"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Bil-permess tiegħek, ser nużaw cookies biex nipproduċu data aggregata anonima dwar in-navigazzjoni u l-imġiba tal-viżitaturi fuq is-sit web tagħna. Ser nużaw din id-data biex intejbu l-esperjenza tiegħek tan-navigazzjoni fuq is-sit web tagħna.
Kunsill Trasport, Telekomunikazzjoni u Enerġija (Trasport), 4 ta' Diċembru 2023
Riżultati prinċipali
Il-Kunsill adotta l-pożizzjoni tiegħu ("approċċ ġenerali") dwar partijiet mill-pakketti leġiżlattivi dwar is-sikurezza fit-toroq u dik marittima, dwar ir-regolament rivedut dwar il-pawżi u l-perjodi ta' mistrieħ fis-settur tat-trasport okkażjonali tal-passiġġieri u dwar ir-regolament propost dwar il-kontabbiltà tal-emissjonijiet tal-gassijiet serra tas-servizzi tat-trasport.
Il-Kunsill ħa nota wkoll ta' rapport ta' progress dwar il-proposta tal-Kummissjoni biex tiġi emendata d-direttiva dwar il-piżijiet u d-dimensjonijiet għall-vetturi heavy-duty. Fl-aħħar nett, il-presidenza informat ukoll lill-ministri dwar is-sitwazzjoni attwali tal-fajls leġiżlattivi l-oħrajn.
Din kienet laqgħa ta' suċċess kbir: irnexxielna nilħqu 8 ftehimiet dwar fajls leġiżlattivi ewlenin, inkluż ir-riforma tal-liċenzji tas-sewqan, l-iskambju transkonfinali tal-informazzjoni dwar reati tat-traffiku u d-direttivi dwar is-sikurezza marittima. Dan ser jippermetti lill-Kunsill jidħol f'taħditiet mal-Parlament Ewropew u, eventwalment, jikkonkludi dawn il-fajls taħt il-leġiżlatura attwali.
Óscar Puente, ministru għat-trasport u l-mobbiltà sostenibbli ta' Spanja
Is-sikurezza fit-toroq
Il-Kunsill adotta approċċ ġenerali dwar ir-raba' riforma tal-leġiżlazzjoni dwar il-liċenzji tas-sewqan li għandha l-għan li ttejjeb is-sikurezza fit-toroq u tiffaċilita l-moviment liberu. Ir-riforma tkopri t-titjib tal-ħiliet tas-sewqan, l-għarfien u l-għarfien espert, pereżempju billi taġġorna l-elementi inklużi fit-testijiet tas-sewqan u tintroduċi skema għas-sewqan akkumpanjat għal-liċenzja B għall-UE kollha. Ġew introdotti wkoll miżuri biex titnaqqas l-imġiba perikoluża, inkluż regoli aġġornati dwar is-saħħa fiżika u mentali, kif ukoll skema ta' perjodu ta' prova fl-UE kollha għal sewwieqa ġodda. Il-proposta tintroduċi wkoll il-possibbiltà ta' liċenzji tas-sewqan diġitali flimkien ma' qafas għall-kooperazzjoni amministrattiva bejn l-awtoritajiet kompetenti tal-istati membri u tipprevedi simplifikazzjoni tal-proċessi u r-rekwiżiti amministrattivi.
Il-Kunsill adotta wkoll approċċ ġenerali dwar l-iskambju transkonfinali ta' informazzjoni dwar ir-reati tat-traffiku, li għandu l-għan li jkompli jtejjeb is-sikurezza fit-toroq billi jestendi l-kamp ta' applikazzjoni tad-direttiva għal reati oħra tat-traffiku relatati mas-sikurezza fit-toroq, jiżgura li s-sewwieqa mhux residenti jirrispettaw ir-regoli tat-traffiku meta jsuqu fi stati membri oħra billi jissaħħu l-mekkaniżmi għall-assistenza reċiproka bejn l-istati membri biex tiġi ffaċilitata l-identifikazzjoni tal-persuna kkonċernata u l-infurzar tal-multi għar-reati tat-traffiku. Għandu l-għan ukoll li jtejjeb il-protezzjoni tad-drittijiet fundamentali tas-sewwieqa mhux residenti.
Il-ministri qablu dwar l-importanza ta' dawn l-atti leġiżlattivi li jenfasizzaw il-kontribut tagħhom għall-viżjoni tal-UE għal "żero mwiet, żero korrimenti serji" fit-toroq Ewropej sal-2050. Il-pożizzjonijiet tal-Kunsill ser iservu bħala mandati ta' negozjar f'taħditiet futuri mal-Parlament Ewropew.
Il-Kunsill adotta l-pożizzjoni tiegħu dwar erba' proposti fir-rigward tal-kontroll mill-istat tal-port, it-tniġġis mill-bastimenti, il-konformità mar-rekwiżiti tal-istat tal-bandiera u l-investigazzjoni ta' aċċidenti fis-settur tat-trasport marittimu, kollha ppreżentati bħala parti mill-pakkett leġiżlattiv dwar is-sikurezza marittima. Il-proposti għandhom l-għan li jimmodernizzaw ir-regoli tal-UE dwar is-sikurezza marittima u jnaqqsu t-tniġġis tal-ilma mill-bastimenti, filwaqt li jgħammru lill-UE b'għodod ġodda biex tappoġġa trasport marittimu nadif u modern.
Fir-rigward tal-inċidenti marittimi, kien hemm bżonn ta' allinjament mal-kodiċi tal-IMO għall-investigazzjoni tal-aċċidenti. Barra minn hekk, il-pożizzjoni tal-Kunsill tespandi l-kamp ta' applikazzjoni tad-direttiva biex tinkludi bastimenti tas-sajd żgħar. L-emendi tal-Kunsill jiffukaw ukoll fuq l-iżgurar tal-indipendenza tal-korpi ta' investigazzjoni tal-aċċidenti, kif ukoll il-kunfidenzjalità tas-sejbiet.
Il-pożizzjoni tal-Kunsill dwar id-direttiva dwar il-kontroll mill-istat tal-port tiffoka fuq l-iżgurar li r-regoli jkunu allinjati mal-proċeduri maqbula tal-Memorandum ta' Qbil ta' Pariġi u tinkludi dispożizzjonijiet addizzjonali tal-Konvenzjonijiet tal-IMO li diġà huma fis-seħħ. Ġew indirizzati wkoll ir-regoli għas-sehem ġust tal-ispezzjonijiet, il-posponimenti tal-ispezzjonijiet, kif ukoll ir-rifjut tal-aċċess. Ġie introdott ukoll reġim volontarju ta' kontroll ta' bastimenti tas-sajd kbar. It-test jintroduċi wkoll modifika fir-rigward tal-profil tar-riskju fejn il-Kunsill qabel dwar l-inklużjoni ta' parametru ambjentali. Nuqqasijiet relatati ma' aspetti soċjali permezz tal-implimentazzjoni tal-Konvenzjoni tal-ILO huma inklużi wkoll fil-profil tar-riskju. Fl-aħħar nett, il-pożizzjoni tal-Kunsill tirreferi wkoll għall-użu ta' ċertifikati elettroniċi u tinkoraġġixxi l-użu tagħhom.
Id-direttiva dwar ir-rekwiżiti tal-istat tal-bandiera kienet l-aktar fajl kumpless biex jiġi nnegozjat. Il-pożizzjoni tal-Kunsill fiha diversi modifiki meta mqabbla mal-proposta oriġinali tal-Kummissjoni. Il-pożizzjoni tallinja t-test mal-kodiċi għall-implimentazzjoni tal-istrumenti tal-IMO ("Kodiċi III"). Tindirizza r-riżorsi umani meħtieġa biex tiġi żgurata l-konformità fil-livell tal-amministrazzjoni tal-istat tal-bandiera, id-data li għandha tiġi rrapportata lill-Kummissjoni u l-użu volontarju ta' bażi tad-data għall-iskambju ta' informazzjoni dwar iċ-ċertifikati elettroniċi bl-użu ta' bażi tad-data tal-informazzjoni. Il-pożizzjoni tal-Kunsill inkorporat kontrolli li jistgħu jitwettqu permezz ta' approċċ ibbażat fuq ir-riskju. Fl-aħħar nett, tindirizza l-bini tal-kapaċità biex jitwettqu l-kompiti amministrattivi meħtieġa u fiha derogi għall-istati membri mingħajr kosta.
Il-pożizzjoni tal-Kunsill dwar id-direttiva dwar it-tniġġis ikkawżat minn vapuri tintroduċi sistema ta' sanzjonijiet amministrattivi li toħloq separazzjoni mid-direttiva l-ġdida dwar ir-reati ambjentali. Il-pożizzjoni tal-Kunsill tkompli tallinja t-test mal-Konvenzjoni MARPOL u tippermetti lill-istati membri jadattaw ir-reġim ta' sanzjonijiet amministrattivi għal-leġiżlazzjoni nazzjonali tagħhom. Il-pożizzjoni tipprovdi wkoll flessibbiltà fir-rigward tal-obbligi ta' reġistrazzjoni u rappurtar biex jiġu evitati piżijiet amministrattivi eċċessivi fl-istati membri u tippermetti lill-istati membri mingħajr kosta jidderogaw minn xi wħud mid-dispożizzjonijiet.
Il-pożizzjonijiet tal-Kunsill jiżguraw kundizzjonijiet ekwi għas-settur filwaqt li jtejbu l-implimentazzjoni u l-infurzar permezz tad-diġitalizzazzjoni u aktar kooperazzjoni fl-UE. Filwaqt li allinjaw ruħhom b'mod sħiħ ma' dawn l-objettivi, il-ministri qablu li d-direttivi riveduti jistabbilixxu l-linji bażi għal trasport marittimu aktar sikur u aktar nadif fl-Ewropa. Il-pożizzjonijiet tal-Kunsill ser iservu bħala mandati ta' negozjar biex jinbdew taħditiet mal-Parlament Ewropew.
Il-ħin tax-xogħol għas-sewwieqa ta' karozzi tal-linja u kowċis
Il-Kunsill adotta l-pożizzjoni tiegħu dwar regolament rivedut dwar perjodi ta' mistrieħ u pawżi għax-xufiera fis-settur tat-trasport okkażjonali tal-passiġġieri. Ir-regoli l-ġodda għandhom l-għan li jirriflettu aħjar in-natura tas-settur u x-xejriet tax-xogħol relatati, filwaqt li jipprevedu ċertu grad ta' flessibbiltà dwar id-distribuzzjoni tal-pawżi u l-ħinijiet tal-bidu għall-perjodi ta' mistrieħ, mingħajr ma jitqassru l-ħinijiet minimi garantiti ta' mistrieħ jew jiġu emendati l-limiti fuq il-ħin tas-sewqan. Il-ministri enfasizzaw id-dimensjoni soċjali tal-proposta peress li x-xufiera professjonali jaħdmu taħt pressjoni għolja u jeħtieġu l-protezzjoni tal-pawżi u l-ħinijiet ta' mistrieħ tagħhom. Enfasizzaw ukoll li x-xufiera f'dan is-settur għandhom ritmu tax-xogħol differenti minn dawk fit-trasport tal-merkanzija jew tat-trasport regolari tal-passiġġieri, minħabba l-istaġjonalità għolja u d-distanzi tas-sewqan li jvarjaw. Il-pożizzjoni tal-Kunsill ser isservi bħala mandat ta' negozjar għal taħditiet futuri mal-Parlament Ewropew.
Il-Kunsill adotta pożizzjoni dwar regolament dwar il-kontabbiltà tal-emissjonijiet ta' gassijiet serra mis-servizzi tat-trasport. Bħala parti mill-pakkett dwar l-"ekoloġizzazzjoni tat-trasport tal-merkanzija", il-proposta għandha l-għan li ttejjeb il-kalkolu tal-emissjonijiet ta' gassijiet serra mis-servizzi tat-trasport u l-forniment ta' informazzjoni dwarhom sabiex il-klijenti jkunu jistgħu jagħżlu l-għażliet ta' trasport l-aktar sostenibbli.
Il-pożizzjoni tal-Kunsill issa inkludiet il-flessibbiltà għall-kumpaniji żgħar u ta' daqs medju, l-aċċettazzjoni ta' data vverifikata u verifikaturi diġà akkreditati, pereżempju fis-settur marittimu u fl-avjazzjoni, wara l-leġiżlazzjoni reċenti li tirriżulta mill-pakkett "Lesti għall-mira ta' 55%". Barra minn hekk, il-Kummissjoni jkollha tiżviluppa għodda biex tgħin lill-kumpaniji żgħar u ta' daqs medju. Fl-aħħar nett, it-test tal-Kunsill iħalli miftuħa l-possibbiltà li fil-futur jiġu inklużi l-emissjonijiet tul iċ-ċiklu tal-ħajja. Il-pożizzjoni tal-Kunsill ser isservi bħala mandat ta' negozjar biex jinbdew taħditiet mal-Parlament Ewropew.
Il-Kunsill ħa nota ta' rapport ta' progress dwar proposta tal-Kummissjoni dwar il-piżijiet u d-dimensjonijiet massimi awtorizzati għal vetturi heavy-duty, li tressaq ukoll bħala parti integrali mill-pakkett tal-"ekoloġizzazzjoni tat-trasport tal-merkanzija". Il-proposta għandha l-għan li tipprovdi inċentivi għas-settur tat-trasport bit-triq biex jinvesti f'teknoloġiji b'emissjonijiet żero u f'soluzzjonijiet effiċjenti fl-użu tal-enerġija. Il-ministri qablu dwar l-importanza tal-proposta biex tiġi appoġġata t-tranżizzjoni tas-settur tat-trasport lejn soluzzjonijiet aktar ekoloġiċi.
Il-presidenza infurmat lill-Kunsill dwar is-sitwazzjoni attwali ta' proposti leġiżlattivi oħra, inkluż ir-reviżjoni tar-regolament dwar il-linji gwida tal-UE għall-iżvilupp tan-network trans-Ewropew tat-trasport (TEN-T), il-"pakkett" tal-Ajru Uniku Ewropew 2+ (SES2+) u d-direttiva dwar l-effett fl-UE kollha ta' ċerti skwalifiki mis-sewqan.
Id-delegazzjoni Ċiprijotta, Griega, Kroata, Maltija, Portugiża u dik Taljana infurmaw lill-Kunsill dwar kwistjonijiet ta' tħassib għas-settur tat-trasport marittimu tal-merkanzija b'rabta mal-implimentazzjoni tad-direttiva dwar l-iskema għall-iskambju ta' kwoti tal-emissjonijiet (ETS).
Id-delegazzjoni Netherlandiża u dik Awstrijaka indirizzaw il-kwistjoni tal-għeja fost il-piloti Ewropej.
Id-delegazzjoni Pollakka, Slovakka u dik Ungeriża infurmaw lill-Kunsill dwar l-impatt fuq is-settur tat-trasport tal-ftehim bejn l-UE u l-Ukrajna dwar it-trasport tal-merkanzija bit-triq.
Id-delegazzjoni Belġjana ppreżentat il-prijoritajiet u l-programm ta' ħidma tagħha għall-ewwel nofs tal-2024.
Ikla informali
Waqt ikla informali ta' nofsinhar, il-ministri kellhom skambju ta' fehmiet dwar il-finanzjament tal-infrastruttura tan-network trans-Ewropew tat-trasport (TEN-T). Il-ministri qablu li l-politika tat-TEN-T hija strument ewlieni għall-iżvilupp ta' infrastruttura tat-trasport koerenti, konnessa u ta' kwalità għolja fl-UE kollha li ssaħħaħ il-koeżjoni ekonomika, soċjali u territorjali tal-UE permezz ta' sistemi tat-trasport mingħajr xkiel bejn il-fruntieri u mingħajr konnessjonijiet neqsin jew konġestjonijiet. F'dan il-kuntest, il-ministri esploraw kif l-istrument finanzjarju "Faċilità Nikkollegaw l-Ewropa" (FNE) jista' jwassal aħjar l-ogħla valur miżjud possibbli tal-UE, billi jiffoka fuq konnessjonijiet transfruntiera, u jipprevedi l-aktar mezzi effettivi ta' politika tat-trasport fl-Ewropa. Iddiskutew ukoll il-prijoritajiet possibbli taħt il-FNE fil-Qafas Finanzjarju Pluriennali (QFP) li jmiss għall-perjodu 2028-2034.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Din kienet laqgħa ta' suċċess kbir: irnexxielna nilħqu 8 ftehimiet dwar fajls leġiżlattivi ewlenin, inkluż ir-riforma tal-liċenzji tas-sewqan, l-iskambju transkonfinali tal-informazzjoni dwar reati tat-traffiku u d-direttivi dwar is-sikurezza marittima. Dan ser jippermetti lill-Kunsill jidħol f'taħditiet mal-Parlament Ewropew u, eventwalment, jikkonkludi dawn il-fajls taħt il-leġiżlatura attwali.