Pakkett dwar is-servizzi diġitali
Il-pakkett dwar is-servizzi diġitali huwa r-rispons tal-UE għall-ħtieġa li jiġi rregolat l-ispazju diġitali. Huwa jiddefinixxi miżuri għall-protezzjoni tal-utenti online filwaqt li jappoġġa l-innovazzjoni.
Spazju diġitali sikur u miftuħ għaċ-ċittadini u n-negozji tal-UE
Il-pjattaformi online huma parti importanti mis-suq u l-ekonomija diġitali tal-UE. L-istati membri tal-UE jirrikonoxxu l-ħtieġa li jsaħħu, jimmodernizzaw u jiċċaraw ir-regoli għas-servizzi diġitali biex:
- tiġi żgurata s-sikurezza tal-utenti online
- in-negozji diġitali innovattivi jitħallew jikbru
Il-qafas legali tal-UE għas-servizzi diġitali għadu ma nbidilx minn meta ġiet adottata d-direttiva dwar il-kummerċ elettroniku fis-sena 2000, u għalhekk kien hemm bżonn serju li dan jiġi aġġornat. Sadanittant, it-teknoloġiji, il-mudelli kummerċjali u s-servizzi diġitali kienu nbidlu b'pass mgħaġġel mingħajr preċedent.
Il-pakkett dwar l-Att dwar is-Servizzi Diġitali ġie ppreżentat mill-Kummissjoni Ewropea f'Diċembru 2020. Dan jinkludi:
- l-Att dwar is-Servizzi Diġitali
- l-Att dwar is-Swieq Diġitali
Iż-żewġ atti leġiżlattivi ġew adottati malajr mill-Kunsill u mill-Parlament Ewropew fl-2022.
Ir-regoli l-ġodda jirregolaw aħjar l-ispazju diġitali u s-servizzi diġitali, inkluż il-pjattaformi tal-media soċjali. Dawn:
- jiżguraw li l-utenti diġitali jkollhom aċċess għal prodotti sikuri u jiġu protetti d-drittijiet fundamentali tal-utenti
- jippermettu kompetizzjoni ħielsa u ġusta fis-setturi diġitali tkun tista' tagħti spinta lill-innovazzjoni u t-tkabbir
Min ser jibbenefika mir-regoli l-ġodda dwar is-servizzi diġitali?
Ir-regoli l-ġodda dwar is-servizzi diġitali huma ta' benefiċċju għal firxa wiesgħa ta' utenti u pjattaformi inkluż:
- ċittadini
- fornituri ta' servizzi diġitali
- utenti kummerċjali ta' servizzi diġitali
- is-soċjetà b'mod ġenerali
Ħajtek online: L-UE kif qed tagħmilha aktar faċli u sikura għalik?
L-Unjoni Ewropea qed taħdem b'mod attiv biex ittejjeb l-ambjent diġitali għall-benefiċċju tal-Ewropej kollha. Il-ħajja diġitali tagħna jeħtieġ li tkun sikura, faċli u tirrispetta l-libertajiet bażiċi.
Fid-dawl tal-aġġornamenti dwar iż-żewġ regolamenti ewlenin biex tiġi żgurata ħajja online aktar sikura u aktar faċli għall-utenti, skopri aktar permezz ta' artiklu dwar is-suġġett kif l-UE qed tagħmel il-ħajja online tiegħek aktar faċli u sikura.
X'inhu l-Att dwar is-Servizzi Diġitali?
L-Att dwar is-Servizzi Diġitali (DSA) jiffoka fuq il-ħolqien ta' ambjent online aktar sikur għall-utenti u l-kumpaniji diġitali, u fuq il-protezzjoni tad-drittijiet fundamentali fl-ispazju diġitali billi jistabbilixxi regoli ġodda dwar:
- il-ġlieda kontra l-kontenut illegali online, inkluż oġġetti, servizzi u informazzjoni, b'rispett sħiħ għall-Karta tad-Drittijiet Fundamentali
- l-indirizzar tar-riskji għas-soċjetà online
- it-traċċabbiltà tal-kummerċjanti fi swieq online
- miżuri ta' trasparenza għall-pjattaformi online
- superviżjoni msaħħa
Dan jistabbilixxi sett ta' responsabbiltajiet, u qafas ċar ta' responsabbiltà u trasparenza għall-fornituri ta' servizzi intermedjarji, bħal:
- swieq online
- networks soċjali
- pjattaformi ta' kondiviżjoni tal-kontenut
- pjattaformi online għall-ivvjaġġar u l-akkomodazzjoni
Dan ifisser li l-intermedjarji online kollha li joffru s-servizzi tagħhom fis-suq uniku, kemm jekk huma stabbiliti fl-UE jew barra minnha, ikollhom jikkonformaw mar-regoli l-ġodda.
Il-kumpaniji għandhom obbligi li jkunu proporzjonali man-natura tas-servizzi tagħhom u għad-daqs u l-impatt tagħhom. Dan ifisser li l-pjattaformi online kbar ħafna (VLOPs) u l-magni tat-tiftix online kbar ħafna (VLOSEs) huma soġġetti għal rekwiżiti aktar stretti.
Il-benefiċċji tad-DSA
Id-DSA jissalvagwardja d-drittijiet u l-interessi leġittimi tal-partijiet kollha involuti, b'mod partikolari ċ-ċittadini tal-UE.
L-utenti online fl-UE jingħataw is-setgħa li jkollhom aktar kontroll fuq dak li jaraw online, u sabiex ikunu kapaċi jifhmu jew jiġu infurmati dwar ir-reklami li jaraw. L-utenti jkunu jistgħu jimmarkaw kontenut illegali, u l-pjattaforma mbagħad tkun obbligata tinnotifikahom bid-deċiżjonijiet li jieħdu.
Il-liġi żżid it-trasparenza tar-regoli għall-moderazzjoni tal-kontenut online, filwaqt li tipprovdi aċċess akbar għad-data għall-awtoritajiet u r-riċerkaturi sabiex dawn jifhmu aħjar l-ispazju online, l-impatt tiegħu fuq is-soċjetà u r-riskji possibbli.
Il-minorenni huma wkoll protetti aħjar permezz tad-DSA. Il-pjattaformi aċċessibbli lill-minorenni huma pprojbiti milli juru reklamar immirat ibbażat fuq l-użu ta' data personali tal-minorenni kif definit fid-dritt tal-UE.
Ir-regoli stabbiliti skont id-DSA huma mfassla biex jipproteġu b'mod partikolari:
- il-libertà ta' espressjoni u informazzjoni
- il-libertà ta' intrapriża
- id-dritt ta' nondiskriminazzjoni
Mekkaniżmu ta' kriżi fid-dawl tal-aggressjoni Russa fl-Ukrajna
Fil-kuntest tal-gwerra fl-Ukrajna u l-impatt fuq il-manipulazzjoni tal-informazzjoni online, fit-test żdied artikolu ġdid li jintroduċi mekkaniżmu ta' rispons għall-kriżijiet.
Dan il-mekkaniżmu ser jagħmilha possibbli li jiġi analizzat l-impatt tal-attivitajiet tal-VLOPs u l-VLOSEs fuq il-kriżi inkwistjoni u li jittieħdu deċiżjonijiet dwar miżuri li għandhom jiżguraw ir-rispett tad-drittijiet fundamentali.
Meta ser japplikaw ir-regoli l-ġodda?
Il-Kunsill adotta l-Att dwar is-Servizzi Diġitali fl-4 ta' Ottubru 2022. Ir-regoli l-ġodda ser japplikaw 15-il xahar wara d-dħul fis-seħħ tagħhom.
- DSA: il-Kunsill jagħti l-approvazzjoni finali għall-protezzjoni tad-drittijiet tal-utenti online (stqarrija għall-istampa, 4 ta' Ottubru 2022)
- Att dwar is-Servizzi Diġitali: Ftehim proviżorju bejn il-Kunsill u l-Parlament Ewropew biex l-internet isir spazju aktar sikur għaċ-ċittadini Ewropej (stqarrija għall-istampa, 23 ta' April 2022)
- Dak li huwa illegali offline għandu jkun illegali online: il-Kunsill jaqbel fuq il-pożizzjoni dwar l-Att dwar is-Servizzi Diġitali (stqarrija għall-istampa, 25 ta' Novembru 2021)
X'inhu l-Att dwar is-Swieq Diġitali?
L-Att dwar is-Swieq Diġitali (DMA) jiffoka fuq l-iżgurar ta' kondizzjonijiet ekwivalenti ta' kompetizzjoni għall-kumpaniji diġitali kollha, irrispettivament mid-daqs tagħhom. Id-DMA għandu l-għan li jiggarantixxi settur diġitali kompetittiv u ġust billi:
- jipprojbixxi prattiki inġusti ta' pjattaformi online li għandhom l-akbar sehem mis-suq
- jagħti l-possibbiltà għall-utenti kummerċjali li joffru lill-konsumaturi aktar għażliet
- jipprovdi servizzi aħjar u prezzijiet aktar ġusti għall-konsumaturi
- jimponi drittijiet u obbligi ċari fuq pjattaformi online kbar
- jippromwovi l-innovazzjoni u ambjent ta' pjattaformi online aktar ġust għan-negozji ġodda tat-teknoloġija
Id-DMA jiddefinixxi regoli ċari għall-pjattaformi l-kbar. Għandu l-għan li jiżgura li l-ebda pjattaforma online kbira ma taġixxi bħala "gwardjan", entità privata li tistabbilixxi r-regoli fis-swieq diġitali billi tikkontrolla mill-inqas wieħed mill-hekk imsejħa "servizzi ewlenin ta' pjattaforma".
Servizzi ewlenin ta' pjattaforma jinkludu:
- servizzi ta' intermedjazzjoni online (jiġifieri swieq, app stores)
- magni tat-tiftix online
- networking soċjali
- servizzi tal-cloud
- servizzi ta' reklamar
Liema pjattaformi jitqiesu bħala gwardjani?
Sabiex pjattaforma titqies bħala gwardjan, għandu jew ikollha fatturat annwali ta' mill-inqas €7.5 biljun fl-Unjoni Ewropea (UE) fl-aħħar tliet snin jew ikollha valutazzjoni fis-suq ta' mill-inqas €75 biljun, u, barra minn hekk jeħtieġ li jkollha mill-inqas 45 miljun utent finali fix-xahar u mill-inqas 10 000 utent professjonali stabbiliti fl-UE.
Il-pjattaforma trid ukoll tikkontrolla wkoll servizz ewlieni ta' pjattaforma wieħed jew aktar f'mill-inqas tliet stati membri.
Il-konsegwenzi għall-gwardjani
Il-gwardjani mhux ser jitħallew:
- jikklassifikaw il-prodotti jew is-servizzi tagħhom stess b'mod aktar favorevoli minn dawk ta' parteċipanti oħra fis-suq
- jipprevjenu lill-iżviluppaturi milli jużaw pjattaformi ta' pagament ta' partijiet terzi għall-bejgħ tal-apps
- jipproċessaw data personali tal-utenti għal reklamar immirat, sakemm ma jingħatax il-kunsens
- jistabbilixxu kondizzjonijiet inġusti fuq l-utenti kummerċjali
- jinstallaw minn qabel ċerti applikazzjonijiet tas-software jew jipprevjenu lill-utenti milli jneħħuhom faċilment
- jirrestrinġu l-utenti kummerċjali tal-pjattaformi
Il-gwardjani ser ikollhom:
- joffru aktar għażliet, bħall-għażla ta' ċertu software fuq is-sistema operattiva tal-utent
- jiżguraw li t-tneħħija tal-abbonament minn servizzi ewlenin tal-pjattaforma tkun faċli daqs l-abbonament
- jipprovdu informazzjoni dwar l-għadd ta' utenti li jżuru l-pjattaformi tagħhom biex jiddeterminaw jekk il-pjattaforma tistax tiġi identifikata bħala gwardjan
- jagħtu lill-utenti kummerċjali aċċess għad-data dwar il-prestazzjoni tal-kummerċjalizzazzjoni jew tar-reklamar tagħhom fuq il-pjattaforma
- jinfurmaw lill-Kummissjoni Ewropea dwar l-akkwiżizzjonijiet u l-fużjonijiet li jwettqu
- jiżguraw li l-funzjonalitajiet bażiċi tas-servizzi ta' messaġġerija istantanja jkunu interoperabbli, jiġifieri jippermettu lill-utenti jiskambjaw messaġġi, jibagħtu messaġġi bil-vuċi jew fajls
Il-kompetizzjoni ġusta tas-servizzi diġitali hija kruċjali biex jiġi żgurat li l-kumpaniji u l-konsumaturi kollha jkunu jistgħu jibbenefikaw bl-istess mod mill-opportunitajiet diġitali. Dan ser jiġġenera wkoll aktar innovazzjoni u jagħti spinta lill-protezzjoni tal-konsumatur.
Min jiżgura li l-gwardjani jikkonformaw mar-regoli?
Sabiex jiġi żgurat livell għoli ta' armonizzazzjoni fis-suq intern, il-Kummissjoni Ewropea hija l-uniku korp li għandu s-setgħa li jinforza r-regolament.
Biex jiġi żgurat li l-gwardjani jkollhom fehim ċar ta' liema regoli għandhom jimxu magħhom, il-Kummissjoni Ewropea tista' tiddeċiedi li tidħol fi djalogu regolatorju.
Ser jitwaqqfu kumitat konsultattiv u grupp ta' livell għoli biex jgħinu u jiffaċilitaw il-ħidma tal-Kummissjoni Ewropea.
X'jiġri jekk il-gwardjani ma jikkonformawx mar-regoli
Meta kumpanija online kbira tkun ġiet identifikata bħala gwardjan, tkun trid tikkonforma mar-regoli tad-DMA fi żmien sitt xhur.
Jekk gwardjan jikser ir-regoli stabbiliti mid-DMA, jirriskja multa sa 10% tal-fatturat totali tiegħu madwar id-dinja. Fil-każ ta' reċidività, tista' tiġi imposta multa sa 20% tal-fatturat tiegħu madwar id-dinja.
F'każ li gwardjan sistematikament jonqos milli jikkonforma mad-DMA, jiġifieri jikser ir-regoli mill-inqas tliet darbiet fi tmien snin, il-Kummissjoni Ewropea tista' tiftaħ investigazzjoni tas-suq u, jekk ikun meħtieġ, timponi rimedji komportamentali jew strutturali.
Meta ser japplikaw ir-regoli l-ġodda?
Il-Kunsill adotta l-Att dwar is-Swieq Diġitali fit-18 ta' Lulju 2022. Ir-regoli l-ġodda ser japplikaw sitt xhur wara l-pubblikazzjoni tagħhom f'Il-Ġurnal Uffiċjali tal-Unjoni Ewropea.
- DMA: il-Kunsill jagħti l-approvazzjoni finali għal regoli ġodda għal kompetizzjoni ġusta online (stqarrija għall-istampa, 18 ta' Lulju 2022)
- Att dwar is-Swieq Diġitali (DMA): qbil bejn il-Kunsill u l-Parlament Ewropew (stqarrija għall-istampa, 25 ta' Marzu 2022)
- Regolamentazzjoni tat-"teknoloġija kbira": il-Kunsill jaqbel dwar it-tisħiħ tal-kompetizzjoni fl-isfera diġitali (stqarrija għall-istampa, 25 ta' Novembru 2021)