"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Il-ministri għall-ambjent tal-UE approvaw il-konklużjonijiet tal-Kunsill dwar it-tħejjijiet għall-konferenza tan-Nazzjonijiet Uniti dwar it-tibdil fil-klima (COP28) tal-2023, li ser issir f'Dubai, l-Emirati Għarab Magħquda, mit-30 ta' Novembru sat-12 ta' Diċembru 2023. Il-konklużjonijiet ser iservu bħala l-pożizzjoni ġenerali ta' negozjar tal-UE waqt il-COP28.
Illum qed nibagħtu messaġġ qawwi lis-sħab tagħna: l-UE hija l-mexxejja globali fl-azzjoni dwar il-klima. F'Dubai, ser inkunu fuq quddiem nett fin-negozjati biex nuru l-aktar impenn qawwi tal-UE għat-tranżizzjoni ekoloġika u nħeġġu lis-sħab tagħna jsegwu l-eżempju tagħna. L-UE hija forza li tixpruna l-bidla u rridu nitkellmu b'vuċi waħda fid-dinja. Sempliċiment ma nistgħux nużaw id-diffikultajiet bħala skuża biex nerġgħu lura għas-sitwazzjoni ta' qabel il-Ftehim ta' Pariġi.
Teresa Ribera Rodríguez, aġent tielet viċi president tal-gvern ta' Spanja u ministru għat-tranżizzjoni ekoloġika u l-isfida demografika
Fil-konklużjonijiet tiegħu, il-Kunsill enfasizza l-importanza li jiżdiedu b'mod sostanzjali l-ambizzjonijiet klimatiċi globali biex l-objettiv ta' 1.5°C stabbilit f'Pariġi jkun jista' jintlaħaq. Huwa appella wkoll għal eliminazzjoni gradwali globali tal-fjuwils fossili b'emissjonijiet mhux imnaqqsa ferm qabel l-2050 u għal eliminazzjoni tas-sussidji għall-fjuwils fossili malajr kemm jista' jkun biex titħaffef it-tranżizzjoni lejn ekonomija newtrali għall-klima. Il-ministri inkoraġġew azzjoni globali lejn it-triplikar tal-kapaċità tal-enerġija rinnovabbli installata għal 11 TW u l-irduppjar tar-rata ta' titjib fl-effiċjenza enerġetika sal-2030.
Il-Kunsill enfasizza wkoll l-importanza li jitwettaq b'suċċess l-ewwel Rendikont Globali fil-COP28 u ġedded l-impenn qawwi li sar mill-UE u l-istati membri tagħha biex ikomplu jżidu l-finanzjament internazzjonali tagħhom għall-klima.
Kontribut stabbilit fil-livell nazzjonali tal-UE għall-UNFCCC
Il-ministri approvaw il-preżentazzjoni mill-UE ta' kontribut stabbilit fil-livell nazzjonali (NDC) aġġornat għall-Konvenzjoni Qafas tan-NU dwar it-Tibdil fil-Klima (UNFCCC). L-NDCs huma parti integrali mill-Ftehim ta' Pariġi, li jirrikjedi li kull parti għall-konvenzjoni tikkomunika l-azzjonijiet klimatiċi tagħha ta' wara l-2020. L-NDC il-ġdid tal-UE ġie aġġornat fid-dawl tal-adozzjoni tal-elementi essenzjali kollha tal-pakkett leġiżlattiv "Lesti għall-mira ta' 55%". F'dan il-kuntest, l-implimentazzjoni sħiħa tal-qafas "Lesti għall-mira ta' 55%" tista' tippermetti lill-UE u lill-istati membri tagħha jaqbżu l-mira tal-UE għat-tnaqqis domestiku nett tal-emissjonijiet ta' gassijiet serra ta' mill-inqas 55% sal-2030, meta mqabbla mal-1990.
L-NDCs jistabbilixxu l-isforzi li jagħmel kull pajjiż biex inaqqas l-emissjonijiet nazzjonali u jadatta għall-impatti tat-tibdil fil-klima. L-UE tippreżenta NDC f'isem l-UE u l-istati membri tagħha.
Il-Ftehim ta' Pariġi: it-triq tal-UE lejn in-newtralità klimatika (Infografika)
Standards tal-emissjonijiet tas-CO₂ għal vetturi heavy-duty
Il-ministri laħqu qbil ("approċċ ġenerali") dwar proposta biex jiġi rieżaminat ir-regolament għall-istandards tal-emissjonijiet tas-CO₂ għal vetturi heavy-duty ġodda.
Bil-qbil tal-lum affermajna mill-ġdid l-impenn tagħna li nilħqu l-miri klimatiċi ambizzjużi tagħna. It-trakkijiet, il-karozzi tal-linja u l-kowċis huma parti importanti mit-trasport bit-triq, u jaffettwaw il-ħajja ta' kuljum ta' miljuni ta' ċittadini. Iċ-ċittadini jistħoqqilhom jgħixu f'ambjent aktar ekoloġiku u aktar b'saħħtu, u issa ninsabu pass eqreb lejn dan l-objettiv. Fl-istess ħin, qed niżguraw il-kompetittività tal-industrija, billi niċċaraw il-pjan direzzjonali għal investimenti ġodda.
Teresa Ribera Rodríguez, aġent tielet viċi president tal-gvern ta' Spanja u ministru għat-tranżizzjoni ekoloġika u l-isfida demografika
Il-proposta għandha l-għan li tkompli tnaqqas l-emissjonijiet tas-CO₂ fis-settur tat-trasport bit-triq f'konformità mal-objettivi klimatiċi tal-UE billi tgħolli l-miri għat-tnaqqis tal-emissjonijiet għall-2030 u billi tintroduċi miri ġodda għall-2035 u l-2040. Barra minn hekk, ser jiġu inklużi aktar kategoriji ta' vetturi fil-miri, b'mod partikolari l-karozzi tal-linja u t-trejlers. Fir-rigward tal-karozzi tal-linja urbani, il-ministri qablu li l-karozzi tal-linja urbani l-ġodda kollha ser ikollhom ikunu b'emissjonijiet żero mill-2035 u stabbilew ukoll mira intermedja ta' 85% għal din il-kategorija sal-2030.
Il-Kunsill laħaq qbil ("approċċ ġenerali") dwar proposta biex tiġi riveduta d-direttiva dwar it-trattament tal-ilma urban mormi.
Il-proposta testendi l-kamp ta' applikazzjoni tad-direttiva għal agglomerazzjonijiet żgħar u titlob lill-istati membri jfasslu pjanijiet għal bliet kbar biex jittrattaw l-ilma tax-xeba' urban mill-ilma tax-xita. Tintroduċi wkoll mira vinkolanti tan-newtralità enerġetika għas-settur tat-trattament tal-ilma urban mormi li għandha tintlaħaq f'kull stat membru sal-2040, flimkien ma' miri interim fl-2030 u l-2035.
L-approċċ ġenerali ser iservi bħala mandat għal negozjati mal-Parlament Ewropew dwar il-forma finali tal-leġiżlazzjoni.
Id-delegazzjoni griega infurmati lill-ministri kif id-direttiva dwar l-għargħar serviet ta' għodda ta' prevenzjoni matul l-għargħar reċenti fil-Greċja.
Din ir-riżorsa bħalissa hi disponibbli biss bil-lingwa jew il-lingwi li ġejjin:
Il-ministri semgħu mill-Italja, il-Greċja u l-Portugall dwar l-impatt tal-iskema tal-UE għall-iskambju ta' kwoti tal-emissjonijiet (ETS) fuq it-trasport marittimu tal-merkanzija.
Din ir-riżorsa bħalissa hi disponibbli biss bil-lingwa jew il-lingwi li ġejjin:
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Illum qed nibagħtu messaġġ qawwi lis-sħab tagħna: l-UE hija l-mexxejja globali fl-azzjoni dwar il-klima. F'Dubai, ser inkunu fuq quddiem nett fin-negozjati biex nuru l-aktar impenn qawwi tal-UE għat-tranżizzjoni ekoloġika u nħeġġu lis-sħab tagħna jsegwu l-eżempju tagħna. L-UE hija forza li tixpruna l-bidla u rridu nitkellmu b'vuċi waħda fid-dinja. Sempliċiment ma nistgħux nużaw id-diffikultajiet bħala skuża biex nerġgħu lura għas-sitwazzjoni ta' qabel il-Ftehim ta' Pariġi.
