Pagi minimi adegwati fl-UE
L-UE trid ittejjeb il-kondizzjonijiet tax-xogħol u tal-għajxien tan-nies, billi tistabbilixxi qafas għal pagi minimi adegwati fl-Ewropa.
L-UE għamlet regoli ġodda tal-UE li jippromwovu pagi minimi statutorji adegwati fl-Ewropa u jgħinu biex jinkisbu kondizzjonijiet tax-xogħol u tal-għajxien aħjar għall-impjegati fl-Ewropa.
It-test finali tad-direttiva dwar pagi minimi adegwati ġie adottat mill-Kunsill fl-4 ta' Ottubru 2022.
Ir-regoli tal-UE dwar il-pagi minimi kif jistgħu jkunu ta' benefiċċju?
Fl-UE kollha, hemm differenzi kbar bejn l-istati membri mil-lat ta' kopertura tal-ħaddiema permezz ta' ftehimiet kollettivi u l-livell tal-pagi minimi. Dan huwa parzjalment minħabba l-mudelli differenti ħafna tas-suq tax-xogħol u livelli differenti ta' introjtu fl-istati membri.
Id-direttiva l-ġdida dwar pagi minimi adegwati għandha l-għan li tgħin biex jinkisbu kondizzjonijiet tax-xogħol u tal-għajxien deċenti għall-impjegati fl-Ewropa.
Kondizzjonijiet tax-xogħol ġusti
Il-ħaddiema għandhom id-dritt għal pagi ġusti li jipprovdu standard ta' għajxien deċenti. Dan huwa deskritt taħt il-prinċipju 6 tal-Pilastru Ewropew tad-Drittijiet Soċjali, fil-Kapitolu 2, li jkopri kondizzjonijiet tax-xogħol ġusti.
Il-Pilastru Ewropew tad-Drittijiet Soċjali huwa proklamazzjoni konġunta mill-kapijiet tal-istituzzjonijiet tal-UE, fejn jintrabtu li jimplimentaw 20 prinċipju fil-qasam tal-politika soċjali.
Djalogu soċjali u involviment tal-ħaddiema
Il-ħaddiema – jew ir-rappreżentanti tagħhom – għandhom id-dritt li jiġu infurmati u kkonsultati minn qabel biżżejjed dwar kwistjonijiet rilevanti għalihom. Dan huwa l-prinċipju 8 tal-Pilastru Ewropew tad-Drittijiet Soċjali, ukoll taħt il-Kapitolu 2.
Kif ir-regoli l-ġodda tal-UE jiżguraw protezzjoni aħjar u aktar effettiva tal-paga minima
Id-direttiva stabbiliet regoli ġodda tal-UE dwar:
- proċeduri biex tiġi stabbilita u aġġornata l-adegwatezza tal-pagi minimi statutorji
- il-promozzjoni ta' negozjar kollettiv dwar l-iffissar tal-pagi
- aċċess effettiv għall-protezzjoni tal-paga minima għal dawk il-ħaddiema li huma intitolati għal paga minima skont il-liġi nazzjonali
Adegwatezza tal-pagi minimi statutorji
L-istati membri b'pagi minimi statutorji huma mitluba jistitwixxu qafas biex jistabbilixxu u jaġġornaw dawn il-pagi minimi skont sett ta' kriterji ċari.
Aġġornamenti għall-pagi minimi statutorji ser isiru mill-inqas kull sentejn (jew mhux aktar tard minn kull erba' snin għal dawk il-pajjiżi li jużaw mekkaniżmu ta' indiċjar awtomatiku).
Madankollu, id-direttiva ma tippreskrivix livell speċifiku ta' paga minima li l-istati membri jridu jilħqu.
Promozzjoni ta' negozjar kollettiv dwar l-iffissar tal-pagi
It-tisħiħ tan-negozjar kollettiv huwa mod kif jiġi miġġieled il-faqar fost dawk li jaħdmu u jittejbu l-kondizzjonijiet tax-xogħol. Ġie nnutat li l-pajjiżi b'kopertura għolja ta' negozjar kollettiv għandhom it-tendenza li jkollhom sehem iżgħar ta' ħaddiema b'paga baxxa u pagi minimi ogħla minn dawk b'kopertura baxxa ta' negozjar kollettiv.
Wieħed mill-għanijiet tad-direttiva huwa li jiżdied l-għadd ta' ħaddiema li huma koperti minn negozjar kollettiv fir-rigward tal-iffissar tal-pagi. Għalhekk l-istati membri għandhom jippromwovu l-kapaċità tas-sħab soċjali li jinvolvu ruħhom f'negozjar kollettiv.
L-istati membri b'kopertura ta' negozjar kollettiv ta' inqas minn 80% għandhom jistabbilixxu pjan ta' azzjoni biex jippromwovu n-negozjar kollettiv. Il-pjan ta' azzjoni għandu jistabbilixxi skeda ta' żmien ċara u miżuri speċifiċi biex tiżdied progressivament ir-rata tal-kopertura tan-negozjar kollettiv.
X'inhu negozjar kollettiv?
In-negozjar kollettiv huwa l-proċess li bih il-ħaddiema, permezz tar-rappreżentanti tagħhom, jinnegozjaw kuntratti ma' min iħaddimhom jew mal-organizzazzjonijiet ta' min iħaddimhom biex jiddeterminaw it-termini tal-impjieg tagħhom, inkluż:
- paga u benefiċċji
- sigħat u liv
- politiki dwar is-saħħa u s-sikurezza tal-impjiegi
Aċċess effettiv għall-protezzjoni tal-paga minima
It-test jistipula li l-istati membri ser jieħdu miżuri biex itejbu l-aċċess effettiv tal-ħaddiema għall-protezzjoni tal-paga minima statutorja. Miżuri għal dan il-għan jinkludu:
- kontrolli mill-ispettorati tax-xogħol
- informazzjoni faċilment aċċessibbli dwar il-protezzjoni tal-paga minima
- l-iżvilupp tal-kapaċità tal-awtoritajiet tal-infurzar li jieħdu azzjoni kontra impjegaturi mhux konformi
Ġbir u rapportar tad-data
L-istati membri għandhom jimmonitorjaw il-kopertura u l-adegwatezza tal-pagi minimi. Barra minn hekk, ser jintalbu jirrapportaw kull sentejn lill-Kummissjoni dwar:
- ir-rata ta' kopertura ta' negozjar kollettiv
- il-livell tal-paga minima statutorja
- is-sehem tal-ħaddiema koperti mill-paga minima statutorja
L-istati membri fejn il-protezzjoni tal-paga minima hija pprovduta esklużivament minn ftehimiet kollettivi għandhom jirrapportaw dwar ir-rati tal-paga l-aktar baxxi stabbiliti minn dawk il-ftehimiet kollettivi u dwar il-pagi ta' dawk li ma jkunux koperti minnhom. Il-Kummissjoni ser tanalizza din id-data u tirrapporta lill-Kunsill u lill-Parlament Ewropew.
Fil‑Kunsill
Il-Kummissjoni Ewropea ressqet il-proposta tagħha dwar direttiva dwar pagi minimi adegwati fl-UE liż-żewġ koleġiżlaturi, il-Kunsill u l-Parlament Ewropew, f'Ottubru 2020.
Fil-Kunsill, il-fajl ġie eżaminat mill-Grupp ta' Ħidma dwar Kwistjonijiet Soċjali, li jittratta l-ħidma leġiżlattiva kollha relatata mal-politika dwar l-impjiegi u dik soċjali.
Proposta għal direttiva dwar pagi minimi adegwati
Matul il-presidenza Ġermaniża, il-presidenza u l-Kummissjoni taw informazzjoni dwar il-proposta għal direttiva dwar pagi minimi adegwati fl-Unjoni Ewropea. Kien hemm diskussjoni qasira dwar id-direttiva waqt il-laqgħa tal-Kunsill impjiegi u politika soċjali f'Diċembru 2020.
Rapport ta' progress dwar id-direttiva dwar pagi minimi adegwati
Il-presidenza Portugiża infurmat lill-ministri dwar is-sitwazzjoni attwali tad-direttiva dwar pagi minimi adegwati. Il-ministri kellhom ukoll l-opportunità li jaqsmu l-fehmiet tagħhom dwar it-titjib u l-elementi kritiċi tal-proposta.
Id-diskussjonijiet iffokaw fuq il-punti li ġejjin:
- l-introduzzjoni tat-terminu "promozzjoni" u s-sostituzzjoni tal-kelma "iffissar"
- it-tħassib tal-istati membri li din id-direttiva toħloq drittijiet individwali għall-ħaddiema
- regoli speċifiċi għall-baħħara (koperti mill-Konvenzjoni dwar ix-Xogħol Marittimu)
- il-protezzjoni tal-paga minima permezz ta' negozjar kollettiv kontra l-protezzjoni permezz ta' pagi minimi statutorji
Dawn id-diskussjonijiet stabbilixxew triq 'il quddiem possibbli għal aktar negozjati bil-ħsieb li jintlaħaq ftehim.
Il-Kunsill jadotta l-pożizzjoni tiegħu (approċċ ġenerali)
Il-ħidma tal-presidenza Slovena bniet fuq il-progress tajjeb li sar mas-sħab tat-triju tagħha, il-Ġermanja u l-Portugall, kif imniżżel fir-rapport ta' progress tal-presidenza Portugiża.
Il-presidenza Slovena ppreżentat lill-Grupp ta' Ħidma dwar Kwistjonijiet Soċjali erba' proposti ta' kompromess suċċessivi, li ġew diskussi waqt sitt ijiem sħaħ ta' laqgħat tal-grupp ta' ħidma u f'ħafna diskussjonijiet bilaterali fil-livelli kollha.
Id-diskussjonijiet iffokaw fuq il-punti li ġejjin:
- is-salvagwardja tal-kompetenza tal-istati membri għall-iffissar tal-pagi minimi
- it-tħassib tad-delegazzjonijiet rigward il-mudelli tax-xogħol nazzjonali u s-sistemi tal-iffissar tal-pagi differenti
- approċċi differenti biex tinkiseb l-adegwatezza
- l-enfasi fuq il-promozzjoni tal-adegwatezza u n-negozjar kollettiv
- il-ħidma biex jintlaħaq l-objettiv li ma jkunx hemm biss pagi minimi ġusti iżda wkoll pagi minimi deċenti
- preferenza li l-istati membri jkunu jistgħu jagħżlu liberament il-valuri ta' referenza indikattivi
- possibbiltà ta' obbligu ta' rappurtar mhux kull sena, iżda kull sentejn
- informazzjoni għall-ħaddiema
Il-ħidma ffukat fuq li jinsabu soluzzjonijiet ta' kompromess għat-tħassib u li jintlaħaq bilanċ fit-test filwaqt li jinżamm l-appoġġ tal-istati membri u li t-test jinżamm simplifikat b'mod adatt.
Fil-Coreper tal-24 ta' Novembru 2021, maġġoranza wiesgħa ta' delegazzjonijiet appoġġaw il-ħidma li saret mill-presidenza.
Waqt il-laqgħa tal-Kunsill tal-impjiegi u l-politika soċjali f'Diċembru, il-Kunsill laħaq approċċ ġenerali dwar liġi tal-UE dwar pagi minimi adegwati fl-UE. Il-ministri ssottolinjaw li filwaqt li t-test irrappreżenta bilanċ fraġli bejn il-pożizzjonijiet tal-istati membri, huwa rrifletta ċ-ċentru ta' gravità ta' dawk il-pożizzjonijiet.
Il-Kunsill u l-Parlament Ewropew jilħqu ftehim proviżorju dwar liġi ġdida tal-UE
F'Ġunju 2022, il-Kunsill laħaq ftehim proviżorju dwar id-direttiva dwar il-pagi minimi li tistabbilixxi qafas proċedurali għall-promozzjoni ta' pagi minimi adegwati madwar l-UE u, speċifikament, biex:
- jippromwovi negozjar kollettiv dwar l-iffissar tal-pagi
- jippromwovi livelli adegwati ta' pagi minimi statutorji
- itejjeb l-aċċess effettiv għall-protezzjoni tal-paga minima għall-ħaddiema kollha
Il-ftehim li ntlaħaq ġie kkonfermat mill-Coreper u segwit minn vot formali kemm fil-Kunsill kif ukoll fil-Parlament Ewropew.
Il-Kunsill jadotta t-test finali tad-direttiva
Il-Kunsill adotta d-direttiva dwar pagi minimi adegwati fl-4 ta' Ottubru 2022.
L-istati membri għandhom sentejn biex jittrasponu d-direttiva fil-liġi nazzjonali.
Id-dimensjoni soċjali tal-UE
Id-direttiva dwar pagi minimi adegwati hija parti mill-impenn tal-UE li ttejjeb il-kondizzjonijiet tal-għajxien u tax-xogħol tan-nies fl-UE.
F'Mejju 2021, il-mexxejja tal-UE qablu li jkomplu japprofondixxu l-implimentazzjoni tal-Pilastru Ewropew tad-Drittijiet Soċjali fil-livell tal-UE u dak nazzjonali.
Il-ħidma fuq il-leġiżlazzjoni tal-UE dwar ix-xogħol fuq il-pjattaformi jew il-bilanċ bejn il-ġeneri fil-bordijiet korporattivi hija wkoll parti mill-impenn tal-UE għal Ewropa soċjali aktar b'saħħitha.
Ara wkoll
L-aħħar reviżjoni: 10 ta' Ottubru 2022