Summit UE-Stati Uniti, 20 ta' Ottubru 2023

Riżultati ewlenin

Il-mexxejja tal-UE, inkluż il-President tal-Kunsill Ewropew, Charles Michel, il-President tal-Kummissjoni Ewropea, Ursula von der Leyen, u r-Rappreżentant Għoli tal-Unjoni Ewropea għall-Affarijiet Barranin u l-Politika ta' Sigurtà, Josep Borrell, iltaqgħu mal-President tal-Istati Uniti, Joe Biden, u s-Segretarju tal-Istat tal-Istati Uniti, Antony Blinken, f'Washington DC.

Is-summit kien opportunità biex tiġi riveduta s-sħubija transatlantika mill-qrib u l-oqsma ta' kooperazzjoni fi ħdan is-sħubija. Fi tmiem is-summit, il-mexxejja adottaw dikjarazzjoni konġunta, li tinkludi pjan direzzjonali biex isostni u jkompli jsaħħaħ ir-relazzjoni għas-snin li ġejjin.

• Summit UE-Stati Uniti: dikjarazzjoni konġunta (20 ta' Ottubru 2023)
• Kummenti mill-President Charles Michel qabel is-summit bejn l-UE u l-Istati Uniti f'Washington

Relazzjonijiet UE-Stati Uniti

Filwaqt li nirrappreżentaw kważi 800 miljun ċittadin, magħqudin mill-valuri tagħna u marbuta flimkien bl-aktar relazzjoni dinamika fid-dinja, naffermaw mill-ġdid l-impenn tagħna għal sħubija transatlantika li tagħti riżultati għall-popli kollha tagħna. Dikjarazzjoni konġunta UE-Stati Uniti, 20 ta' Ottubru 2023

L-UE u l-Istati Uniti huma sħab mill-qrib u tal-istess fehma li jikkondividu rabta b'saħħitha u impenn għal ordni internazzjonali bbażata fuq ir-regoli u multilateraliżmu effettiv.

Flimkien, huma forza pożittiva li tippromwovi l-istabbiltà u l-paċi madwar id-dinja u li tindirizza l-isfidi globali fundamentali inkluż xenarju ta' sigurtà mibdul, il-protezzjoni tad-demokrazija, ir-rispett għad-drittijiet tal-bniedem u t-tibdil fil-klima.

Is-sħubija bejn l-UE u l-Istati Uniti ġġib benefiċċji għaċ-ċittadini tagħha fuq iż-żewġ naħat tal-Atlantiku, u l-UE u l-Istati Uniti huma impenjati wkoll biex jibnu l-prosperità u jiżviluppaw aktar il-kooperazzjoni tagħhom fil-qasam tas-sigurtà u d-difiża. Il-mexxejja rrikonoxxew il-valur ta' difiża Ewropea aktar b'saħħitha u aktar kapaċi li tikkontribwixxi b'mod pożittiv għas-sigurtà globali u transatlantika u hija komplementari għan-NATO u interoperabbli magħha.

• Relazzjonijiet bejn l-Unjoni Ewropea u l-Istati Uniti (skeda informattiva, SEAE)
• Kooperazzjoni UE-NATO (informazzjoni ġenerali)

Is-sitwazzjoni fil-Lvant Nofsani

Il-mexxejja ddiskutew is-sitwazzjoni fil-Lvant Nofsani, li qed isegwu mill-qrib.

Nappellaw għall-ħelsien immedjat tal-ostaġġi kollha u nenfasizzaw il-fehma komuni tagħna li soluzzjoni ta' żewġ stati tibqa' t-triq vijabbli għal paċi dejjiema. Dikjarazzjoni konġunta UE-Stati Uniti, 20 ta' Ottubru 2023

L-UE u l-Istati Uniti kkundannaw bl-aktar mod qawwi possibbli l-attakki terroristiċi brutali u indiskriminati tal-Ħamas kontra Iżrael u l-poplu tiegħu. Il-mexxejja tennew li Iżrael għandu d-dritt li jiddefendi lilu nnifsu, f'konformità mad-dritt internazzjonali, inkluż id-dritt umanitarju internazzjonali, u esprimew it-tħassib tagħhom dwar il-kriżi umanitarja f'Gaża li sejra għall-agħar.

Il-mexxejja enfasizzaw ukoll l-importanza li jaħdmu mill-qrib mas-sħab biex:

• jipproteġu lill-persuni ċivili
• jappoġġaw jew jagħtu assistenza lil dawk li qed jippruvaw isibu post sikur
• jiffaċilitaw l-aċċess għall-ikel, l-ilma, il-kura medika u l-kenn

Il-gwerra tar-Russja kontra l-Ukrajna

L-UE u l-Istati Uniti wrew tmexxija konġunta fl-appoġġ tagħhom lill-Ukrajna wara l-gwerra ta' aggressjoni tar-Russja. Il-mexxejja affermaw mill-ġdid l-impenn fit-tul tagħhom għall-Ukrajna, inkluż permezz ta' appoġġ diplomatiku, finanzjarju u militari. Huma tennew ukoll id-determinazzjoni tagħhom li:

• jiżguraw li r-Russja terfa' r-responsabbiltà kollha għall-gwerra tagħha
• jimmiraw atturi minn pajjiżi terzi li jappoġġaw il-gwerra b'mod materjali
• jinfurzaw b'mod konġunt is-sanzjonijiet u l-miżuri ta' kontroll tal-esportazzjonijiet

L-UE u l-Istati Uniti wrew kooperazzjoni bla preċedent biex jiġi organizzat rispons transatlantiku komuni għall-gwerra u l-konsegwenzi globali tagħha. F'dan ir-rigward, huma affermaw mill-ġdid l-impenn tagħhom li jaħdmu mal-komunità globali biex jiġu indirizzati l-isfidi fil-qasam tal-enerġija, tal-ekonomija u tas-sigurtà tal-ikel li ġabet magħha l-gwerra tar-Russja.

• L-impatt tal-invażjoni tal-Ukrajna mir-Russja fuq is-swieq: ir-rispons tal-UE (informazzjoni ġenerali)
• Sigurtà u affordabbiltà tal-ikel (informazzjoni ġenerali)

Kummerċ u ekonomija

L-UE u l-Istati Uniti huma sħab ekonomiċi mill-qrib b'rabtiet kummerċjali u ta' investiment b'saħħithom, u huma minn ta' quddiem nett fit-trasformazzjoni teknoloġika u diġitali. Il-mexxejja enfasizzaw l-importanza tal-kummerċ u l-investimenti fir-relazzjoni tagħhom u ddiskutew kif ser isolvu l-kwistjonijiet pendenti.

L-UE u l-Istati Uniti huma determinati wkoll li jżidu r-reżiljenza ekonomika u s-sigurtà ekonomika tagħhom billi:

• jindirizzaw prattiki ekonomiċi mhux tas-suq li huma distorsivi
• inaqqsu l-vulnerabbiltajiet tal-katina tal-provvista
• isaħħu l-ktajjen ta' provvista transatlantiċi
• jindirizzaw ir-riskji għas-sigurtà teknoloġika u l-ħrib tat-teknoloġija
• jiġġieldu kontra l-koerċizzjoni ekonomika

Il-mexxejja evalwaw ukoll il-progress li sar fl-arranġament globali dwar l-azzar u l-aluminju sostenibbli u dwar ftehim immirat dwar il-minerali kritiċi.

• Politika kummerċjali tal-UE (informazzjoni ġenerali)

It-tibdil fil-klima u l-enerġija

Il-mexxejja tennew ir-rieda tagħhom li jindirizzaw it-tibdil fil-klima u jiksbu n-newtralità klimatika sal-2050, inkluż billi jreġġgħu lura t-telf tal-bijodiversità u jipproteġu l-oċeani tagħna.

Fid-dawl tat-28 Konferenza tan-Nazzjonijiet Uniti dwar it-Tibdil fil-Klima (COP28) li jmiss f'Dubai, l-UE u l-Istati Uniti ħeġġew azzjoni ambizzjuża mill-atturi ewlenin l-oħra kollha u appellaw lill-pajjiżi kollha biex jilħqu l-għan li jżidu b'mod drammatiku l-kapaċità globali tal-enerġija rinnovabbli u l-effiċjenza fl-enerġija.

L-UE u l-Istati Uniti huma impenjati wkoll fil-ħidma li għaddejja tal-Wegħda Globali b'rabta mal-Metan, li nedew f'Novembru 2021. Billi jingħaqdu mal-wegħda, il-pajjiżi jimpenjaw ruħhom li jaħdmu flimkien biex kollettivament inaqqsu l-emissjonijiet tal-metan.

• Tibdil fil-klima: x'qed tagħmel l-UE (informazzjoni ġenerali)
• Il-prezzijiet tal-enerġija u s-sigurtà tal-provvista (informazzjoni ġenerali)

It-tranżizzjoni ekoloġika u dik diġitali

L-UE u l-Istati Uniti jinsabu minn ta' quddiem nett ta' trasformazzjoni teknoloġika u diġitali li tikkontribwixxi biex l-ekonomiji tagħna jsiru aktar sostenibbli u kompetittivi, filwaqt li jiġi żgurat li ħadd ma jitħalla jibqa' lura.

F'dan ir-rigward, il-mexxejja impenjaw ruħhom li:

• joħolqu ekosistema diġitali sigura u kompetittiva
• jibnu spazju transatlantiku komuni għall-innovazzjoni, it-teknoloġija u l-enerġija
• jagħmlu t-teknoloġija innovattiva affordabbli għad-dinja kollha
• jippromwovu approċċ iċċentrat fuq il-bniedem għall-intelliġenza artifiċjali

• Politika industrijali tal-UE (informazzjoni ġenerali)

Affarijiet globali

Il-Balkani tal-Punent

L-UE u l-Istati Uniti għandhom interess komuni f'Balkani tal-Punent stabbli u siguri. F'dan il-kuntest, il-mexxejja appellaw lill-partijiet fid-Djalogu bejn Belgrad u Pristina biex inaqqsu b'mod urġenti t-tensjonijiet u jerġgħu jibdew id-djalogu.

Il-mexxejja esprimew ukoll l-appoġġ tagħhom għall-perspettiva tal-UE tar-reġjun tal-Balkani tal-Punent u ħeġġew lis-sħab kollha biex ikomplu jagħmlu riformi biex javvanzaw fit-triq Ewropea tagħhom.

• Tkabbir tal-UE: Serbja (informazzjoni ġenerali)
• Djalogu bejn Belgrad u Pristina (EEAS)
• Tkabbir tal-UE (informazzjoni ġenerali)

Armenja-Ażerbajġan

L-UE u l-Istati Uniti huma impenjati li jippromwovu paċi dejjiema fl-Armenja u l-Ażerbajġan, ibbażata fuq ir-rikonoxximent reċiproku tas-sovranità, l-invjolabbiltà tal-fruntieri u l-integrità territorjali.

F'dan il-kuntest, il-mexxejja appellaw li:

• l-Ażerbajġan jiżgura d-drittijiet u s-sigurtà ta' dawk li jibqgħu fin-Nagorno-Karabakh u għal dawk li jixtiequ jirritornaw lejn djarhom
• il-partijiet kollha jaderixxu mal-prinċipju li ma tintużax il-forza u t-theddid tal-użu tal-forza

• Ir-relazzjonijiet tal-UE mal-Armenja (informazzjoni ġenerali)
• Ir-relazzjonijiet tal-UE mal-Ażerbajġan (informazzjoni ġenerali)

Afrika

Filwaqt li jaqsmu interess komuni f'Afrika paċifika, demokratika u reżiljenti, il-mexxejja laqgħu l-adeżjoni tal-Unjoni Afrikana bħala membru permanenti tal-G20.

Il-mexxejja impenjaw ruħhom ukoll li jaħdmu flimkien mas-sħab biex jippromwovu s-sigurtà, l-istabbiltà u l-prosperità fl-Afrika ta' Fuq u biex jindirizzaw l-isfidi tas-sigurtà fis-Saħel.

Reġjun Indo-Paċifiku

L-UE u l-Istati Uniti jappoġġaw reġjun Indo-Paċifiku ħieles u miftuħ li jista' jikkontribwixxi għall-istabbiltà u l-prosperità tar-reġjun f'konformità mal-valuri demokratiċi u d-dritt internazzjonali.

Biex tissaħħaħ il-kooperazzjoni fir-reġjun, u f'konformità mal-istrateġiji Indo-Paċifiċi rispettivi tagħhom, l-UE u l-Istati Uniti ser ifittxu li:

• jespandu s-sensibilizzazzjoni dwar id-dominju marittimu
• jinkoraġġixxu l-kooperazzjoni fil-konnettività
• jirrispondu għall-manipulazzjoni tal-informazzjoni barranija
• iżidu l-koordinazzjoni ċibernetika
• jinkoraġġixxu l-isforzi li għaddejjin biex jitħarsu l-libertajiet fundamentali u d-drittijiet tal-bniedem

Il-mexxejja affermaw mill-ġdid ukoll:

• l-appoġġ sod tagħhom għaċ-ċentralità u l-unità tal-ASEAN
• is-sħubija mal-pajjiżi Gżejjer tal-Paċifiku

Ċina

L-UE u l-Istati Uniti huma lesti jibnu relazzjoni kostruttiva u stabbli maċ-Ċina biex jindirizzaw l-isfidi globali u jiddiskutu oqsma ta' interess komuni.

F'dan ir-rigward, l-UE u l-Istati Uniti appellaw liċ-Ċina biex:

• tieħu sehem f'fora internazzjonali biex jiġu diskussi kwistjonijiet bħall-kriżi tal-klima u tal-bijodiversità, is-saħħa globali u t-tħejjija għall-pandemiji
• tagħmel pressjoni fuq ir-Russja biex twaqqaf il-gwerra ta' aggressjoni tagħha kontra l-Ukrajna

Sabiex jippermettu relazzjonijiet ekonomiċi sostenibbli maċ-Ċina, l-UE u l-Istati Uniti ser:

• jinvestu fl-ekonomiji proprji tagħhom
• inaqqsu d-dipendenzi u l-vulnerabbiltajiet kritiċi
• jipproteġu ċerti teknoloġiji avvanzati

Il-mexxejja esprimew ukoll it-tħassib serju tagħhom dwar is-sitwazzjoni fl-Ibħra tal-Lvant u tan-Nofsinhar taċ-Ċina u dwar is-sitwazzjoni tad-drittijiet tal-bniedem u tax-xogħol furzat fiċ-Ċina.

Finanzjament għall-iżvilupp sostenibbli

L-UE u l-Istati Uniti huma impenjati li jaċċelleraw il-progress lejn l-għanijiet ta' żvilupp sostenibbli u li jimmobilizzaw finanzjament addizzjonali għall-iżvilupp, inkluż billi jagħmlu l-banek multilaterali tal-iżvilupp aktar effettivi.

Għal dan l-għan, l-UE u l-Istati Uniti ser iżidu l-isforzi biex:

• jipprovdu appoġġ qawwi lill-pajjiżi foqra, b'introjtu baxx u medju
• jagħtu l-għajnuna tagħhom biex jiġi żblukkat il-kapital privat għall-investimenti
• itejbu s-sħubija għall-infrastruttura u l-investimenti globali
• jippromwovu l-inklużjoni diġitali u t-teknoloġija tal-komunikazzjoni u l-ktajjen tal-provvista tas-servizzi madwar id-dinja

Kuntest

L-aħħar summit UE-Stati Uniti sar fi Brussell fil-15 ta' Ġunju 2021.

Matul is-summit, il-mexxejja adottaw dikjarazzjoni li tiddeskrivi l-kooperazzjoni bejn l-UE u l-Istati Uniti f'era ta' wara l-pandemija.

• Summit UE-Stati Uniti, 15 ta' Ġunju 2021
• Stqarrija tas-summit bejn l-UE u l-Istati Uniti: "Lejn Sħubija transatlantika mġedda"