"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.

Żur il-paġna tal-politika tal-cookies tagħna għal aktar informazzjoni u biex tibdel is-settings tiegħek.

български español čeština dansk Deutsch eesti Ελληνικά English français Gaeilge hrvatski italiano latviešu lietuvių magyar Malti Nederlands polski português română slovenčina slovenščina suomi svenska
Skip to content

Regolamentazzjoni bankarja

Il-qafas bankarju tal-UE japplika għall-banek kollha, istituzzjonijiet ta' kreditu oħra u ditti tal-investiment li joperaw fl-UE. L-għan tiegħu huwa li jiżgura l-istabbiltà u l-integrità filwaqt li jżomm il-fiduċja tal-pubbliku fis-sistema finanzjarja.

L-objettivi tal-qafas bankarju tal-UE

Protezzjoni tad-depożitanti

Is-salvagwardja tal-fondi tad-depożitanti billi jinżammu banek kapitalizzati tajjeb li kapaċi jifilħu għax-xokkijiet finanzjarji.

Prevenzjoni ta' riskji sistemiċi

Il-mitigazzjoni tar-riskji li jistgħu jwasslu għal kriżijiet finanzjarji u jiddestabbilizzaw l-ekonomija.

Standards armonizzati

L-istabbiliment ta' regoli uniformi biex jinħolqu kundizzjonijiet ekwi u tiġi promossa kompetizzjoni ġusta fost l-istituzzjonijiet ta' kreditu.

Tisħiħ tar-reżiljenza u t-trasparenza

It-tisħiħ tal-istabbiltà u ċ-ċarezza ġenerali sabiex tinbena l-fiduċja u tiġi żgurata s-sostenibbiltà fit-tul.

Strumenti legali ewlenin

L-UE adottat strumenti legali dwar diversi aspetti tas-settur bankarju. Dan huwa sommarju tal-leġiżlazzjoni ewlenija.

Regolament u direttiva dwar ir-rekwiżiti ta' kapital

Ir-regolament dwar ir-rekwiżiti ta' kapital (CRR) u d-direttiva dwar ir-rekwiżiti ta' kapital (CRD) jistipulaw rekwiżiti prudenzjali dettaljati għal, fost l-oħrajn, l-adegwatezza tal-kapital, il-likwidità, l-ingranaġġ, il-ġestjoni tar-riskju u s-superviżjoni.

Dawn ir-regoli jiżguraw li l-banek iżommu biżżejjed kapital u likwidità biex itaffu r-riskji u jassorbu t-telf potenzjali.

Direttiva dwar skemi ta' garanzija tad-depożiti

Id-direttiva dwar skemi ta' garanzija tad-depożiti (SGD) tipproteġi lid-depożitanti f'kull stat membru billi tiggarantixxi r-rimborż tad-depożiti sa €100 000 jekk bank ifalli. Id-direttiva tistabbilixxi wkoll regoli għall-iskemi nazzjonali ta' garanzija tad-depożiti, inkluż limiti ta' kopertura, finanzjament u proċeduri ta' żborż.

Il-banek kollha jeħtieġ li jipparteċipaw f'dawn l-iskemi.

Il-banek imsieħba jagħmlu kontribuzzjonijiet skont il-profil tar-riskju tagħhom u fatturi oħra. L-iskema ta' garanzija tqiegħed il-kontribuzzjonijiet kollha f'fond. Meta bank ifalli u d-depożiti ma jibqgħux disponibbli, l-iskemi ta' garanzija jridu jkunu f'pożizzjoni li jirrimborżaw lid-depożitanti li jkollhom kwalunkwe tip ta' depożitu protett skont id-direttiva.

Direttiva dwar l-irkupru u r-riżoluzzjoni tal-banek

Id-direttiva dwar l-irkupru u r-riżoluzzjoni tal-banek (BRRD) tistabbilixxi qafas għall-irkupru u r-riżoluzzjoni ordnati ta' banek li qed ifallu, biex jiġi minimizzat l-impatt fuq l-ekonomija u biex titneħħa l-ħtieġa għal rikapitalizzazzjonijiet iffinanzjati mill-kontribwenti.

Id-direttiva:

  • tiżgura li l-banek li qed ifallu jiġu ġestiti b'mod effettiv permezz ta' pjanijiet ta' riżoluzzjoni u protokolli ta' kriżi
  • tipprevjeni l-ħtieġa ta' rikors għall-kontribwenti f'każ ta' fallimenti bankarji billi tintroduċi mekkaniżmu ta' rikapitalizzazzjoni interna (l-azzjonisti u l-kredituri jridu jġarrbu l-ispejjeż meta l-bank ifalli)
  • tistabbilixxi fondi ta' riżoluzzjoni, iffinanzjati mis-settur bankarju, biex jipprovdu sostenn għar-riżoluzzjoni tal-banek li qed ifallu jekk ikun meħtieġ

Regolament dwar il-mekkaniżmu superviżorju uniku

Ir-regolament dwar il-mekkaniżmu superviżorju uniku (MSU) jiddefinixxi l-qafas għar-rwol tal-Bank Ċentrali Ewropew (BĊE) fis-superviżjoni ta' banek sinifikanti fl-unjoni bankarja.

Il-MSU jiddeskrivi r-responsabbiltajiet superviżorji tal-BĊE u l-kollaborazzjoni tiegħu mal-awtoritajiet nazzjonali kompetenti.

Regolament dwar il-mekkaniżmu uniku ta' riżoluzzjoni

Ir-regolament dwar il-mekkaniżmu uniku ta' riżoluzzjoni (SRM) jipprovdi l-qafas għar-rwol tal-Bord Uniku ta' Riżoluzzjoni (SRB) fir-riżoluzzjoni ta' banek li qed ifallu fl-unjoni bankarja.

Ir-regolament SRM jiddefinixxi s-setgħat tal-SRB fir-rigward tal-ippjanar tar-riżoluzzjoni, il-proċessi tat-teħid tad-deċiżjonijiet tiegħu u l-użu tal-fond uniku ta' riżoluzzjoni.

Standards ta' Basel III

L-istandards ta' Basel III huma sett ta' regolamenti bankarji internazzjonali żviluppati mill-Kumitat ta' Basel dwar is-Superviżjoni Bankarja biex jissaħħu r-rekwiżiti ta' kapital tal-banek billi tiżdied il-likwidità u jitnaqqas l-ingranaġġ tal-banek.

Dawn l-istandards ġew integrati fil-qafas regolatorju tal-UE permezz ta' emendi għas-CRR u s-CRD.

Meta mqabbel ma' Basel II, Basel III jżid għadd ta' dispożizzjonijiet ewlenin fejn:

  • il-banek irid ikollhom aktar kapital biex ikopru t-telf potenzjali, filwaqt li jiżguraw stabbiltà akbar matul it-tnaqqis fir-ritmu finanzjarju
  • il-banek huma meħtieġa jżommu ammont suffiċjenti ta' assi likwidi ta' kwalità għolja biex jissopravivu xenarju ta' stress ta' 30 jum (proporzjon tal-kopertura tal-likwidità)
  • il-banek irid ikollhom sorsi ta' finanzjament stabbli biex jappoġġaw l-operazzjonijiet tagħhom fuq perjodu ta' żmien ta' sena (proporzjon ta' finanzjament stabbli nett)
  • miżura mhux ibbażata fuq ir-riskju tiġi implimentata biex tillimita l-akkumulazzjoni ta' ingranaġġ eċċessiv fis-settur bankarju (proporzjon ta' ingranaġġ)
  • prattiki mtejba ta' ġestjoni tar-riskju u ttestjar tal-istress aktar rigoruż jiżguraw li l-banek ikunu jistgħu jifilħu għax-xokkijiet ekonomiċi b'mod effettiv

Il-Kunsill adotta l-pakkett leġiżlattiv ta' implimentazzjoni ta' Basel III fit-30 ta' Mejju 2024. Ir-regoli l-ġodda daħlu fis-seħħ fl-1 ta' Jannar 2025, b'xi rekwiżiti soġġetti għal perjodu ta' introduzzjoni gradwali pluriennali.

Rwol tal-istituzzjonijiet tal-UE

Il-qafas bankarju tal-UE jinvolvi diversi istituzzjonijiet ewlenin, li kull waħda minnhom għandha rwol distint fiż-żamma tal-istabbiltà finanzjarja.

Il-Bank Ċentrali Ewropew huwa s-superviżur ewlieni ta' banek sinifikanti fiż-żona tal-euro taħt il-mekkaniżmu superviżorju uniku. Dan jiżgura li dawn il-banek jikkonformaw mar-rekwiżiti prudenzjali.

Il-Bord Uniku ta' Riżoluzzjoni huwa responsabbli għall-ippjanar u l-ġestjoni tar-riżoluzzjoni ta' banek li qed ifallu taħt il-mekkaniżmu uniku ta' riżoluzzjoni. Il-ħidma tiegħu hija appoġġata mill-fond uniku ta' riżoluzzjoni.

L-Awtorità Bankarja Ewropea (EBA) tippromwovi regolamentazzjoni u superviżjoni prudenzjali effettivi u konsistenti madwar l-UE. Hija tiżviluppa standards tekniċi u linji gwida għall-armonizzazzjoni tal-prattiki regolatorji.

L-awtoritajiet nazzjonali kompetenti (NCAs) jissorveljaw banek iżgħar u jimplimentaw regolamenti tal-UE fil-livell nazzjonali, filwaqt li jikkomplementaw il-ħidma tal-BĊE u l-EBA.

L-aħħar żviluppi u l-iżviluppi li għaddejjin bħalissa

Il-qafas bankarju tal-UE jkompli jadatta u jevolvi b'rispons għal bidliet ekonomiċi globali, avvanzi teknoloġiċi u prijoritajiet ta' sostenibbiltà. Din il-ħidma għandha l-għan li ssaħħaħ ir-reżiljenza tas-sistema finanzjarja, filwaqt li trawwem l-innovazzjoni u tiżgura l-protezzjoni tal-konsumatur.

Pakkett dwar il-finanzi diġitali

Bi tweġiba għat-tkabbir rapidu tal-finanzi diġitali, l-UE qed tiżviluppa qafas regolatorju komprensiv biex tindirizza l-isfidi ppreżentati mill-kriptovaluti, l-innovazzjonijiet tat-teknoloġija finanzjarja u s-sistemi ta' pagament diġitali.

Finanzi sostenibbli

L-integrazzjoni tal-attivitajiet ta' klassifikazzjoniambjentali, soċjali u ta' governanza (ESG) fir-regolamentazzjoni bankarja hija prijorità għall-UE. Fid-19 ta' Novembru, il-Kunsill adotta regoli ġodda li għandhom l-għan li jagħmlu l-attivitajiet ta' klassifikazzjoni fl-UE aktar konsistenti, trasparenti u komparabbli sabiex tingħata spinta lill-fiduċja tal-investituri fi prodotti finanzjarji sostenibbli.

L-Awtorità Ewropea tat-Titoli u s-Swieq (ESMA) ser tawtorizza u tissorvelja l-fornituri ta' klassifikazzjonijiet ESG li joperaw fl-UE, filwaqt li tiżgura li jaderixxu mal-istandards ta' trasparenza.

Ġlieda kontra l-ħasil tal-flus

Biex tindirizza r-riskji emerġenti u tiġġieled il-kriminalità finanzjarja, l-UE qed issaħħaħ il-qafas tagħha kontra l-ħasil tal-flus (AML). Dan jinkludi kontrolli aktar stretti, aktar trasparenza fit-tranżazzjonijiet finanzjarji u kooperazzjoni akbar bejn l-awtoritajiet nazzjonali u tal-UE.

L-istabbiliment ta' awtorità ġdida tal-UE għall-ġlieda kontra l-ħasil tal-flus (AMLA) ser ikollha rwol ċentrali fil-monitoraġġ tal-konformità u fl-iżgurar tal-applikazzjoni uniformi tar-regoli kontra l-ħasil tal-flus fl-istati membri kollha.

Rieżami tal-ġestjoni tal-kriżijiet u l-assigurazzjoni tad-depożiti

F'dawn l-aħħar snin l-awtoritajiet tal-istati membri spiss fittxew soluzzjonijiet barra mill-qafas tal-UE meta banek ta' daqs medju u iżgħar fallew fl-UE. Dan xi drabi wassal biex il-flus tal-kontribwenti jintużaw biex jappoġġaw banek li qed ifallu minflok ir-riżorsi interni meħtieġa tal-bank jew xbieki ta' sikurezza privati ffinanzjati mill-industrija, kif maħsub mill-qafas ta' riżoluzzjoni tal-banek tal-UE.

F'April 2023, b'reazzjoni għal din is-sitwazzjoni, il-Kummissjoni pproponiet riforma tal-qafas għall-ġestjoni tal-kriżijiet u l-assigurazzjoni tad-depożiti (CMDI). Fid-19 ta' Mejju 2024, il-Kunsill qabel dwar il-pożizzjoni tiegħu dwar il-qafas billi adotta mandat ta' negozjar. Fil-25 ta' Ġunju 2025, il-Kunsill u l-Parlament Ewropew laħqu qbil dwar ir-rieżami, li jimmarka pass ieħor lejn it-tlestija tal-unjoni bankarja tal-UE.

Il-pakkett ta' riforma jinkludi proposti leġiżlattivi li jemendaw id-direttiva dwar l-irkupru u r-riżoluzzjoni tal-banek, ir-regolament dwar il-mekkaniżmu uniku ta' riżoluzzjoni u d-direttiva dwar skemi ta' garanzija tad-depożiti. Ir-rieżami għandu l-għan li jnaqqas id-diskrepanza fil-finanzjament billi jagħti lill-banek żgħar u ta' daqs medju aċċess għal xbieki ta' sikurezza ffinanzjati mill-industrija bħala għodda addizzjonali ta' finanzjament tar-riżoluzzjoni u li jnaqqas id-dipendenza fuq ir-rikapitalizzazzjoni interna ta' depożitanti mhux assigurati.

Daisy Chains

Fis-26 ta' Marzu 2024, il-Kunsill adotta l-hekk imsejħa direttiva "daisy chains" bħala parti mir-riforma tal-qafas CMDI. Id-Direttiva temenda l-BRRD u l-SRMR. Tintroduċi sett ta' aġġustamenti mmirati li ser ikollhom rwol importanti fit-titjib tal-proporzjonalità tal-qafas.

L-aħħar reviżjoni: 25 ta' Ġunju 2025