"Il-cookies jintużaw biex intejbu l-esperjenza ta' navigazzjoni tiegħek. Il-cookies meħtieġa huma neċessarji biex jappoġġaw karatteristiċi essenzjali tas-sit web tal-Kunsill. Il-cookies fakultattivi jgħinuna nipproduċu rapporti statistiċi anonimi u aggregati biex naqdu aħjar il-ħtiġijiet tiegħek.
Kunsill Ġustizzja u Affarijiet Interni, 8 u 9 ta' Ġunju 2023
Riżultati ewlenin
Affarijiet interni, 8 ta' Ġunju
Ażil u migrazzjoni
Il-Kunsill laħaq qbil dwar żewġ fajls ewlenin dwar l-ażil u l-migrazzjoni – ir-regolament dwar il-ġestjoni tal-ażil u tal-migrazzjoni u r-regolament dwar il-proċeduri tal-ażil. Iż-żewġ liġijiet iservu ta' pedament għal politika Ewropea ġdida dwar il-migrazzjoni u l-ażil li hija ġusta, effiċjenti u sostenibbli fit-tul.
Il-migrazzjoni hija sfida u responsabbiltà komuni Ewropea. Il-qbil tagħna llum huwa qabża kbira 'l quddiem lejn politika Ewropea ġusta u sostenibbli dwar il-migrazzjoni u l-ażil.
Maria Malmer Stenergard, Ministru għall-Migrazzjoni tal-Iżvezja
Ir-regolament dwar il-proċeduri tal-ażil (APR) jistabbilixxi proċedura komuni fl-UE kollha li l-istati membri jeħtieġ li jsegwu meta n-nies ifittxu protezzjoni internazzjonali. Ir-regolament fih regola dwar il-proċedura fuq il-fruntiera li tippermetti valutazzjoni malajr fil-fruntieri esterni tal-UE dwar jekk l-applikazzjonijiet ikunux bla bażi jew inammissibbli.
Ir-regolament dwar il-ġestjoni tal-ażil u tal-migrazzjoni (AMMR) għandu jissostitwixxi r-regolament ta' Dublin attwali. L-iskop tal-AMMR huwa li jiddetermina liema stat membru huwa responsabbli għall-eżami ta' applikazzjoni għall-ażil. Jistabbilixxi wkoll mekkaniżmu ġdid għall-ġestjoni tal-migrazzjoni u ta' solidarjetà li jiżgura distribuzzjoni aktar indaqs tal-migranti mal-UE kollha.
Il-qafas leġiżlattiv tal-UE għall-migrazzjoni u l-ażil u d-dimensjoni esterna tal-migrazzjoni huma ż-żewġt uċuħ tal-istess munita. Il-Kunsill ħa nota tas-sitwazzjoni attwali tal-Kummissjoni u tal-presidenza tad-dimensjoni esterna tal-migrazzjoni, inkluż kwistjonijiet bħall-flussi migratorji dinjija u l-kooperazzjoni tal-UE ma' sħab esterni għall-ġestjoni tal-pressjonijiet migratorji. Ingħatat attenzjoni partikulari lill-pjan ta' azzjoni għar-rotta tal-Mediterran tal-Punent/l-Atlantiku u għas-sitwazzjoni fit-Tuneżija, l-Eġittu u l-Iraq.
Żona Schengen
Il-Kunsill ta' Schengen kellu skambju ta' fehmiet dwar is-sitwazzjoni ġenerali taż-żona Schengen, abbażi ta' preżentazzjoni mill-Kummissjoni tar-rapport tagħha tal-2023 dwar l-istat ta' Schengen. Il-ministri qablu dwar l-oqsma li għandhom jirċievu attenzjoni speċjali mill-Kunsill ta' Schengen għaċ-ċiklu li jmiss tal-Kunsill ta' Schengen 2023-2024:
jitneħħew il-kontrolli fil-fruntieri mal-Bulgarija u r-Rumanija
is-sistemi ta' ritorn isiru aktar effettivi
tingħata spinta lill-kooperazzjoni fl-infurzar tal-liġi fil-ġlieda kontra l-kriminalità organizzata u t-traffikar tad-drogi
tissaħħaħ il-ħidma dwar il-ġestjoni tal-migrazzjoni u tal-fruntieri
Il-Kunsill ta' Schengen iddiskuta wkoll il-monitoraġġ tas-sistemi ta' vjaġġar mingħajr viża. Il-ministri appellaw għal użu aktar strateġiku tal-politika tal-UE dwar il-viżi. Huma laqgħu b'mod ġenerali l-pjan tal-Kummissjoni li toħroġ bi proposta leġiżlattiva – fit-tieni semestru ta' din is-sena – biex il-mekkaniżmu ta' sospensjoni tal-viża jsir aktar effiċjenti. Dan għandu jgħammar lill-UE b'għodda aħjar biex tiġġieled każijiet ta' abbuż tas-sistemi ta' vjaġġar mingħajr viża u biex tnaqqas b'mod qawwi l-migrazzjoni irregolari lejn l-UE kkawżata min-nuqqas ta' allinjament tal-politika dwar il-viża mill-ġirien li huma ħielsa mill-viża.
L-eu-LISA, l-aġenzija tal-UE inkarigata mill-ġestjoni operazzjonali tas-sistemi tal-IT fil-qasam tal-libertà, is-sigurtà u l-ġustizzja, għarrfet lill-ministri dwar l-implimentazzjoni tal-interoperabbiltà tas-sistemi ta' informazzjoni tal-UE. Dawn jintużaw mill-istati membri fil-ġlieda kontra l-kriminalità, il-kontroll tal-fruntieri u l-ġestjoni tal-flussi migratorji. Fost informazzjoni oħra, l-aġenzija għarrfet dwar is-sitwazzjoni attwali tal-implimentazzjoni ta' dawn is-sistemi. Fil-Kunsill ĠAI ta' Ottubru għandha tiġi ppreżentata skeda ta' żmien riveduta għal meta dawn is-sistemi jkunu lesti teknikament.
B'rabta wkoll mal-parti dwar Schengen tal-laqgħa, ir-Rumanija għarrfet dwar forum ministerjali għall-istati membri ta' Schengen li sar fid-9 ta' Mejju 2023. Ir-Rumanija u l-Bulgarija għarrfu lid-delegazzjonijiet dwar proġetti pilota fil-qasam tal-ażil, ir-ritorn u l-ġestjoni tal-fruntieri. Fl-aħħar nett, il-presidenza pprovdiet informazzjoni dwar il-proposti leġiżlattivi attwali fiż-żona Schengen.
Sigurtà interna/Infurzar tal-liġi
Il-presidenza u l-Kummissjoni aġġornaw lill-ministri dwar it-tnedija ta' Grupp ta' Esperti ta' Livell Għoli dwar l-aċċess għad-data għal infurzar effettiv tal-liġi. L-objettiv tal-grupp ta' esperti ser ikun li jistabbilixxi viżjoni dwar kif jiġu indirizzati l-isfidi attwali u antiċipati għall-infurzar tal-liġi fil-kuntest ta' żviluppi tekniċi – bħall-użu tal-komunikazzjoni elettronika bi kriptaġġ minn tarf sa tarf jew l-intelliġenza artifiċjali – u li jipproponi rakkomandazzjonijiet għall-formulazzjoni ta' politiki u leġiżlazzjoni tal-UE.
Is-servizzi diġitali qed jiġu abbużati dejjem aktar mill-kriminali biex iwettqu reati. Għandna bżonn niżguraw li l-aġenziji tal-infurzar tal-liġi jkollhom l-għodda li jeħtieġu biex jiġġieldu l-kriminalità u għal dak il-għan l-aċċess għad-data huwa ta' importanza kruċjali. Konvint li l-Grupp ta' Esperti ta' Livell Għoli ser ikun ta' kontribut sostanzjali għal infurzar tal-liġi aktar effettiv.
Gunnar Strömmer, Ministru għall-Ġustizzja tal-Iżvezja
Minn għargħar fuq skala kbira sa nirien mhux ikkontrollati u l-COVID-19, l-Ewropa għandha quddiemha għadd dejjem jikber ta' kriżijiet kumplessi u dejjiema. Minħabba l-gwerra ta' aggressjoni tar-Russja kontra l-Ukrajna, hemm anke riskju ogħla ta' inċidenti kimiċi, bijoloġiċi, radjoloġiċi u nukleari (CBRN). Fuq dan l-isfond, il-ministri approvaw konklużjonijiet dwar it-tisħiħ tar-reżiljenza tas-soċjetà kollha fil-kuntest tal-protezzjoni ċivili, inkluż l-istat ta' tħejjija għal inċidenti "CBRN". Il-Kunsill jaqbel li l-protezzjoni ċivili taqdi rwol importanti biex tagħti spinta lir-reżiljenza tal-UE u biex jittaffa r-riskju ta' inċidenti CBRN.
Id-dibattitu waqt l-ikla ta' nofsinhar kien dwar kwistjonijiet marbutin mal-ġlieda kontra t-terroriżmu u dwar il-ġlieda kontra l-estremiżmu vjolenti u t-terroriżmu. L-implikazzjonijiet tal-aggressjoni tar-Russja kontra l-Ukrajna fuq is-sigurtà interna tal-UE u l-protezzjoni temporanja għan-nies li qed jaħarbu mill-gwerra kienu wkoll fuq l-aġenda.
Il-presidenza għarrfet ukoll dwar is-sitwazzjoni attwali ta' proposti leġiżlattivi oħra – minn proposti leġiżlattivi fil-qasam tal-ażil, il-migrazzjoni, il-fruntieri u l-viżi għal regoli li jipprevjenu u jiġġieldu l-abbuż sesswali tat-tfal.
Din ir-riżorsa bħalissa hi disponibbli biss bil-lingwa jew il-lingwi li ġejjin:
Taħt Affarijiet Oħra, is-Slovenja ppreżentat il-konklużjonijiet tal-Laqgħa Ministerjali tal-Proċess ta' Brdo, li saret fit-3 u fl-4 ta' April f'Portorož, is-Slovenja. Il-laqgħa ministerjali kienet iddedikata għad-diskussjoni dwar l-isfidi attwali fil-qasam tas-sigurtà interna u l-migrazzjoni b'enfasi fuq kooperazzjoni aktar mill-qrib fil-ġlieda kontra l-faċilitazzjoni ta' dħul klandestin ta' migranti. Il-presidenza għarrfet dwar il-laqgħa ministerjali tal-Ġustizzja u l-Affarijiet Interni bejn l-UE u l-Istati Uniti li ser issir fl-20 u l-21 ta' Ġunju 2023 fi Stokkolma. Id-delegazzjoni Spanjola, il-presidenza li jmiss, ippreżentat il-programm ta' ħidma tagħha.
Ftehim ta' kooperazzjoni bejn l-UE u r-Renju Unit dwar il-kompetizzjoni
Il-Kunsill adotta, mingħajr diskussjoni, deċiżjoni li tawtorizza l-ftuħ ta' negozjati mar-Renju Unit dwar il-kooperazzjoni u l-iskambju ta' informazzjoni fi kwistjonijiet ta' kompetizzjoni.
Il-ftehim ser jissupplimenta l-Ftehim dwar il-Kummerċ u l-Kooperazzjoni bejn l-UE u r-Renju Unit, li daħal fis-seħħ fl-1 ta' Mejju 2021, u ser ikopri l-kooperazzjoni mal-awtoritajiet tal-kompetizzjoni tar-Renju Unit dwar kwistjonijiet marbuta mal-applikazzjoni tal-liġi tal-UE dwar il-kompetizzjoni.
Il-Kunsill adotta ħames approċċi ġenerali – pożizzjonijiet komuni dwar abbozzi ta' liġijiet tal-UE li huma prerekwiżiti għall-bidu ta' negozjati mal-Parlament Ewropew – biex tiġi miġġielda aħjar il-kriminalità organizzata, jitħares id-dibattitu pubbliku, tiġi miġġielda l-vjolenza fuq in-nisa u jiġi kriminalizzat il-ksur tas-sanzjonijiet tal-UE.
Il-ġlieda kontra l-kriminalità organizzata hija prijorità ewlenija għall-presidenza Żvediża. Id-deċiżjonijiet importanti li ttieħdu llum ser itejbu l-kapaċità tal-infurzar tal-liġi biex jiġġieled il-kriminalità organizzata, waqt li fl-istess ħin jiġu rispettati d-drittijiet fundamentali tal-bniedem. Dan ser isaħħaħ il-libertà u s-sigurtà taċ-ċittadini kollha fl-istati membri tal-UE.
Gunnar Strömmer, Ministru għall-Ġustizzja tal-Iżvezja
L-UE qed issaħħaħ ir-regoli dwar l-irkupru u l-konfiska tal-istrumenti u r-rikavat tal-kriminalità. Fost aġġornamenti oħra, l-istati membri jkunu obbligati jippermettu l-konfiska ta' ġid mhux ġustifikat taħt ċerti kondizzjonijiet. Il-Kunsill qabel dwar approċċ ġenerali dwar dan l-abbozz ta' liġi.
Il-Kunsill wasal għal approċċ ġenerali dwar proposta għal liġi kontra kawżi strateġiċi kontra l-parteċipazzjoni pubblika (SLAPP). L-għan tagħha huwa li tipprevjeni proċedimenti fil-qorti li jkunu infondati jew abbużivi kontra ġurnalisti u difensuri tad-drittijiet tal-bniedem, u li tistabbilixxi regoli għal rimedji għal proċedimenti bħal dawn. Bis-saħħa tal-liġi proposta tal-UE, il-persuni li tinfetaħ kawża SLAPP fil-konfront tagħhom ser jibbenefikaw minn għadd ta' salvagwardji u protezzjonijiet proċedurali.
Il-Kunsill qabel dwar il-pożizzjoni tiegħu li jaġġorna d-direttiva tal-UE kontra t-traffikar. Fost affarijiet oħra, iż-żwieġ furzat u l-adozzjoni illegali ser jidhru b'mod espliċitu bħala tipi ta' sfruttament koperti mid-direttiva. Il-pajjiżi tal-UE jridu jiżguraw ukoll li l-persuni li konxjament jużaw servizzi pprovduti minn vittmi tat-traffikar ikunu jistgħu jiffaċċjaw sanzjonijiet.
Il-vjolenza fuq in-nisa
Il-Kunsill laħaq qbil dwar abbozz ta' liġi dwar il-ġlieda kontra l-vjolenza fuq in-nisa u l-vjolenza domestika. Fost affarijiet oħra, għandu l-għan li jikkriminalizza għadd ta' tipi ta' mġiba madwar l-UE bħall-mutilazzjoni ġenitali femminili, is-cyberstalking jew il-fastidju online. Il-proposta tindirizza wkoll ir-rappurtar tal-vjolenza fuq in-nisa kif ukoll miżuri ta' appoġġ u assistenza għall-vittmi, fosthom il-kumpens u l-ġbir tad-data.
Fl-UE, mara minn kull tlieta esperjenzat vjolenza fiżika jew sesswali, fil-biċċa l-kbira mwettqa minn sħab intimi (data mill-2014). Huwa stmat li fl-2020 biss, mara żagħżugħa minn kull tnejn esperjenzat vjolenza online bbażata fuq il-ġeneru. Din il-proposta għalhekk ser tkun pass konsiderevoli 'l quddiem fil-ġlieda kontra l-vjolenza abbażi tal-ġeneru.
Il-Kunsill qed jaħdem fuq leġiżlazzjoni ġdida biex jaċċerta li l-ksur tal-miżuri restrittivi jiġi kriminalizzat. Din tistabbilixxi penali minimi għaċ-ċirkomvenzjoni u l-ksur tas-sanzjonijiet tal-UE. Il-Kunsill wasal għal approċċ ġenerali dwar dan l-abbozz ta' leġiżlazzjoni.
Minbarra dawn il-ħames approċċi ġenerali, il-presidenza għarrfet ukoll lill-ministri dwar proposti leġiżlattivi pendenti oħra fil-qasam tal-ġustizzja: id-diskussjonijiet li għaddejjin mal-Parlament dwar il-protezzjoni tal-ambjent u d-diġitalizzazzjoni tal-ġustizzja, kif ukoll proposta dwar it-trasferiment ta' proċedimenti kriminali (minn stat membru għal ieħor).
Din ir-riżorsa bħalissa hi disponibbli biss bil-lingwa jew il-lingwi li ġejjin:
Punti oħra fuq l-aġenda tal-ministri għall-ġustizzja
Barra minn hekk, il-ministri kellhom skambju ta' fehmiet dwar il-kwistjoni tal-investigazzjoni u l-prosekuzzjoni tal-ksur tal-miżuri restrittivi tal-UE fir-rigward tal-aggressjoni tar-Russja kontra l-Ukrajna. Il-ministri qasmu informazzjoni dwar il-miżuri meħuda mill-awtoritajiet nazzjonali tagħhom f'dan ir-rigward u ddiskutew l-aħjar prattiki possibbli u l-isfidi ewlenin. Id-diskussjoni wriet li dawn l-investigazzjonijiet u l-prosekuzzjonijiet huma diffiċli iżda wriet ukoll li ħafna sfidi huma komuni għall-istati membri kollha. Bosta delegazzjonijiet ikkonfermaw li hemm valur miżjud li jitkompla l-iskambju ta' informazzjoni u tal-aħjar prattiki u li l-Eurojust u l-Europol jibqgħu jappoġġaw lill-awtoritajiet nazzjonali. Fil-konklużjonijiet tiegħu tat-23 ta' Marzu 2023, il-Kunsill Ewropew stieden lill-Kunsill u lill-Kummissjoni jsaħħu l-istrumenti kollha ta' infurzar meħtieġa u, flimkien mal-istati membri, jiżviluppaw approċċ ikkoordinat bis-sħiħ għal dak l-għan.
L-iskambju ta' fehmiet dwar l-aspetti ġudizzjarji tal-ġlieda kontra l-kriminalità organizzata – u l-bilanċ li għandu jinstab bejn il-ħtieġa ta' miżuri investigattivi effettivi u l-protezzjoni tad-drittijiet fundamentali – kienu s-suġġett tad-dibattitu waqt l-ikla ta' nofsinhar.
Il-ministri ngħataw informazzjoni dwar is-sitwazzjoni attwali tal-aħħar żviluppi li jikkonċernaw l-Uffiċċju tal-Prosekutur Pubbliku Ewropew (UPPE) li beda l-operat tiegħu f'Ġunju 2021. Fl-2022, l-UPPE fetaħ 865 investigazzjoni li bħalissa wasslu għal 1117-il investigazzjoni attiva bi stima ta' €14.1 biljun f'danni.
Il-presidenza tat ukoll rendikont tal-progress li sar fl-adeżjoni tal-UE għall-Konvenzjoni Ewropea dwar id-Drittijiet tal-Bniedem u indirizzat dak li għad baqa' jsir biex jintlaħaq dan il-għan.
Il-presidenza ħarġet konklużjonijiet dwar is-sikurezza ta' persuni LGBTI fl-Unjoni Ewropea.
Affarijiet oħra
Il-presidenza Żvediża infurmat lill-ministri dwar il-laqgħa ministerjali tal-Ġustizzja u l-Affarijiet Interni bejn l-UE u l-Istati Uniti li ser issir fl-20 u l-21 ta' Ġunju 2023 fi Stokkolma. Il-Latvja għarrfet lid-delegazzjonijiet dwar konferenza tal-ministri għall-ġustizzja tal-Kunsill tal-Ewropa li ser issir f'Riga fil-11 ta' Settembru 2023.
Fir-rigward tat-trasferiment ta' data personali lil stati terzi, il-Kummissjoni għarrfet dwar ir-rieżami tad-deċiżjoni ta' adegwatezza għall-Ġappun u l-ħidma li għaddejja fuq il-qafas tal-privatezza tad-data bejn l-UE u l-Istati Uniti u dwar it-tabella ta' valutazzjoni tal-ġustizzja għall-2023.
Il-ministru Slovena infurmat lid-delegazzjonijiet dwar in-negozjati u l-adozzjoni ta' Konvenzjoni ġdida dwar il-Kooperazzjoni Internazzjonali fl-Investigazzjoni u l-Prosekuzzjoni tad-Delitt tal-Ġenoċidju, id-Delitti kontra l-Umanità, id-Delitti tal-Gwerra u Delitti Internazzjonali oħra.
Fl-aħħar nett, il-presidenza Spanjola li jmiss infurmat dwar il-programm ta' ħidma tagħha.
Għal informazzjoni ġenerali dwar l-akkreditazzjoni, jekk jogħġbok żur din il-paġna.
L-akkreditazzjoni tal-media għas-summits internazzjonali li jsiru barra mill-Unjoni Ewropea ser tiġi ttrattata mill-awtoritajiet governattivi tal-pajjiż ospitanti.
Il-migrazzjoni hija sfida u responsabbiltà komuni Ewropea. Il-qbil tagħna llum huwa qabża kbira 'l quddiem lejn politika Ewropea ġusta u sostenibbli dwar il-migrazzjoni u l-ażil.
Is-servizzi diġitali qed jiġu abbużati dejjem aktar mill-kriminali biex iwettqu reati. Għandna bżonn niżguraw li l-aġenziji tal-infurzar tal-liġi jkollhom l-għodda li jeħtieġu biex jiġġieldu l-kriminalità u għal dak il-għan l-aċċess għad-data huwa ta' importanza kruċjali. Konvint li l-Grupp ta' Esperti ta' Livell Għoli ser ikun ta' kontribut sostanzjali għal infurzar tal-liġi aktar effettiv.
Il-ġlieda kontra l-kriminalità organizzata hija prijorità ewlenija għall-presidenza Żvediża. Id-deċiżjonijiet importanti li ttieħdu llum ser itejbu l-kapaċità tal-infurzar tal-liġi biex jiġġieled il-kriminalità organizzata, waqt li fl-istess ħin jiġu rispettati d-drittijiet fundamentali tal-bniedem. Dan ser isaħħaħ il-libertà u s-sigurtà taċ-ċittadini kollha fl-istati membri tal-UE.