"Bainimid úsáid as fianáin lena chinntiú go bhfeabhsaítear d’eispéireas brabhsála. Tá gá le fianáin riachtanacha chun tacú le gnéithe bunriachtanacha de shuíomh gréasáin na Comhairle. Cuidíonn na fianáin roghnacha linn tuarascálacha staidrimh anaithnide, comhiomlánaithe a tháirgeadh chun freastal níos fearr ar do chuid riachtanas.
Le cead uaitse, úsáidfimid fianáin le sonraí comhlánaithe anaithnide a tháirgeadh maidir le brabhsáil agus iompraíocht na gcuairteoirí ar ár suíomh gréasáin. Úsáidfimid na sonraí sin chun feabhas a chur ar an eispéireas agat ar ár suíomh.
An Chomhairle Iompair, Teileachumarsáide agus Fuinnimh
An Chomhairle Iompair, Teileachumarsáide agus Fuinnimh (Iompar), 5 Nollaig 2022
Príomhthorthaí
Gréasán tras-Eorpach iompair (TEN-T): cur chuige ginearálta
Tháinig an Chomhairle ar chomhaontú maidir le sainordú caibidlíochta (‘cur chuige ginearálta’) don dréachtrialachán maidir le treoirlínte an Aontais chun Gréasán Tras-Eorpach Iompair (TEN-T) a fhorbairt.
Is é is aidhm don togra gréasán tras-Eorpach iompair atá iontaofa, saoráideach ardcháilíochta a thógáil lena gcinnteofar nascacht inbhuanaithe ar fud an Aontais gan briseadh fisiceach, scrogaill tráchta ná naisc atá in easnamh. Leis an togra, déantar forbairt ghréasán TEN-T a ailíniú le cuspóirí aeráide agus forbartha inbhuanaithe an Aontais trí iompar ilmhódach a chur chun cinn, athléimneacht ghréasán TEN-T a neartú agus éifeachtacht a chuid uirlisí rialachais a fheabhsú. Leagtar síos sa téacs spriocdhátaí soiléire chun gréasán TEN-T a chríochnú. Ba cheart an croíghréasán a chríochnú faoi 2030, an croíghréasán leathnaithe a cuireadh leis le déanaí a chríochnú faoi 2040 agus an gréasán cuimsitheach a chríochnú faoi 2050.
Is den ríthábhacht gréasán iompair maith a fhorbairt ar fud na hEorpa. Ní hamháin ionas gur féidir lenár saoránaigh bogadh timpeall go tapa agus go hiontaofa, ach ionas gur féidir lenár ngnólachtaí forbairt a thuilleadh agus leas iomlán a bhaint as acmhainneacht an mhargaidh inmheánaigh.
Martin Kupka, Aire Iompair Phoblacht na Seice
Tugtar aird ar leith sa reachtaíocht athbhreithnithe ar struchtúr nua rialachais do bheartas TEN-T agus don ilmhódúlacht trí spriocanna uaillmhianacha a leagan síos, go háirithe maidir le bonneagar iarnróid a fhorbairt, rud a chuideodh le hiompar iarnróid a dhéanamh níos iomaíche sa mhargadh iompair. Ina theannta sin, éilítear i dtéacs an chur chuige ghinearálta imirce de réir a chéile i dtreo leithead rianta caighdeánach Eorpach ar chroíghréasán TEN-T agus ar ghréasán leathnaithe TEN-T.
Mar fhreagairt ar thionchar fogha na Rúise faoin Úcráin, féachann na rialacha athbhreithnithe freisin le nascacht níos fearr a bhaint amach idir an Úcráin agus Poblacht na Moldóive agus an tAontas Eorpach trí Chonairí Iompair Eorpacha.
Le linn na díospóireachta, chuir na hairí in iúl go dtacaíonn siad d’aon ghuth le cuspóirí agus cur chuige an togra ón Uachtaránacht. Chomhaontaigh siad gur príomhionstraim de chuid bheartas iompair an Aontais maidir le forbairt an ghréasáin tras-Eorpaigh iompair iad na treoirlínte atá molta. Chuir na hairí i bhfios go láidir gur cheart don bheartas seo iompar inbhuanaithe agus níos éifeachtúla daoine agus earraí a spreagadh agus comhtháthú eacnamaíoch, sóisialta agus críochach an Aontais a neartú ag an am céanna. In ainneoin a n-uaillmhianta, a dtosaíochtaí agus a gcur chuige éagsúla, dhearbhaigh na hairí go bhfuil siad tiomanta bonneagar iompair comhleanúnach, nasctha ardchaighdeáin a fhorbairt ar fud an Aontais.
D’fhormheas an Chomhairle conclúidí maidir le Forbairt reatha an iompair ar uiscebhealaí intíre (an clár NAIADES III).
Modh iompair inbhuanaithe fuinneamhéifeachtúil slán tearcphlódaithe is ea iompar ar uiscebhealaí intíre, agus is féidir ról lárnach a bheith aige maidir le hiarrachtaí an Aontais an córas iompair a dhícharbónú. Dá bhrí sin, athdhearbhaítear sna conclúidí ón gComhairle rannchuidiú dearfach an iompair ar uiscebhealaí intíre agus leagtar béim iontu ar an ngá atá le hacmhainneacht a fhorbairt go hiomlán ar bhealach inbhuanaithe. Agus aird á tabhairt ar thionchar láidir an athraithe aeráide ar iompar ar uiscebhealaí intíre, tá bearta de dhíth ar an earnáil chun athnuachan cabhlaigh a luathú agus a spreagadh, infheistíochtaí leordhóthanacha bonneagair a chur ar fáil, a tharraingteacht d’oibrithe iompair a mhéadú agus cabhrú léi coinneáil suas le forbairtí digiteacha. Sa chomhthéacs sin, moltar do na Ballstáit sna conclúidí ón gComhairle straitéisí fadtéarmacha a ullmhú agus a chur chun feidhme agus tógáil ar scéimeanna tacaíochta náisiúnta chun cuspóirí Phlean Gníomhaíochta NAIADES III a bhaint amach, mar a leagtar amach sa teachtaireacht ón gCoimisiún an 25 Meitheamh 2021, ‘NAIADES III: Boosting future-proof European inland waterway transport’ [Borradh a chur faoin iompar ar uiscebhealaí intíre san Eoraip a sheasfaidh an aimsir]
Faoi aon ghnó eile, thug an Uachtaránacht agus an Coimisiún an t-eolas is déanaí do na hairí maidir leis an gcaidreamh iompair leis an Úcráin tar éis an phlé a rinneadh ag an gComhairle Iompair an 5 Meitheamh 2022 maidir leis an mbealach is fearr chun freagairt an Aontais ar chogadh foghach na Rúise a chomhordú. Ón gcruinniú sin i leith, rinneadh gníomhaíochtaí éagsúla ar an leibhéal Eorpach. Mar shampla, cuireadh ‘lánaí dlúthpháirtíochta’ ar bun chun slabhraí soláthair agus rialuithe idir an Úcráin agus an tAontas a bharrfheabhsú, chun bealaí nua iompair a bhunú agus chun scrogaill tráchta a sheachaint. Rinneadh thart ar 18 milliún tona gráin agus olashíolta a easpórtáil ón Úcráin trí lánaí dlúthpháirtíochta an Aontais ó mhí na Bealtaine i leith. Thairis sin, tá comhaontú tugtha i gcrích chun oibríochtaí áirithe lasta de bhóthar a léirscaoileadh go sealadach idir an tAontas agus an Úcráin agus an Mholdóiv. Agus iad ag tacú go hiomlán leis na tionscnaimh agus na gníomhaíochtaí thuasluaite go léir, phléigh na hairí go hachomair na féidearthachtaí éagsúla breise chun bacainní a bhaint agus chun na gealltanais a chur chun feidhme ar an mbealach is fearr d’fhonn aghaidh a thabhairt ar na dúshláin a bhaineann leis an gcogadh san Úcráin.
Thiolaic toscaireacht na Fraince, na Beilge, Lucsamburg, na hÍsiltíre agus na Portaingéile páipéar comhpháirteach maidir le hinbhuanaitheacht agus cothroime na hearnála eitlíochta a neartú.
Ina theannta sin, chuir an Coimisiún na hairí ar an eolas faoi threochtaí maidir le sábháilteacht ar bhóithre agus neartaigh sé iarrachtaí chun spriocanna sábháilteachta ar bhóithre a bhaint amach i bhfianaise an fháis mhóir ar líon na bhfianuithe tiománaithe do thiománaithe tríú tíortha.
Níl an acmhainn seo ar fáil faoi láthair ach amháin sa teanga (sna teangacha) seo a leanas:
Ina theannta sin, chuir an Uachtaránacht na hairí ar an eolas maidir le toradh chruinniú ghrúpa ionadaíoch na stát 'an tSoghluaisteacht Nasctha Chomhoibritheach Uathoibrithe' a tionóladh i bPrág an 29 Samhain 2022.
Níl an acmhainn seo ar fáil faoi láthair ach amháin sa teanga (sna teangacha) seo a leanas:
Chuir an Uachtaránacht na hairí ar an eolas freisin faoi staid na himeartha i ndáil leis na comhaid reachtacha atá ann faoi láthair:
An cinneadh atá beartaithe maidir le cur chun feidhme na gceanglas fógra agus fritháirimh faoin Scéim Fritháirithe agus Laghdaithe Carbóin don Eitlíocht Idirnáisiúnta (CORSIA) d’oibreoirí aerárthaí atá bunaithe san Aontas. Tá an chaibidlíocht le Parlaimint na hEorpa díreach tugtha chun críche agus foilseofar an cinneadh go luath
An rialachán atá beartaithe maidir le cothrom iomaíochta a áirithiú d’aeriompar inbhuanaithe (ReFuelEU aviation), a bhfuil an chaibidlíocht le Parlaimint na hEorpa ar an mbóthar ceart ina leith agus a bhféadfar í a thabhairt chun críche ag an gcruinniú tríthaobhach a bheidh ann an 8 Nollaig 2022
An rialachán atá beartaithe maidir le bonneagar breoslaí ionadúla (AFIR) a úsáid, a bhfuil an dara cruinniú tríthaobhach le Parlaimint na hEorpa beartaithe ina leith an 13 Nollaig 2022
An rialachán atá beartaithe maidir le breoslaí in-athnuaite agus ísealcharbóin a úsáid sa mhuiriompar (an tionscnamh FuelEU Maritime), a bhfuil caibidlíocht fós ar siúl ina leith le Parlaimint na hEorpa, agus an dara cruinniú tríthaobhach beartaithe don 8 Nollaig 2022
An t-athbhreithniú ar an Treoir maidir le Córais Chliste Iompair (CCI), a bhfuil an chéad chruinniú tríthaobhach le Parlaimint na hEorpa ina leith beartaithe don 15 Nollaig 2022
An treoir lena bhfeabhsaítear na ceanglais chobhsaíochta le haghaidh longa paisinéirí róró, a bhfuil an chéad chruinniú tríthaobhach agus, is dóichí, cruinniú tríthaobhach críochnaitheach le Parlaimint na hEorpa sceidealaithe ina leith an 6 Nollaig 2022
Mar mhír dheireanach, chuir Uachtaránacht inteachta na Sualainne a clár oibre don chéad leath de 2023 i láthair.
Míreanna eile ar an gclár oibre
Mar mhír gan phlé, d’fhormheas an Chomhairle an Dearbhú Eorpach maidir le Cearta Digiteacha agus Prionsabail Dhigiteacha le haghaidh na Deacáide Digití.
Is iad údaráis rialtais na tíre óstaí a láimhseálfaidh creidiúnú na meán le haghaidh cruinnithe mullaigh idirnáisiúnta a reáchtáiltear lasmuigh den Aontas Eorpach.
Is den ríthábhacht gréasán iompair maith a fhorbairt ar fud na hEorpa. Ní hamháin ionas gur féidir lenár saoránaigh bogadh timpeall go tapa agus go hiontaofa, ach ionas gur féidir lenár ngnólachtaí forbairt a thuilleadh agus leas iomlán a bhaint as acmhainneacht an mhargaidh inmheánaigh.
