Kronoloġija - Il-politika tal-UE dwar il-migrazzjoni u l-ażil

Il-kronoloġija li ġejja tagħti ħarsa ġenerali lejn l-iżviluppi ewlenin fil-ħidma tal-Kunsill u l-Kunsill Ewropew sabiex isawru rispons tal-UE għall-pressjonijiet migratorji.

Il-Kunsill adotta sensiela ta' atti leġiżlattivi biex jiġi rriformat il-qafas legali tal-UE dwar il-ġestjoni tal-migrazzjoni u l-ażil.

Dan jistabbilixxi sett regoli li ser jgħinu:

• fil-ġestjoni tal-wasliet b'mod ordnat
• fil-ħolqien ta' proċeduri effiċjenti u uniformi
• fl-iżgurar tal-kondiviżjoni ġusta tal-piżijiet bejn l-istati membri

• Il-Kunsill jadotta l-patt tal-UE dwar il-migrazzjoni u l-ażil (stqarrija għall-istampa, 14 ta' Mejju 2024)

Il-Kunsill jadotta l-permess uniku li għandu l-għan li jistabbilixxi:

• proċedura ta' applikazzjoni unika għal permess konġunt ta' xogħol u ta' residenza
• garanzija ta' sett komuni ta' drittijiet għal ċittadini ta' pajjiżi terzi eliġibbli abbażi tat-trattament ugwali bħaċ-ċittadini tal-istat membru li jagħti l-permess uniku
• ipproċessar aktar mgħaġġel ta' applikazzjoni
• il-possibbiltà għad-detenturi ta' permess uniku li jibdlu l-impjegatur
• struzzjonijiet ċari jekk detentur ta' permess uniku jispiċċa bla xogħol

• Migrazzjoni legali: il-Kunsill jagħti l-approvazzjoni tiegħu għall-permess uniku ta' xogħol u ta' residenza għal ċittadini mhux tal-UE (stqarrija għall-istampa, 12 ta' April 2024)

Ir-rappreżentanti tal-istati membri tal-UE (Coreper) approvaw il-qbil proviżorju li ntlaħaq bejn il-presidenza tal-Kunsill u l-Parlament Ewropew fl-20 ta' Diċembru 2023 dwar ħames liġijiet ewlenin (li jikkostitwixxu l-patt dwar l-ażil u l-migrazzjoni) li ser jirriformaw is-sistema tal-ażil u l-migrazzjoni tal-UE.

Il-kumitat tar-rappreżentanti permanenti ta wkoll l-approvazzjoni tiegħu għal tliet liġijiet dwar l-ażil u l-migrazzjoni li kien intlaħaq qbil dwarhom bejn il-Kunsill u l-Parlament fl-2022. Dawn it-tliet liġijiet jinkludu:

• reviżjoni tad-direttiva dwar il-kundizzjonijiet tal-akkoljenza
• aġġornament tar-regolament dwar il-kwalifiki
• regolament li jistabbilixxi qafas tal-UE għar-risistemazzjoni

• Ir-riforma tal-ażil u l-migrazzjoni: ir-rappreżentanti tal-istati membri tal-UE japprovaw qbil mal-Parlament Ewropew (stqarrija għall-istampa, 8 ta' Frar 2024)

Il-ħames liġijiet tal-UE li l-Presidenza Spanjola u l-Parlament laħqu qbil dwarhom jittrattaw l-istadji kollha tal-ġestjoni tal-ażil u l-migrazzjoni, u jvarjaw minn:

• kontroll ta' migranti irregolari meta jaslu fl-UE
• teħid ta' data bijometrika
• proċeduri biex isiru u jiġu ttrattati applikazzjonijiet għall-ażil
• ir-regoli biex jiġi ddeterminat liema stat membru huwa responsabbli milli jittratta applikazzjoni għall-ażil
• kooperazzjoni u solidarjetà bejn l-istati membri u kif għandhom jiġu indirizzati sitwazzjonijiet ta' kriżi, inkluż każijiet ta' strumentalizzazzjoni tal-migranti

• Il-Kunsill u l-Parlament Ewropew jagħmlu avvanz importanti fir-riforma tas-sistema tal-ażil u l-migrazzjoni tal-UE

Ir-rappreżentanti tal-istati membri tal-UE laħqu qbil dwar il-komponent finali ta' politika Ewropea komuni dwar l-ażil u l-migrazzjoni.

L-istati membri ssiġillaw il-mandat għal negozjati tagħhom fir-rigward ta' regolament dwar sitwazzjonijiet ta' kriżi, inkluż l-istrumentalizzazzjoni tal-migrazzjoni, u force majeure fil-qasam tal-migrazzjoni u l-ażil. Din il-pożizzjoni ser tifforma l-bażi tan-negozjati bejn il-presidenza tal-Kunsill u l-Parlament Ewropew.

• Politika dwar il-migrazzjoni: il-Kunsill jaqbel dwar mandat għal liġi tal-UE li tittratta sitwazzjonijiet ta' kriżi (stqarrija għall-istampa, 4 ta' Ottubru 2023)

Il-presidenza tat lill-ministri rapport ta' progress dwar il-fajls leġiżlattivi kollha tal-patt dwar l-ażil u l-migrazzjoni.

Il-Kunsill u l-Parlament Ewropew bħalissa huma involuti fl-hekk imsejħa negozjati tat-trilogu dwar ħames fajls leġiżlattivi. Flimkien ser jirriformaw is-sistema Ewropea komuni tal-ażil u dan ser jirriżulta f'qafas komuni tal-UE li jittratta l-aspetti kollha tal-ġestjoni tal-ażil u tal-migrazzjoni. Iż-żewġ istituzzjonijiet jixtiequ jtemmu n-negozjati u jadottaw formalment il-proposti leġiżlattivi differenti qabel tmiem dan il-perjodu leġiżlattiv.

Il-ministri rċevew ukoll tagħrif dwar is-sitwazzjoni attwali tad-dimensjoni esterna tal-migrazzjoni. Dan jikkonċerna l-politiki tal-UE biex jiġu ffaċċjati l-isfidi migratorji li l-UE tikkondividi ma' kontinenti u pajjiżi oħra. Il-Kummissjoni tat aġġornament tal-progress li nkiseb fil-kooperazzjoni ma’ pajjiżi terzi sħab.

• Kunsill Ġustizzja u Affarijiet Interni, 4-5 ta' Diċembru 2023

Il-President osserva li l-Kunsill Ewropew jesprimi s-sogħba kbira tiegħu għat-telf terribbli ta' ħajjiet bħala riżultat tat-traġedja reċenti fil-Mediterran.

Is-sitwazzjoni migratorja fil-fruntieri esterni tal-UE u ġewwa l-UE ġiet eżaminata b'mod komprensiv, u ġiet innotata l-ħidma li saret s'issa fil-qafas ta' rispons Ewropew.

Il-Presidenza tal-Kunsill u l-Kummissjoni infurmaw lill-Kunsill Ewropew dwar il-progress sostnut fl-implimentazzjoni tal-konklużjonijiet tiegħu tad-9 ta' Frar 2023, b'attenzjoni fuq l-aspetti esterni tal-migrazzjoni u l-mekkaniżmi ta' finanzjament tagħhom.

Il-Kunsill Ewropew ser jibqa' jeżamina din il-ħidma.

• Kunsill Ewropew, 29-30 ta' Ġunju 2023
• Konklużjonijiet mill-President tal-Kunsill Ewropew dwar id-dimensjoni esterna tal-migrazzjoni

Il-Kunsill laħaq qbil dwar żewġ regolamenti ewlenin dwar l-ażil u l-migrazzjoni:

Regolament dwar il-proċeduri tal-ażil

Ir-regolament dwar il-proċeduri tal-ażil (APR) jistabbilixxi proċedura komuni fl-UE kollha li l-istati membri jeħtieġ li jsegwu meta jkun hemm nies li jfittxu protezzjoni internazzjonali.

Regolament dwar il-ġestjoni tal-ażil u tal-migrazzjoni

Ladarba jintlaħaq qbil dwaru, ir-regolament dwar il-ġestjoni tal-ażil u tal-migrazzjoni (AMMR) għandu jissostitwixxi r-regolament ta' Dublin attwali. Ir-regolament ta' Dublin jistabbilixxi regoli li jiddeterminaw liema stat membru huwa responsabbli għall-eżami ta' applikazzjoni għall-ażil. L-AMMR ser jissimplifika dawn ir-regoli u jqassar il-limiti ta' żmien.

Biex tiġi bbilanċjata s-sistema attwali fejn ftit stati membri huma responsabbli għall-maġġoranza l-kbira tal-applikazzjonijiet għall-ażil, qed jiġi propost mekkaniżmu ġdid ta' solidarjetà li jkun sempliċi, prevedibbli u li jista' jitħaddem. Ir-regoli l-ġodda jgħaqqdu flimkien is-solidarjetà obbligatorja mal-flessibbiltà għall-istati membri fir-rigward tal-għażla tal-kontributi individwali.

• Politika dwar il-migrazzjoni: il-Kunsill jilħaq qbil dwar liġijiet ewlenin b'rabta mal-ażil u l-migrazzjoni (stqarrija għall-istampa, 8 ta' Ġunju 2023)

The Council has agreed its position on an update of an EU law that deals with legal migration to the EU labour market. The updated rules streamline the application procedure and make it more effective.

Thanks to this international recruitment of talent should get a boost, more rights for third-country workers and their equal treatment compared to EU workers should reduce labour exploitation.

• Legal migration: Council settles on negotiating position for review of Single Permit Directive (press release, 8 June 2023)

Il-presidenza tal-Kunsill u l-Kummissjoni infurmaw lill-Kunsill Ewropew dwar il-progress fl-implimentazzjoni tal-konklużjonijiet tiegħu ta' Frar dwar il-migrazzjoni.

Il-mexxejja appellaw għall-implimentazzjoni rapida ta' dawk il-konklużjonijiet u ser jerġgħu jeżaminawha f'Ġunju.

• Kunsill Ewropew, 23 ta' Marzu 2023

Il-kapijiet ta' stat u ta' gvern tal-UE tkellmu dwar il-migrazzjoni f'Kunsill Ewropew straordinarju li sar fi Brussell. Huma vvalutaw l-implimentazzjoni tal-konklużjonijiet preċedenti tagħhom dwar approċċ komprensiv għall-migrazzjoni f'konformità mal-prinċipji u l-valuri tal-UE u d-drittijiet fundamentali, b'enfasi fuq:

• azzjoni esterna akbar
• ir-ritorn u r-riammissjoni
• il-kontroll tal-fruntieri esterni tal-UE
• il-ġlieda kontra l-istrumentalizzazzjoni, it-traffikar u l-faċilitazzjoni ta' dħul klandestin ta' migranti
• data dwar il-flussi migratorji
• il-patt dwar il-migrazzjoni u l-ażil

• Kunsill Ewropew Straordinarju (riżultati ewlenin, 9 ta' Frar 2023)

Il-Kunsill approva mandati ta' negozjar dwar żewġ atti leġiżlattivi dwar l-ażil u l-migrazzjoni, abbażi tal-proposti ppreżentati mill-Kummissjoni fil-qafas tal-Patt dwar il-Migrazzjoni u l-Ażil:

• ir-regolament Eurodac, maħsub biex jgħin lill-istati membri jimmonitorjaw aħjar il-progress tal-applikanti għall-ażil u tal-persuni f'sitwazzjoni irregolari fl-UE
• ir-regolament dwar l-iskrinjar, jikkontribwixxi għat-tisħiħ tal-kontrolli fuq il-persuni fil-fruntieri esterni

Barra minn hekk, 21 stat membru jew stat assoċjat kkonfermaw l-adozzjoni ta' dikjarazzjoni dwar is-solidarjetà, li tipprevedi mekkaniżmu volontarju ta' kontribuzzjonijiet ta' solidarjetà, fil-forma ta' rilokazzjonijiet jew tipi oħra ta' kontribuzzjonijiet, partikolarment dawk finanzjarji

• Il-Kunsill japprova mandati ta' negozjar għar-regolament dwar il-Eurodac u r-regolament dwar l-iskrinjar u 21 stat jadottaw dikjarazzjoni dwar is-solidarjetà (stqarrija għall-istampa, 22 ta' Ġunju 2022)
• Sistemi tal-IT għall-ġlieda kontra l-kriminalità u għas-sigurtà tal-fruntieri tal-UE (informazzjoni ġenerali)

Il-Kunsill adotta regolament dwar l-Azzjoni ta' Koeżjoni għar-Refuġjati fl-Ewropa (CARE) li ser jippermetti r-rilaxx u r-riallokazzjoni rapidi tal-finanzjament tal-politika ta' koeżjoni. Dan ser jiżgura li l-istati membri li jospitaw refuġjati jkollhom biżżejjed riżorsi biex jissodisfaw il-ħtiġijiet dejjem jikbru għall-akkomodazzjoni, l-edukazzjoni u l-kura tas-saħħa.

Barra minn hekk, l-istati membri ser ikunu jistgħu jużaw l-Assistenza fl-Irkupru għall-Koeżjoni u għat-Territorji tal-Ewropa (REACT-EU), wieħed mill-akbar programmi ta' investiment pubbliku tal-UE għal wara l-pandemija.

Il-Kunsill adotta wkoll proposta biex:

• jiġu liberati sa €420 miljun f'fondi li fadal mill-fond tal-affarijiet interni 2014-2020
• l-istati membri u donaturi pubbliċi jew privati oħra jitħallew jagħmlu kontribuzzjonijiet addizzjonali taħt il-fond għall-ażil, il-migrazzjoni u l-integrazzjoni 2021-2027

Dan ser jipprovdi riżorsi addizzjonali għall-akkoljenza ta' persuni li jaħarbu mill-gwerra fl-Ukrajna.

• Ukrajna: €17-il biljun f'fondi tal-UE biex jiġu mgħejuna r-refuġjati (stqarrija għall-istampa, 4 ta' April 2022)

L-UE ddeċidiet li tintroduċi l-iskema ta' protezzjoni temporanja. L-objettiv huwa li tittaffa l-pressjoni fuq is-sistemi nazzjonali tal-ażil u li l-persuni spostati jkunu jistgħu jgawdu minn drittijiet armonizzati madwar l-UE. Dawn id-drittijiet jinkludu:

• residenza
• aċċess għas-suq tax-xogħol u l-akkomodazzjoni
• assistenza medika
• aċċess għall-edukazzjoni għat-tfal

Il-protezzjoni temporanja hija mekkaniżmu ta' emerġenza li jista' jiġi applikat f'każijiet ta' influss bil-massa ta' persuni spostati u li għandu l-għan li jipprovdi protezzjoni immedjata u kollettiva għal persuni spostati li mhumiex f'pożizzjoni li jirritornaw lejn il-pajjiż ta' oriġini tagħhom.

• Ukrajna: il-Kunsill jintroduċi protezzjoni temporanja għal persuni li qed jaħarbu mill-gwerra (stqarrija għall-istampa, 4 ta' Marzu 2022)

Mid-19 ta’ Jannar 2022, l-Aġenzija tal-Unjoni Ewropea għall-Ażil (EUAA) ser tissostitwixxi l-Uffiċċju Ewropew ta’ Appoġġ fil-qasam tal-Ażil (EASO).

L-aġenzija l-ġdida hija responsabbli mit-titjib tal-funzjonament tas-sistema Ewropea komuni tal-ażil, billi tagħti assistenza operazzjonali u teknika msaħħa lill-istati membri u billi ġġib aktar konsistenza fil-valutazzjoni tal-applikazzjonijiet għall-protezzjoni internazzjonali.

• Aġenzija tal-UE għall-Ażil (sit web)

Il-Kunsill adotta regolament li jistabbilixxi l-aġenzija tal-UE għall-ażil. Dan ir-regolament għandu l-għan li jtejjeb l-applikazzjoni tal-politika dwar l-ażil fl-UE, billi jittrasforma l-uffiċċju Ewropew ta' appoġġ fil-qasam tal-ażil (EASO) attwali f'aġenzija vera u proprja.

Din l-aġenzija ser tkun responsabbli mit-titjib tal-funzjonament tas-sistema Ewropea komuni tal-ażil, billi

• tagħti assistenza operazzjonali u teknika mtejba lill-istati membri
• tikkontribwixxi għal aktar konverġenza fil-valutazzjoni tal-applikazzjonijiet għal protezzjoni internazzjonali

• Patt dwar il-migrazzjoni u l-ażil: il-Kunsill jadotta regolament dwar l-aġenzija tal-UE għall-ażil (stqarrija għall-istampa, 9 ta' Diċembru 2021)

Il-mexxejja tal-UE appellaw lill-Kummissjoni Ewropea u lir-Rappreżentant Għoli tal-UE għall-Affarijiet Barranin u l-Politika ta’ Sigurtà biex jagħmlu t-tmien pjanijiet ta’ azzjoni għal pajjiżi prijoritarji ta’ oriġini u ta’ tranżitu operazzjonali u biex jimplimentawhom mingħajr dewmien.

Il-Kunsill Ewropew għamilha ċara li mhu ser jaċċetta l-ebda tentattiv minn pajjiżi mhux tal-UE biex jiġu strumentalizzati l-migranti għal finijiet politiċi. Huwa tenna d-determinazzjoni tiegħu li jiżgura kontroll effettiv tal-fruntieri esterni tal-UE u enfasizza l-ħtieġa li jiġu żgurati ritorni effettivi u l-implimentazzjoni sħiħa tal-ftehimiet ta’ riammissjoni.

Il-kapijiet ta’ stat u ta’ gvern tal-UE qalu li l-UE ser tkompli tiġġieled kontra l-attakk ibridu li għaddej organizzat mir-reġim Belarussu, inkluż billi tadotta aktar miżuri restrittivi kontra persuni u entitajiet ġuridiċi.

• Konklużjonijiet tal-Kunsill Ewropew, 21-22 ta' Ottubru 2021
• Relazzjonijiet tal-UE mal-Belarussja

Il-Kunsill adotta d-direttiva dwar il-karta blu. Ir-regoli l-ġodda, li jieħdu post dawk eżistenti, jarmonizzaw aktar il-kondizzjonijiet ta' dħul u residenza għal ħaddiema bi kwalifiki għolja minn pajjiżi mhux tal-UE u jagħmlu l-karta blu tal-UE aktar attraenti.

L-iskema l-ġdida għandha l-għan li tiġbed u żżomm ħaddiema bi kwalifiki għoljin, partikolarment f'setturi li qed iħabbtu wiċċhom ma' nuqqas ta' ħiliet.

Din is-sistema ta' ammissjoni fl-UE kollha:

• tistabbilixxi kriterji li huma aktar inklużivi
• tissimplifika l-proċeduri
• tiffaċilita l-mobilità intra-UE
• tħaffef ir-riunifikazzjoni tal-familja
• tagħti livell għoli ħafna ta' aċċess għas-suq tax-xogħol

• Migrazzjoni legali: il-Kunsill jadotta direttiva dwar il-karta blu biex jattira ħaddiema bi kwalifiki għolja (stqarrija għall-istampa, 7 ta' Ottubru 2021)

Il-ministri għall-affarijiet interni ddiskutew l-iżviluppi fl-Afganistan, b’mod aktar speċifiku fir-rigward tal-implikazzjonijiet potenzjali fl-oqsma tal-protezzjoni internazzjonali, il-migrazzjoni u s-sigurtà u adottaw dikjarazzjoni dwar il-kwistjoni.

Huma enfasizzaw il-ħtieġa li titkompla l-koordinazzjoni mas-sħab internazzjonali dwar l-istabbilizzazzjoni tar-reġjun u li jiġi żgurat li l-għajnuna umanitarja tilħaq lill-persuni vulnerabbli. Huma ddikjaraw ukoll il-ħtieġa li titkompla l-kooperazzjoni biex tiġi evitata l-migrazzjoni illegali mir-reġjun, kif ukoll biex jiġu protetti b’mod effettiv il-fruntieri esterni tal-UE u jiġi evitat id-dħul mhux awtorizzat.

• Dikjarazzjoni dwar is-sitwazzjoni fl-Afganistan (31 ta' Awwissu 2021)

Il-presidenza tal-Kunsill u r-rappreżentanti tal-Parlament Ewropew laħqu ftehim proviżorju dwar regolament dwar l-aġenzija tal-UE għall-ażil.

Ir-regolament propost għandu l-għan li jtejjeb l-applikazzjoni tal-politika dwar l-ażil fl-UE, billi jittrasforma l-uffiċċju Ewropew ta' appoġġ fil-qasam tal-ażil (EASO) attwali f'aġenzija vera u proprja. Din l-aġenzija ser tkun responsabbli mit-titjib tal-funzjonament tas-sistema Ewropea komuni tal-ażil, billi:

• tagħti assistenza operazzjonali u teknika mtejba lill-istati membri
• tikkontribwixxi għal aktar konverġenza fil-valutazzjoni tal-applikazzjonijiet għal protezzjoni internazzjonali

• L-aġenzija tal-UE għall-ażil: il-presidenza tal-Kunsill u l-Parlament Ewropew jilħqu ftehim proviżorju (stqarrija għall-istampa, 29 ta' Ġunju 2021)

Il-mexxejja tal-UE qablu li sħubiji ta' benefiċċju reċiproku u kooperazzjoni ma' pajjiżi ta' oriġini u ta' tranżitu ser jiġu intensifikati biex jiġi evitat it-telf ta' ħajjiet u biex titnaqqas il-pressjoni fuq il-fruntieri Ewropej, bħala parti mill-azzjoni esterna tal-UE.

Dan l-approċċ komuni għandu jindirizza r-rotot migratorji kollha u ser:

• ikun prammatiku, flessibbli u mfassal apposta
• jagħmel użu, bħala Tim Ewropa, mill-istrumenti u l-inċentivi kollha disponibbli
• isir f'kooperazzjoni mill-qrib mal-Aġenzija tan-NU għar-Refuġjati (UNHCR) u l-Organizzazzjoni Internazzjonali għall-Migrazzjoni (IOM)

Il-kapijiet ta' stat jew ta' gvern tal-UE appellaw lill-Kummissjoni Ewropea u lir-Rappreżentant Għoli, f'kooperazzjoni mal-istati membri, biex:

• minnufih isaħħu azzjonijiet konkreti mal-pajjiżi prijoritarji ta' oriġini u ta' tranżitu
• iressqu pjanijiet ta' azzjoni għall-pajjiżi ta' oriġini u ta' tranżitu prijoritarji fil-ħarifa tal-2021

Il-Kunsill Ewropew ikkundanna u ċaħad kwalunkwe tentattiv minn pajjiżi terzi biex jistrumentalizzaw lill-migranti għal finijiet politiċi.

• Kunsill Ewropew, 24-25 ta' Ġunju 2021 (riżultati ewlenin)

Il-presidenza tal-Kunsill u l-Parlament Ewropew laħqu qbil proviżorju dwar abbozz ta' direttiva li tistabbilixxi l-kondizzjonijiet ta' dħul u residenza għal nazzjonali ta' pajjiżi terzi bi kwalifiki għoljin li jiġu jgħixu u jaħdmu fl-UE.

Id-direttiva dwar il-karta blu għandha l-għan li tiġbed u żżomm ħaddiema bi kwalifiki għoljin, partikolarment f'setturi li qed iħabbtu wiċċhom ma' nuqqas ta' ħiliet. Ir-regoli l-ġodda ser:

• joħolqu kriterji ta' ammissjoni aktar inklużivi
• jissimplifikaw il-proċeduri
• jiffaċilitaw il-mobbiltà ġewwa l-UE
• jagħmlu r-riunifikazzjoni tal-familja aktar faċli
• jagħtu livell għoli ta' aċċess għas-suq tax-xogħol

• Migrazzjoni legali: Il-presidenza tal-Kunsill u l-Parlament Ewropew jilħqu qbil proviżorju dwar skema biex jiġbdu ħaddiema bi kwalifiki għoljin (stqarrija għall-istampa, 18 ta' Mejju 2021)

Wara l-approvazzjoni tal-Parlament Ewropew fis-16 ta' Diċembru 2020, il-Kunsill adotta r-regolament li jistabbilixxi l-qafas finanzjarju pluriennali (QFP) tal-UE għall-2021-2027. Ir-regolament jipprevedi baġit fit-tul ta' €1 074.3 biljun għall-UE27.

L-infiq fl-oqsma tal-migrazzjoni u l-ġestjoni tal-fruntieri ser jammonta għal €22.7 biljun matul is-seba' snin li ġejjin. L-appoġġ għall-migrazzjoni u l-ġestjoni tal-fruntieri ġie msaħħaħ b'mod konsiderevoli, inkluż biex jiġu ffinanzjati sa 10 000 gwardja tal-fruntiera għad-dispożizzjoni tal-Aġenzija Ewropea għall-Gwardja tal-Fruntiera u tal-Kosta sal-2027.

• Baġit fit-tul tal-UE 2021-2027 (informazzjoni ġenerali)

Fit-23 ta' Settembru 2020 il-Kummissjoni Ewropea ppreżentat patt ġdid dwar il-migrazzjoni u l-ażil u ħames proposti leġiżlattivi ġodda biex jiġu rriformati r-regoli tal-UE dwar l-ażil.

Il-ministri tal-UE ddiskutew l-elementi ewlenin tal-patt, inkluż id-dimensjoni esterna, il-fażi proposta ta' qabel id-dħul, il-mekkaniżmu ta' solidarjetà, il-migrazzjoni interna u l-ġestjoni tal-ażil, diversi mezzi biex jittejjeb ir-ritorn, ir-rwol tal-aġenziji, il-perkorsi legali għad-dħul fl-Ewropa u l-integrazzjoni.

• Vidjokonferenza tal-ministri għall-affarijiet interni (14 ta' Diċembru 2020)

Il-ministri għall-affarijiet interni ġew mgħarrfa mill-stati membri l-aktar milquta direttament, il-Kummissjoni u l-aġenziji rilevanti tal-UE, dwar l-aħħar żviluppi fuq il-fruntieri esterni tal-UE mat-Turkija. Il-ministri vvalutaw ukoll kif il-miżuri msemmija fid-dikjarazzjoni tal-ministri għall-affarijiet interni tal-4 ta' Marzu qed jiġu implimentati, inkluż l-iskjerament tal-intervent rapidu fil-fruntieri tal-Frontex u l-assistenza teknika addizzjonali.

Il-Presidenti Charles Michel u Ursula von der Leyen iltaqgħu mal-President Recep Tayyip Erdoğan fi Brussell. Il-mexxejja ddiskutew ir-relazzjonijiet bilaterali, l-implimentazzjoni tad-dikjarazzjoni UE-Turkija dwar il-migrazzjoni, is-sigurtà u l-istabbiltà fir-reġjun u l-kriżi fis-Sirja.

Il-laqgħa tal-lum mal-President Erdoğan hija pass importanti fid-direzzjoni t-tajba. Jeħtieġ li kemm it-Turkija kif ukoll l-UE jaħdmu fuq l-implimentazzjoni sħiħa tad-dikjarazzjoni UE-Turkija dwar il-migrazzjoni sabiex is-sitwazzjoni ma tkomplix tiggrava. Charles Michel, President tal-Kunsill Ewropew

• Kummenti mill-President Charles Michel wara l-laqgħa mal-President tat-Turkija Recep Tayyip Erdoğan, 9 ta' Marzu 2020

Il-Kunsill jirrikonoxxi ż-żieda fil-piż migratorju u r-riskji li qed tiffaċċa t-Turkija fit-territorju tagħha u l-isforzi sostanzjali li għamlet biex tospita 3,7 miljun migrant u refuġjat. Il-ministri jtennu wkoll is-solidarjetà sħiħa tal-UE mal-Greċja, li qed tiffaċċa sitwazzjoni bla preċedent, kif ukoll mal-Bulgarija, Ċipru u stati membri oħra fl-isforzi tagħhom biex jamministraw il-fruntieri esterni tal-UE

• Dikjarazzjoni tal-Kunsill Affarijiet Barranin (stqarrija għall-istampa, 6 ta' Marzu 2020)

Il-ministri għall-affarijiet interni ddiskutew is-sitwazzjoni fuq il-fruntieri esterni tal-UE u esprimew is-solidarjetà tagħhom mal-Greċja, il-Bulgarija, Ċipru u stati membri oħra li jista' jkun li qed jiġu affettwati bl-istess mod, inkluż fl-isforzi biex tiġi ġestita l-fruntiera esterna tal-UE. Huma kkonfermaw ukoll l-impenn tagħhom li jsaħħu s-sostenn tagħhom fl-oqsma li jinsabu taħt pressjoni, inkluż permezz tal-iskjerament tal-intervent rapidu fil-fruntieri tal-Frontex u assistenza teknika addizzjonali.

• Dikjarazzjoni dwar is-sitwazzjoni fuq il-fruntieri esterni tal-UE, 4 ta' Marzu 2020

Il-ministri għall-intern tal-UE ddiskutew il-futur tal-politika tal-UE dwar il-migrazzjoni u l-asil, abbażi ta' rapport imħejji mill-Presidenza Finlandiża. Matul id-dibattitu, il-ministri laqgħu l-intenzjoni tal-Kummissjoni li tippreżenta patt ġdid dwar il-migrazzjoni u l-asil. Huma kkonfermaw il-ħtieġa għal approċċ komprensiv għall-migrazzjoni, b'approċċ ta' gvern sħiħ kif ukoll approċċ tar-rotta sħiħ.

• Kunsill Ġustizzja u Affarijiet Interni, 2-3 ta' Diċembru 2019

Il-Kunsill adotta regolament rivedut dwar l-Aġenzija Ewropea għall-Gwardja tal-Fruntiera u tal-Kosta. Din qed tissaħħaħ f'termini ta' persunal u tagħmir tekniku. Qed tingħata wkoll mandat usa' biex tappoġġa l-attivitajiet tal-istati membri, speċjalment fir-rigward tal-kontroll tal-fruntieri, ir-ritorn u l-kooperazzjoni ma' pajjiżi terzi.

• Gwardja Ewropea tal-Fruntiera u tal-Kosta: il-Kunsill jadotta regolament rivedut (stqarrija għall-istampa, 8/11/2019)

Il-ministri għall-affarijiet interni ddiskutew is-sitwazzjoni attwali tal-migrazzjoni. Huma rieżaminaw is-sitwazzjoni tal-migrazzjoni fl-UE fir-rotot kollha, b'fokus partikolari fuq iż-żieda fil-wasliet fil-Lvant tal-Mediterran. Huma qiesu wkoll id-dikjarazzjoni reċenti bejn Franza, il-Ġermanja, l-Italja u Malta dwar arranġamenti temporanji għall-iżbark.

• Kunsill Ġustizzja u Affarijiet Interni, 07-08/10/2019

Il-Kunsill estenda l-mandat tal-EUNAVFOR MED Operazzjoni Sophia, sal-31 ta' Marzu 2020.

L-iskjerament tal-assijiet navali tal-Operazzjoni ser jibqa' temporanjament sospiż, filwaqt li l-istati membri tal-UE jkomplu jaħdmu fil-fora adatti fuq soluzzjoni dwar l-iżbark bħala parti mis-segwitu tal-konklużjonijiet tal-Kunsill Ewropew ta' Ġunju 2018.

• EUNAVFOR MED Operazzjoni Sophia: mandat estiż sat-30 ta' Settembru 2019 (stqarrija għall-istampa, 29/03/2019)

Fl-aġenda strateġika tal-UE għall-2019-2024, il-mexxejja tal-UE appellaw għall-iżvilupp ulterjuri tal-politika komprensiva dwar il-migrazzjoni li qed tiffunzjona tajjeb.

"Ser inkomplu napprofondixxu l-kooperazzjoni tagħna mal-pajjiżi ta' oriġini u ta' transitu fil-ġlieda kontra l-migrazzjoni illegali u t-traffikar tal-bnedmin u biex niżguraw ritorni effettivi. Fir-rigward tad-dimensjoni interna, jenħtieġ li naqblu dwar politika effettiva dwar il-migrazzjoni u l-asil. Jenħtieġ li jintlaħaq kunsens dwar ir-Regolament ta' Dublin sabiex jiġi rriformat abbażi ta' bilanċ ta' responsabbiltà u solidarjetà, filwaqt li jitqiesu l-persuni żbarkati wara operazzjonijiet ta' Tfittxija u Salvataġġ." Aġenda strateġika għall-2019-2024

• Aġenda strateġika ġdida 2019-2024

Il-Kunsill adotta regolament biex itejjeb il-funzjonament tan-netwerk Ewropew bejn l-uffiċjali għall-komunikazzjoni dwar l-immigrazzjoni. Ir-regoli l-ġodda ser iżidu l-kooperazzjoni u l-koordinazzjoni bejn l-uffiċjali għall-komunikazzjoni mibgħuta f'pajjiżi terzi mill-istati membri jew mill-UE biex jittrattaw kwistjonijiet marbuta mal-immigrazzjoni.

• Uffiċjali għall-komunikazzjoni dwar l-immigrazzjoni: il-Kunsill jadotta regoli ġodda biex itejjeb il-koordinazzjoni (stqarrija għall-istampa, 14/06/2019)

Illum il-Kunsill qabel dwar pożizzjoni ta' negozjar parzjali għad-direttiva riveduta dwar ir-ritorn. Ir-regoli l-ġodda għandhom l-għan li jżidu r-rata effettiva ta' ritorn ta' migranti irregolari. Din il-pożizzjoni tkopri l-aspetti kollha tar-reviżjoni proposta minbarra d-dispożizzjonijiet dwar il-proċedura għar-ritorn fuq il-fruntiera.

• Politika dwar il-migrazzjoni: il-Kunsill jaqbel dwar pożizzjoni ta' negozjar parzjali għad-direttiva dwar ir-ritorn (stqarrija għall-istampa, 07/06/2019)

L-UE qed twessa' l-ambitu tal-appoġġ tagħha għal miżuri fl-oqsma tal-migrazzjoni, il-ġestjoni tal-fruntieri u s-sigurtà sabiex jiġu indirizzati sfidi li qed jikbru. Il-Kunsill qabel dwar approċċi ġenerali parzjali għal tliet proposti settorjali fil-qasam tal-affarijiet interni fil-kuntest tal-qafas finanzjarju pluriennali (QFP) għall-perjodu 2021-2027.

• Politika dwar il-migrazzjoni: il-Kunsill jaqbel dwar pożizzjoni ta' negozjar parzjali għad-direttiva dwar ir-ritorn (stqarrija għall-istampa, 07/06/2019)

Il-Kunsill adotta emendi għar-regolament dwar il-kodiċi tal-viża, li ser iżidu l-għodod disponibbli bħala rispons għall-isfidi maħluqa mill-migrazzjoni illegali.

• Politika dwar il-viżi: L-UE taġġorna r-regoli biex tiffaċilita l-ivvjaġġar leġittimu u tiġġieled il-migrazzjoni illegali (stqarrija għall-istampa, 06/06/2019)

L-ambaxxaturi għall-UE kkonfermaw f'isem il-Kunsill il-qbil informali li ntlaħaq bejn il-Parlament Ewropew u l-Presidenza Rumena tal-Kunsill dwar regolament dwar il-Gwardja Ewropea tal-Fruntiera u tal-Kosta. Ir-regoli l-ġodda issa ser ikollhom jiġu adottati formalment mill-Parlament Ewropew u mill-Kunsill.

• Gwardja Ewropea tal-Fruntiera u tal-Kosta: il‑Kunsill jikkonferma qbil dwar mandat aktar b'saħħtu (stqarrija għall‑istampa, 01/04/2019)

Il-Kunsill illum estenda l-mandat tal-EUNAVFOR MED Operazzjoni Sophia sat-30 ta' Settembru 2019.

Il-kmandant tal-Operazzjoni ngħata struzzjonijiet biex jissospendi temporanjament l-iskjerament tal-assi navali tal-Operazzjoni sakemm iddum din l-estensjoni għal raġunijiet operattivi. L-Istati Membri tal-UE ser ikomplu jaħdmu fil-fora xierqa fuq soluzzjoni dwar l-iżbark bħala parti mis-segwitu tal-konklużjonijiet tal-Kunsill Ewropew ta' Ġunju 2018.

• EUNAVFOR MED Operazzjoni Sophia: mandat estiż sat-30 ta' Settembru 2019 (stqarrija għall-istampa, 29/03/2019)

L-ambaxxaturi għall-UE qablu dwar il-pożizzjoni ta' negozjar tal-Kunsill rigward regolament dwar il-Gwardja Ewropea tal-Fruntiera u tal-Kosta. Abbażi ta' dan il-mandat, il-Presidenza Rumena tal-Kunsill ser tibda negozjati mal-Parlament Ewropew.

Il-Gwardja Ewropea tal-Fruntiera u tal-Kosta (Frontex) qed tiġi msaħħa f'dak li jirrigwarda l-persunal u tagħmir tekniku. Qed tingħata wkoll mandat usa' biex tappoġġa l-attivitajiet tal-istati membri fir-rigward tal-protezzjoni tal-fruntieri, ir-ritorn u l-kooperazzjoni ma' pajjiżi terzi.

• Gwardja Ewropea tal-Fruntiera u tal-Kosta: il-Kunsill jaqbel dwar il-pożizzjoni ta' negozjar (stqarrija għall-istampa, 20/02/2019)

L-ambaxxaturi għall-UE ikkonfermaw f'isem il-Kunsill il-qbil informali li ntlaħaq bejn il-Parlament Ewropew u l-presidenza Rumena tal-Kunsill dwar il-proposta li temenda l-kodiċi dwar il-viżi.

Ir-regoli l-ġodda ser itejbu l-kondizzjonijiet għal vjaġġaturi leġittimi u jżidu l-għodod disponibbli ta' rispons għall-isfidi li toħloq il-migrazzjoni illegali.

• Politika dwar il-viżi: Il-Kunsill jikkonferma qbil dwar bidliet għall-kodiċi dwar il-viżi (stqarrija għall-istampa, 20/02/2019)

Il-Presidenza tal-Kunsill u l-Parlament laħqu qbil informali dwar regoli ġodda biex jissaħħaħ in-netwerk Ewropew tal-uffiċjali għall-komunikazzjoni dwar l-immigrazzjoni. Dawn l-uffiċjali huma skjerati f'pajjiżi terzi mill-istati membri jew l-UE biex jittrattaw kwistjonijiet relatati mal-immigrazzjoni.

• Uffiċjali għall-komunikazzjoni dwar l-immigrazzjoni: il-Presidenza tal-Kunsill u l-Parlament Ewropew jilħqu qbil proviżorju (stqarrija għall-istampa, 18/02/2019)

Il-Kunsill estenda l-mandat tal-EUNAVFOR MED Operazzjoni Sophia sal-31 ta' Marzu 2019. L-operazzjoni għandha l-għan li tfixkel il-mudell kummerċjali tal-faċilitaturi tad-dħul klandestin ta' migranti u t-traffikanti tal-bnedmin fin-Nofsinhar tal-Mediterran Ċentrali.

• EUNAVFOR MED Operazzjoni Sophia: mandat estiż sal-31 ta' Marzu 2019 (stqarrija għall-istampa, 21/12/2018)

Il-mexxejja tal-UE ddiskutew kwistjonijiet marbuta mal-migrazzjoni fis-summit tal-UE ta' Diċembru. Huma appellaw sabiex il-politika tal-UE dwar il-migrazzjoni esterna tiġi żviluppata aktar u implimentata.

Fir-rigward tal-politiki interni tal-Unjoni, il-mexxejja stiednu lill-koleġislaturi biex jikkonkludu malajr in-negozjati dwar il-Gwardja Ewropea tal-Fruntiera u tal-Kosta (EBCG).

Appellaw ukoll għal aktar sforzi biex jiġu konklużi n-negozjati dwar l-Aġenzija għall-Asil, id-direttiva dwar ir-ritorn u r-riforma tas-sistema tal-asil tal-UE.

• Kunsill Ewropew, 13-14/12/2018

Il-Kunsill qabel dwar approċċ ġenerali parzjali rigward proposta dwar il-Gwardja Ewropea tal-Fruntiera u tal-Kosta, li jkopri d-dispożizzjonijiet marbuta mar-ritorn u l-kooperazzjoni ma' pajjiżi terzi.

Ir-regoli proposti ser jippermettu lil Frontex

• tipprovdi appoġġ tekniku u operattiv lill-istati membri waqt operazzjonijiet ta' ritorn
• issaħħaħ il-kooperazzjoni tagħha ma' pajjiżi terzi lil hinn mill-pajjiżi tal-viċinat

• Gwardja Ewropea tal-Fruntiera u tal-Kosta: Il-Kunsill jilħaq qbil parzjali dwar ir-ritorn u l-kooperazzjoni ma' pajjiżi terzi (stqarrija għall-istampa, 06/12/2018)

Il-Kunsill qabel dwar miżuri konkreti biex tissaħħaħ il-ġlieda kontra n-netwerks għall-faċilitazzjoni ta' immigrazzjoni illegali. Dan wara appell mill-mexxejja tal-UE fil-laqgħa tagħhom f'Ottubru.

L-azzjonijiet konkreti għandhom ikunu msejsin fuq:

• approċċ imtejjeb bejn l-aġenziji kemm fil-livell tal-UE kif ukoll f'dak nazzjonali
• l-aħjar użu tas-sinerġiji bejn l-għodod operazzjonali disponibbli
• l-akbar użu possibbli tal-assi esterni tal-UE

• Faċilitazzjoni ta' immigrazzjoni illegali: il-Kunsill japprova ġabra ta' miżuri għall-ġlieda kontra n-netwerks li jiffaċilitaw l-immigrazzjoni illegali (stqarrija għall-istampa, 06/12/2018)

Il-mexxejja tal-UE appellaw għall-intensifikazzjoni tal-ġlieda kontra l-faċilitaturi ta' dħul klandestin tal-migranti. Huma stiednu lill-Kunsill biex jiżviluppa sett ta' miżuri għal dan l-għan sa Diċembru.

Il-mexxejja qalu wkoll li jeħtieġ li jsir aktar għall-prevenzjoni ulterjuri ta' migrazzjoni illegali. Huma appellaw għal kooperazzjoni msaħħa mal-pajjiżi ta' oriġini u ta' tranżitu

Barra minn hekk, il-mexxejja stiednu lill-Parlament Ewropew u lill-Kunsill biex jeżaminaw, bħala kwistjoni ta' prijorità, il-proposti reċenti tal-Kummissjoni relatati mal-migrazzjoni u l-asil.

• Kunsill Ewropew, 18/10/2018

Il-Kunsill iddiskuta proposta tal-Kummissjoni biex tespandi l-mandat tal-Aġenzija Ewropea għall-Gwardja tal-Fruntiera u tal-Kosta u biex iżżid il-persunal tagħha sa 10 000 sal-2020. Il-ministri għall-affarijiet interni esprimew ix-xewqa ġenerali tagħhom li jissaħħaħ il-mandat tal-aġenzija, partikolarment dwar ir-ritorni u l-kooperazzjoni ma' pajjiżi terzi. Huma qasmu wkoll il-fehmiet tagħhom dwar id-daqs, il-kompożizzjoni, il-kompiti u s-setgħat tal-korp permanenti tal-aġenzija, kif ukoll dwar l-iskeda ta' żmien meħtieġa biex dan il-korp jiġi stabbiliti b'mod sħiħ.

• Kunsill Ġustizzja u Affarijiet Interni, 11-12/10/2018

Il-kapijiet ta' stat jew ta' gvern iltaqgħu f'Salzburg għal ċena informali ta' ħidma dwar il-migrazzjoni. Il-mexxejja qablu li tissaħħaħ il-kooperazzjoni ma' pajjiżi terzi, inkluż l-Eġittu. Donald Tusk ser jiltaqa' mal-President Al Sisi f'Settembru biex imexxi 'l quddiem il-kooperazzjoni. F'dan il-kuntest, il-mexxejja qablu wkoll li jorganizzaw summit mal-Lega tal-Istati Għarab fi Frar 2019.

• Laqgħa informali tal-kapijiet ta' stat jew ta' gvern, 19-20/09/2018

L-istati membri tal-UE qablu dwar kif jiġu ffinanzjati €3 biljun addizzjonali għall-Faċilità tal-UE għar-refuġjati fit-Turkija bħala appoġġ għar-refuġjati Sirjani:

• €2 biljun ser jiġu ffinanzjati mill-baġit tal-UE
• €1 biljun ser jiġi ffinanzjat mill-istati membri skont is-sehem tagħhom tad-dħul nazzjonali gross tal-UE

• Faċilità għar-refuġjati fit-Turkija: l-istati membri jaqblu dwar id-dettalji ta' finanzjament addizzjonali (stqarrija għall-istampa 29/06/2018)

Meta ltaqgħu f'summit ta' jumejn fi Brussell, il-mexxejja tal-UE qablu dwar miżuri biex isaħħu l-ġlieda kontra l-faċilitaturi ta' dħul klandestin ta' migranti u jnaqqsu aktar il-migrazzjoni illegali tul ir-rotot migratorji kollha.

Il-mexxejja tal-UE appoġġaw l-iżvilupp ta' kunċett ta' pjattaformi reġjonali ta' żbark għan-nies salvati fuq il-baħar minn operazzjonijiet ta' tfittxija u salvataġġ.

• Kunsill Ewropew, 28-29/06/2018

Il-Kunsill ittraspona fid-dritt tal-UE s-sanzjonijiet tan-NU tas-7 ta' Ġunju mmirati kontra sitt traffikanti tal-bnedmin u faċilitaturi ta' dħul klandestin ta' bnedmin li joperaw fil-Libja. Din hija l-ewwel darba li n-NU qed timponi sanzjonijiet fuq traffikanti ta' bnedmin.

• Il-ġlieda kontra t-traffikar tal-bnedmin fil-Libja: l-UE timponi sanzjonijiet kontra sitt traffikanti tal-bnedmin u faċilitaturi ta' dħul klandestin ta' bnedmin f'konformità mad-deċiżjoni tan-NU (stqarrija għall-istampa, 14/06/2018)

Il-ministri għall-intern iddiskutew is-sitwazzjoni attwali u t-triq 'il quddiem rigward għadd ta' kwistjonijiet ta' migrazzjoni. Huma qiesu kif isaħħu l-ħidma li għaddejja f'oqsma differenti, inkluż:

• l-appoġġ għall-aġenziji tal-UE
• ir-rispett kontinwu għad-dikjarazzjoni bejn l-UE u t-Turkija
• l-għoti ta' finanzjament biżżejjed għall-Fond Fiduċjarju tal-UE għall-Afrika
• l-appoġġ lis-sħab fil-Balkani tal-Punent

• Kunsill Ġustizzja u Affarijiet Interni, 04-05/06/2018

Il-Kunsill qabel ma' żieda fis-self mill-Bank Ewropew tal-Investiment għal proġetti barra mill-UE li jindirizzaw kwistjonijiet ta' migrazzjoni. €3.7 biljun huma allokati għal proġetti fis-setturi pubbliċi u privati biex jindirizzaw l-għeruq tal-migrazzjoni.

• BEI: Il-Kunsill japprova €3.7 biljun addizzjonali biex jiġu indirizzati kwistjonijiet ta' migrazzjoni (stqarrija għall-istampa, 27/02/2018)

Il-Kunsill Ewropew kellu dibattitu dwar id-dimensjonijiet esterni u interni tal-politika dwar il-migrazzjoni tal-UE. Huma vvalutaw dak li ħadem u dak li ma ħadimx fl-aħħar sentejn, u ddiskutew kif isaħħu l-politika.

Il-mexxejja tal-UE qalu wkoll li ser jipprovaw jilħqu qbil dwar ir-riforma tas-sistema ta' Dublin sa Ġunju 2018. Id-dibattitu kien ibbażat fuq nota ċċirkolata mill-President Tusk qabel is-summit.

• Laqgħa tal-Kunsill Ewropew (14-15/12/2017)

L-ambaxxaturi għall-UE qablu dwar mandat għal negozjati dwar abbozz ta' regoli għall-kwalifikazzjoni tal-applikanti għall-asil u kundizzjonijiet aħjar tal-għajxien għall-persuni li jfittxu asil madwar l-UE. Il-presidenza issa ser tibda n-negozjati mal-Parlament Ewropew.

• Kundizzjonijiet ta' akkoljenza għall-applikanti għal asil: Il-Kunsill jaqbel dwar mandat għal negozjar (stqarrija għall-istampa, 29/11/2017)

Il-Kunsill adotta r-regolament għal sistema ta' dħul/ħruġ u r-regolament li jemenda l-kodiċi tal-fruntieri ta' Schengen b'rabta mas-sistema ta' dħul/ħruġ.

Din is-sistema ser tirreġistra informazzjoni dwar id-dħul, il-ħruġ u ċ-ċaħda tad-dħul ta' ċittadini ta' pajjiżi li mhumiex fl-UE li jaqsmu l-fruntieri esterni taż-żona Schengen.

• Sistema ta' dħul/ħruġ: adozzjoni finali mill-Kunsill (stqarrija għall-istampa, 20/11/2017)

L-ambaxxaturi għall-UE qablu dwar mandat għal negozjati dwar regolament li jistabbilixxi qafas ta' risistemazzjoni tal-UE għall-ammissjoni ta' persuni li jfittxu asil.

L-abbozz ta' regolament jipprova:

• jipprevedi mogħdijiet legali u sikuri lejn l-UE
• jipprovdi regoli komuni għar-risistemazzjoni u l-ammissjoni umanitarja
• jgħin biex tittaffa l-pressjoni f'pajjiżi li mhumiex fl-UE fejn ġew spostati numru kbir ta' persuni li jfittxu asil

• Qafas ta' risistemazzjoni tal-UE: il-Kunsill lest biex jibda n-negozjati (stqarrija għall-istampa, 15/11/2017)

Il-mexxejja tal-UE qablu li joffru appoġġ aktar b'saħħtu lill-ħidma tal-Italja mal-Libja u li joffru finanzjament adegwat għal proġetti marbutin mal-migrazzjoni fl-Afrika ta' Fuq. "Għandna nosservaw riżultati konkreti fil-ftit ġimgħat li ġejjin", qal il-President Tusk wara l-laqgħa.

Huma wiegħdu wkoll li jkomplu bit-taħditiet dwar ir-riforma tas-sistema ta' Dublin fis-summit tagħhom f'Diċembru, bil-ħsieb li jintlaħaq kunsens fl-ewwel nofs tal-2018.

• Kunsill Ewropew, 19 u 20 ta' Ottubru 2017

Il-Kunsill estenda l-mandat tal-EUNAVFOR MED Operazzjoni Sophia sal-31 ta' Diċembru 2018. Il-Kunsill emenda wkoll il-mandat tal-operazzjoni biex:

• tistabbilixxi mekkaniżmu ta' monitoraġġ ta' dawk li jkunu qed jiġu mħarrġin biex tiġi żgurata l-effiċjenza fit-tul tat-taħriġ tal-Gwardja tal-Kosta Libjana
• twettaq attivitajiet ġodda ta' sorveljanza u tiġbor informazzjoni dwar it-traffikar illegali ta' esportazzjonijiet taż-żejt mil-Libja
• ittejjeb il-possibbiltajiet għall-kondiviżjoni ta' informazzjoni dwar it-traffikar tal-bnedmin mal-aġenziji tal-infurzar tal-liġi tal-istati membri, FRONTEX u EUROPOL

• EUNAVFOR MED Operazzjoni Sophia: mandat estiż sal-31 ta' Diċembru 2018 (stqarrija għall-istampa, 25/07/2017)

L-ambaxxaturi għall-UE kkonfermaw qbil bejn il-presidenza Maltija u l-Parlament Ewropew li ntlaħaq fid-29 ta' Ġunju dwar il-kwistjonijiet politiċi ta' proposta għal Sistema ta' Dħul/Ħruġ u proposta li temenda l-Kodiċi tal-Fruntieri ta' Schengen fir-rigward tas-Sistema ta' Dħul/Ħruġ.

Dan ser iwitti t-triq għal ftehim ġenerali ladarba jkunu solvuti l-kwistjonijiet tekniċi pendenti.

Din is-sistema ser tirreġistra informazzjoni dwar id-dħul, il-ħruġ u ċ-ċaħda tad-dħul ta' ċittadini ta' pajjiżi li mhumiex fl-UE li jaqsmu l-fruntieri esterni taż-żona Schengen.

• Sistema ta' dħul/ħruġ: Il-Kunsill jikkonferma l-ftehim bejn il-Presidenza u l-Parlament Ewropew dwar id-dispożizzjonijiet politiċi ewlenin (stqarrija għall-istampa, 30/06/2017)

Il-presidenza Maltija u r-rappreżentanti tal-Parlament Ewropew laħqu qbil politiku ġenerali ad referendum dwar kull wieħed mit-tnax-il kapitolu tar-regolament dwar l-Aġenzija tal-Unjoni Ewropea għall-Asil.

Il-qbil huwa soġġett għall-approvazzjoni mill-Coreper fil-futur qarib wara li ssir aktar ħidma fuq il-premessi. Barra minn hekk, il-qbil jeskludi ċerti partijiet tat-test li huma relatati ma' proposti leġislattivi oħra fil-pakkett dwar ir-reviżjoni tas-Sistema Ewropea Komuni tal-Asil (SEKA) li għadhom ma ġewx iffinalizzati.

• Aġenzija tal-UE għall-Asil: il-Presidenza u l-Parlament Ewropew jilħqu ftehim politiku ġenerali (stqarrija għall-istampa, 29/06/2017)

Il-mexxejja tal-UE appellaw għal aktar azzjoni biex jitnaqqas il-fluss ta' migranti mil-Libja lejn l-Italja, tul ir-rotta tal-Mediterran Ċentrali. B'mod partikolari, ikkonċentraw fuq:

• l-għoti ta' aktar taħriġ u tagħmir lill-gwardji tal-kosta Libjani
• kooperazzjoni aktar mill-qrib mal-pajjiżi ta' oriġini u ta' tranżitu
• aktar sforzi biex jiżdiedu r-ritorni

Huma qalu li għandhom jiġu stabbiliti b'mod urġenti ftehimiet ta' riammissjoni ma' pajjiżi li mhumiex fl-UE. Il-mexxejja tal-UE tennew ukoll il-bżonn li tiġi rriformata s-sistema komuni tal-asil.

• Kunsill Ewropew, 22-23/06/2017

Il-ministri adottaw konklużjonijiet tal-Kunsill biex itennu li t-tfal migranti għandhom id-dritt li jiġu protetti, f'konformità mad-dispożizzjonijiet rilevanti tal-liġi tal-UE, inkluż il-Karta tad-Drittijiet Fundamentali tal-UE, u mad-dritt internazzjonali dwar id-drittijiet tat-tfal.

Fl-2015 u fl-2016, 30 fil-mija tal-applikanti għall-asil fl-UE kienu tfal, b'ħafna minnhom jivvjaġġaw mingħajr il-familja tagħhom.

• Konklużjonijiet tal-Kunsill dwar il-protezzjoni tat-tfal migranti

Il-Kunsill ippermetta estensjoni temporanja tal-kontrolli fil-fruntieri interni f'ċirkostanzi eċċezzjonali. L-Awstrija, il-Ġermanja, id-Danimarka, l-Iżvezja u n-Norveġja jistgħu jestendu l-kontrolli proporzjonati u temporanji fil-fruntieri f'partijiet speċifiċi tal-fruntieri tagħhom għal mhux aktar minn sitt xhur.

• Żona Schengen: Il-Kunsill jirrakkomanda l-estensjoni tal-kontrolli fil-fruntieri interni għal perjodu ta' mhux iktar minn sitt xhur

Il-Kunsill adotta rakkomandazzjoni għall-estensjoni tal-kontrolli temporanji fil-fruntieri interni f'ċirkostanzi eċċezzjonali. L-Awstrija, il-Ġermanja, id-Danimarka, l-Iżvezja u n-Norveġja għandhom jestendu l-kontrolli proporzjonati u temporanji fil-fruntieri f'partijiet speċifiċi tal-fruntieri tagħhom għal mhux aktar minn tliet xhur.

• Żona Schengen: Il-Kunsill jirrakkomanda l-estensjoni tal-kontrolli fil-fruntieri interni

Imlaqqgħin f'summit informali, il-mexxejja tal-UE adottaw id-Dikjarazzjoni ta' Malta, li tiffoka fuq miżuri biex jitnaqqas il-fluss ta' migranti tul ir-rotta tal-Mediterran Ċentrali u biex jiġi indirizzat il-mudell kummerċjali ta' dawk li jiffaċilitaw id-dħul klandestin ta' bnedmin. B'mod partikolari, it-28 kap ta' stat jew ta' gvern tal-UE qablu li jżidu l-kooperazzjoni mal-Libja, minn fejn telqu 90 % tal-migranti fl-2016.

• Dikjarazzjoni ta' Malta mill-membri tal-Kunsill Ewropew dwar l-aspetti esterni tal-migrazzjoni: nindirizzaw ir-rotta tal-Mediterran Ċentrali, 3 ta' Frar 2017

Ir-riżerva ta' reazzjoni rapida hija magħmula minn 1 500 uffiċjal mogħti mill-istati membri tal-UE u l-pajjiżi assoċjati ta' Schengen. F'sitwazzjoni ta' kriżi, huma jkunu għad-dispożizzjoni immedjata tal-Frontex, li tista' timmobilizzahom fi żmien ħamest ijiem ta' xogħol.

• L-Aġenzija Ewropea għall-Gwardja tal-Fruntiera u tal-Kosta tniedi riżerva ta' intervent rapidu

Il-Kumitat tar-Rappreżentanti Permanenti (Coreper) approva test ta' kompromess miftiehem mal-Parlament Ewropew dwar emenda għall-Kodiċi tal-Fruntieri ta' Schengen biex jissaħħu l-kontrolli fil-bażijiet tad-data rilevanti fil-fruntieri esterni.

• Kodiċi tal-Fruntieri ta' Schengen: qbil biex jissaħħu l-kontrolli fil-fruntieri esterni

Il-ministri ddiskutew in-nuqqasijiet fl-implimentazzjoni tal-miżuri differenti dwar il-migrazzjoni adottati s'issa. Huma impenjaw ruħhom b'mod partikolari li jżidu n-numru ta' esperti pprovduti mill-istati membri lill-aġenziji (speċjalment l-EASO).

Il-Kunsill ittratta wkoll ir-riforma tas-sistema Ewropea komuni tal-asil, fejn il-ministri approvaw l-approċċ fuq tliet linji ssuġġerit mill-presidenza.

• Kunsill Ġustizzja u Affarijiet Interni, 13-14 ta' Ottubru 2016

L-Aġenzija Ewropea għall-Gwardja tal-Fruntiera u tal-Kosta tnediet uffiċjalment fis-6 ta' Ottubru 2016. L-avveniment tat-tnedija sar fil-Punt ta' Kontroll tal-Fruntiera Kapitan Andreevo, fil-fruntiera esterna Bulgara mat-Turkija.

"Qed noħolqu realtà ġdida fil-fruntieri esterni tagħna. Dan huwa eżitu tanġibbli tal-impenn konġunt li ntlaħaq qbil dwaru fil-Pjan Direzzjonali ta' Bratislava, kif ukoll wirja prattika ta' għaqda bejn l-istati membri," qal Robert Fico, Prim Ministru tas-Slovakkja u detentur tal-Presidenza b'rotazzjoni tal-Kunsill. "Ser jgħinna nerġgħu lura lejn Schengen," huwa żied jgħid.

L-Aġenzija Ewropea għall-Gwardja tal-Fruntiera u tal-Kosta ser tissorvelja mill-qrib il-fruntieri esterni tal-UE u ser taħdem flimkien mal-istati membri biex tiġi identifikata u indirizzata malajr kwalunkwe theddida potenzjali għas-sigurtà fil-fruntieri esterni tal-UE.

Il-Kunsill ta l-approvazzjoni finali tiegħu għal gwardja Ewropea tal-fruntiera u tal-kosta. Ir-rwol ewlieni tagħha huwa li tgħin biex tiġi pprovduta ġestjoni integrata tal-fruntieri fil-fruntieri esterni. Din ser tiżgura l-ġestjoni effettiva tal-flussi migratorji u tipprovdi livell għoli ta' sigurtà għall-UE.

• il-Gwardja Ewropea tal-Fruntiera u tal-Kosta: approvazzjoni finali

Il-Kumitat Politiku u ta' Sigurtà awtorizza lil EU NAVFOR MED operazzjoni Sophia tibda żewġ kompiti addizzjonali ta' appoġġ:

• it-taħriġ tal-gwardji tal-kosta u l-flotta navali Libjani
• kontribut għall-implimentazzjoni tal-embargo tan-NU fuq l-armi fl-ibħra miftuħa 'l barra mill-kosta tal-Libja

• EUNAVFOR MED Operazzjoni Sophia awtorizzata li tibda żewġ kompiti addizzjonali ta' sostenn

Il-Kunsill estenda l-mandat ta' EUCAP Sahel Niger sal-15 ta' Lulju 2018. Huwa adatta wkoll il-mandat tal-missjoni biex tgħin lill-awtoritajiet Niġerini fl-iżvilupp ta' politiki, tekniki u proċeduri għal titjib fil-kontroll tal-migrazzjoni irregolari.

• EUCAP Sahel Niger: missjoni estiża, baġit maqbul, mandat emendat

Il-Kummissjoni Ewropea ppreżentat it-tieni sensiela ta' proposti biex tirriforma s-sistema Ewropea komuni tal-asil u proposta biex jinħoloq qafas komuni tal-UE għar-risistemazzjoni.

• It-tlestija tar-riforma tas-sistema Ewropea komuni tal-asil
• Titjib tal-mezzi legali: Il-Kummissjoni tipproponi li toħloq qafas komuni tal-UE għar-risistemazzjoni

Il-Kumitat tar-Rappreżentanti Permanenti (Coreper) ikkonferma t-test ta' kompromess miftiehem mal-Parlament Ewropew dwar ir-regolament propost għal Gwardja Ewropea tal-fruntiera u tal-kosta. Il-gwardja Ewropea tal-fruntiera u tal-kosta ser tkun tikkonsisti minn aġenzija Ewropea (l-aġenzija Frontex attwali b'kompiti estiżi) u l-awtoritajiet nazzjonali tal-pajjiżi Schengen responsabbli mill-ġestjoni tal-fruntieri.

• Gwardja Ewropea tal-Fruntiera u tal-Kosta: il-Kunsill jikkonferma qbil mal-Parlament

Il-Kunsill estenda l-mandat ta' EU NAVFOR Med operazzjoni Sophia b'sena sas-27 ta' Lulju 2017. Huwa wessa' wkoll il-mandat tal-operazzjoni biż-żieda ta' żewġ kompiti ta' appoġġ:

• it-taħriġ tal-gwardji tal-kosta u l-flotta navali Libjani
• kontribut għall-implimentazzjoni tal-embargo tan-NU fuq l-armi fl-ibħra miftuħa 'l barra mill-kosta tal-Libja

• EUNAVFOR MED operazzjoni Sophia: mandat estiż b'sena, żewġ kompiti ġodda miżjuda

Il-Ministri ddiskutew is-sitwazzjoni attwali, billi kkonċentraw b'mod partikolari fuq l-implimentazzjoni tad-dikjarazzjoni UE-Turkija tat-18 ta' Marzu u fuq il-flussi migratorji fil-Mediterran Ċentrali. Huma tennew li għandu jiżdied l-għadd ta' persuni li jirritornaw lejn it-Turkija mill-Greċja. L-istati parteċipanti ġew mistiedna wkoll iħaffu r-risistemazzjoni tar-refuġjati Sirjani mit-Turkija u r-rilokazzjoni ta' persuni li jfittxu asil mill-Greċja u l-Italja.

Il-Kunsill adotta deċiżjoni li għandha l-għan li tissospendi għal sena l-obbligi tal-Iżvezja rigward ir-rilokazzjoni ta' persuni li għandhom bżonn protezzjoni internazzjonali mill-Italja u l-Greċja. Adotta wkoll konklużjonijiet dwar ir-ritorn u r-riammissjoni.

• Laqgħa tal-Kunsill Ġustizzja u Affarijiet Interni tad-9 u l-10 ta' Ġunju 2016

Il-Kummissjoni Ewropea ppreżentat komunikazzjoni għal qafas ta' sħubija ma' pajjiżi terzi.

• Komunikazzjoni mill-Kummissjoni dwar l-istabbiliment ta' qafas ġdid ta' sħubija ma' pajjiżi terzi taħt l-Aġenda Ewropea dwar il-Migrazzjoni

Il-Kummissjoni Ewropea ppreżentat ukoll proposta għal direttiva dwar il-kondizzjonijiet ta' dħul u residenza ta' ċittadini ta' pajjiżi terzi bil-għan li jsibu impjieg li jeħtieġ ħiliet avvanzati.

• Il-proposta tal-Kummissjoni li tiġi riformata l-iskema tal-‘Karta Blu' għal ħaddiema b'ħiliet avvanzati minn barra l-UE

Il-G7 appella għal rispons globali għall-kriżi tal-migrazzjoni u tar-refuġjati. Il-mexxejja ħadu l-impenn li jżidu l-assistenza globali biex tagħmel tajjeb għall-ħtiġijiet tar-refuġjati u l-komunitajiet li qed jospitawhom. Huma talbu lill-istituzzjonijiet finanzjarji u lid-donaturi bilaterali biex iżidu l-assistenza tagħhom. Huma qablu wkoll li jtejbu l-mezzi legali għall-migrazzjoni u jinkoraġġixxu l-istabbiliment ta' skemi ta' risistemazzjoni.

• Dikjarazzjoni sħiħa tal-mexxejja, summit tal-G7, il-Ġappun, 26-27 ta' Mejju 2016
• Summit tal-G7, Ise-Shima, il-Ġappun, 26-27 ta' Mejju 2016

Il-ministri kellhom diskussjoni dwar l-aspetti esterni tal-migrazzjoni. Huma analizzaw l-implimentazzjoni tal-pjan ta' azzjoni tal-Belt Valletta u d-dikjarazzjoni UE-Turkija.

Il-Kunsill adotta konklużjonijiet dwar EUNAVFOR MED Operazzjoni Sophia, u estenda l-mandat tal-operazzjoni b'sena u żied żewġ kompiti ta' appoġġ.

• Konklużjonijiet tal-Kunsill dwar l-aspetti esterni tal-migrazzjoni
• Konklużjonijiet tal-Kunsill dwar EUNAVFOR MED Operazzjoni Sophia
• Kunsill Affarijiet Barranin ta' 23/05/2016

Il-ministri għall-intern kellhom skambju ta' fehmiet dwar is-sitwazzjoni attwali. Huma kkonċentraw b'mod partikolari fuq l-implimentazzjoni tad-dikjarazzjoni UE-Turkija tat-18 ta' Marzu u l-flussi migratorji fil-Mediterran Ċentrali.

L-istati parteċipanti ġew mistiedna jħaffu r-risistemazzjoni tar-refuġjati Sirjani mit-Turkija u r-rilokazzjoni tal-applikanti għal asil mill-Greċja u l-Italja, skont id-deċiżjonijiet eżistenti.

• Kunsill Ġustizzja u Affarijiet Interni, 20/05/2016

Il-Kunsill adotta deċiżjoni ta' implimentazzjoni li tagħti rakkomandazzjoni li tippermetti li jkomplu l-kontrolli temporanji fil-fruntieri interni f'ċirkostanzi eċċezzjonali. L-Awstrija, il-Ġermanja, id-Danimarka, l-Iżvezja u n-Norveġja għandhom jibqgħu jwettqu kontrolli temporanji proporzjonati fil-fruntieri f'partijiet speċifiċi tal-fruntiera tagħhom għal perjodu ta' mhux aktar minn sitt xhur.

• Il-Kunsill jadotta rakkomandazzjoni biex ikomplu l-kontrolli fil-fruntieri interni

Il-ministri kkonċentraw fuq l-implimentazzjoni tal-pjan ta' azzjoni tal-Belt Valletta u l-Fond Fiduċjarju ta' Emerġenza għall-Afrika. Huma analizzaw ukoll l-istat attwali tad-djalogi ta' livell għoli mal-pajjiżi sħab.

Il-Kunsill iddiskuta kif l-aħjar jiġu appoġġati persuni spostati u refuġjati fi kriżijiet li jdumu.

• Kunsill Affarijiet Barranin (Żvilupp), 12/05/2016

Il-Kummissjoni Ewropea ppreżentat serje ta' proposti biex tirriforma s-sistema Ewropea komuni tal-asil.

• Lejn sistema Ewropea komuni tal-asil sostenibbli u ġusta

Il-Kummissjoni ppreżentat ukoll proposta għal deċiżjoni ta' implimentazzjoni tal-Kunsill li tagħti rakkomandazzjoni għat-tkomplija tal-kontrolli temporanji fil-fruntieri interni f'ċirkostanzi eċċezzjonali.

Il-ministri għall-affarijiet interni eżaminaw il-progress fl-implimentazzjoni tal-miżuri eżistenti. Huma affermaw ukoll mill-ġdid il-ħtieġa li titħaffef l-implimentazzjoni tad-dikjarazzjoni bejn l-UE u t-Turkija tat-18 ta' Marzu 2016.

Il-ministri kienu infurmati dwar il-progress li sar fl-abbozz ta' regolament dwar il-Gwardja Ewropea tal-Fruntiera.

• Kunsill Ġustizzja u Affarijiet Interni, 21 ta' April 2016

Il-ministri ddiskutew l-aspetti esterni tal-migrazzjoni. Huma qiesu l-progress fl-implimentazzjoni tal-miżuri inklużi fid-dikjarazzjoni bejn l-UE u t-Turkija u eżaminaw l-inizjattivi meħuda għar-rotta tal-Mediterran Ċentrali. Enfasizzaw ukoll l-azzjonijiet fil-ġlieda kontra t-traffikanti u l-faċilitaturi ta' dħul klandestin, kif ukoll l-appoġġ tal-UE lill-Afrika.

• Kunsill Affarijiet Barranin, 18-19/04/2016

Il-Kumitat tar-Rappreżentanti Permanenti qabel dwar il-pożizzjoni ta' negozjar tal-Kunsill għar-regolament propost dwar il-gwardja Ewropea tal-fruntiera. Hekk kif il-Parlament Ewropew jadotta l-pożizzjoni tiegħu, il-presidenza ser tibda n-negozjati bl-għan li jintlaħaq qbil politiku sal-aħħar ta' Ġunju 2016.

L-objettiv prinċipali tal-gwardja Ewropea tal-fruntiera hu li tiġi żgurata u implimentata, bħala responsabbiltà kondiviża, il-ġestjoni integrata Ewropea tal-fruntieri fuq il-fruntieri esterni tal-UE. Hija tkun magħmula minn Aġenzija Ewropea għall-Gwardja tal-Fruntiera u l-awtoritajiet nazzjonali responsabbli għall-ġestjoni tal-fruntieri.

• Gwardja Ewropea tal-Fruntiera: il-Kunsill lest biex jinnegozja mal-Parlament Ewropew

Wara d-dikjarazzjoni UE-Turkija tat-18 ta' Marzu, il-Kummissjoni Ewropea għamlet proposta biex tiġi emendata d-deċiżjoni tal-Kunsill li jiġu rilokati persuni li jeħtieġu protezzjoni internazzjonali mill-Italja u l-Greċja. Din il-proposta tagħmel disponibbli 54 000 post li ma kinux għadhom ġew allokati, sabiex jiġu risistemati Sirjani mit-Turkija fl-UE.

• Proposta għal deċiżjoni li temenda d-deċiżjoni tal-Kunsill tat-22 ta' Settembru 2015 li tistabbilixxi miżuri proviżorji fil-qasam tal-protezzjoni internazzjonali għall-benefiċċju tal-Italja u l-Greċja

Il-Kunsill Ewropew kompla jiddiskuti l-istrateġija komprensiva tiegħu biex tiġi indirizzata l-kriżi tal-migrazzjoni.

Fil-laqgħa tagħhom fit-18 ta' Marzu, il-mexxejja tal-UE u tat-Turkija laħqu ftehim li għandu l-għan li jwaqqaf il-fluss tal-migrazzjoni irregolari li jgħaddi mit-Turkija lejn l-Ewropa, li jkisser il-mudell ta' negozju tal-faċilitaturi ta' dħul klandestin u li joffri lill-migranti alternattiva sabiex ma jpoġġux ħajjithom f'riskju.

• Kunsill Ewropew, 17-18 ta' Marzu 2016
• Dikjarazzjoni UE-Turkija, 18 ta' Marzu 2016
• Konklużjonijiet tal-Kunsill Ewropew, 17-18 ta' Marzu 2016

Il-Kunsill aċċetta l-abbozz ta' baġit emendatorju propost mill-Kummissjoni fid-9 ta' Marzu 2016. Huwa qabel li jagħmel disponibbli €100 miljun f'impenji u €80.2 miljun f'pagamenti mill-baġit tal-UE għall-2016 biex jappoġġa lill-Greċja u lil stati membri oħra li jinsabu f'diffikultà minħabba l-kriżi tar-refuġjati.

L-abbozz ta' baġit emendatorju issa jrid jiġi approvat mill-Parlament Ewropew.

Fil-15 ta' Marzu, il-Kunsill adotta regolament li ser jippermetti lill-UE biex tgħin lill-Greċja u stati membri oħra affettwati biex jindirizzaw is-sitwazzjoni umanitarja diffiċli li rriżultat mill-kriżi tal-migrazzjoni. L-għajnuna umanitarja tal-UE għandha l-għan li tipprovdi lir-refuġjati b'ikel, kenn, ilma, mediċini u ħtiġijiet bażiċi oħrajn.

• Kriżi tar-refuġjati: il-Kunsill jistabbilixxi appoġġ ta' emerġenza

Il-ministri ddiskutew is-sitwazzjoni attwali u l-implimentazzjoni tad-dikjarazzjoni li l-mexxejja tal-UE laħqu qbil dwarha fis-7 ta' Marzu. Il-ministri ngħataw ukoll informazzjoni mill-presidenza dwar is-sitwazzjoni attwali tar-regolament propost li jistabbilixxi Gwardja Ewropea tal-Fruntiera u tal-Kosta.

Il-Kunsill adotta konklużjonijiet dwar il-faċilitazzjoni ta' dħul klandestin ta' migranti. Huwa adotta wkoll deċiżjoni ta' implimentazzjoni dwar sospensjoni temporanja tar-rilokazzjoni ta' 30 % tal-applikanti allokati lill-Awstrija skont id-deċiżjoni 2015/1601.

• Konklużjonijiet tal-Kunsill dwar il-faċilitazzjoni ta' dħul klandestin ta' migranti
• Deċiżjoni ta' implimentazzjoni tal-Kunsill dwar is-sospensjoni temporanja tar-rilokazzjoni ta' 30 % tal-applikanti allokati lill-Awstrija skont id-deċiżjoni 2015/1601

Il-Kunsill qabel dwar mekkaniżmu ta' appoġġ ta' emerġenza f'każ ta' kriżi fl-UE. Dan ser jippermetti lill-UE biex tgħin lill-Greċja u stati membri oħra affettwati biex jindirizzaw is-sitwazzjoni umanitarja diffiċli kkawżata bil-kriżi tal-migrazzjoni. L-għajnuna umanitarja tal-UE għandha l-għan li tipprovdi lir-refuġjati b'ikel, kenn, ilma, mediċini u ħtiġijiet bażiċi oħrajn.

Din il-proposta għandha tiġi ppreżentata fil-laqgħa tal-Kunsill Affarijiet Ġenerali għal adozzjoni formali fil-15 ta' Marzu.

• Kriżi tar-refuġjati: il-Kunsill juri solidarjetà mal-Greċja billi japprova appoġġ ta' emerġenza

Il-mexxejja tal-UE kellhom laqgħa mat-Turkija biex isaħħu l-kooperazzjoni tagħhom fuq il-kriżi tal-migrazzjoni. Huma appellaw għall-implimentazzjoni sħiħa u rapida tal-Pjan ta' Azzjoni bejn l-UE u t-Turkija, kif ukoll biex jitnaqqas l-għadd ta' daħliet illegali mit-Turkija għall-Greċja.

Huma ddiskutew ukoll xi proposti ġodda biex tiġi indirizzata l-kriżi. Il-President Tusk ngħata l-biċċa xogħol li jistudja d-dettalji tagħhom qabel il-Kunsill Ewropew li jmiss.

• Laqgħa tal-kapijiet ta' stat jew ta' gvern tal-UE mat-Turkija, 7 ta' Marzu 2016
• Dikjarazzjoni tal-Kapijiet ta' Stat jew ta' Gvern tal-UE, 7 ta' Marzu 2016

Il-Kummissjoni ppreżentat proposta għal regolament tal-Kunsill li joħloq strument ta' għajnuna ta' emerġenza għal kriżi fl-UE. Dan jippermetti li tingħata għajnuna umanitarja b'rispons għal kriżi kbira li tolqot l-istati membri, inkluża l-kriżi attwali tal-migrazzjoni.

• Proposta għal regolament tal-Kunsill dwar l-għoti ta' appoġġ ta' emerġenza fl-UE

Il-ministri ddiskutew is-sitwazzjoni attwali tal-migrazzjoni u tennew il-ħtieġa għal soluzzjoni Ewropea komuni. Huma ffukaw fuq il-progress li sar fl-implimentazzjoni tal-miżuri eżistenti, fuq il-kooperazzjoni mat-Turkija u fuq ir-rotta tal-Balkani tal-Punent.

Il-Kunsill ħa rendikont ukoll tal-ħidma fuq il-proposta għal gwardja Ewropea tal-fruntiera u tal-kosta.

• Kunsill Ġustizzja u Affarijiet Interni, 25 ta' Frar 2016

Il-mexxejja tal-UE adottaw konklużjonijiet dwar il-kriżi tal-migrazzjoni. Huma ffukaw fuq il-ħtieġa li jintlaħaq kunsens Ewropew dwar il-migrazzjoni u dwar l-implimentazzjoni tad-deċiżjonijiet li diġà ttieħdu. Huma enfasizzaw il-ħtieġa li jsir progress:

• fl-implimentazzjoni tal-Pjan ta' Azzjoni UE-Turkija
• fl-għoti ta' assistenza umanitarja lir-refuġjati, inkluż fil-Balkani tal-Punent
• fl-iżgurar li l-hotspots ikunu funzjonali b'mod sħiħ
• fl-implimentazzjoni tad-deċiżjonijiet dwar ir-rilokazzjoni, ir-ritorn u r-riammissjoni
• fit-titjib fil-ġestjoni tal-fruntieri esterni
• fil-funzjonament normali mill-ġdid taż-żona Schengen

• Kunsill Ewropew, 18-19 ta' Frar 2016

Il-Kunsill adotta rakkomandazzjoni dwar l-indirizzar ta' nuqqasijiet serji identifikati waqt evalwazzjoni tal-applikazzjoni mill-Greċja tal-acquis ta' Schengen fil-qasam tal-ġestjoni tal-fruntieri esterni. Ir-rakkomandazzjoni tipproponi li l-Greċja tieħu azzjoni ta' rimedju biex tindirizza dawn in-nuqqasijiet.

• Rakkomandazzjoni dwar l-indirizzar tan-nuqqasijiet serji identifikati fl-evalwazzjoni tal-2015 dwar l-applikazzjoni tal-acquis ta' Schengen fil-qasam tal-ġestjoni tal-fruntieri esterni mill-Greċja
• Evalwazzjoni ta' Schengen tal-Greċja: Il-Kunsill jadotta rakkomandazzjoni li tindirizza nuqqasijiet fil-fruntieri esterni

Il-President tal-Kunsill Ewropew Donald Tusk ingħaqad ma' mexxejja dinjija oħra f'konferenza f'Londra biex iħabbar kontribuzzjoni tal-UE ta' €3 biljun f'assistenza lill-poplu Sirjan fl-2016. Din tinkludi kemm nies fis-Sirja kif ukoll ir-refuġjati u l-komunitajiet li qed jospitawhom fil-pajjiżi ġirien.

• L-UE twiegħed li tagħti aktar minn € 3 biljun lis-Sirjani fil-konferenza ta' Londra
• Intervent mill-President Donald Tusk fil-konferenza ta' Londra dwar Appoġġ għas-Sirja u r-Reġjun

L-istati membri qablu dwar kif għandhom jiġu ffinanzjati t-€3 biljun għall-faċilità tal-UE għar-refuġjati fit-Turkija. Dan ser jippermetti lill-UE twassal aktar assistenza umanitarja lir-refuġjati fit-Turkija u l-komunitajiet li jospitawhom.

• Faċilità għar-refuġjati għat-Turkija: l-istati membri jaqblu dwar id-dettalji tal-finanzjament

Il-Kunsill ikkonkluda li ġew sodisfatti l-kondizzjonijiet kollha biex l-operazzjoni Sophia ta' EUNAVFOR MED timplimenta fl-Ibħra Miftuħa r-Riżoluzzjoni 2240 tal-Kunsill tas-Sigurtà tan-NU. Din ir-riżoluzzjoni ssaħħaħ l-awtorità tal-operazzjoni Sophia biex jittieħdu miżuri kontra l-faċilitazzjoni tad-dħul klandestin ta' migranti u t-traffikar ta' bnedmin mit-territorju tal-Libja u lil hinn mill-kosta tagħha, taħt il-fażi 2 tal-operazzjoni (ibħra miftuħa). Il-fażi 2 bdiet fis-7 ta' Ottubru 2015.

• Deċiżjoni tal-kumitat politiku u ta' sigurtà dwar l-implimentazzjoni tar-riżoluzzjoni 2240 tal-Kunsill tas-Sigurtà tan-NU, 20 ta' Jannar 2016
• Adozzjoni tar-riżoluzzjoni 2240 tal-Kunsill tas-Sigurtà tan-NU

Il-ministri ddiskutew ukoll il-pożizzjoni tal-UE qabel il-konferenza tad-donaturi għas-Sirja, li ser issir f'Londra fl-4 ta' Frar 2016. Din il-konferenza għandha l-għan li tindirizza l-ħtiġijiet ekonomiċi fit-tul tar-refuġjati fir-reġjun u li żżid il-finanzjament disponibbli għall-pajjiżi l-aktar affettwati.

Il-Kunsill Ewropew ħa kont tal-implimentazzjoni tad-deċiżjonijiet meħuda f'laqgħat preċedenti u qabel li jħaffef l-azzjonijiet fuq:

• it-tħaddim ta' hotspots
• l-implimentazzjoni tad-deċiżjonijiet ta' rilokazzjoni u r-ritorni
• il-kontroll tal-fruntieri esterni tal-UE
• kooperazzjoni mal-pajjiżi ta' oriġini u ta' tranżitu

Il-mexxejja tal-UE talbu wkoll lill-Kunsill biex jeżamina rapidament il-proposta tal-Kummissjoni Ewropea għat-tisħiħ tal-fruntieri esterni tal-UE li nħarġet fil-15 ta' Diċembru.

• Konklużjonijiet dwar il-migrazzjoni - Kunsill Ewropew (17 ta' Diċembru 2015)
• Kunsill Ewropew, 17-18 ta' Diċembru 2015

Fil-kuntest tal-aġenda Ewropea dwar il-migrazzjoni, il-Kummissjoni Ewropea ressqet pakkett ta' proposti maħsuba għas-sigurtà tal-fruntieri esterni tal-UE u għal ġestjoni aktar effettiva tal-migrazzjoni.

• Pakkett ta' proposti mill-Kummissjoni Ewropea maħsub sabiex tiġi żgurata s-sigurtà fil-fruntieri esterni tal-Ewropa (Kummissjoni Ewropea - stqarrija għall-istampa)

Il-Kummissjoni ppreżentat ukoll:

• Rakkomandazzjoni għal skema volontarja ta' ammissjoni umanitarja mat-Turkija għal refuġjati mis-Sirja (Kummissjoni Ewropea - stqarrija għall-istampa)
• Proposta għal sospensjoni temporanja tal-obbligi tal-Iżvezja skont il-mekkaniżmu ta' rilokazzjoni tal-UE (Kummissjoni Ewropea - stqarrija għall-istampa)

Il-ministri għall-ġustizzja ħadu nota ta' rapport ta' progress dwar azzjonijiet relatati mal-kooperazzjoni ġudizzjarja u l-ġlieda kontra l-ksenofobija.

Il-ministri għall-affarijiet interni kellhom diskussjoni dwar l-implimentazzjoni ta' miżuri diġà miftiehma u dwar l-azzjonijiet meħtieġa biex tissaħħaħ iż-żona Schengen.

• Kunsill Ġustizzja u Affarijiet Interni, 03-04 ta' Diċembru 2015

L-UE u t-Turkija adottaw pjan ta' azzjoni konġunt biex tiġi indirizzata l-kriżi tar-refuġjati maħluqa mis-sitwazzjoni fis-Sirja.

L-UE u l-istati membri tagħha ser iħaffu l-involviment politiku u finanzjarju tagħhom biex iwaqqfu l-fluss ta' migrazzjoni lejn l-UE li jgħaddi mit-Turkija. L-UE impenjat ruħha li tipprovdi l-ewwel €3 biljun euro ta' riżorsi addizzjonali lit-Turkija biex tgħinha ttejjeb is-sitwazzjoni tar-refuġjati Sirjani li bħalissa jinsabu fil-pajjiż.

Il-pjan ta' azzjoni jinkludi wkoll aktar kooperazzjoni rigward il-migranti li m'għandhomx bżonn protezzjoni internazzjonali.

Barra minn hekk, il-ftehim ta' riammissjoni bejn l-UE u t-Turkija ser jiġi applikat bis-sħiħ minn Ġunju 2016. L-UE u t-Turkija qegħdin jimmiraw ukoll biex ikomplu l-proċess ta' liberalizzazzjoni tal-viża għaċ-ċittadini tat-Turkija fiż-żona Schengen sa Ottubru 2016.

• Laqgħa tal-kapijiet ta' stat jew ta' gvern mat-Turkija - Dikjarazzjoni UE-Turkija, 29 ta' Novembru 2015
• Laqgħa tal-Kapijiet ta' Stat jew ta' Gvern tal-Unjoni Ewropea mat-Turkija, 29 ta' Novembru 2015

Il-kwistjoni tal-integrazzjoni tal-migranti kienet element komuni fid-diskussjonijiet li saru fl-erba' laqgħat tal-Kunsill. Il-ministri ffukaw b'mod partikolari fuq:

• ir-rwol tal-politika dwar iż-żgħażagħ u l-ħidma fost iż-żgħażagħ b'rabta mal-migrazzjoni
• l-istrateġiji dwar l-edukazzjoni u t-taħriġ biex jiġu integrati migranti li waslu reċentement u persuni li ġejjin minn kuntest ta' migrazzjoni
• ir-rwol tad-djalogu interkulturali biex jitjieb l-intendiment reċiproku bejn il-migranti u l-pajjiżi ospitanti
• il-potenzjal edukattiv tal-isport biex tingħata għajnuna liż-żgħażagħ żvantaġġati, inklużi l-migranti

• Kunsill Edukazzjoni, Żgħażagħ, Kultura u Sport, 23-24 ta' Novembru 2015

Il-ministri ffokaw fuq is-segwitu tal-konferenza ta' livell għoli dwar ir-rotta tal-Balkani tal-Punent (8 ta' Ottubru) u s-Summit tal-Belt Valletta dwar il-migrazzjoni (11-12 ta' Novembru). Huma laqgħu d-diskussjonijiet mas-sħab Afrikani fil-Belt Valletta. Rigward ir-rotta tal-Balkani tal-Punent u tal-lvant, huma ddiskutew ukoll il-kooperazzjoni mat-Turkija, il-Libanu u Ġordan.

• Kunsill Affarijiet Barranin, 16-17 ta' Novembru 2015

Il-kapijiet ta' stat jew ta' gvern tal-UE ltaqgħu mal-kontropartijiet tagħhom minn pajjiżi Afrikani biex jiddiskutu kwistjonijiet tal-migrazzjoni. Huma qablu dwar pjan ta' azzjoni li jiffoka fuq ħames oqsma ta' prijorità:

• l-indirizzar tal-kawżi fundamentali tal-migrazzjoni irregolari u l-ispostament furzat
• it-titjib tal-ħidma għall-promozzjoni u l-organizzazzjoni ta' mezzi għal migrazzjoni legali
• it-titjib tal-protezzjoni tal-migranti u tal-persuni li jfittxu asil
• il-ġlieda kontra l-isfruttament u t-traffikar tal-migranti
• it-titjib tal-kooperazzjoni fil-qasam tar-ritorn, ir-riammissjoni u r-riintegrazzjoni

• Summit tal-Belt Valletta, 11-12 ta' Novembru 2015 - pjan ta' azzjoni
• Summit tal-Belt Valletta, 11-12 ta' Novembru 2015 - dikjarazzjoni politika
• Summit tal-Belt Valletta dwar il-migrazzjoni, 11-12 ta' Novembru 2015

Il-mexxejja tal-UE ddiskutew l-aħħar żviluppi fil-kriżi tal-migrazzjoni u dwar kif tista' tiġi aċċellerata l-implimentazzjoni tal-miżuri maqbula f'Settembru u Ottubru. Il-mexxejja tal-UE ffukaw id-diskussjonijiet tagħhom b'mod partikolari fuq il-kooperazzjoni mat-Turkija.

Il-President Tusk tenna l-ħtieġa li l-UE tikseb mill-ġdid il-kontroll tal-fruntieri esterni tagħha u tipproċedi b'mod effettiv għar-reġistrazzjoni tal-migranti.

• Kummenti għall-istampa mill-President Donald Tusk wara l-laqgħa informali tal-kapijiet ta' stat jew ta' gvern tal-UE
• Laqgħa informali tal-kapijiet ta' stat jew ta' gvern tal-UE fit-12 ta' Novembru 2015

Il-Ministri adottaw konklużjonijiet li jiddefinixxu aktar miżuri biex tiġi ttrattata l-kriżi tar-refuġjati u tal-migrazzjoni. Dawn jiffukaw fuq:

• li l-proċess ta' rilokazzjoni li għaddej bħalissa jsir aktar rapidu
• li jissaħħu l-fruntieri esterni tal-UE
• li jiġu miġġielda t-traffikar tal-bnedmin u l-faċilitazzjoni tad-dħul klandestin ta' persuni
• li jitjiebu r-ritorn u r-riammissjoni

Il-Kunsill appoġġa d-deċiżjoni tal-Presidenza li jiġi aġġornat ir-Rispons Politiku f'Sitwazzjonijiet ta' Kriżi għal modalità ta' attivazzjoni sħiħa.

• Konklużjonijiet tal-Kunsill dwar Miżuri biex tiġi indirizzata l-kriżi tar-refuġjati u l-migrazzjoni
• Kunsill Ġustizzja u Affarijiet Interni, 9 ta' Novembru 2015

Il-presidenza Lussemburgiża ddeċidiet li tattiva l-arranġamenti integrati għal rispons politiku f'sitwazzjonijiet ta' kriżi (IPCR) fil-modalità ta' kondiviżjoni tal-informazzjoni. L-istati membri u l-istituzzjonijiet tal-UE huma mitluba jikkondividu kontinwament informazzjoni aġġornata dwar is-sitwazzjoni fuq il-post permezz ta' pjattaforma komuni fuq l-internet. Il-Kummissjoni u s-SEAE ser jipprovdu analiżi integrata regolari tal-informazzjoni pprovduta.

L-għan huwa li jiġi sorveljat l-iżvilupp tal-flussi migratorji, li jingħata appoġġ għat-teħid tad-deċiżjonijiet u li l-miżuri miftiehma jiġu implimentati aħjar.

• Kriżi tal-migrazzjoni: il-Presidenza tal-Kunsill tal-UE żżid il-kondiviżjoni tal-informazzjoni bejn l-istati membri billi tattiva l-IPCR

Il-Ministri tal-UE kellhom dibattitu fil-fond dwar il-migrazzjoni, li jiffoka fuq il-kooperazzjoni għall-iżvilupp. Huma qablu li jsaħħu l-kooperazzjoni ma' pajjiżi terzi biex jindirizzaw l-isfidi komuni li għandhom quddiemhom bħalissa l-Ewropa u l-pajjiżi sħab tagħha.

• Kunsill Affarijiet Barranin, 26 ta' Ottubru 2015

Mexxejja li jirrappreżentaw l-Albanija, l-Awstrija, il-Bulgarija, il-Kroazja, l-eks Repubblika Jugoslava tal-Maċedonja, il-Ġermanja, il-Greċja, l-Ungerija, ir-Rumanija, is-Serbja u s-Slovenja qablu dwar pjan ta' azzjoni ta' 17-il punt biex titjieb il-kooperazzjoni bejn il-pajjiżi tul ir-rotta tal-migrazzjoni tal-Balkani tal-Punent sabiex tiġi ttrattata l-kriżi tar-refuġjati fir-reġjun.

• Dikjarazzjoni tal-mexxejja wara l-laqgħa dwar il-flussi tar-refuġjati tul ir-rotta tal-Balkani tal-Punent

Il-mexxejja tal-UE qablu fuq sensiela ta' prijoritajiet:

• il-kooperazzjoni ma' pajjiżi ta' oriġini u ta' transitu: laqgħu l-qbil dwar pjan ta' azzjoni konġunt bejn l-UE u t-Turkija u qablu li jiksbu miżuri operazzjonali konkreti fis-Summit li ġej tal-Belt Valletta
• it-tisħiħ tal-fruntieri esterni tal-UE: inkluż permezz ta' sistema integrata ta' ġestjoni tal-fruntieri li tmur lil hinn mill-mandat attwali tal-Frontex u ż-żieda ta' mijiet ta' gwardji oħra tal-fruntiera għas-sigurtà ta' żoni hotspots fil-Greċja u l-Italja
• ir-ritorn u r-riammissjoni: it-titjib tal-implimentazzjoni skont il-leġislazzjoni u ftehimiet eżistenti u t-tisħiħ tar-rwol tal-Frontex

• Kunsill Ewropew, 15 ta' Ottubru 2015
• Konklużjonijiet tal-Kunsill Ewropew, 15 ta' Ottubru 2015
• Il-Kriżi tar-Refuġjati: rapporti dwar il-progress fl-implimentazzjoni ta' azzjonijiet ta' prijorità (Kummissjoni Ewropea)

Il-ministri għall-affarijiet barranin tal-UE ddiskutew l-aspetti esterni tal-migrazzjoni. Il-Kunsill adotta konklużjonijiet biex jikkontribwixxi għad-diskussjonijiet tal-laqgħa tal-Kunsill Ewropew fil-15 ta' Ottubru.

• Konklużjonijiet tal-Kunsill dwar il-Migrazzjoni, 12 ta' Ottubru 2015
• Laqgħa tal-Kunsill Affarijiet Barranin, 12 ta' Ottubru 2015

Il-Kunsill iddiskuta l-ġestjoni futura tal-fruntieri esterni tal-UE, u adotta konklużjonijiet dwar il-futur tal-politika ta' ritorn.

• Konklużjonijiet tal-Kunsill dwar il-futur tal-politika ta' ritorn, 8 ta' Ottubru 2015
• Laqgħa tal-Kunsill Ġustizzja u Affarijiet Interni, 8-9 ta' Ottubru 2015

Il-ministri tal-UE għall-affarijiet interni u għall-affarijiet barranin iltaqgħu mal-kontropartijiet tagħhom mit-Turkija, il-Libanu, il-Ġordan u l-Balkani tal-Punent. Il-pajjiżi assoċjati, l-Iżvizzera, in-Norveġja, il-Liechtenstein u l-Iżlanda attendew ukoll.

Il-konferenza kellha l-għan li ttejjeb l-impenn fost is-sħab kollha, iżżid is-solidarjetà u tiżgura ġestjoni tajba tal-flussi migratorji u tar-refuġjati. Hija adottat dikjarazzjoni.

• Dikjarazzjoni tal-Konferenza ta' Livell Għoli dwar ir-Rotta tal-Mediterran tal-Lvant u l-Balkani tal-Punent
• Konferenza dwar ir-rotta tal-Lvant tal-Mediterran u l-Balkani tal-Punent, 8 ta' Ottubru 2015

Il-Kumitat Politiku u ta' Sigurtà qabel li jibda l-ewwel pass tat-tieni fażi tal-operazzjoni kontra faċilitaturi ta' dħul klandestin ta' persuni mis-7 ta' Ottubru 2015. B'hekk ser ikunu jistgħu jitwettqu t-tlugħ abbord, it-tfittxija, is-sekwestru u d-devjazzjoni fl-ibħra miftuħa ta' bastimenti suspettużi, b'rispett għad-dritt internazzjonali.

Il-KPS qabel ukoll li l-operazzjoni jinbidlilha isimha għal "Sophia", wara l-isem mogħti lit-tarbija mwielda fuq bastiment li kien qed jieħu sehem fl-operazzjoni.

• EUNAVFOR Med: L-UE taqbel li tibda l-fażi attiva tal-operazzjoni kontra l-faċilitaturi ta' dħul klandestin ta' bnedmin u li tingħata l-isem ġdid "Operazzjoni Sophia"

Il-mexxejja tal-UE qablu dwar sensiela ta' prijoritajiet għall-azzjoni li:

• tirreaġixxi għall-bżonnijiet urġenti tar-refuġjati permezz ta' assistenza mogħtija lill-UNHCR, il-Programm Dinji tal-Ikel, il-Libanu, il-Ġordan, it-Turkija u pajjiżi oħra
• tassisti lill-pajjiżi tal-Balkani tal-Punent fil-ġestjoni tal-flussi tar-refuġjati
• tindirizza l-kawżi fundamentali tal-migrazzjoni irregolari fl-Afrika
• tindirizza s-sitwazzjoni fil-fruntieri esterni tal-UE
• tappoġġa lill-istati membri l-aktar esposti permezz tal-istabbiliment ta' "hotspots" u tiżgura r-rilokazzjoni u r-ritorn

Huma ddiskutew ukoll kif għandhom jiġu indirizzati l-isfidi migratorji fit-tul u appellaw għal aktar sforzi diplomatiċi rigward is-Sirja u l-Libja.

• Dikjarazzjoni - laqgħa informali tal-kapijiet ta' stat jew ta' gvern, 23 ta' Settembru 2015
• Laqgħa informali tal-kapijiet ta' stat jew ta' gvern, 23 ta' Settembru 2015

Il-Kunsill adotta deċiżjoni li tistabbilixxi mekkaniżmu temporanju u eċċezzjonali ta' rilokazzjoni mill-Italja u mill-Greċja lejn stati membri oħra. Dan il-mekkaniżmu ser japplika għal 120 000 persuna fi bżonn ċar ta' protezzjoni internazzjonali.

• Deċiżjoni tal-Kunsill li tistabbilixxi miżuri proviżorji fil-qasam tal-protezzjoni internazzjonali għall-benefiċċju tal-Italja u l-Greċja
• Laqgħa tal-Kunsill Ġustizzja u Affarijiet Interni, 22 ta' Settembru 2015

Il-Kunsill adotta d-deċiżjoni finali li tistabbilixxi mekkaniżmu temporanju u eċċezzjonali ta' rilokazzjoni mill-Italja u mill-Greċja lejn stati membri oħra. Dan il-mekkaniżmu ser japplika għal 40 000 persuna fi bżonn ċar ta' protezzjoni internazzjonali.

Il-Presidenza fasslet sett ta' konklużjonijiet li ppreżentaw pjan ta' azzjoni biex jittratta l-kriżi tal-migrazzjoni.

• Il-Kunsill jaqbel dwar ir-rilokazzjoni mill-Greċja u l-Italja ta' 40 000 refuġjat
• Aqra t-test sħiħ tal-konklużjonijiet tal-presidenza
• Laqgħa tal-Kunsill Ġustizzja u Affarijiet Interni, 14 ta' Settembru 2015

Il-Kunsill adotta valutazzjoni pożittiva, u qabel li kienu ntlaħqu l-kondizzjonijiet biex issir it-transizzjoni għall-ewwel pass tat-tieni fażi. Din il-valutazzjoni kienet parti mill-passi formali meħtieġa fil-proċess ta' transizzjoni tal-operazzjoni lejn it-tieni fażi f'ibħra miftuħa.

• EUNAVFOR Med: Il-Kunsill jadotta valutazzjoni pożittiva dwar il-kondizzjonijiet biex wieħed jgħaddi għall-ewwel pass tat-tieni fażi fl-ibħra miftuħa

Biex titwettaq l-aġenda Ewropea dwar il-migrazzjoni ppreżentata f'Mejju, il-Kummissjoni Ewropea ppreżentat it-tieni pakkett ta' proposti biex jindirizzaw il-kriżi tar-refuġjati:

• proposta għal rilokazzjoni ta' emerġenza għal 120,000 persuna fi bżonn ċar ta' protezzjoni internazzjonali minn pajjiżi l-aktar esposti
• mekkaniżmu ta' rilokazzjoni permanenti għall-istati membri kollha
• lista ta' pajjiżi ta' oriġini sikuri komuni għall-Ewropa
• politika ta' ritorn aktar effettiva
• gwida dwar regoli tal-akkwist pubbliku għall-miżuri ta' appoġġ għar-refuġjati
• miżuri li jindirizzaw id-dimensjoni esterna tal-kriżi tar-refuġjati
• fond fiduċjarju għall-Afrika

• Pakkett ta' proposti mill-Kummissjoni Ewropea li jindirizza l-kriżi tar-refuġjati (Kummissjoni Ewropea - stqarrija għall-istampa)

Il-ministri tal-affarijiet interni qablu dwar il-kontribut minn kull stat membru għar-rilokazzjoni u r-risistemazzjoni tal-persuni li għandhom bżonn ċar ta' protezzjoni internazzjonali, li jilħqu t-total ta' 54 760 persuna.

Huma adottaw ukoll konklużjonijiet dwar id-deżinjazzjoni ta' ċerti pajjiżi terzi bħala pajjiżi ta' oriġini bla periklu.

• Laqgħa tal-Kunsill Ġustizzja u Affarijiet Interni, 20 ta' Lulju 2015

Abbażi tal-aġenda tal-Kummissjoni u diskussjonijiet fil-Kunsill, il-mexxejja tal-UE qablu dwar sensiela ta' miżuri li jkopru l-oqsma li ġejjin:

• ir-rilokazzjoni u r-risistemazzjoni
• ir-ritorn u r-riammissjoni
• il-kooperazzjoni ma' pajjiżi terzi

• Konklużjonijiet tal-Kunsill Ewropew, 25-26 ta' Ġunju 2015
• Laqgħa tal-Kunsill Ewropew, 25-26 ta' Ġunju 2015

Il-Kunsill nieda EU NAVFOR MED, operazzjoni navali kontra l-faċilitaturi ta' dħul klandestin tal-bnedmin u t-traffikanti tal-bnedmin fil-Mediterran. Il-missjoni ser titwettaq f'fażijiet sekwenzjali fejn l-ewwel fażi ser tiffoka fuq is-sorveljanza u l-valutazzjoni tan-netwerks ta' faċilitazzjoni ta' dħul klandestin tal-bnedmin u t-traffikar tal-bnedmin.

• Il-Kunsill nieda operazzjoni navali tal-UE biex tisfratta l-faċilitaturi ta' dħul klandestin u traffikanti ta' bnedmin fil-Mediterran

Il-President tal-Kunsill Ewropew, Donald Tusk, ħatar lill-Ambaxxatur Pierre Vimont biex imexxi t-tħejjijiet għall-Konferenza tal-Belt Valletta bejn l-UE u l-pajjiżi Afrikani.

• Il-President Tusk jaħtar lil Pierre Vimont bħala mibgħut personali għall-Konferenza tal-Belt Valletta, 16 ta' Ġunju 2015

Fil-laqgħa tal-Kunsill tagħhom ta' Ġunju, il-ministri għall-affarijiet interni tal-UE ddiskutew l-aspetti differenti tal-aġenda Ewropea dwar il-migrazzjoni proposta mill-Kummissjoni Ewropea u l-pakkett tagħha għall-implimentazzjoni.

Il-biċċa l-kbira tad-delegazzjonijiet laqgħu n-natura komprensiva u trasversali tagħha, kif ukoll it-taħlita tagħha ta' azzjonijiet immedjati biex jiġu indirizzati l-kriżijiet attwali u l-miżuri fit-tul proposti li għandhom iwasslu għall-istabbiliment ta' politika verament Ewropea dwar il-migrazzjoni.

• Laqgħa tal-Kunsill Ġustizzja u Affarijiet Interni, 15-16 ta' Ġunju 2015

Wara l-aġenda Ewropea dwar il-migrazzjoni ppreżentata ġimagħtejn qabel, il-Kummissjoni Ewropea ressqet l-ewwel pakkett ta' miżuri li jindirizzaw il-kriżi tal-migrazzjoni:

• proposta għal rilokazzjoni ta' emerġenza għal 40 000 ruħ fi bżonn ta' protezzjoni internazzjonali, mill-Italja u mill-Greċja lejn stati membri oħra
• rakkomandazzjoni li titlob lill-istati membri jirrisistemaw 20 000 ruħ fi bżonn ta' protezzjoni internazzjonali minn barra l-UE
• pjan ta' azzjoni tal-UE kontra l-faċilitazzjoni tad-dħul klandestin ta' migranti
• linji gwida dwar it-teħid tal-marki tas-swaba'
• konsultazzjoni pubblika fuq il-futur tad-direttiva dwar il-karta blu

• Pakkett ta' proposti biex jindirizzaw il-kriżi tal-migrazzjoni, 27 ta' Mejju 2015 (Kummissjoni Ewropea - stqarrija għall-istampa)

Wara l-laqgħa speċjali tal-Kunsill Ewropew tat-23 ta' April, il-Kunsill tenna l-ħtieġa li tissaħħaħ il-ħidma dwar ir-rabtiet bejn il-migrazzjoni u l-iżvilupp. Huwa stieden lill-Kummissjoni Ewropea u lis-SEAE biex jaħdmu fuq miżuri konkreti.

• Kunsill Affarijiet Barranin (Żvilupp), 26 ta' Mejju 2015

Wara struzzjonijiet mill-Kunsill Ewropew, il-Kunsill qabel li jistabbilixxi operazzjoni militari tal-UE, EUNAVFOR Med, sabiex tkisser il-mudell operattiv tal-faċilitaturi ta' dħul klandestin u t-traffikanti ta' bnedmin fil-Mediterran.

• Il-Kunsill jistabbilixxi operazzjoni navali tal-UE biex tisfratta l-faċilitaturi ta' dħul klandestin ta' bnedmin fil-Mediterran

Il-Kunsill qabel li jsaħħaħ l-ambitu tal-missjoni ċivili tal-UE fin-Niġer biex jappoġġa lill-awtoritajiet Niġerini fil-prevenzjoni tal-migrazzjoni irregolari u fil-ġlieda kontra reati kriminali marbuta magħha.

• L-EUCAP Sahel Niger ser tgħin fil-prevenzjoni tal-migrazzjoni irregolari
• EUCAP Sahel Niger (SEAE)

Fit-13 ta' Mejju 2015, il-Kummissjoni Ewropea adottat aġenda Ewropea dwar il-migrazzjoni. Hija saħqet dwar il-ħtieġa għal ġestjoni aħjar tal-migrazzjoni u enfasizzat li din hija responsabbiltà komuni.

L-aġenda tkopri l-aspetti kollha tal-ġestjoni tal-migrazzjoni u tqis l-aspetti interni u esterni b'mod għalkollox integrat.

Hija identifika azzjonijiet u miżuri konkreti fl-erba' oqsma li ġejjin:

• it-tnaqqis tal-inċentivi għall-migrazzjoni irregolari
• is-salvataġġ tal-ħajjiet u s-sigurtà tal-fruntieri esterni
• politika b'saħħitha dwar l-asil
• politika ġdida dwar il-migrazzjoni legali

Wara l-ġrajjiet traġiċi fil-Mediterran ta' April 2015, il-kapijiet ta' stat u ta' gvern tal-UE qablu li jimmobilizzaw l-isforzi kollha biex ma jħallux li jmutu aktar nies fuq il-baħar u biex jindirizzaw il-kawżi fundamentali tal-migrazzjoni. Huma ddeċidew li t-tweġiba tiffoka fuq erba' oqsma ewlenin:

• it-tisħiħ tal-preżenza fuq il-baħar
• il-ġlieda kontra t-traffikanti
• il-prevenzjoni ta' flussi migratorji illegali
• it-tisħiħ tas-solidarjetà u r-responsabbiltà interni

Il-mexxejja tal-UE enfasizzaw ir-rwol fundamentali tal-komunikazzjoni li ġejja tal-Kummissjoni dwar aġenda Ewropea dwar il-migrazzjoni u talbu li jiġi organizzat is-summit tal-Belt Valletta biex jiġu diskussi kwistjonijiet dwar il-migrazzjoni ma' pajjiżi Afrikani u pajjiżi oħra ewlenin.

Huma appellaw ukoll għal tisħiħ rapidu tal-operazzjonijiet Triton u Poseidon, b'minn tal-anqas l-ittriplikar tar-riżorsi finanzjarji tagħhom għall-2015 u l-2016.

• Laqgħa speċjali tal-Kunsill Ewropew, 23 ta' April 2015 - dikjarazzjoni