Kunsill Ġustizzja u Affarijiet Interni, 08-09/10/2015, 8 u 9 ta' Ottubru 2015

Riżultati ewlenin

Migrazzjoni

Il-Kunsill iddiskuta l-ġestjoni futura tal-fruntieri esterni tal-UE, bħal pereżempju r-responsabbiltà kollettiva tal-istati membri u l-Frontex li qiegħda tiżviluppa, l-użu ta' teknoloġiji moderni u l-kwistjoni ta' kif jittejjeb l-użu tal-mekkaniżmu eżistenti ta' monitoraġġ u evalwazzjoni fil-verifika tal-applikazzjoni tal-acquis ta' Schengen. Id-diskussjoni pprovdiet kontribut għat-tħejjijiet tal-Kunsill Ewropew li jmiss.

Maġġoranza kbira ħafna ta' stati membri kienu favur it-tisħiħ tar-responsabbiltà kollettiva għall-kontrolli tal-fruntieri esterni u enfasizzaw il-ħtieġa għal tisħiħ fis-sehem u l-kapaċità tal-Frontex.

Il-ministri ddiskutew ukoll il-futur tal-politika ta' ritorn u adottaw sett ta' konklużjonijiet.

• Konklużjonijiet tal-Kunsill dwar il-futur tal-politika tar-ritorn

Il-Presidenza tqis li d-dibattitu tal-lum ser jgħin fit-tħejjijiet għall-Kunsill Ewropew tal-ġimgħa d-dieħla. Il-futur ta' Schengen jiddependi mill-kontroll kredibbli u effikaċi tal-fruntieri esterni tal-UE. Din hija prijorità partikolarment importanti fi ħdan l-Aġenda Ewropea dwar il-Migrazzjoni kollha kemm hi Jean Asselborn, Ministru għall-immigrazzjoni u l-asil tal-Lussemburgu u President tal-Kunsill

Il-Kunsill ingħata aġġornament fuq l-aħħar żviluppi dwar ir-rilokazzjoni ta' 160 000 persuna li jeħtieġu protezzjoni internazzjonali, wara d-deċiżjonijiet adottati fl-14 u t-22 ta' Settembru. Il-ministri laqgħu b'sodisfazzjon l-ewwel rilokazzjonijiet, li diġà ser jibdew fid-9 ta' Ottubru 2015.

Il-Kunsill iddiskuta wkoll modi kif titjieb il-kooperazzjoni ġudizzjarja u t-tisħiħ tal-ġlieda kontra l-ksenofobija fil-kriżi tal-migrazzjoni. Il-miżuri diskussi jinkludu użu aħjar tal-għodod tal-Eurojust mill-awtoritajiet ġudizzjarji tal-istati membri, kooperazzjoni aħjar mal-awtoritajiet ġudizzjarji ta' pajjiżi terzi, kooperazzjoni mal-fornituri tal-internet għal azzjoni kontra diskors ta' mibegħda fuq l-internet u ħarsien aħjar tad-drittijiet tat-tfal.

• It-tiftix ta’ soluzzjonijiet għal pressjonijiet migratorji (informazzjoni ġenerali)

B'reazzjoni għall-kriżi tal-migrazzjoni l-Kunsill approva wkoll €576.3 miljun f'impenji u €71.3 miljun f'pagamenti bħala għajnuna finanzjarja addizzjonali mill-baġit tal-UE tal-2015. B'dan iseħħu l-impenji meħuda mill-Kunsill Ewropew fit-23 ta' Settembru 2015.

• Il-Kunsill japprova aktar flus biex tiġi indirizzata l-kriżi tar-refuġjati

Ġlieda kontra t-terroriżmu

Il-Kunsill adotta konklużjonijiet dwar it-tisħiħ tal-miżuri fil-ġlieda kontra t-traffikar tal-armi tan-nar.

• Konklużjonijiet tal-Kunsill dwar it-tisħiħ tal-użu tal-mezzi għall-ġlieda kontra t-traffikar tal-armi tan-nar

Il-ministri ġew aġġornati wkoll dwar l-implimentazzjoni tal-miżuri rigward il-ġlieda kontra t-terroriżmu wara l-istqarrija tal-mexxejja tal-UE fit-12 ta' Frar 2015, u qablu li jimxu 'l quddiem fuq għadd ta' prijoritajiet qabel il-laqgħa li jmiss f'Diċembru.

Il-Presidenza infurmat lill-Kunsill dwar il-progress fil-ħidma fuq direttiva dwar l-użu ta' data tar-reġistru tal-ismijiet tal-passiġġieri għall-prevenzjoni, il-kxif, l-investigazzjoni u l-prosekuzzjoni ta' reati terroristiċi u kriminalità serja.

"Għaddejjin taħditiet politiċi mal-Parlament Ewropew. Ninsabu fiduċjużi li nsibu qbil politiku qabel l-aħħar tas-sena li ser jippermettielna naslu għal riżultat bilanċjat li joffri protezzjoni addizzjonali reali liċ-ċittadini tagħna u fl-istess ħin iqis b'mod sħiħ kemm il-ħtiġijiet operattivi kif ukoll il-protezzjoni tad-data u tad-drittijiet fundamentali", Etienne Schneider, Ministru għas-sigurtà interna tal-Lussemburgu u President tal-Kunsill 

• Ġlieda tal-UE kontra t-terroriżmu (informazzjoni ġenerali)

Protezzjoni tad-data

Il-Kunsill qabel dwar il-pożizzjoni tiegħu għan-negozjar dwar l-abbozz ta' direttiva dwar il-protezzjoni tad-data. Dan jippermetti lill-presidenza Lussemburgiża tibda t-taħditiet mal-Parlament Ewropew fuq din il-parti tal-pakkett dwar il-protezzjoni tad-data. Il-parti l-oħra tal-pakkett hija r-regolament ġenerali dwar il-protezzjoni tad-data li t-taħditiet dwaru diġà bdew mal-Parlament. L-abbozz ta' direttiva jistabbilixxi regoli għall-protezzjoni tad-data personali pproċessata għall-prevenzjoni, l-investigazzjoni, il-kxif jew il-prosekuzzjoni ta' reati kriminali jew l-eżekuzzjoni ta' reati kriminali jew is-salvagwardja kontra theddidiet għas-sigurtà pubblika u l-prevenzjoni tagħhom.

"Il-ftehim tal-lum huwa pass kruċjali sabiex jintlaħaq qbil ġenerali dwar il-pakkett tal-UE dwar il-protezzjoni tad-data sal-aħħar tas-sena", Félix Braz, Ministru għall-Ġustizzja tal-Lussemburgu u President tal-Kunsill.

• Il-protezzjoni tad-data għall-kooperazzjoni bejn il-pulizija u dik ġudizzjarja f'materji kriminali: il-Kunsill lest għal taħditiet mal-PE
• Riforma tal-protezzjoni tad-data

Il-Kummissjoni infurmat ukoll lill-Kunsill dwar il-konsegwenzi tas-sentenza tal-Qorti Ewropea tal-Ġustizzja li fis-6 ta' Ottubru 2015 iddikjarat li d-deċiżjoni tal-Kummissjoni dwar l-isfera ta' sikurezza ("safe harbour") kienet invalida.

Uffiċċju tal-Prosekutur Pubbliku Ewropew

Il-Kunsill qabel proviżorjament dwar ċerti artikoli tal-abbozz ta' regolament li jistabbilixxi l-uffiċċju tal-prosekutur pubbliku Ewropew. Dawn l-artikoli jistabbilixxu regoli li b'mod partikolari jkopru t-tmexxija ta' investigazzjonijiet u prosekuzzjonijiet kriminali fil-qrati nazzjonali, u jinkludu d-drittijiet proċedurali tal-persuni suspettati u dawk akkużati. L-istabbiliment tal-Uffiċċju tal-Prosekutur Pubbliku Ewropew għandu l-għan li jgħin fil-ġlieda kontra reati kontra l-interessi finanzjarji tal-UE. Ser tkompli l-ħidma bit-tir li jintlaħaq qbil fil-Kunsill dwar il-partijiet li fadal tar-regolament.

Appoġġ lill-Greċja

Il-Kunsill adotta regolament li ser jgħin lill-Greċja timmassimizza l-użu tal-fondi tal-UE u ttejjeb il-likwidità sabiex tistimula t-tkabbir u toħloq ix-xogħol. L-għan ewlieni tar-regolament hu li jindirizza n-nuqqas ta' fondi pubbliċi disponibbli għall-investiment tant meħtieġ fil-Greċja, u li jiżgura li l-fondi strutturali u ta' investiment Ewropej ikunu jistgħu jipprovdu benefiċċji konkreti malajr kemm jista' jkun.

• Riżultat tal-laqgħa tal-Kunsill