Kronoloġija - Protezzjoni tal-konsumatur

Il-Kunsill ta l-approvazzjoni tiegħu għal liġi ġdida li għandha l-għan li tissimplifika, tiċċara u ssaħħaħ id-drittijiet tal-passiġġieri tal-ajru.

Il-qafas il-ġdid isaħħaħ il-protezzjoni tal-passiġġieri filwaqt li jiżgura bilanċ ġust mar-realtajiet operazzjonali tal-linji tal-ajru. Jgħin ukoll biex tiġi ppreservata l-konnettività madwar l-UE u jinżammu kundizzjonijiet ekwivalenti ta' kompetizzjoni għal-linji tal-ajru.

• Il-Kunsill jagħti l-approvazzjoni finali għal drittijiet aktar b'saħħithom tal-passiġġieri tal-ajru (stqarrija għall-istampa, 13 ta' Lulju 2026)

Il-Kunsill u l-Parlament Ewropew laħqu ftehim proviżorju biex jaġġornaw ir-regoli dwar l-infurzar tad-drittijiet tal-passiġġieri.

L-għan huwa li tiġi ssimplifikata, armonizzata u mtejba l-konsistenza fil-qafas eżistenti għall-modi kollha tat-trasport.

Dan japplika b'mod partikolari fir-rigward ta':

• informazzjoni lill-passiġġieri dwar id-drittijiet tagħhom qabel u matul il-vjaġġ tagħhom
• il-protezzjoni tal-passiġġieri b'mobbiltà mnaqqsa (PMM)
• it-trattamenttal-ilmenti
• infurzar aktar effettiv tad-drittijiet tal-passiġġieri

• Il-Kunsill u l-Parlament jaqblu dwar infurzar aktar effettiv tad-drittijiet tal-passiġġieri (25 ta' Ġunju 2026)

Il-Kunsill u l-Parlament Ewropew laħqu ftehim proviżorju biex jaġġornaw ir-regoli. Il-qafas il-ġdid ser isaħħaħ u jiċċara d-drittijiet tal-passiġġieri.

Ir-regoli aġġornati jinkludu:

• gwida aktar ċara dwar kif jintalab kumpens f'każijiet ta' kanċellazzjoni u dewmien
• assistenza addizzjonali matul it-tfixkil
• drittijiet ġodda rigward "no shows" u bagalji tal-kabina, u għal persuni bi bżonnijiet speċifiċi
• drittijiet imsaħħa għall-passiġġieri li jingħataw rotta alternattiva

• Il-Kunsill u l-Parlament jilħqu ftehim storiku dwar drittijiet aktar b'saħħithom tal-passiġġieri tal-ajru tal-UE (stqarrija għall-istampa, 15 ta' Ġunju 2026)

Il-Kunsill adotta direttiva li għandha l-għan li ssaħħaħ id-drittijiet tal-vjaġġaturi meta jixtru diversi servizzi, bħal titjiriet, trasferimenti, akkomodazzjoni jew eskursjonijiet, f'pakkett wieħed.

Ir-regoli aġġornati:

• jaġġustaw id-definizzjoni ta' "pakketti tal-ivvjaġġar"
• itejbu l-informazzjoni li trid tiġi pprovduta lill-vjaġġaturi
• jiċċaraw id-drittijiet tal-vjaġġaturi fil-każ ta' kanċellazzjoni ta' pakkett jew insolvenza tal-fornitur ta' servizz

• Protezzjoni tal-konsumatur: il-Kunsill jagħti l-approvazzjoni finali għal salvagwardji addizzjonali għall-utenti tal-pakketti tal-ivvjaġġar (stqarrija għall-istampa, 30 ta' Marzu 2026)

Il-Kunsill approva konklużjonijiet li jipprovdu gwida lill-Kummissjoni għall-implimentazzjoni tal-aġenda tal-konsumatur 2030 ta' ħames snin.

Il-konklużjonijiet jappellaw għal:

• it-tisħiħ tal-protezzjoni tal-konsumatur (b'mod partikolari online)
• il-promozzjoni ta' konsum sostenibbli
• infurzar aħjar
• kooperazzjoni aktar b'saħħitha bejn l-atturi rilevanti kollha

• Protezzjoni tal-konsumatur: il-Kunsill jappella għal salvagwardji aktar b'saħħithom, konsum sostenibbli, infurzar imsaħħaħ u simplifikazzjoni (stqarrija għall-istampa, 26 ta' Frar 2026)

• Strateġija dwar l-investiment bl-imnut: il-Kunsill u l-Parlament jaqblu dwar pakkett li jagħti s-setgħa lill-konsumaturi filwaqt li jagħti spinta lis-swieq (stqarrija għall-istampa, 18 ta' Diċembru 2025)

Il-Kunsill ta l-approvazzjoni finali tiegħu għar-regolament dwar id-deterġenti u l-aġenti tensjoattivi.

Il-leġiżlazzjoni l-ġdida ser tagħmilha aktar faċli biex jinbiegħu dawk il-prodotti fis-suq tal-UE filwaqt li tipproteġi s-saħħa tal-bniedem u l-ambjent. Ser tissimplifika wkoll l-informazzjoni għall-konsumaturi u tiċċara r-rekwiżiti tat-tikkettar għall-kumpaniji.

• Il-protezzjoni tal-konsumatur u l-ambjent: il-Kunsill japprova r-regolament dwar id-deterġenti u l-aġenti tensjoattivi (stqarrija għall-istampa, 8 ta' Diċembru 2025)

Il-Kunsill u l-Parlament Ewropew laħqu ftehim proviżorju dwar reviżjoni tad-direttiva dwar il-pakketti tal-ivvjaġġar li għandha l-għan li tagħmel il-protezzjoni tal-vjaġġaturi aktar effettiva.

F'pakkett tal-ivvjaġġar, l-organizzatur jgħaqqad servizzi tal-ivvjaġġar jew servizzi turistiċi differenti bħal titjiriet, trasferimenti, akkomodazzjoni u eskursjonijiet, eċċ. Il-pakketti jinxtraw kemm online kif ukoll offline, u jistgħu jiġu offruti minn operaturi turistiċi, aġenziji tal-ivvjaġġar, trasportaturi, u operaturi oħra.

Il-ftehim isaħħaħ id-drittijiet tal-konsumaturi, inaqqas il-piżijiet għall-operaturi u jiċċara l-obbligi tal-organizzaturi tal-pakketti dwar kwistjonijiet bħar-rifużjonijiet, il-protezzjoni mill-insolvenza u l-użu ta' vouchers.

• Protezzjoni tal-konsumatur: il-Kunsill u l-Parlament jilħqu ftehim dwar ir-reviżjoni tar-regoli dwar il-pakketti tal-ivvjaġġar (stqarrija għall-istampa, 2 ta' Diċembru 2025)

• Servizzi ta' pagament: il-Kunsill u l-Parlament jaqblu li jsaħħu l-ġlieda kontra l-frodi u jżidu t-trasparenza (stqarrija għall-istampa, 27 ta' Novembru 2025)

Il-Kunsill ta l-approvazzjoni finali tiegħu għal direttiva li taġġorna, tissimplifika, u ssaħħaħ il-qafas eżistenti għas-soluzzjoni alternattiva għat-tilwim (ADR).

L-ADR tirreferi għal metodi biex jiġi solvut it-tilwim bejn il-konsumaturi u n-negozjanti barra mill-qorti, normalment bl-assistenza ta' parti terza newtrali.

It-test ser jagħmel l-ADR aktar aċċessibbli u għażla aktar attraenti għas-soluzzjoni tat-tilwim li jirriżulta minn ftehimiet kuntrattwali, u jagħmel il-qafas tal-ADR adattat għas-suq diġitali.

Soġġett għal ċerti kundizzjonijiet, l-ADR issa ser tkun disponibbli wkoll għal tilwim bejn konsumaturi bbażati fl-UE u negozjanti minn pajjiżi terzi.

• Protezzjoni tal-konsumatur: il-Kunsill japprova d-direttiva aġġornata dwar is-soluzzjoni alternattiva għat-tilwim (stqarrija għall-istampa, 17 ta' Novembru 2025)

Il-Kunsill ta l-approvazzjoni finali tiegħu għar-regolament dwar is-sikurezza tal-ġugarelli li ser isaħħaħ ir-regoli dwar is-sikurezza, iżid il-protezzjoni kontra sustanzi kimiċi dannużi u jippromwovi l-użu ta' passaporti diġitali tal-prodotti biex jiffaċilita l-infurzar.

Ir-regolament il-ġdid dwar is-sikurezza tal-ġugarelli jipprojbixxi jew jirrestrinġi l-użu fil-ġugarelli ta' diversi sustanzi kimiċi perikolużi, inkluż interferenti endokrinali, sensitizzaturi tal-ġilda, prodotti bijoċidali, u sustanzi perfluworoalkilati u polifluworoalkilati (PFAS).

• Il-Kunsill jadotta regoli ġodda biex il-ġugarelli tat-tfal isiru aktar sikuri (stqarrija għall-istampa, 13 ta' Ottubru 2025)

• Il-Kunsill jistabbilixxi pożizzjoni dwar regoli aktar ċari u mtejba għall-passiġġieri tal-ajru (stqarrija għall-istampa, 5 ta' Ġunju 2025)

Il-Kunsill adotta regolament biex tingħalaq il-pjattaforma Ewropea għas-soluzzjoni online għat-tilwim (pjattaforma tal-ODR) u jitneħħew l-obbligi assoċjati għall-amministrazzjonijiet u n-negozji online.

F'konformità mal-proposta tal-Kummissjoni, il-Kunsill iqis li l-livell ta' prestazzjoni tal-pjattaforma tal-ODR eżistenti ma jiġġustifikax l-ispejjeż pubbliċi u privati meħtieġa biex tinżamm.

• Il-Kunsill jappella għall-għeluq tal-pjattaforma tal-ODR u s-sostituzzjoni tagħha b'għodda aħjar (stqarrija għall-istampa, 19 ta' Novembru 2024)

Il-Kunsill adotta l-pożizzjoni tiegħu dwar pakkett ta' miżuri biex jadatta s-soluzzjoni alternattiva ta' tilwim (ADRs).



L-ADRs huma mekkaniżmu fejn il-konsumaturi jistgħu jsolvu t-tilwim tagħhom mal-kumpaniji qabel ma jmorru l-qorti.

L-għan huwa li:

• ikopru tipi ġodda ta' prattika inġusta (eż. reklamar qarrieqi jew imblukkar ġeografiku mhux ġustifikat)
• dawn il-mekkaniżmi jsiru aktar faċli biex jintużaw, aktar rapidi u aktar attraenti kemm għall-konsumaturi kif ukoll għall-kumpaniji

• Id-drittijiet tal-konsumatur: il-Kunsill jadotta pożizzjoni dwar miżuri biex tiġi ffaċilitata s-soluzzjoni ta' tilwim (stqarrija għall-istampa, 25 ta' Settembru 2024)

Il-Kunsill adotta direttiva li tippromwovi t-tiswija ta' oġġetti miksura jew difettużi, magħrufa wkoll bħala d-direttiva dwar id-dritt għat-tiswija (R2R).

Id-direttiva adottata toħloq sett ta' għodod u inċentivi biex it-tiswija ssir aktar attraenti għall-konsumaturi. Dawn jinkludu: 

• il-ħtieġa li l-manifatturi jsewwu prodotti li teknikament jistgħu jissewwew skont il-liġi tal-UE
• id-disponibbiltà ta' formola ta' tiswija volontarja b'informazzjoni ċara dwar il-proċess ta' tiswija (skadenzi, prezzijiet, eċċ.)
• pjattaforma online tal-UE fejn il-konsumaturi jistgħu faċilment isibu servizzi ta' tiswija
• l-estensjoni tal-garanzija legali bi 12-il xahar jekk il-konsumaturi jagħżlu t-tiswija minflok is-sostituzzjoni

• Ekonomija ċirkolari: il-Kunsill jagħti l-approvazzjoni finali għad-direttiva dwar id-dritt għat-tiswija (stqarrija għall-istampa, 30 ta' Mejju 2024)
• Dritt għat-tiswija tal-prodotti

Il-Kunsill adotta l-pożizzjoni tiegħu (mandat ta' negozjar) dwar ir-regolament dwar is-sikurezza tal-ġugarelli.

Ir-regolament għandu l-għan li jaġġorna r-regoli biex it-tfal jiġu protetti mir-riskji relatati mal-użu tal-ġugarelli.

Il-pożizzjoni tal-Kunsill tintroduċi diversi elementi ta' titjib, li:

• jiċċaraw l-obbligi tal-operaturi ekonomiċi u tas-swieq online
• jistabbilixxu l-kontenut tal-passaport diġitali tal-prodotti u tat-twissijiet
• iżidu l-għadd ta' sustanzi li l-preżenza tagħhom fil-ġugarelli hija pprojbita

• Is-sikurezza tal-ġugarelli: il-Kunsill jadotta l-pożizzjoni tiegħu dwar regoli aġġornati (stqarrija għall-istampa, 15 ta' Mejju 2024)

Il-Kunsill adotta direttiva biex tissaħħaħ il-pożizzjoni tal-konsumaturi għat-tranżizzjoni ekoloġika.

Bis-saħħa tal-miżuri l-ġodda, il-konsumaturi tal-UE ser:

• ikollhom aċċess għal informazzjoni affidabbli biex jagħmlu l-għażliet ekoloġiċi t-tajba, inkluż b'rabta mal-obsolexxenza bikrija
• ikunu protetti aħjar kontra asserzjonijiet ekoloġiċi żleali
• ikunu infurmati aħjar dwar il-possibbiltà ta' tiswija tal-prodotti qabel jixtruhom

Id-direttiva tintroduċi wkoll tikketta armonizzata b'informazzjoni dwar il-garanzija kummerċjali ta' durabbiltà offruta mill-produtturi.

• Drittijiet tal-konsumatur: approvazzjoni finali għad-direttiva tissaħħaħ il-pożizzjoni tal-konsumaturi għat-tranżizzjoni ekoloġika (20 ta' Frar 2024)
• Ekonomija ċirkolari (informazzjoni ġenerali)

Il-Kunsill adotta regolament dwar il-ġbir u l-kondiviżjoni tad-data b'rabta mas-servizzi ta' kiri ta' akkomodazzjoni għal żmien qasir.

Dan l-att leġiżlattiv ser:

• isaħħaħ it-trasparenza fil-qasam tal-kirjiet ta' akkomodazzjoni għal żmien qasir
• jgħin lill-awtoritajiet pubbliċi jirregolaw din il-parti dejjem aktar importanti tas-settur tat-turiżmu
• jippermetti kompetizzjoni ġusta fis-settur filwaqt li jiggarantixxi l-kwalità għall-konsumaturi

B'mod ġenerali, ir-regolament ser jikkontribwixxi għal ekosistema aktar sostenibbli tat-turiżmu u jappoġġa t-tranżizzjoni diġitali tagħha.

• Turiżmu: il-Kunsill jagħti l-approvazzjoni finali tiegħu għar-regolament dwar il-kiri għal żmien qasir (stqarrija għall-istampa, 18 ta' Marzu 2024)

Il-Kunsill u l-Parlament Ewropew laħqu qbil proviżorju dwar id-direttiva dwar id-dritt għat-tiswija. L-elementi ewlenin huma:

• dritt għall-konsumaturi li jitolbu lill-manifatturi jsewwu prodotti li teknikament jistgħu jissewwew skont id-dritt tal-UE (pereżempju, magni tal-ħasil tal-ħwejjeġ, vacuum cleaners jew mobiles)
• formola Ewropea ta' informazzjoni dwar it-tiswija mingħajr ħlas
• pjattaforma ta' tiswija online biex il-konsumaturi jiġu konnessi mas-sewwejja
• estensjoni ta' 12-il xahar tal-perjodu ta' obbligazzjoni tal-bejjiegħ wara t-tiswija ta' prodott

Bil-ħolqien ta' inċentivi għall-produtturi u l-konsumaturi biex itawlu ċ-ċikli tal-ħajja tal-prodotti, il-leġiżlazzjoni l-ġdida ser tnaqqas ukoll l-iskart u tippromwovi mudelli ta' negozju aktar sostenibbli.

• Ekonomija ċirkolari: il-Kunsill u l-Parlament jilħqu qbil proviżorju dwar id-direttiva dwar id-dritt għat-tiswija (stqarrija għall-istampa, 2 ta' Frar 2024)
• Ekonomija ċirkolari (informazzjoni ġenerali)

F'ekonomija ċirkolari, il-prodotti jitfasslu biex ikunu aktar durabbli, ikunu jistgħu jerġgħu jintużaw, jistgħu jissewwew u jiġu aġġornati. Meta prodott jiġi modifikat sostanzjalment, barra mill-kontroll tal-manifattur oriġinali, u jsir disponibbli fis-suq jew jerġa' jitqiegħed fis-servizz, il-liġi l-ġdida tiżgura li:

• il-kumpanija jew il-persuna li għamlet il-modifika sostanzjali jenħtieġ li tinżamm responsabbli bħala l-manifattur tal-prodott modifikat
• kull min isofri ħsara minn prodott difettuż huwa intitolat għal kumpens: danni jinkludu mewt jew korriment personali, inkluż dannu medikament rikonoxxut għas-saħħa psikoloġika, ħsara lill-proprjetà, kif ukoll qerda jew korruzzjoni irriversibbli tad-data
• l-importatur ta' prodott jew komponent difettuż minn manifattur mhux tal-UE jista' jinżamm responsabbli għad-danni
• il-konsumaturi għandhom ċans ġust li jirċievu kumpens f'każijiet kumplessi

• Ftehim bejn il-Kunsill u l-Parlament Ewropew jagħmel ir-regoli tal-UE dwar ir-responsabbiltà adatti għall-era diġitali u l-ekonomija ċirkolari (stqarrija għall-istampa, 14 ta' Diċembru 2023)

Il-Kunsill adotta l-pożizzjoni tiegħu dwar id-direttiva proposta dwar regoli komuni li jippromwovu t-tiswija ta' oġġetti, magħrufa wkoll bħala d-direttiva dwar id-dritt għat-tiswija.

It-test propost għandu l-għan li jneħħi l-ostakli li jiskoraġġixxu lill-konsumaturi milli jsewwu minħabba inkonvenjenza, nuqqas ta' trasparenza jew diffikultà biex jaċċessaw is-servizzi ta' tiswija.

Il-mandat tal-Kunsill:

• jiċċara l-obbligu tal-manifattur li jsewwi
• jillimita r-rekwiżit li tiġi pprovduta formola ta' tiswija għal dawk li għandhom obbligu legali li jsewwu prodotti difettużi
• jippromwovi pjattaforma Ewropea ta' tiswija online
• jipproteġi l-libertà tal-għażla tal-konsumaturi bejn it-tiswija u s-sostituzzjoni

• Ekonomija Ċirkolari: il-Kunsill jadotta pożizzjoni dwar direttiva li tħaddan id-dritt tal-konsumaturi għat-tiswija (stqarrija għall-istampa, 22 ta' Novembru 2023)

Bħala parti mill-isforzi li għaddejjin biex tiġi promossa ekosistema tat-turiżmu bbilanċjata fl-UE, il-Kunsill u l-Parlament Ewropew laħqu qbil proviżorju dwar il-proposta għal regolament dwar il-ġbir u l-kondiviżjoni tad-data għal servizzi ta' kiri ta' akkomodazzjoni għal żmien qasir.

Ir-regoli l-ġodda ser:

• jarmonizzaw ir-rekwiżiti tar-reġistrazzjoni għall-ospitanti, inkluż billi jipprovdulhom numru ta' reġistrazzjoni uniku
• jgħinu lill-awtoritajiet pubbliċi jfasslu politiki infurmati
• isaħħu t-trasparenza fis-settur

• Turiżmu: Il-Kunsill u l-Parlament jilħqu qbil biex iġibu aktar trasparenza fil-kirjiet ta' akkomodazzjoni għal żmien qasir (stqarrija għall-istampa, 16 ta' Novembru 2023)

Il-Kunsill adotta d-direttiva dwar il-krediti għall-konsumatur, li għandha l-għan li ttejjeb il-protezzjoni għall-konsumaturi Ewropej li japplikaw għal kreditu.

Ir-regoli l-ġodda:

• jiżguraw li l-informazzjoni dwar il-kreditu, bħall-kost totali tal-kreditu, tiġi ppreżentata b'mod ċar u li jinftiehem
• jistabbilixxu regoli ta' reklamar aktar stretti biex jitnaqqas il-kreditu abbużiv għal konsumaturi b'dejn eċċessiv u miżuri effettivi kontra s-sovradebitu
• jobbligaw lis-selliefa jivvalutaw jekk il-konsumaturi jistgħux iħallsu lura l-kreditu tagħhom
• iwessgħu l-kamp ta' applikazzjoni tad-direttiva biex ikopri self ta' inqas minn €200 u prodotti li jinxtraw issa u jitħallsu aktar tard
• jagħtu lill-konsumaturi d-dritt li jitterminaw ftehim ta' kreditu fi żmien 14-il jum, u jagħtu lis-superstiti tal-kanċer id-dritt li jintesew

• It-talba għal self ser tkun aktar sikura fl-UE wara l-approvazzjoni finali tal-Kunsill tad-direttiva dwar il-krediti għall-konsumatur (stqarrija għall-istampa, 9 ta' Ottubru 2023)
• Protezzjoni tal-konsumatur ta' prodotti finanzjarji (informazzjoni ġenerali)

Id-direttiva biex il-konsumaturi jingħataw is-setgħa għat-tranżizzjoni ekoloġika għandha l-għan li tiġġieled kontra l-prattiki kummerċjali żleali li jipprevjenu lill-konsumaturi milli jagħmlu l-għażliet it-tajba għal prodotti u servizzi aktar ekoloġiċi jew aktar ċirkolari.

Il-ftehim proviżorju jintroduċi ħafna titjib:

• l-inklużjoni ta' asserzjonijiet żleali bbażati fuq kumpens għall-emissjonijiet tal-gassijiet serra fil-lista ta' prattiki kummerċjali pprojbiti
• informazzjoni aħjar dwar l-obsolexxenza bikrija
• l-introduzzjoni ta' format armonizzat biex tiżdied il-viżibbiltà tal-garanzija kummerċjali volontarja tad-durabbiltà

• Il-Kunsill u l-Parlament jilħqu ftehim proviżorju biex il-konsumaturi jingħataw is-setgħa għat-tranżizzjoni ekoloġika (stqarrija għall-istampa, 19 ta' Settembru 2023)
• Ekonomija ċirkolari (informazzjoni ġenerali)

Il-Kunsill u l-Parlament laħqu ftehim politiku proviżorju dwar id-direttiva li tikkonċerna l-kuntratti ta' servizzi finanzjarji konklużi mill-bogħod.

Ir-regoli l-ġodda jinkludu:

• informazzjoni prekuntrattwali aktar ċara
• id-dritt li jintalab intervent mill-bniedem meta l-kummerċjant juża għodod online, bħal chatbots
• funzjoni ta' rtirar li hija faċli biex tinstab
• il-protezzjoni minn tekniki ta' dark pattern iddisinjati biex jinfluwenzaw l-għażliet tal-konsumaturi

• Il-Kunsill u l-Parlament jilħqu ftehim politiku proviżorju dwar il-kuntratti ta' servizzi finanzjarji konklużi mill-bogħod (stqarrija għall-istampa, 6 ta' Ġunju 2023)
• Protezzjoni tal-konsumatur ta' prodotti finanzjarji (informazzjoni ġenerali)

Il-Kunsill adotta r-regolament il-ġdid dwar il-makkinarju.

It-test ġdid:

• jarmonizza r-rekwiżiti essenzjali tas-saħħa u s-sigurtà għall-makkinarju fl-UE
• color: inherit; jippromwovi l-moviment liberu tal-makkinarju
• color: inherit; jiżgura livell għoli ta' sigurtà għall-ħaddiema u ċ-ċittadini

• Regoli ġodda għall-makkinarju: il-Kunsill jagħti l-approvazzjoni finali tiegħu (stqarrija għall-istampa, 22 ta' Mejju 2023)

Il-Kunsill adotta formalment regolament dwar is-swieq fil-kriptoassi (MiCA) li, għall-ewwel darba, jpoġġi lill-kriptoassi u l-fornituri ta' servizzi tal-kriptoassi taħt qafas regolatorju fil-livell tal-UE.

Ir-regolament il-ġdid għandu l-għan li:

• itejjeb it-trasparenza
• jissalvagwardja l-istabbiltà finanzjarja
• iżid il-protezzjoni tal-konsumatur
• irawwem l-innovazzjoni

• Finanzi diġitali: il-Kunsill jadotta regoli ġodda dwar is-swieq fil-kriptoassi (MiCA) (stqarrija għall-istampa, 16 ta' Mejju 2023)
• Finanzi diġitali (informazzjoni ġenerali)

Il-Kunsill adotta l-mandat ta' negozjar tiegħu dwar il-proposta għal direttiva dwar l-għoti tas-setgħa lill-konsumaturi għat-tranżizzjoni ekoloġika.

Il-pożizzjoni tal-Kunsill:

• issaħħaħ id-dritt tal-konsumaturi għall-informazzjoni
• tipprojbixxi l-asserzjonijiet ambjentali ġeneriċi
• tintroduċi format grafiku armonizzat tal-Unjoni Ewropea, biex jgħin lill-konsumaturi jirrikonoxxu l-garanziji kummerċjali ta' durabbiltà

Il-proposta hija waħda mill-inizjattivi li jinsabu fl-aġenda tal-konsumatur ġdida tal-Kummissjoni tal-2020.

• L-għoti tas-setgħa lill-konsumaturi għat-tranżizzjoni ekoloġika: il-Kunsill jadotta l-pożizzjoni tiegħu (stqarrija għall-istampa, 3 ta' Mejju 2023)
• Patt Ekoloġiku Ewropew (informazzjoni ġenerali)

Il-ministri approvaw il-pożizzjoni ta' negozjar tal-Kunsill rigward proposta għal regolament dwar il-ġbir u l-kondiviżjoni ta' data relatata ma' servizzi ta' kiri ta' akkomodazzjoni għal żmien qasir.

Dawn ir-regoli l-ġodda ser ikunu ta' benefiċċju għal kulħadd:

• l-ospitanti ser ikollhom proċedura ta' reġistrazzjoni faċli
• il-pjattaformi ser ikollhom sett uniku ta' regoli għall-informazzjoni li jridu jipprovdu
• il-vjaġġaturi ser ikunu protetti aħjar kontra l-frodi
• l-awtoritajiet ser ikunu jistgħu jirregolaw abbażi ta' data preċiża u affidabbli

• Il-Kunsill jaqbel dwar pożizzjoni rigward il-ġbir u l-kondiviżjoni ta' data għall-kiri ta' akkomodazzjoni għal żmien qasir (stqarrija għall-istampa, 2 ta' Marzu 2023)

Illum, il-Kunsill adotta r-regolament dwar is-sikurezza ġenerali tal-prodotti (GPSR) li jsaħħaħ ir-regoli tas-sikurezza għall-prodotti mibjugħa kemm offline kif ukoll online.

Is-swieq online ser ikollhom:

• jikkooperaw mal-awtoritajiet tas-sorveljanza tas-suq li ser ikunu jistgħu jordnawhom ineħħu prodotti perikolużi mill-pjattaformi tagħhom
• jistabbilixxu punt uniku ta' kuntatt inkarigat mis-sikurezza tal-prodotti

Il-GPSR jagħmilha wkoll aktar faċli għall-konsumaturi biex isewwu, jirritornaw jew jissostitwixxu prodotti mhux sikuri:

• jekk jirriżulta li prodott mhuwiex sikur, l-operaturi ekonomiċi jridu jadottaw miżuri korrettivi minnufih u jinfurmaw lill-awtoritajiet tas-sorveljanza tas-suq
• jekk prodott jissejjaħ lura, il-konsumaturi ser ikollhom id-dritt li jissewwielhom, jibdluh jew jingħataw il-flus lura

• Il-Kunsill jagħti l-approvazzjoni finali għal-leġiżlazzjoni li bis-saħħa tagħha l-prodotti għall-konsumaturi ser isiru aktar sikuri (stqarrija għall-istampa, 25 ta' April 2023)
• Sigurtà tal-prodotti u sorveljanza tas-suq (informazzjoni ġenerali)

Il-Kunsill u l-Parlament Ewropew laħqu qbil proviżorju dwar id-direttiva dwar il-krediti għall-konsumatur, parti mill-aġenda l-ġdida tal-konsumatur li tnediet fl-2020.

Id-direttiva għandha l-għan li timmodernizza u ssaħħaħ il-protezzjoni fil-livell Ewropew għall-konsumaturi li japplikaw għall-kreditu, pereżempju billi tiżgura li l-informazzjoni dwar il-kreditu tiġi ppreżentata b'mod ċar u li jinftiehem, u li tkun adattata għall-apparati diġitali.

Id-direttiva dwar il-krediti għall-konsumatur ser tiżgura li l-konsumaturi jkunu jistgħu jagħmlu għażla infurmata meta japplikaw għall-kreditu u jkunu protetti minn prattiki ta' self irresponsabbli li jistgħu jwasslu għal dejn eċċessiv.

Biex ilaħħqu max-xejra tad-diġitalizzazzjoni, ir-regoli l-ġodda dwar il-kreditu issa ser japplikaw ukoll għal ċertu self riskjuż li huwa eskluż mill-kamp ta' applikazzjoni tad-direttiva attwalment fis-seħħ.

• Il-Kunsill u l-Parlament Ewropew jaqblu li jtejbu l-protezzjoni għall-konsumaturi li japplikaw għall-kreditu (stqarrija għall-istampa, 2 ta' Diċembru 2022)
• Protezzjoni tal-konsumatur ta' prodotti finanzjarji (informazzjoni ġenerali)

Il-Kunsill ta l-approvazzjoni finali tiegħu għad-direttiva dwar iċ-ċarġers komuni.

Id-direttiva ser tagħmel port tal-iċċarġjar tat-tip USB-C obbligatorju għal varjetà wiesgħa ta' tagħmir elettroniku. Iċ-ċarġer komuni ser itejjeb il-konvenjenza tal-konsumatur billi jarmonizza l-interfaċċi tal-iċċarġjaru t-teknoloġija tal-iċċarġjar rapidu.

Barra minn hekk, id-direttiva ser tħalli l-għażla lill-konsumatur biex jixtri tagħmir ġdid b'ċarġer jew mingħajru. Dan ser inaqqas l-iskart elettroniku assoċjat mal-produzzjoni, it-trasport u r-rimi taċ-ċarġers.

Għall-parti l-kbira tat-tagħmir, ir-regoli l-ġodda jridu jiġu implimentati fi żmien 24 xahar mid-dħul fis-seħħ tad-direttiva.

• Ċarġer komuni: Il-ministri tal-UE jagħtu l-approvazzjoni finali għal port tal-iċċarġjar wieħed tajjeb għal kulħadd (stqarrija għall-istampa, 24 ta' Ottubru 2022)

Il-Kunsill ta l-approvazzjoni finali tiegħu għall-Att dwar is-Servizzi Diġitali (DSA). Id-DSA huwa mistenni li joħloq ambjent online aktar sikur.

Id-DSA:

• jipproteġi l-ispazju diġitali kontra t-tixrid ta' kontenut illegali
• jiżgura l-protezzjoni tad-drittijiet fundamentali tal-utenti
• jiddefinixxi responsabbiltajiet ċari u akkontabilità għall-fornituri ta' servizzi intermedjarji, (eż. il-media soċjali, is-swieq online)

• DSA: il-Kunsill jagħti l-approvazzjoni finali għall-protezzjoni tad-drittijiet tal-utenti online (stqarrija għall-istampa, 4 ta' Ottubru 2022)

L-istati membri qablu dwar mandat għal negozjati mal-Parlament Ewropew dwar il-proposta għal regolament dwar is-sikurezza ġenerali tal-prodotti (GPSR).

Hekk kif għadd dejjem akbar ta' konsumaturi jixtru oġġetti u prodotti online, il-proposta GPSR timmodernizza r-regoli għas-swieq online u taġġornahom għan-negozji online.

Ir-regoli riveduti għas-sikurezza ġenerali tal-prodotti għandhom l-għan li jiżguraw li l-prodotti tal-era diġitali jilħqu l-istandards Ewropej tas-sikurezza.

• Regolament dwar is-sikurezza ġenerali tal-prodotti: il-Kunsill jadotta l-pożizzjoni tiegħu (stqarrija għall-istampa, 20 ta' Lulju 2022)
• Sigurtà tal-prodotti u sorveljanza tas-suq (informazzjoni ġenerali)

Il-Kunsill ta l-approvazzjoni finali tiegħu għal regoli ġodda għal settur diġitali ġust u kompetittiv permezz tal-Att dwar is-Swieq Diġitali (DMA).

Id-DMA joħloq kondizzjonijiet ekwi diġitali bi drittijiet u regoli ċari għall-pjattaformi online kbar ("gwardjani") biex jiżgura li ħadd minnhom ma jabbuża mill-pożizzjoni tiegħu.

Ir-regolamentazzjoni tas-suq diġitali fil-livell tal-UE ser tiżgura settur diġitali ġust u kompetittiv, sabiex il-kumpaniji u l-konsumaturi kollha jibbenefikaw minn opportunitajiet diġitali.

• Id-DMA: il-Kunsill jagħti l-approvazzjoni finali għal regoli ġodda għal kompetizzjoni ġusta online (stqarrija għall-istampa, 18 ta' Lulju 2022)

Il-Kunsill qabel dwar il-pożizzjoni tiegħu ("approċċ ġenerali") rigward ir-reviżjoni tad-direttiva dwar il-krediti għall-konsumatur.

Id-direttiva għandha l-għan li tippromwovi prattiki responsabbli u trasparenti tal-atturi kollha involuti fil-kreditu għall-konsumatur, pereżempju billi tiżgura li l-informazzjoni dwar il-krediti tiġi ppreżentata b'mod ċar u li jinftiehem, u tiġi adattata għall-apparat diġitali.

Il-mandat tal-Kunsill:

• jipproponi li ċerti prodotti jiġu esklużi mill-kamp ta' applikazzjoni (eż. il-finanzjament kollettiv dirett)
• jissuġġerixxi deroga parzjali fakultattiva minn ċerti dispożizzjonijiet għal xi wħud mill-prodotti ta' kreditu meqjusa inqas riskjużi
• jipproponi li jingħaqdu l-formoli ta' informazzjoni prekuntrattwali li għandhom jiġu ppreżentati lill-konsumaturi

• Protezzjoni tal-konsumaturi: il-Kunsill jadotta pożizzjoni tiegħu dwar regoli ġodda għall-krediti tal-konsumatur (stqarrija għall-istampa, 9 ta' Ġunju 2022)

Il-Kunsill approva l-estensjoni sal-2032 tal-iskema tar-roaming daqslikieku f'pajjiżek, li tippermetti lin-nies jagħmlu telefonati, jibagħtu messaġġi u jużaw l-internet mingħajr ħlas żejjed waqt li jkunu qed jivvjaġġaw f'pajjiżi oħra tal-UE.

Ir-regoli l-ġodda ser iżidu t-trasparenza għas-servizzi li jistgħu jkunu soġġetti għal spejjeż addizzjonali, u ser iħarsu wkoll lill-konsumaturi minn kontijiet għolja minħabba roaming involontarju fuq networks mobbli mhux fuq l-art waqt vjaġġ fuq vapur jew ajruplan.

• Il-Kunsill japprova l-estensjoni tas-sistema tar-roaming mingħajr tariffi addizzjonali (stqarrija għall-istampa, 4 ta' April 2022)
• Futur diġitali għall-Ewropa (informazzjoni ġenerali)

Il-Kumitat tar-Rappreżentanti Permanenti tal-Kunsill (Coreper) ta l-appoġġ tiegħu għall-ftehim politiku li ntlaħaq bejn il-Kunsill u n-negozjaturi tal-Parlament Ewropew dwar l-emendi għad-direttiva dwar l-assigurazzjoni ta' vetturi bil-mutur

Ir-regoli l-ġodda ser isaħħu l-protezzjoni tal-partijiet li jkunu ġarrbu l-ħsara f'inċidenti ta' vetturi bil-mutur u jtejbu d-drittijiet tad-detenturi tal-poloz.

• Direttiva dwar l-assigurazzjoni ta' vetturi bil-mutur: Il-Coreper japprova ftehim proviżorju (stqarrija għall-istampa, 28 ta' Ġunju 2021)

Il-Kunsill adotta l-pożizzjoni tiegħu fl-ewwel qari dwar ir-regolament propost li jistabbilixxi l-programm għas-suq uniku tal-UE għas-snin 2021 sal-2027.

L-għan ewlieni tal-programm huwa li ċ-ċittadini, il-konsumaturi, in-negozji u l-awtoritajiet pubbliċi madwar l-UE jkunu jistgħu jieħdu vantaġġ sħiħ mill-integrazzjoni tas-suq.

Għal dak il-għan, jippromwovi azzjonijiet li għandhom l-għan li:

• itejbu l-governanza u t-tħaddim tas-suq intern
• isaħħu l-kompetittività tal-intrapriżi tal-UE, b'mod partikolari intrapriżi mikro, żgħar u ta' daqs medju
• jippermettu l-iżvilupp ta' standards Ewropej ta' kwalità għolja
• iżidu l-protezzjoni tal-konsumatur
• itejbu s-saħħa tal-bniedem, tal-annimali u tal-pjanti, kif ukoll it-trattament xieraq tal-annimali

• Il-Kunsill jadotta pożizzjoni dwar il-programm għas-suq uniku ta' €4.2 biljun għall-2021-2027 (stqarrija għall-istampa, 16 ta' April 2021)
• Suq uniku tal-UE (informazzjoni ġenerali)

Il-Kunsill adotta sett ta' konklużjonijiet b'reazzjoni għall-komunikazzjoni tal-Kummissjoni dwar "Aġenda tal-Konsumatur Ġdida li ssaħħaħ ir-reżiljenza tal-konsumatur għall-irkupru sostenibbli", li tippreżenta viżjoni olistika għall-politika tal-UE għall-konsumatur għas-snin 2020 sa 2025.

Il-konklużjonijiet:

• għandhom l-għan li jipprovdu gwida politika
• jenfasizzaw il-ħtieġa li jiġi indirizzat it-tħassib tal-konsumaturi fit-tfassil tal-politiki settorjali tal-UE, bħal dawk marbuta mat-tranżizzjoni doppja ekoloġika u diġitali
• jirreferu għall-importanza tal-fiduċja tal-konsumatur biex jiġi stimulat l-irkupru ekonomiku wara l-kriżi tal-COVID-19

Il-Kunsill jilqa' l-intenzjoni tal-Kummissjoni li tindirizza kwistjonijiet bħal:

• id-"dritt għat-tiswija"
• protezzjoni tal-konsumatur online u offline
• sikurezza tal-prodotti
• il-prevenzjoni ta' dejn eċċessiv

• Aġenda tal-Konsumatur Ġdida: Il-Kunsill jadotta konklużjonijiet (stqarrija għall-istampa, 22 ta' Frar 2021)

Il-Kunsill adotta riforma tad-drittijiet tal-passiġġieri tal-ferrovija li ser issaħħaħ id-drittijiet tal-passiġġieri kollha, u b'mod partikolari dawk b'diżabbiltà jew b'mobbiltà mnaqqsa.

Id-dispożizzjonijiet aġġornati ser isaħħu r-regoli dwar rotot alternattivi u ser jagħmluha aktar faċli biex ittella' rota fuq ferrovija.

Ser jippromwovu wkoll l-użu ta' biljetti globali, li jtejjeb il-protezzjoni f'każ ta' konnessjonijiet mitlufa.

• Titjib fid-drittijiet tal-passiġġieri ferrovjarji adottati mill-Kunsill (stqarrija għall-istampa, 25 ta' Jannar 2021)

Wara l-qbil li ntlaħaq mal-Parlament Ewropew f'Ġunju 2020, il-Kunsill illum adotta l-pożizzjoni tiegħu fl-ewwel qari dwar abbozz ta' direttiva dwar azzjonijiet rappreżentattivi għall-protezzjoni tal-interessi kollettivi tal-konsumaturi.

Id-direttiva titlob lill-istati membri jdaħħlu fis-seħħ sistema ta' azzjonijiet rappreżentattivi għall-protezzjoni tal-interessi kollettivi tal-konsumaturi kontra l-ksur tad-dritt tal-Unjoni.

Din tkopri azzjonijiet kemm għal inġunzjonijiet kif ukoll għal miżuri ta' rimedju.

Id-direttiva ġiet proposta mill-Kummissjoni f'April 2018 bħala parti mill-pakkett ''Patt ġdid għall-konsumaturi'' tal-Kummissjoni, li għandu l-għan li jiżgura regoli ġusti u trasparenti għall-konsumaturi tal-UE.

• Rimedju kollettiv għall-konsumaturi: Il-Kunsill jadotta pożizzjoni fl-ewwel qari (stqarrija għall-istampa, 4 ta’ Novembru 2020)

Il-Kunsill adotta regolament b'regoli ġodda dwar it-tikkettar tat-tajers fir-rigward ta' parametri bħall-effiċjenza fl-użu tal-fjuwil, il-qabda fuq l-imxarrab u l-istorbju.

L-għan tar-regolament huwa li t-tikketti jsiru aktar viżibbli u li l-konsumaturi jingħataw aktar informazzjoni biex ikunu jistgħu jagħżlu tajers aktar sikuri, aktar effiċjenti fl-użu tal-fjuwil u li jagħmlu inqas storbju.

Ir-regolament għad irid jiġi adottat formalment mill-Parlament Ewropew.

Wara ftehim mal-Parlament Ewropew f'Marzu 2019, il-Kunsill adotta regolament dwar is-sikurezza ġenerali tal-vetturi bil-mutur u l-protezzjoni tal-okkupanti tal-vetturi u tal-utenti vulnerabbli tat-triq bil-għan li jitnaqqas b'mod sinifikanti l-għadd ta' inċidenti fit-toroq.

Skont ir-regoli l-ġodda, il-vetturi bil-mutur kollha (inkluż trakkijiet, karozzi tal-linja, vannijiet u vetturi utilitarji sportivi) ser ikollhom jiġu mgħammra bil-karatteristiċi ta' sikurezza li ġejjin:

• assistenza intelliġenti tal-veloċità
• faċilitazzjoni għall-istallazzjoni ta' interlock tal-alkoħol
• sistemi ta' twissija għall-ħedla u l-attenzjoni tas-sewwieq
• sistemi ta' twissija avvanzati kontra d-distrazzjoni tas-sewwieq
• sinjali ta' waqfien ta' emerġenza
• sistemi li jidentifikaw ir-rivers
• reġistraturi tad-data tal-avvenimenti
• monitoraġġ preċiż tal-pressjoni tat-tajers

• Karozzi aktar sikuri fl-UE (stqarrija għall-istampa, 8 ta' Novembru 2019)

Wara ftehim mal-Parlament Ewropew f'Marzu 2019, il-Kunsill adotta direttiva li timmodernizza d-dritt tal-Unjoni fil-qasam tal-protezzjoni tal-konsumaturi u tiffaċilita l-infurzar tad-drittijiet tal-konsumaturi.

Id-direttiva tiggarantixxi standards ogħla ta' protezzjoni għall-konsumaturi tal-UE meta jixtru prodotti jew servizzi online.

Tipprevedi wkoll miżuri aktar robusti kontra prattiki kummerċjali żleali jew qarrieqa fl-UE kollha.

Din id-direttiva hija parti mill-"Patt Ġdid għall-Konsumaturi", imniedi mill-Kummissjoni fl-2017.

• Il-protezzjoni tal-konsumaturi tal-UE ser tissaħħaħ (stqarrija għall-istampa, 8 ta' Novembru 2019)

Il-Kunsill adotta regolament li jsaħħaħ is-sorveljanza tas-suq sabiex jiżgura li l-prodotti introdotti fis-suq fl-UE jkunu sikuri u konformi mal-leġiżlazzjoni tal-UE.

Ir-regolament:

• jikkonsolida l-qafas eżistenti għal attivitajiet tas-sorveljanza tas-suq
• jindirizza l-isfidi tal-kummerċ elettroniku u l-kummerċ online internazzjonali
• iħeġġeġ azzjonijiet konġunti mill-awtoritajiet tas-sorveljanza tas-suq minn diversi stati membri
• jintroduċi fluss tax-xogħol għalkollox diġitali biex jittejjeb l-iskambju ta' informazzjoni bejn l-awtoritajiet u l-Kummissjoni
• joħloq qafas imsaħħaħ għall-kontrolli fuq prodotti li jidħlu fis-suq uniku u għal kooperazzjoni mtejba bejn l-awtoritajiet tas-sorveljanza tas-suq u l-awtoritajiet doganali

• L-UE tadotta regolament biex iżżomm prodotti perikolużi barra mis-suq intern (stqarrija għall-istampa, 14 ta' Ġunju 2019)

Il-Kunsill adotta regoli ġodda biex jagħmilha aktar faċli u sikur għall-konsumaturi biex jixtru u għall-kumpaniji biex ibiegħu kemm oġġetti kif ukoll kontenut diġitali b'mod transfruntier.

Id-direttiva dwar il-kontenut diġitali tipprevedi li:

• jekk ma jkunx possibbli li d-difetti jitranġaw fi żmien raġonevoli, il-konsumatur ikun intitolat għal tnaqqis fil-prezz jew għal rimborż sħiħ
• il-perjodu ta' garanzija ma jistax ikun iqsar minn sentejn

Id-direttiva dwar il-bejgħ tal-oġġetti tintroduċi:

• perjodu ta' garanzija minimu ta' sentejn
• perjodu ta' sena għall-inverżjoni tal-oneru tal-provi favur il-konsumatur

L-għan huwa li jiġi pprovdut livell għoli ta' protezzjoni u ċertezza legali għall-konsumaturi Ewropej, b'mod partikolari f'każ ta' xiri transfruntier kif ukoll biex isir aktar faċli għan-negozji, speċjalment l-SMEs, biex ibiegħu fl-UE kollha.

• L-UE tadotta regoli ġodda dwar il-kuntratti ta' bejgħ għal oġġetti u kontenut diġitali (stqarrija għall-istampa, 15 ta' April 2019)