Emendi għar-regoli tal-unjoni bankarja

Fil-15 ta' Frar l-ambaxxaturi għall-UE approvaw ftehim milħuq bejn il-presidenza tal-Kunsill u l-Parlament dwar sett rivedut ta’ regoli mmirati lejn it-tnaqqis tar-riskji fis-settur bankarju tal-UE.

Il-pakkett maqbul mill-Kunsill u l-Parlament fih żewġ regolamenti u żewġ direttivi, rigward:

• ir-rekwiżiti ta’ kapital tal-banek (emendi għar-regolament 575/2013 u d-direttiva 2013/36/UE);
• l-irkupru u r-riżoluzzjoni ta’ banek f’diffikultà (emendi għad-direttiva 2014/59/UE u r-regolament 806/2014).

Id-deċiżjoni tikkonkludi proċess ta’ negozjati li beda f’Novembru 2016. Intlaħaq qbil inizjali fir-rigward tal-elementi ewlenin tal-pakkett bankarju u dan ġie kkonfermat mill-Kunsill fl-4 ta’ Diċembru 2018. L-ambaxxaturi għall-UE issa approvaw il-ftehim dwar il-miżuri kollha għat-tnaqqis tar-riskju.

Il-pakkett dwar it-tnaqqis tar-riskju huwa maħsub biex jimplimenta r-riformi maqbula fil-livell internazzjonali wara l-kriżi finanzjarja tal-2007 u l-2008 sabiex jissaħħaħ is-settur bankarju u jiġu indirizzati l-isfidi pendenti għall-istabbiltà finanzjarja. Ippreżentati f'Novembru 2016, dawn jinkludu elementi maqbula mill-Kumitat ta' Basel dwar is-Superviżjoni Bankarja u mill-Bord għall-Istabilità Finanzjarja (FSB).

Fost il-miżuri prinċipali maqbula għat-tnaqqis tar-riskju fis-sistema bankarja, il-pakkett isaħħaħ il-qafas għar-riżoluzzjoni tal-banek. Dan jirrikjedi li l-istituzzjonijiet globali sistematikament importanti (“G-SIIs”) jkollhom aktar kapaċità ta’ assorbiment tat-telf u ta’ rikapitalizzazzjoni billi jistabbilixxi r-rekwiżiti fir-rigward tal-ammont u l-kwalità tal-fondi proprji u obbligazzjonijiet eliġibbli (MREL) biex jiżgura proċess ta’ “rikapitalizzazzjoni interna” effettiv u ordnat. Jipprovdi wkoll salvagwardji proviżorji u azzjonijiet addizzjonali possibbli għall-awtoritajiet tar-riżoluzzjoni.

Il-pakkett isaħħaħ ukoll ir-rekwiżiti ta' kapital tal-banek biex jitnaqqsu l-inċentivi għat-teħid ta' riskju eċċessiv, bl-inklużjoni ta' proporzjon vinkolanti ta' ingranaġġ, proporzjon vinkolanti ta' finanzjament stabbli nett u l-istabbiliment ta' regoli sensittivi għar-riskju għan-negozjar f'titoli u derivattivi.

Barra minn hekk, il-pakkett bankarju fih miżuri għat-titjib tal-kapaċità ta' self tal-banek u għall-faċilitazzjoni ta' rwol akbar għall-banek fis-swieq finanzjarji, bħal:

• it-tnaqqis tal-piż amministrattiv għall-banek li jkunu iżgħar u inqas kumplessi, b'rabta partikolari mar-rekwiżiti ta' rappurtar u ta' żvelar;
• it-titjib tal-kapaċità tal-banek li jsellfu lill-SMEs u li jiffinanzjaw proġetti ta' infrastruttura;

Il-pakkett bankarju fih ukoll qafas għall-kooperazzjoni u l-kondiviżjoni tal-informazzjoni bejn id-diversi awtoritajiet involuti fis-superviżjoni u r-riżoluzzjoni tal-gruppi bankarji transkonfinali. Il-miżuri maqbula jippreservaw il-bilanċ li ntlaħaq bil-pożizzjoni tal-Kunsill bejn is-setgħat tas-superviżuri lokali u dawk ospitanti biex jiġu ffaċilitati l-flussi transkonfinali tal-kapital u l-likwidità, filwaqt li jiġi żgurat livell adegwat ta' protezzjoni għad-depożitanti, il-kredituri u l-istabbiltà finanzjarja fl-istati membri kollha. Il-ftehim idaħħal ukoll emendi għat-titjib tal-kooperazzjoni bejn l-awtoritajiet kompetenti dwar kwistjonijiet b'rabta mas-superviżjoni ta' attivitajiet fil-ġlieda kontra l-ħasil tal-flus.

• Unjoni Bankarja: l-ambaxxaturi għall-UE japprovaw pakkett sħiħ ta' miżuri għat-tnaqqis tar-riskji (stqarrija għall-istampa, 15/2/2019)

Il-ministri għall-finanzi approvaw il-ftehim li ntlaħaq bejn il-Presidenza Awstrijaka tal-Kunsill u l-Parlament Ewropew dwar il-miżuri ewlenin ta' pakkett leġislattiv komprensiv bil-għan li jitnaqqsu r-riskji fis-settur bankarju tal-UE.

Il-proposti huma maħsuba biex jimplimentaw ir-riformi maqbula fil-livell internazzjonali wara l-kriżi finanzjarja tal-2007-2008 biex jissaħħaħ is-settur bankarju u jiġu indirizzati l-isfidi pendenti għall-istabbiltà finanzjarja. Ippreżentati f'Novembru 2016, dawn jinkludu l-elementi maqbula mill-Kumitat ta' Basel dwar is-superviżjoni bankarja u mill-Bord għall-Istabbiltà Finanzjarja (FSB).

Pjan direzzjonali biex titlesta l-unjoni bankarja

Il-miżuri maqbula jwettqu tlieta mill-objettivi ewlenin stabbiliti mill-pjan direzzjonali tal-Kunsill dwar it-tlestija tal-unjoni bankarja maqbula f'Ġunju 2016:

• it-tisħiħ tal-qafas għal riżoluzzjoni bankarja, b'mod partikolari l-livell u l-kwalità meħtieġa tas-subordinazzjoni tal-obbligazzjonijiet (MREL) biex jiġi żgurat proċess ta' "rikapitalizzazzjoni interna" li jkun effettiv u ordnat.
• l-introduzzjoni tal-possibbiltà li l-awtoritajiet ta' riżoluzzjoni jissospendu l-pagamenti u/jew l-obbligi kuntrattwali tal-bank meta jkun taħt riżoluzzjoni, l-hekk imsejħa "għodda ta' moratorju", biex tingħata għajnuna fl-istabbilizzazzjoni tas-sitwazzjoni tal-bank.
• it-tisħiħ tar-rekwiżiti ta' kapital tal-banek biex jitnaqqsu l-inċentivi għat-teħid ta' riskju eċċessiv, bl-inklużjoni ta' proporzjon vinkolanti ta' ingranaġġ, proporzjon vinkolanti ta' finanzjament stabbli nett u l-istabbiliment ta' regoli sensittivi għar-riskju għan-negozjar f'titoli u derivattivi.

Barra minn hekk, il-pakkett bankarju fih miżuri għat-titjib tal-kapaċità ta' self tal-banek u għall-faċilitazzjoni ta' rwol akbar għall-banek fis-swieq tal-kapital, bħal:

• it-tnaqqis tal-piż amministrattiv għall-banek li jkunu iżgħar u inqas kumplessi, b'rabta b'mod partikolari mar-rekwiżiti ta' rappurtar u ta' żvelar;
• it-titjib tal-kapaċità tal-banek li jsellfu lill-SMEs u li jiffinanzjaw proġetti ta' infrastruttura;
• it-tnaqqis tal-ispejjeż tal-ħruġ/żamma ta' ċerti strumenti, bħal strumenti ta' titolizzazzjoni ta' kwalità għolja jew bonds koperti;

Il-pakkett bankarju fih ukoll qafas għall-kooperazzjoni u l-kondiviżjoni tal-informazzjoni bejn id-diversi awtoritajiet involuti fis-superviżjoni u r-riżoluzzjoni ta' gruppi bankarji transkonfinali.

Il-miżuri maqbula jippreservaw il-bilanċ li ntlaħaq bil-pożizzjoni tal-Kunsill bejn is-setgħat tas-superviżuri tal-pajjiż ta' oriġini u ta' dak ospitanti biex jiġu ffaċilitati l-flussi transkonfinali tal-kapital u l-likwidità, filwaqt li jiġi żgurat livell adegwat ta' protezzjoni għad-depożitanti, il-kredituri u l-istabbiltà finanzjarja fl-istati membri kollha.

Il-ftehim idaħħal ukoll emendi għat-titjib tal-kooperazzjoni bejn l-awtoritajiet kompetenti dwar kwistjonijiet b'rabta mas-superviżjoni ta' attivitajiet fil-ġlieda kontra l-ħasil tal-flus.

Il-Kunsill Affarijiet Ekonomiċi u Finanzjarji qabel dwar il-pożizzjoni tiegħu fuq il-proposti biex jitnaqqas ir-riskju fl-industrija bankarja, billi jissaħħu r-regoli dwar ir-rekwiżiti ta' kapital u dwar l-irkupru u r-riżoluzzjoni tal-banek. Il-ministri talbu lill-presidenza biex tibda negozjati mal-Parlament Ewropew hekk kif il-Parlament ikun lest li jinnegozja. Fuq il-bażi tal-progress li sar fit-tnaqqis tar-riskji, huma tennew l-impenn tagħhom li jsir progress fil-komponenti kollha - inkluż il-qsim tar-riskji - imsemmijin fil-pjan direzzjonali tal-Kunsill dwar l-unjoni bankarja minn Ġunju 2016.

• Qbil tal-Kunsill dwar miżuri biex jitnaqqas ir-riskju (stqarrija għall-istampa, 25 ta' Mejju 2018)
• Kunsill Affarijiet Ekonomiċi u Finanzjarji, 25 ta' Mejju 2018

Il-ministri taw ħarsa lejn il-progress li sar fuq il-pakkett bankarju.

• Kunsill Affarijiet Ekonomiċi u Finanzjarji, 5 ta' Diċembru 2017

Fis-16 ta' Ġunju 2017, il-Kunsill laħaq qbil rigward il-pożizzjoni tiegħu fin-negozjar dwar abbozz ta' proposta li temenda r-regolament dwar ir-rekwiżiti ta' kapital għall-banek tal-UE. L-emenda tintroduċi miżuri tranżizzjonali biex jittaffa l-impatt negattiv potenzjali fuq il-kapital regolatorju tal-banek li jistgħu jseħħu wara l-introduzzjoni tal-IFRS 9.

Bil-qbil il-presidenza tal-Kunsill tista' tibda negozjati mal-Parlament Ewropew dwar il-proposta ladarba l-Parlament ikun laħaq qbil dwar il-pożizzjoni tiegħu ta' negozjar.

L-IFRS 9 itejbu l-kontabbiltà tal-istrumenti finanzjarji billi jirrikjedu dispożizzjonijiet minn kmieni għat-telf mis-self. Jindirizzaw id-dgħufijiet fil-qafas tal-kontabbiltà identifikati matul il-kriżi finanzjarja. Madankollu, dispożizzjonijiet akbar x'aktarx jirriżultaw fi tnaqqis tal-kapital regolatorju tal-banek.

Ladarba tiġi adottata, il-proposta tippermetti lill-banek iżidu lura mal-kapital tagħhom ta’ ''grad 1 tal-ekwità komuni'' porzjon akbar mid-dispożizzjonijiet miżjuda għat-telf mis-self bħala kapital żejjed matul perjodu tranżizzjonali ta' ħames snin. Dak l-ammont miżjud ser jonqos b'mod progressiv f'kull sena tal-perjodu tranżizzjonali sa ma jasal sa żero fi tmiemu.

Il-proposta tipprevedi wkoll tneħħija gradwali fuq tliet snin ta' eżenzjoni mil-limitu għall-iskoperturi kbar għall-iskoperturi tal-banek għad-dejn tas-settur pubbliku tal-istati membri denominati fil-munita ta' kwalunkwe stat membru ieħor.

L-IFRS 9 ser jidħlu fis-seħħ fl-1 ta' Jannar 2018, u l-Kunsill b'hekk iddeċieda li jaqsam u jħaffef sa dik id-data d-dħul fis-seħħ tad-dispożizzjonijiet tranżizzjonali marbuta mal-IFRS 9 mill-proposta tal-Kummissjoni ta' Novembru 2016 li temenda r-regolament 575/2013 dwar ir-rekwiżiti tal-kapital bankarju.

• Abbozz ta' regolament fir-rigward tal-perjodu tranżizzjonali biex jittaffa l-impatt tal-introduzzjoni tal-IFRS 9 - Kompromess tal-Presidenza, Mejju 2017

Fis-16 ta' Ġunju 2017, il-Kunsill laħaq qbil dwar il-pożizzjoni tiegħu ta' negozjar dwar abbozz ta' direttiva li temenda l-qafas għall-irkupru u r-riżoluzzjoni tal-banek billi tintroduċi regoli għall-klassifikazzjoni ta’ strumenti ta' dejn mhux garantit fi proċedimenti ta' insolvenza (jiġifieri l-ġerarkija tal-kredituri tal-banek). Bil-ftehim il-presidenza tal-Kunsill tista' tibda taħditiet mal-Parlament Ewropew malli l-Parlament ikun approva l-pożizzjoni ta' negozjar tiegħu.

Il-proposta temenda u ttejjeb l-artikolu 108 tad-direttiva dwar l-irkupru u r-riżoluzzjoni tal-banek li qabel kellha x'taqsam mal-klassifikazzjoni tad-depożiti fil-ġerarkija tal-insolvenza.

Tintroduċi rekwiżit għall-istati membri biex jistabbilixxu subordinazzjoni ċara ta’ depożiti mhux garantiti li jkollhom jiġu ''rikapitalizzati internament'' jekk bank ifalli jew x'aktarx ikun ser ifalli.

Dawn ir-regoli jikkonċernaw, fost l-oħrajn, depożiti kbar li mhumiex koperti minn skema ta' garanzija, jiġifieri, is-sehem ta' 'l fuq mil-limitu ta' €100 000 protett mill-iskema ta' garanzija tad-depożiti.

L-istati membri jkunu mitluba jistabbilixxu klassi ta' dejn superjuri ''mhux bi preferenza'', peress li d-direttiva attwali tistabbilixxi biss preferenzi għal persuni fiżiċi u intrapriżi żgħar u ta' daqs medju, mingħajr ma tikkjarifika t-trattament preferenzjali fid-dettall.

• Abbozz ta' direttiva fir-rigward tal-klassifikazzjoni tal-istrumenti ta' dejn mhux garantiti fil-ġerarkija tal-insolvenza - kompromess tal-Presidenza, Mejju 2017

Il-Grupp ta' Ħidma tal-Kunsill dwar is-Servizzi Finanzjarji, magħmul minn esperti nazzjonali mill-istati membri tal-UE, beda jaħdem fuq is-sett ta' proposti leġislattivi biex jiġu emendati r-regoli eżistenti tal-unjoni bankarja.

• Grupp ta' Ħidma dwar is-Servizzi Finanzjarji

Il-Kunsill Affarijiet Ekonomiċi u Finanzjarji kellu skambju ta’ fehmiet wara preżentazzjoni mill-Kummissjoni Ewropea tal-pakkett tagħha ta’ proposti leġislattivi li għandhom l-għan li jkomplu jtejbu r-reżiljenza tas-settur bankarju tal-UE u l-kapaċità tiegħu li jappoġġa l-ekonomija reali.

L-emendi, ippubblikati fit-23 ta' Novembru 2016, ikopru l-ġabra unika tar-regoli, jiġifieri r-rekwiżiti ta' kapital għas-settur bankarju, ir-regoli għall-irkupru u r-riżoluzzjoni tal-banek u r-regoli dwar il-mekkaniżmu uniku ta’ riżoluzzjoni.

• Kunsill Affarijiet Ekonomiċi u Finanzjarji, 6 ta' Diċembru 2016

Fil-laqgħa tiegħu tas-17 ta' Ġunju, il-Kunsill adotta konklużjonijiet bit-titolu "Pjan direzzjonali biex titlesta l-unjoni bankarja". Id-dokument jagħti ħarsa ġenerali lejn il-passi li jmiss fl-unjoni bankarja u jistieden lill-Kummissjoni Ewropea biex taħdem fuq proposti biex temenda r-regoli dwar l-unjoni bankarja.

• Pjan direzzjonali biex titlesta l-Unjoni Bankarja - Konklużjonijiet tal-Kunsill, 17 ta' Ġunju 2016