedagoġija u jappellaw lill-istati membri biex jieħdu passi biex jagħtu spinta lil-litteriżmu fl-IA tal-għalliema, iħaddnu l-potenzjal tal-IA filwaqt li jtaffu r-riskji assoċjati, jippromwovu għodod tal-IA speċifiċi għall-edukazzjoni, jindirizzaw id-distakki diġitali, u jissalvagwardaw il-kundizzjonijiet tax-xogħol u l-benesseri tal-għalliema.
L-għalliema mhumiex biss utenti tal-IA – huma gwidi, konsulenti u ħassieba kritiċi li jgħinu lill-istudenti jinnavigaw dinja diġitali dejjem aktar kumplessa. Huwa essenzjali li jiġu appoġġati bit-taħriġ, l-għodod u s-salvagwardji adatti biex l-IA tkun suċċess fl-edukazzjoni.
Dr Athena Michaelidou, Ministru għall-Edukazzjoni, l-Isport u ż-Żgħażagħ tar-Repubblika ta' Ċipru
Il-ministri skambjaw il-fehmiet tagħhom dwar is-suġġett tal-"Ħiliet bażiċi u ż-Żona Ewropea tal-Edukazzjoni: nibnu pontijiet għall-futur". Id-diskussjoni ffukat fuq strateġiji effettivi biex jissaħħu l-ħiliet bażiċi għall-istudenti kollha. Il-Kunsill esplora wkoll kif il-kooperazzjoni fil-livell tal-UE tista' tappoġġa bl-aħjar mod l-iżvilupp u t-titjib ta' tali ħiliet u r-rwol taż-Żona Ewropea tal-Edukazzjoni f'dan il-proċess.
Waqt l-ikla ta' nofsinhar, il-ministri għall-edukazzjoni ddiskutew modi ta' kif jinbnew sistemi reżiljenti ta' edukazzjoni u taħriġ fi żminijiet ta' kriżi. Il-ministru Ukren għall-edukazzjoni u x-xjenza, Oksen Lisovyi, ħa sehem ukoll fid-diskussjoni.
Punti oħrajn
Taħt "affarijiet oħra", il-ministri rċevew informazzjoni dwar il-programm ta' ħidma tal-presidenza Irlandiża li jmiss; informazzjoni mill-Kroazja dwar il-proġett brAIn fl-era tal-IA; u informazzjoni mis-Slovakkja dwar azzjoni koordinata għas-sikurezza online tat-tfal
Din ir-riżorsa bħalissa hi disponibbli biss bil-lingwa jew il-lingwi li ġejjin:
Il-ministri kellhom skambju ta' fehmiet dwar modi kif jiġi żgurat li t-tfassil tal-politika fil-livell tal-UE u dak nazzjonali jirrifletti aħjar il-ħtiġijiet u l-aspettattivi taż-żgħażagħ fl-Ewropa.
Matul id-diskussjoni, huma qasmu eżempji ta' prattiki tajbin fil-pajjiżi tagħhom li għenu biex il-politiki jsiru aktar adatti għaż-żgħażagħ, kif ukoll kwalunkwe sfida li ltaqgħu magħha u kif indirizzawha. Huma ressqu wkoll modi biex jiġi żgurat li l-Istrateġija tal-UE għaż-Żgħażagħ li jmiss tkun aktar adatta għaż-żgħażagħ, b'mod partikolari fir-rigward tal-parteċipazzjoni, l-implimentazzjoni u l-impatt.
Pjan ta' Ħidma tal-Istrateġija tal-UE għaż-Żgħażagħ
Il-Kunsill approva riżoluzzjoni dwar ir-reviżjoni tal-Pjan ta' Ħidma tal-Istrateġija tal-UE għaż-Żgħażagħ għall-2025-2027.
Ir-riżoluzzjoni taġġorna l-pjan ta' ħidma għall-perjodu 2025-2027, b'mod partikolari fid-dawl tal-presidenza Irlandiża, dik Litwana u dik Griega li jmiss tal-Kunsill tal-UE.
L-istrateġija tal-UE għaż-Żgħażagħ għall-2019-2027 għandha l-għan li tagħti s-setgħa liż-żgħażagħ, issaħħaħ ir-reżiljenza tagħhom u tippromwovi l-inklużjoni tagħhom.
Il-Kunsill approva riżoluzzjoni dwar l-eżiti tal-11-il ċiklu tad-Djalogu tal-UE maż-Żgħażagħ, li kellha l-għan li tiżgura li l-eżiti jiġu rikonoxxuti u segwiti mill-partijiet ikkonċernati rilevanti fil-livell tal-UE u dak nazzjonali, kif ukoll li tiżgura t-trasparenza, il-kwalità u l-kontinwità fl-implimentazzjoni tad-Djalogu tal-UE maż-Żgħażagħ u r-riżultati tiegħu.
Il-11-il ċiklu tad-Djalogu tal-UE maż-Żgħażagħ kien immexxi mit-triju ta' presidenzi tal-Polonja, id-Danimarka u Ċipru, u ffoka fuq l-Għan Ewropew dwar iż-Żgħażagħ Nru 1: "il-Konnessjoni tal-UE maż-Żgħażagħ".
Saret laqgħa informali waqt il-kolazzjon fil-qafas tad-Djalogu tal-UE maż-Żgħażagħ, li laqqgħet flimkien rappreżentanti mill-presidenzi preċedenti, attwali u li jmiss, il-Kummissjoni, il-Parlament Ewropew, u l-organizzazzjonijiet Ewropej taż-żgħażagħ. Id-diskussjoni ffukat fuq l-Istrateġija tal-UE għaż-Żgħażagħ wara l-2027.
Punti oħrajn
Taħt "affarijiet oħra", il-ministri ġew infurmati dwar il-konklużjonijiet tal-kolazzjon informali dwar l-Istrateġija tal-UE għaż-Żgħażagħ wara l-2027, u rċevew informazzjoni mid-delegazzjoni Irlandiża dwar il-programm ta' ħidma għall-presidenza tagħhom li jmiss. Il-Kummissjoni infurmat lid-delegazzjonijiet dwar l-Istrateġija dwar l-Ekwità Interġenerazzjonali u l-Pjan ta' Azzjoni kontra l-Bullying Ċibernetiku.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
